1 Eri met, kedekedeo nan pahr kerieisek wenou en mwehin sounkopwung kan ong aramas en Nihpai kan, kilang, ahnsou me Mehn Leimen kan pwourda ni keieun menseng en tepin sounpwongo, kilang, re diarada me Amelekaia mehla nan sapwellime impwalo; oh re kilang me Dienkomw onopadahngehr mahweniong irail ni rahno.

2 Eri met, ahnsou me Mehn Leimen ko kilangadahr met re masepwehkada; oh re pweieksangehr arail koasoandi en kohdahla nan sahpw en paliepeng, oh irail pwurala nan kahnimw en Mulek, oh rapahki perehparail nan kelen kahnimwo.

3 Kedekedeo rien Amelekaia ohlo ahpw pilipilda en wiahla nanmwarki en aramas oko; oh ede iei Amoron; eri nanmwarki Amoron, rien nanmwarki Amelekaia, pilipildahr en uhd wiliandi wiahla nanmwaki.

4 Kedekedeo e ahpw mahsanihong nah aramas akan re en koledi kahnimw kan, me re kalowehdier sang ni ar kakerehdi nta; pwe neirail aramas tohto kamakamkihla kahnimw koaros me re kin kalohwehdi.

5 Oh met, Dienkom kilang me Mehn Leimen ko koasoanehdier me re pahn kolokol kahnimw kan me re kalowehdi, oh sahpw akan me re koledier; oh pwehki Dienkom eh kilang uwen ar tohto, e ahpw medewehda me e sohte konehng en song mahweniong irail nan ar kehl kan.

6 Ahpw nah ohl akan kapilpene wasao, duwehte me re kaukaunopohng mahwen; ei, a ni mehlel e kaukaunopadahng doare pein ih sang irail, a e wia met sang ni arail kaukauwada kehl kan oh kaukaunopada wasahn rukula kan.

7 Kedekedeo e ahpw wie kaukaunop ong mahwen lao lel ahnsou me Moronai kadarodo ohl tohto pwe re en kakehlakahla nah sounpei kan.

8 Oh Moronai pil kadaralahng Dienkom ilek ehu me e pahn kolokolete aramas selidi kan koaros me e koledier; pwe nin duwen Mehn Leimen ko ar salihedier kiden neirail aramas kan, e pahn pil koledi Mehn Leimen me selidi ko pwe en kak kawilialiki irail akan me Mehn Leimen ko koledi.

9 Oh e pil kadaralahng ilek ehu me e anahne kelehdi sahpw en Rahk, oh silehdi ahl tehtiko wasa me kohdahla nan sahpw en paliepeng, pwe Mehn Leimen ko de kalowehdi wasao oh ahneki manaman en kahpwalih irail ni pali koaros.

10 Oh Moronai pil kadarala reh, pekpeki en loalopwoatohng ahpwapwalih wasa pwuko, oh en wia uwen eh kak koaros en kaloke Mehn Leimen kan wasao ahnsou koaros, pwe e en kak pwurehng kalowehdi kahnimw kan me kohsang irail, sang ni koasoandi me pahn kapingirailda de wiepe teikan; oh me en pil kelepene oh kakehlakahla kahnimw kan me kapilpene, me sohte lohdi pahn manaman en Mehn Leimen.

11 Oh e pil ndaiong ih, I pahn kohwei rehmw, ahpw kilang, Mehn Leimen ko pil kohdohn peiong kiht ni irepen sahpw me mi limwahn sehd en palikapi; oh kilang, I pahn mahweniong irail, eri I sohte kak kohwei rehmw.

12 Met, nanmwarki (Amoron) ahpw ketketlahsang nan sahpw en Saraemla, oh ketin mahsanihong lih nanmwarkio duwen pwoulahn rie ohlo, oh kapokonepenehr kiden ohl kei, oh kolahng mahweniong Mehn Nihpai kan me mi ni irepen sahpwo limwahn sehd en palikapi.

13 Oh e nannantihong pwe en kahpwalih Mehn Nihpai ko, oh en kak pahnehla ekei neirail sounpei ko nan sahpwo, a ahnsowohte e ahpw kileleiong irail akan me mihmihte nan kahnimw kan me irail kalowehdi, me re pahn kahpwalih Mehn Nihpai ko nan sahpw me mi ni sehd en palimese, oh re en sapwenkihla sapwarail koaros ma re kak, nin duwen kehlail en neirail karis en sounpei kan.

14 Oh iei met irair keper me Mehn Nihpai kan mihmi loale ni imwiseklahn kerieisek weneu en sounpar en mwehin sounkopwung kan ong aramas en Nihpai kan.

15 Ahpw kilang, kedekedeo ni kerieisek isuh en sounpar en mwehin sounkopwung kan, Moronai ruwese Dienkom—en koasoanehdi sounpei kan pwe re en sile palieir oh palikapi en irepen sahpwo, e ahpw tepida karis kohla nan sahpw en Rahk, pwe nah ohl akan en kak sewese Dienkom kapwurehsang kahnimw kan me kohsang irail—

16 Kedekedeo Dienkom ahpw ale pakair en mahweniong kahnimw en Miulek, oh song kalowehdi ma e kak.

17 Kedekedeo Dienkom ahpw kaunopada pwe en mahweniong kahnimw en Mulek, oh e ahpw iang nah sounpei kan karis kolahng Mehn Leimen ko; ahpw e kilang me e pahn apwal en kak kaloweiraildi ma re pahn mihmihte nan kehl; eri e ahpw pweieksang eh koasoandio oh pwurala nan kahnimw en Rahk, pwe en awih Moronai eh pahn kohdo, pwe en kak kakehlakahla nah sounpei kan.

18 Kedekedeo Moronai oh nah sounpei kan ahpw lella reh nan sahpw en Rahk, ni imwin pahr kerieisek isuh en mwehin sounkopwung kan ong aramas en Nihpai kan.

19 Oh ni tepin kerieisek waluhn sounparo, Moronai oh Dienkom oh kaun lapalap en sounpei tohto ahpw wie lamalamki mahwen—dahme re pahn wia pwe en kahrehiong Mehn Leimen ko en kohieido mahweniong irail; de mehkot me pahn pitihiraildi en pedoisang nan arail kehl kehlail kan, pwe re en kak poweiraildi oh kapwurehsang kahnimw en Mulek.

20 Kedekedeo irail ahpw kadaralahng karis en Mehn Leimen ko, me kin sinsile kahnimw en Mulek, meninkeder kei ong arail kauno, me kahdaneki Seikop, oh peki reh en pedoido iangahki nah sounpei kan pwe irail en tuhpene wasa patapat kis nanpwungen kahnimw riauo. Ahpw kilang, Seikop, Mehn Soram, sohte men kahluwaiei nah sounpei kan pwe irail en tuhpene wasa patapato.

21 Kedekedeo Moronai, pwehki e sohte koapworopworki me irail pahn kak tuhpene wasa kis me pahn pahrek ong irail koaros, eri, e koasoanehdi koasoandi ehu pwe en kak pitihedi Mehn Leimen ko en pedoisang nan kahnimwo.

22 Eri e ahpw koasoanehdi me Dienkom pahn kahluwa ekei sounpei oh kohdihla ni oaroahro; oh nihpwong, Moronai oh nah sounpei kan pahn kohla nan sapwtehno ni palikapi en kahnimw en Mulek; oh mandahn rahno, ahnsou me sounsilasil en Mehn Leimen ko kilangada Dienkom, irail ahpw tangala oh pakairkihong Seikop, arail kauno.

23 Kedekedeo karis en Mehn Leimen ko ahpw kohieilahng Dienkom, oh uwen arail tohto re kihkihong me re pahn powehdi Dienkom pwehki nah sounpei ko me malaulau. A ni ahnsou me Dienkom kilangada karis en Mehn Leimen ko kohkodohn peiong irail e ahpw pweiekla oh tangalahng ni oaroahr me mi ni paliepeng.

24 Kedekedeo ahnsou me Mehn Leimen ko kilangada me e tepida tang, re nan kapehd kehlailda oh wia uwen arail kak en pwakih irail. Oh ahnsou me Dienkom wie kakahluwahsang Mehn Leimen ko me pwakipwakih irail ni sohte katepe, kilang, Moronai ruwesehiong ekei nah sounpei ko me iangih, me re pahn kohlongala nan kahnimwo, oh kalowehdi.

25 Eri ih me re wia, oh re kemehla irail koaros me mihmihte pwe en sile kahnimwo, ei, irail koaros me sohte men pwilikihdi neirail dipwisou en mahwen kan.

26 Eri Moronai kalowehkihdier kahnimw en Mulek ekei nah sounpei ko, nindokon ih oh me luhwe ko karis kohla pwe re en tuhwong Mehn Leimen ko ahnsou me re pahn pwurasang ar pwakih Dienkom.

27 Kedekedeo Mehn Leimen ko pwakih Dienkom lao re karanih kahnimw en Rahk, oh re tuhwong Lihai oh sounpei kei, me mihmihte pwe re en sinsile kahnimw en Rahk.

28 Oh met kilang, ni ahnsou me kaun lapalap en sounpei en Mehn Leimen ko kilangada me Lihai iangahki nah sounpei ko kohkohdohn mahweniong irail, re tangdoaui ni ar pingida, pwe Lihai e de koanoairaildi mwohn ar pahn lellahng kahnimw en Mulek; pwe re pwangada pwehki ar pwakpwakih irail, oh nein Lihai ohl akan kehlail.

29 Met Mehn Leimen ko sohte ese me Moronai oh nah sounpei ko mi mwurirail; oh ihte me irail masak Lihai oh nah ohl akan.

30 Met Lihai sohte men koliraildi lao re tuhwong Moronai oh nah sounpei ko.

31 Kedekedeo mwohn Mehn Leimen kan ar pahn kak pwurala wasa doh Mehn Nihpai kan kapilirailpenehr, nein Moronai ohl akan mi apali, oh nein Lihai ohl akan mi ni pali teio, irail koaros me roson oh kehlail; ahpw Mehn Leimen ko luwetalahr pwehki ar alialu reirei.

32 Oh Moronai ndaiong nah ohl akan me irail pahn peiong irail lao re pwilikihdi neirail dipwisou en mahwen kan.

33 Kedekedeo Seikop, pwehki eh wia arail kaun, oh pwehki ih Mehn Soram, oh pwehki eh inenen keptakai, lapalahn pei ehu ahpw wiawi ni e kahrehiong Mehn Leimen ko en mahweniong Moronai.

34 Pwehki Moronai eh perehla wasa me re pahn keid ie, eri Seikop koasoanehdi me e pahn kemeirailla oh douluhllahng kahnimw en Mulek. Ahpw kilang, Moronai oh nah sounpei kan kehlailsang irail; eri re sohte lohdiong pahn Mehn Leimen ko.

35 Kedekedeo peio ahpw inenen mwuledek nan pali koaros; oh tohto sang nan pali riauo mehla; ei, oh Moronai ohla oh Seikop kamakamala.

36 Oh pwehki Lihai oh nah sounpei kehlail ko ar peiong irail sang mwuri me nohn uk, kahrehda Mehn Leimen kan me mi mwurio pwilikihdi neirail dipwisou en mahwen kan; oh irail me luhwe ko, pwehki ar pingida, re sohte ese wasa re pahn kohla ia de wasa re pahn pei.

37 Met pwehki Moronai eh kilang me re pingidahr, e ahpw ndaiong irail: Ma kumwail pahn wahdo noumwail dipwisou en mahwen kan oh pwilikihdi, kilang se pahn tokedihsang at kakerehdi ntahmwail.

38 Kedekedeo ahnsou me Mehn Leimen kan rongehr lokaia pwukat, arail kaun lapalap en sounpei kan, irail koaros me sohte kamakamala, kohdo oh pwilikihdi neirail dipwisou en mahwen kan ni nehn Moronai, oh ndaiong neirail sounpei kan re en pil wia soahngohte.

39 Ahpw kilang, me tohto rehrail me kahng; oh irail akan me sohte men pwilikihdi neirail kedlahs kan kolkoldi oh pirapirdi, oh neirail dipwisou en mahwen kan pehdsang irail, oh re idihdiong en iang riarail ko alu kohla nan sahpw en Rahk.

40 Oh met uwen irail tohto me re salihedi tohtohsang irail me kamakamala, ei, tohtohsang irail akan me kamakamala ni pali koaros.