1 Tan-awa, karon natabo ini nga sa wala madugay pagkatapos nga napadala ni Moroni ang iya sulat sa puno nga gobernador, nakabaton sia sing isa ka sulat halin kay Pahoran, ang puno nga gobernador. Kag amo ini ang mga pulong nga iya nabaton:

2 Ako, si Pahoran, nga amo ang puno nga gobernador sini nga duta, nagapadala sining mga pulong kay Moroni, ang puno nga kapitan sa kasoldadohan. Tan-awa, ginasiling ko sa imo, Moroni, nga wala ako nagakalipay sa inyo tuman nga mga pag-antos, huo, ginakasubo ini sang akon kalag.

3 Apang tan-awa, may yara sinang nagakalipay sa inyo mga pag-antos, huo, sa bagay nga nag-alsa sila sa pagrebelde batok sa akon, kag amo man sa sinang akon katawhan nga mga maki-kahilwayan, huo, kag ang mga nag-alsa tuman kadamo.

4 Kag yadtong mga naghangad nga kuhaon ang hukom-lingkuranan sa akon ang nangin kabangdanan sining tuman nga kalainan; kay naggamit sila sang tuman nga pagpanginto, kag nadala nila palayo ang mga tagipusuon sang madamo nga katawhan, nga mangin kabangdanan sang tuman nga pag-antos naton; ginpunggan nila ang pagpadala sang aton mga panigana, kag ginpahog ang aton mga maki-kahilwayan sa bagay nga wala sila nakakadto sa inyo.

5 Kag tan-awa, gintabog nila ako sa ila atubang, kag nagpalagyo ako padulong sa duta sang Gideon upod ang tanan nga tinawo nga mahimo ko nga makuha.

6 Kag tan-awa, nagpadala ako sang pabantala sa tanan sini nga bahin sang duta; kag tan-awa, nagapanong sila sa amon adlaw-adlaw, sa ila mga armas, sa pagpangapin sang ila pungsod kag sang ila kahilwayan, kag agud itimalus ang mga malain nga ginhimo sa amon.

7 Kag nagkadto sila sa amon, sa bagay nga yadtong mga nag-alsa sa pagrebelde batok sa amon nabatuan, huo, sa bagay nga nagakahadlok sila sa amon kag wala nangisog sa pagsalakay batok sa amon.

8 Naagaw nila ang duta, ukon ang siyudad, sang Zarahemla; nagpili sila sing isa ka hari sa ila, kag nagsulat sia sa hari sang mga Lamanhon, nga sa diin nagbuylog sia sa isa ka alyansa upod sa iya; nga sa sini nga pagpakig-alyansa nagpasugot sia nga dumalahan ang siyudad sang Zarahemla, nga sa sini nga pagdumala ginahunahuna niya nga masarangan na sang mga Lamanhon nga sakopon ang nabilin sang duta, kag sia ang igabutang nga hari sa sini nga katawhan kon masakop sila sa idalom sang mga Lamanhon.

9 Kag karon, sa imo sulat ginpakalain mo ako, apang indi ini importante; wala ako naakig, kundi nga nagakasadya sa kadako sang imo tagipusuon. Ako, si Pahoran, wala nagahangad sang gahum, luwas lamang sa pagkapot liwat sang akon hukom-lingkuranan agud nga maamligan ko ang mga kinamatarong kag ang kahilwayan sang akon katawhan. Ang akon kalag nagapabilin nga malig-on sa sinang kahilwayan kon sa diin nahilway kita sang Dios.

10 Kag karon, tan-awa, batuan naton ang kalainan bisan tubtob sa pagpaagay sang dugo. Indi kita magpaagay sang dugo sang mga Lamanhon kon magpabilin sila sa ila kaugalingon nga duta.

11 Indi kita magpaagay sang dugo sang aton mga kauturan kon indi sila mag-alsa sa pagrebelde kag magkapot sang espada batok sa aton.

12 Ipaidalom naton ang aton mga kaugalingon sa gota sang pagkaulipon kon kinahanglanon ini sa hustisya sang Dios, ukon kon suguon niya kita nga himuon ini.

13 Apang tan-awa wala sia nagasugo sa aton nga ipaidalom naton ang aton mga kaugalingon sa aton mga kaaway, kundi nga dapat naton ibutang ang aton pagsalig sa iya, kag luwason niya kita.

14 Gani, pinalangga kong utod nga Moroni, batuan naton ang kalainan, kag kon ano man nga malain nga indi naton mabatuan paagi sa aton mga pulong, huo, pareho sang mga pagrebelde kag mga pag-ilinaway, batuan naton ini paagi sa aton mga espada, agud nga mapapabilin naton ang aton kahilwayan, agud nga magkasadya kita sa dako nga pribilihiyo sang aton simbahan, kag sa kawsa sang aton Manunubos kag aton Dios.

15 Gani, magkadto ka sa akon sing madasig upod ang pila sang imo mga tinawo, kag biyai ang nabilin sa idalom sang pagpanguna nanday Lehi kag Teancum; hatagi sila sing gahum sa pagpadayon sang giyera sa sina nga bahin sang duta, suno sa Espiritu sang Dios, nga amo man ang espiritu sang kahilwayan nga yara sa ila.

16 Tan-awa nagpadala na ako sing pila ka mga panigana sa ila agud nga indi sila magkalamatay tubtob nga makakadto kamo sa akon.

17 Panipona ang kon ano man nga puwersa nga inyo masarangan sa inyo paglakat padulong diri, kag magasalakay kita sing madasig batok sinang mga nagsilipak, sa kusog sang aton Dios suno sa pagtuo nga yari sa aton.

18 Kag agawon naton ang siyudad sang Zarahemla agud nga makaangkon kita sing dugang nga pagkaon nga ipadala kanday Lehi kag Teancum; huo, magasulong kita batok sa ila sa kusog sang Ginuo, kag tapuson naton ining tuman nga kalainan.

19 Kag karon, Moroni, nagakalipay ako sa pagbaton sang imo sulat, kay nagakabalaka ako parte sa kon ano ang dapat naton nga himuon, kon bala mangin matarong para sa aton ang magsalakay batok sa aton mga kauturan.

20 Apang nagsiling ka, luwas lang nga maghinulsol sila ang Ginuo nagsugo sa imo nga magsalakay ka batok sa ila.

21 Pat-ura nga mapabakod mo sanday Lehi kag Teancum sa Ginuo; hambali sila nga indi magkahadlok, kay ang Dios magaluwas sa ila, huo, kag ang tanan man nga nagapabilin nga malig-on sa sinang kahilwayan kon sa diin nahilway sila sang Dios. Kag karon ginatapos ko ang akon sulat sa akon pinalangga nga utod nga si Moroni.