1 Ao ngkai e koro bukina bwa ngke Moronaai e a tia ni karekea te reta aio ao e a karekea ninikorian nanona, ao e a onrake n te kimwareirei ae rianako ibukin kakaonimakin Bwaoraan, ao bon tiaki te ^atia kamwane ni kaineti ma inaomatan ao waakin abana.

2 Ma e bon korakora naba ngurengurena ibukin buakakaia ake a tia ni kakioa Bwaoraan ma n te kaintekateka ni motikitaeka, eng, ni kakimototoa ibukiia naake a tia n totoko ni kaitaraa abaia ma Atuaia naba.

3 Ao e koro bukina bwa Moronaai e kairia ana koraki tabeman, n aron nanon Bwaoraan, man angan Riaai ma Teaenikam bwa a na taraa nikiraia ana taanga ni buaka, ma ni mwananga nakon te aba are Kiteon.

4 Ao e bon katea te ^aburaeki n ^binaomata, n taabo nako ake e roko iai, ma ni karekea te taanga ni buaka are e kona ni karekea i nanon mwanangana nakon te aba are Kiteon.

5 Ao e koro bukina bwa ngaa ma ngaa ake bwarikoriko nakon ana buraeki, man tabeki aia kabaang bwa a na tei ibukin inaomataia, bwa aonga n aki reke n te tautoronaki.

6 Ao ngaia are, Moronaai e a ikotiia mwaane nako are e kona ni karekeia i nanon mwanangana ni kabane, e roko nakon te aba are Kiteon; man ikotiia ana taanga ni buaka ma ana taanga Bwaoraan ao e a korakora matoatoaia, a bon matoatoa riki nakoia ana koraki Bwaakati, are aia ^auea taan biri nako ake a kakioia ^baomata ake a inaomata man te aba are Taraemera man tia n taua te aba.

7 Ao e koro bukina bwa Moronaai ma Bwaoraan a ruorikaaki ma aia taanga ni buaka nakon te aba are Taraemera, man nako ni kaitaraa te kaawa, ao a bon kaitibo ma ana koraki Bwaakati ao a bon buaka.

8 Ao nooria, Bwaakati e a bon tiringaki ao a kairaki ana koraki bwa bure, ao Bwaoraan e a kaokaki nakon ana kaintekateka ni motiki taeka.

9 Ao ana koraki Bwaakati a bon kabowiaki, n aron tuan te aba, ao ana aomata te uea naba ake a tia n anaaki man teweaki nako nanon te nne ni kaikain; ao a ^atiringaki n aron te tua; eng, ana koraki Bwaakati ao ana aomata te uea, are a rawa n tabeki bwaai ni buaka n tei ibukin abaia, ma ana buaka ni kaitaraa, a bon tiringaki.

10 Ao ngaia are e bon riai bwa e na kamatoaki kawakinan te tua aio ibukin maurin abaia; eng, ao are e kuneaki ni kaakea inaomatana e a bon waekoa naba n tiringaki n aron te tua.

11 Ao ngaia are e a toki aia katenibwi n ririki n tautaeka taan moti i aoia ana botanaomata Nibwaai; Moronaai ma Bwaoraan a tia ni kaoka te rau nakon te aba are Taraemera, i buakoia oin aia botanaomata man tia ni karokoa te mate i aoia ni kabane ake aki taua raoi te waaki n inaomata.

12 Ao e koro bukina bwa ni moan waakin aia katenibwi ma teuana n ririki n tautaeka taan moti i aoia ana botanaomata Nibwaai, Moronaai e kawaekoa n te tai naba arei ni karekea te anga bwa a na kanakoaki bwaai ake a kainnanoaki, ao te taanga naba ni buaka ae onoua te ngaa mwaane kaaina bwa a na kanakoaki nakon Ereman, bwa a na buokiia ni kawakina mwakoron te aba anne.

13 Ao e karekea naba te anga bwa te taanga ni buaka ae kaaina ono ngaa mwaane, ma te amwarake ae tau, bwa a riai ni kanakoaki nakon Riaai ma Teaenikam. Ao e koro bukina bwa e bon karaoaki aio bwa e na kamatoatoaki te aba ni kaaitaraia Reimwanaite.

14 Ao e koro bukina bwa Moronaai ma Bwaoraan, ngke a tia ni katuka te koraki ae mwaiti n te aba are Taraemera, a mwananga ma te koraki ae mwaiti nakon te aba are Nibwaaia, man nanomatoa bwa a na kabwakaia Reimwanaite ake n te kaawa anne.

15 Ao e koro bukina bwa ngke a mwananga nakon te aba, a kairia aia koraki Reimwanaite mangaia man tirigiia aika a mwaiti, man anai aia bwai ake a kainnanoi ma aia bwai ni buaka.

16 Ao e koro bukina bwa i mwin are a tia n anaia, a tua bwa a na karaoa te berita ae tabu bwa a na manga aki oki n tabeki aia bwai ni buaka ni kaaitaraia Nibwaite.

17 Ao ngke a tia ni karaoa te berita ae tabu aio a kanakoia bwa a maeka i buakoia ana botanaomata Amon, ao mwaitia ake aki tiringaki tao aua te nga.

18 Ao e koro bukina bwa ngke a tia ni kanakoia a waakina mwanangaia nakon te aba are Nibwaaia. Ao e koro bukina bwa ngke a roko n te kaawa are Nibwaaia, a bon katei umwaianrianna n taabo aika a aoraoi i Nibwaaia, are e bon kaan ma te kaawa are Nibwaaia.

19 Ngkai Moronaai e bon tangiria bwa a na roko Reimwanaite ni buaka ni kaaitaraia, n taabo ake a aoraoi; ma Reimwanaite a bon ataa rianakon korakoran ninikoriaia, ao ngke a noora mwaitia, ngaia are a rawa n roko ni buaka n te bong arei.

20 Ao ngke e a roko n te tairiki, Moronaai e mwananga i nanon rootongitongin te bong, man roko i taubukin te oo bwa e na kareke rongorongo bwa engaa mwakoron te kaawa ae a matu iai Reimwanaite ma aia taanga ni buaka.

21 Ao e koro bukina bwa a mena i mainiku, i rarikin te tabo n rin; ao a bane ni matu. Ao ngkai Moronaai e oki nakon ana taanga ni buaka, ma n tua bwa a na katauraoi n te tai ae waekoa taian kora ma kaai n tamwarake, bwa a na karuoaki ma itaubukin te oo nakon mwakoron te oo are i nanona.

22 Ao e koro bukina bwa Moronaai e tua bwa ana koraki a na mwananga ma n nako taubukin te oo, man ruo nakon mwakoron te kaawa anne, eng, ao i maeao naba, are aki matu iai Reimwanaite ma aia taanga ni buaka.

23 Ao e koro bukina bwa a bane ni karuoaki nakon te kaawa n te bong, n aia kora ake a mamatoa ma aia kai n tamwarake; ngaia are ngke e a ingabong a bon bane ni mena i nanon oon te kaawa.

24 Ao ngkai, ngke a uti Reimwanaite man nooria bwa ana taanga ni buaka Moronaai a mena i nanon te oo, a bon korakora maakuia, n te aro are a bon biri nako tinaniku man te tabo n rin.

25 Ao ngkai Moronaai ngke e nooria bwa a bon biri nako mai matana, e bon tua bwa ana koraki a na mwananga ni kaaitaraia man tiringia aika a mwaiti, man otabwaninia tabemwaang, ma ni kairia bwa bure; ao nikiraia a biri nako nakon te aba are Moronaai, are e mena n te tia i rarikin taari.

26 Ngaia are Bwaoraan ma Moronaai a karekea tauan te kaawa are Nibwaaia n akea temanna mai i buakoia ae bua; ao a bon mwaiti Reimwanaite ake a tiringaki.

27 Ngkai e koro bukina bwa a mwaiti Reimwanaite ake bure ae a tangiria bwa a na ikotaki ma ana ^abotanaomata Amon man riki bwa aomata aika a inaomata.

28 Ao e koro bukina bwa mwaitia ake a tangira aei, a bon anganaki n aron are a tangiria.

29 Ngaia are, ni kabane aia bure Reimwanaite a bon ikotaki ma ana botanaomata Amon, ma ni waaki ni mwakuri ni kakorakoraia, ni mwakuria te tano, n uniki aekan nako taian kai n amwarake, ma nanai ni man n aekaia nako; ao a beebete Nibwaite man te rawawata ae korakora; eng, n te aro are a bon aki tabetabe irouia aia bure ni kabane Reimwanaite.

30 Ngkai e koro bukina bwa Moronaai, ngke e a tia ni karekea tauan te kaawa are Nibwaaia, man tia ni kairia nako bure aika a mwaiti, are e bon kakorakora kerikakin mwaitia aia taanga ni buaka Reimwanaite, man tia ni manga kaokia Nibwaite aika a mwaiti ake a bon tia n anaaki bwa bure, are e a bon riki bwa kakorakoraia ana taanga ni buaka Moronaai; ngaia are Moronaai e a mwananga nako man te aba are Nibwaaia nakon te aba are Riaai.

31 Ao e koro bukina bwa ngke Reimwanaite a noora Moronaai bwa e roko ni kaaitaraia, a bon maaku riki ma ni biri nako mai matan ana taanga ni buaka Moronaai.

32 Ao e koro bukina bwa Moronaai ma ana taanga ni buaka a bon kakioia man te kaawa ae bubura teuana nakon te kaawa ae bubura teuana, ni karokoa ae a kaitiboaki ma Riaai ao Teaenikam; ao Reimwanaite a biri nako mai irouia Riaai ma Teaenikam, n nakon te tia i rarikin taari, ni karokoa ae a roko n te aba are Moronaai.

33 Ao aia taanga ni buaka Reimwanaite a bon ikotaki, n te aro are a mena n te rabwata ae ti teuana te aba are Moronaai. Ngkai Amoron, are aia uea Reimwanaite e mena naba i rarikiia.

34 Ao e koro bukina bwa Moronaai ma Riaai ao Teaenikam a bon tiku ma aia taanga ni buaka n otabwaninia tian te aba are Moronaai, n te aro are a otabwaniniaki n te tia i rarikin te rereua i maiaki, ao n te tia i rarikin te rereua i mainiku.

35 Ao ngaia are a tiku ni matu n te tairiki anne. Bwa nooria, Nibwaite ma Reimwanaite a bon kua ibukin ananaun mwanangaia; ngaia are a bon aki iangoa te kamwane n te tairiki, ma ti Teaenikam bwa e korakora unna iroun Amoron, n te aro are e taku bwa Amoron ma Amarakaai are tarina, a ^akarika te buaka ae korakora ma n tei maan aio i marenaia ma Reimwanaite, are e karika te buaka ae korakora ao kawawaean te raraa, eng, ao te rongo ae korakora.

36 Ao e koro bukina bwa ibukin unna ao Teaenikam e mwananga nako nakon aia tabo Reimwanaite, ma n ruorikaaki riaon te oo nakon te kaawa. Ao e mwananga ma te kora man te tabo teuana nakon te tabo teuana, n te aro are e a kunea te uea; ao e ^akareia n te kai ni kare, are e a bon ewaraki iai rarikin buroona. Ma nooria, e kautia ana toro te uea i mwaain matena, n te aro are a bon kakioa Teaenikam, man tiringnga.

37 Ngkai e koro bukina bwa ngke Riaai ma Moronaai a ataia bwa e a mate Teaenikam e a bon korakora nanokawakia; bwa nooria, bon te mwaane are e a tia ni buaka ma te ninikoria ibukin abana, eng, te rao ni koaua ibukin te kainaomataki; ao e a tia ni kainnano n taian karawawataki aika a korakora. Ma nooria, e a mate, ma n tia n iranako kawain te aonaba ni kabane.

38 Ao ngkanne e koro bukina bwa Moronaai e mwananga ngke e a ingabong, ma n roko irouia Reimwanaite, n te aro are e a bon tiringia n te tiritiri ae moan te korakora; ao a bon kakioia ni kaotinakoia man te aba; ao a bon biri nako, ao a bon aki manga oki n te tai anne ni kaaitaraia Nibwaite.

39 Ao ngaia are e a toki aia katenibwi ma teuana n ririki n tautaeka taan moti i aoia ana botanaomata Nibwaai; ao are a tia n rinanon te bubuaka, ma kawawaean te raraa, ma te rongo, ma te karawawataki, i nanon te maan ae ririki aika a mwaiti.

40 Ao e a tia n iai taian tiritiri, ma itabaraara, ma kakauntaeka, ma aekan taian buakaka nako i buakoia te botanaomata are Nibwaai; ma e ngae n anne ibukin te ^araoiroi, eng, ibukin aia tataro aika a raraoi, ao a bon kamaiuaki.

41 Ma nooria, ibukin korakoran abwabwakin te buaka i marenaia Nibwaite ma Reimwanaite a mwaiti ake a kamatoatoaia, ibukin ananaun te buaka; ao a mwaiti ake a maraurau nanoia ibukin ^akarawawatakia, n te aro are e kananorinanoia i matan te Atua, n nakon are te kabanea n rinano.

42 Ao e koro bukina bwa i mwin are Moronaai e a tia ni kamatoatoai mwakoron te aba are a rang teretere riki nakoia Reimwanaite, ni karokoa ae bon tau matoatoaia, e oki nakon te kaawa are Taraemera; ao Ereman e oki nakon ana tabo ni bwaibwai; ao e a manga kamatoaki riki te rau i buakoia ana botanaomata Nibwaai.

43 Ao Moronaai e anga te mwioko ibukin kairakia ana taanga ni buaka nako nanon bain natina are Moronaaia; ao e kerikaaki nakon oin batana bwa e na kabanea nikiran ana bong i nanon te rau.

44 Ao Bwaoraan e oki nakon ana kaintekateka ni motikitaeka; ao Ereman e a manga katokaa riki iaona te mwioko bwa e na manga kabwarabwara nakoia te botanaomata ana taeka te Atua; bwa ibukina bwa e a rang korakora te bubuaka ma te itabaraara e bon riai bwa e na karaoaki riki te tua i nanon te ekaretia.

45 Ngaia are, Ereman ma tarina a mwananga, ma n taekina ana taeka te Atua ma te mwaaka ma ni ^akakoauaki irouia aomata aika a mwaiti, are e karika rairakin nanoia man aia bure ma ni bwabetitoaki nakon te Uea ae Atuaia.

46 Ao e koro bukina bwa a manga katea riki ana ekaretia te Atua, ni kabuta te aba.

47 Eng, a karaoaki kaetieti ni kaineti ma te tua. Ao a rineaki aia ^ataan moti, ma mataniwia taan moti.

48 Ao te botanaomata are Nibwaai a moanna n ^ariki rake n te aba, ma ni moanna n riki rake mwaitia, ma ni manga korakora matoatoaia riki n te aba. Ao a bon riki rake ni korakora kaubwaia.

49 Ma e ngae ngke a kaubwai, ke a korakora, ke a nakoraoi aroia, a bon aki tabekaki rake ibukin kainikatongan aia taratara; ao aki naba iremwe n uringa te Uea ae Atuaia; ma a bon korakora nanorinanoia i matana

50 Eng, a bon uringi bwaai ake a korakora are e a tia te Uea ni karaoi ibukiia, are e a tia ni kamaiuia man te mate, ao man te kabaeaki, ao man te nne ni kaikain, ao man aekan karawawata n aekaia nako, ao e kainaomataia mai nanon baia aia kairiribai.

51 Ao a bon tataro nakon te Uea ae Atuaia n aki toki, n te aro are te Uea e bon kakabwaiaia, n aron ana taeka, n te aro are a bon matoatoa ma n nakoraoi aroia n te aba.

52 Ao e koro bukina bwa a bane n tia bwaai aikai ni kabane. Ao Ereman e mate, n aia katenibwi ma nimaua n ririki n tautaeka taan moti i aoia ana botanaomata Nibwaai.