1 Ao ngkanne e koro bukina bwa ngke a tia Reimwanaite n nako ni buakaniia Nibwaite a kunea, i mwin kainnanoia ni kataia n tiringia, bwa e matebuaka tiringakia, a oki nakon te aba are Nibwaai.

2 Ao e koro bukina bwa e korakora uniia Amwarakaite ibukin konakiia. Ao ngke a nooria bwa aki kona ni kataea kaia mai irouia Nibwaite, ao a kaunia nanoia aomata bwa a na un nakoia ^atariia, ake kaain ^bAentaai-Nibwaai-Riaai; ngaia are a waaki riki ni manga tiringia.

3 Ao ngkanne aomata aikai a rawa riki ni ^amanga tabeki aia bwai ni buaka, ao a kariaia bwa a na tiringaki n aron are a tangiria aia kairiribai.

4 Ao ngkanne ngke Amon ma tarina a noora te mwakuri n tiritiri aio i buakoia ake a bon tangiriia, ao i buakoia ake a tangiraki irouia—bwa a tararuaki n aekaia anera ake a kanakoaki mai iroun te Atua bwa a na kamaiuia man te tiringaki ae aki totoki—ngaia are, Amon ma tarina ngke a noora te mwakuri n tiritiri aio, ao a bon rotaki n te nanoanga, ao a ^ataku nakon te uea:

5 Ti na ikotiia ana aomata te uea, ao ti na nako rikaaki nakon te aba are Taraemera nakoia tarira ake Nibwaite, ma ni birinako mai nanon baia ara kairiribai, bwa ti na aki tiringaki.

6 Ma te uea e taku nakoina: Nooria, a na tiringira Nibwaite, ibukin korakoran te tiritiri ao te bure ake ti a tia ni karaoi nakoia.

7 Ao Amon e taku: N na nako n ukoria mai iroun te Uea, ao ngkana e taku nakoira, nako rikaaki nakoia tarimi, kam na nako?

8 Ao te uea e taku nakoina: Eng, ngkana te Uea e taku nakoira nako, ao ti na nako rikaaki nakoia tarira, ao ti na riki bwa aia toro ni karokoa ae ti a tia ni kabooa mwiin korakoran te tiritiri ma te bure are ti karaoi nakoia.

9 Ma Amon e taku nakoina: E tabuaki n aia tua tarira, are e kateaki iroun tamau, bwa e na iai te ^atoro i buakoia; ngaia are ti na nako rikaaki man onimakina aia nanoanga tarira.

10 Ma te uea e taku nakoina: Ukoria mai iroun te Uea, ao ngkana e taku nakoira nako, ao ti na nako, mwiina ti na mate n te aba aei.

11 Ao e koro bukina bwa Amon e nakon n ukoria mai iroun te Uea, ao e taku te Uea nakoina:

12 Kairia te botanaomata aio man te aba aio, bwa ana aki mate; bwa e korakora a na tautau Tatan iaon nanoia Amwarakaite, are a kauerakea nanoia Reimwanaite bwa a na un nakoia tariia bwa a na tiringia; ngaia are otinako man te aba aio; ao a na kakabwaiaki te botanaomata aio n te roro aei bwa N na kawakinia.

13 Ao ngkanne e koro bukina bwa Amon e nako n tuanga te uea taeka ni kabane are e taku te Uea nakoina.

14 Ao a ikotiia ni kabane aia aomata, eng, ana aomata te Uea ni kabane, man ikotiia aia nanai ma aia boota ni man, ma ni kitana te aba, ao a roko n te rereua are e bwenaua te aba are Nibwaai man te aba are Taraemera, man roko i rarikin tian te aba.

15 Ao e koro bukina bwa Amon e taku nakoia: Nooria, Ngai ma tariu ti na nakon te aba are Taraemera ao kam na tiku ikai ni karokoa okira; bwa ti na kata nanoia tarira, bwa a kariaia ke aki bwa kam na roko i abaia.

16 Ao e koro bukina bwa ngke e mwananga Amon nakon te aba, ao ngaia ma tarina a kaitibo ma Aramwa, n te ^atabo are e a tia n taekinaki; ao nooria, bon moan te kakukurei te kaitibo aio.

17 Ao ngkanne ^akukurein Amon e bon rang korakora n te aro ae e a onrake; eng, e a kabwautaki ni kimwareirein Atuana, n te aro are e a ^bbane korakorana; ao e ^cbwaka nako aontano.

18 Ao ngkanne tiaki aei te kimwareirei ae rianako? Nooria, bon aio te kimwareirei are akea ae kona ni karekea ma ti naake a bon rairaki raoi man nanorinano n ukoukora te kukurei.

19 Ao ngkanne kukurein Aramwa ngke e kaitibo ma tarina e bon rang korakora, ao kimwareirein naba Aaron, ma Aomna, ao Imnaai; ma nooria kukureia e aki korakora riki nakon korakoraia.

20 Ao e koro bukina bwa Aramwa e kairia tarina n oki nakon te aba are Taraemera; ao n nakon naba oin batana; Ao a nako n tuanga ^amataniwia taan moti bwaai ni kabane ake a tia n riki nakoia n te aba are Nibwaai, i buakoia tariia, ake Reimwanaite.

21 Ao e koro bukina bwa mataniwia taan moti e kanakoa te katanoata ni kabuta te aba, ni kan ataa nanoia aomata ibukin karinakia tariia, ake kaain Aentaai-Nibwaai-Riaai.

22 Ao e koro bukina bwa e roko bwanaia aomata, ni kangai: Nooria, ti na aanga te aba are Ietion, are e mena i mainiku i rarikin taari, are e toma ma te Aba ni mari, are e mena i meangin te Aba ni mari; ao te aba aio are Ietion are ti a anganiia tarira bwa aia bwai.

23 Ao nooria, ti na katea ara taanga ni buaka i marenan te aba are Ietion ao te aba are Nibwaai, bwa ti aonga ni kawakinia tarira n te aba are Ietion; ao aio are ti a karaoia ibukiia tarira, ibukin maakuia n tabeki bwaai ni buaka ni kaaitaraia tariia bwa mwiina a bure; ao maakuia aio e reke ma ni marakiia n rairannano, i mwin aia tiritiri ma buakakaia ae korakora.

24 Ao ngkanne nooria, aio are ti na karaoia nakoia tarira, bwa aonga ni bwaibwai n te aba are Ietion; ao ti na tararuaia mai irouia aia kairiribai n ara taanga ni buaka, ngkana a kona n anga teutana mwakoron kaubwaia bwa buokan kateimatoan ara taanga ni buaka.

25 Ao ngkanne, e koro bukina bwa ngke Amon e ongo aio, e oki nakoia kaain Aentaai-Nibwaai-Riaai, ao Aramwa raona, nakon te rereua, ike a tia ni katei iai umwaianrianna, ma ni kaoti nakoia bwaai ni kabane. Ao Aramwa e karaki naba nakoia aron ^arairakina nakon te onimaki, ma Amon ao Aaron, ao tarina.

26 Ao e koro bukina bwa e karika te kimwareirei ae korakora i buakoia. Ao a nako rikaaki nakon te aba are Ietion, man taua Ietion bwa aia bwai; ao a aranaki irouia Nibwaite bwa ana aomata Amon; ngaia are a kinaaki n te ara anne mai i mwin te tai anne.

27 Ao a mena i buakoia ana aomata Nibwaai, ma ni warekaki i buakoia aomata ake kaain ana ekaretia te Atua. Ao a kinaaki man nanomatoaia nakon te Atua, ma nakoia naba aomata; bwa bon aomata ngaia aika a ^akokoaua man etieti ni bwaai ni kabane; ao a ^bnene n aia onimaki iroun Kristo, ni karokoa naba te toki.

28 Ao a taraa kawawaean raraaia tariia bwa te bwai ae moan te korakora ribakina; ao a bon aki kona ni manga imanonoaki bwa a na tabeki bwaai ni buaka ni kaaitaraia tariia; ao aki manga taraa te mate ma te maaku, ibukin aia kantaninga ma aia taratara iroun Kristo ao te mangauti; ngaia are e kabwautaki te mate n tokanikain Kristo iaona.

29 Ngaia ae a kukurei ni ^amate n te anga ae moan te kammaraki ma ni kakorakai are e kona ni karaoaki irouia tariia, i mwaain ae a na kona n ana te kabaang ke te kabaang ae uarereke n oroia.

30 Ao ngaia are bon aomata ngaia aika a nanomatoa man tangiraki, aomata aika a korakora nanonakia iroun te Uea.