1 Na nau bikpela kes tru i stat long kamap long olgeta graun bikos long pasin nogut bilong ol pipol, we sapos wanpela man putim samting bilong wok bilong em, o naip bilong pait bilong em long selp, o long ples we em i save putim, lukim, em i no bin painim long tumora, bikos bikpela kes tru i bin kamap long graun.

2 Olsem na, wanwan man i bin holim pas long samting bilong em yet wantaim han bilong em, na i no inap dinau, o givim, na wanwan man i bin holim handel bilong naip bilong pait bilong em long rait han bilong em, long sambai long ol samting wantaim laip, bilong em na meri na ol pikinini bilong em.

3 Na nau, bihain long tupela krismas, na bihain long idai bilong Saret, lukim, brata bilong Saret i bin kirap long pait wantaim Koriantuma, we Koriantuma i bin winim em na ronim em i go long ples we nogat man i stap long ples Akis.

4 Na em i kamap we brata bilong Saret i bin pait wantaim em long ples we nogat man i stap long ples Akis, na ol i bin pait nogut tru, na planti tausen man i bin pundaun long naip bilong pait bilong ol.

5 Na em i kamap we Koriantuma i bin banisim ples we nogat man i stap, na brata bilong Saret i bin go aut wantaim ol man bilong em long ples we nogat man i stap long nait, na kilim wanpela hap bilong ami bilong Koriantuma, taim ol i spak.

6 Na em i bin kam long graun bilong Moron, na putim em yet long sia bilong king bilong Koriantuma.

7 Na em i kamap we Koriantuma i bin i stap long ples we nogat man i stap wantaim ami bilong em long tupela krismas, we em i bin kisim bikpela strong tru long ami bilong em.

8 Nau brata bilong Saret, nem bilong em i Gilied, i bin kisim bikpela strong tru long ami bilong em, bikos long ol kainkain pasin hait bilong ol.

9 Na em i kamap we hai pris bilong em i bin kilim em taim em i sindaun i stap long sia bilong king bilong em.

10 Na em i kamap we wanpela long ol lain ol i wokim kainkain pasin hait i bin kilim hai pris insait long wanpela tokhait rot, na kisim dispela kingdom long em yet, na nem bilong em i Lip, na Lip i wanpela traipela man tru, inap long em i winim ol narapela man namel long olgeta pipol.

11 Na em i kamap we Koriantuma i bin kamap long graun bilong Moron long nambawan krismas long rul bilong Lip, na pait wantaim em.

12 Na em i kamap we em i bin pait wantaim Lip, we Lip i bin katim em long han na givim sua long em, tasol ami bilong Koriantuma i bin go het long pait wantaim Lip, na em i ronawe i go long arere bilong nambis.

13 Na em i kamap we Koriantuma i bin bihainim em, na Lip pait wantaim em long nambis.

14 Na em i kamap we Lip i bin kilim ol ami bilong Koriantuma, na ol i ronawe gen i go long ples we nogat man i stap long ples Akis.

15 Na em i kamap we Lip i bin bihainim em i go inap long em i bin kam long ol ples daun bilong Agos. Na Koriantuma i bin kisim olgeta pipol wantaim em taim em i ronawe long pes bilong Lip long wanem hap graun we em i bin ronawe i go.

16 Na taim Koriantuma i kam long ol ples daun bilong Agos, em i pait wantaim Lip, na katim em i go inap long em idai, tasol, brata bilong Lip i bin kamap long pait wantaim Koriantuma long ples bilong em, na ol i pait nogut tru we Koriantuma i bin ronawe gen long pes bilong ami bilong brata bilong Lip.

17 Nau nem bilong brata bilong Lip em i Sis. Na em i kamap we Sis i bin ronim Koriantuma, na em i winim planti siti, kilim ol meri wantaim ol pikinini na kukim planti siti.

18 Na olgeta hap bilong graun ol i bin poret long Sis, ye, wanpela singautim i bin go long olgeta hap bilong graun—Olsem husat ken sanap long pesim ami bilong Sis? Lukim, em i brumim graun long pes bilong em!

19 Na em i kamap we ol pipol i bin i stat long bung wantaim long kirapim ol ami, long olgeta hap long pes bilong graun.

20 Na ol i bin brukim, na wanpela hap bilong ol i bin ronawe i go long ami bilong Sis, na narapela hap bilong ol i bin ronawe i go long ami bilong Koriantuma.

21 Na bikpela pait tru i bin i stap longpela taim, na bikos pasin bilong kapsaitim blut na bagarap i bin i stap longpela taim, inap long olgeta pes bilong graun i bin karamap wantaim ol bodi bilong idai man.

22 Na pait i bin kamap kwiktaim na hariap tru na nogat wanpela man i bin i stap long planim ol idai man, tasol ol i bin go het long wanpela pait i go long narapela pait long kapsaitim blut, na larim ol bodi bilong ol man wantaim meri na pikinini antap long pes bilong graun, long kamap kaikai bilong ol liklik snek bilong skin.

23 Na smel bilong ol i bin kamap long pes bilong graun, tru tumas, long olgeta pes bilong graun, olsem na ol pipol ol i bin wari long de na long nait, bikos long smel bilong ol.

24 Tasol, Sis i no pinis long ronim Koriantuma, long wanem, em i bin mekim tok tru antap long pe bek em yet long Koriantuma long blut bilong brata bilong em, em i bin kilim, na long toktok bilong Bikpela em i bin kam long Ita olsem Koriantuma bai i no inap idai wantaim naip bilong pait.

25 Olsem na yumi lukim olsem Bikpela i bin visitim ol taim belhat bilong em i pulap, na pasin nogut wantaim pasin les nogut tru bilong ol i bin redim bagarap bilong ol oltaim oltaim.

26 Na em i kamap we Sis i bin bihainim Koriantuma i go long hap bilong is, tru tumas long nambis, na Koriantuma i bin pait wantaim Sis long tripela de.

27 Na ol ami bilong Sis ol i bin bagarap nogut tru na ol pipol i stat long poret, na i stat long ronawe long pes bilong ol ami bilong Koriantuma, na ol i ronawe i go long graun bilong Koriho, na ol i kilim olgeta pipol ol i bungim na husat les long joinim ol.

28 Na ol sanapim haus sel bilong ol long ples daun bilong Koriho, na Koriantuma i bin sanapim haus sel bilong em long ples daun bilong Sur. Nau ples daun bilong Sur i bin i stap klostu long liklik maunten Komno, olsem na, Koriantuma i bin bung wantaim ol ami bilong em long liklik maunten Komno, na singautim ol ami bilong Sis long kam long pait wantaim wanpela biugel.

29 Na em i kamap we ol i bin kam, tasol ol i bin ronim ol i go bek gen, na ol i kam long namba tu taim, na ol i bin ronim ol i go bek gen long nambatu taim. Na em i kamap we ol kam gen long namba tri taim, na pait i kamap nogut tru.

30 Na em i kamap we Sis i bin katim Koriantuma inap long em i bin givim planti bikpela sua, na Koriantuma, bikos em i bin lusim blut bilong em, na hap idai, olsem na em ol i bin karim em i go wankain olsem em i bin idai.

31 Nau bikpela namba tru long ol man, meri na pikinini ol i bin idai long tupela sait, olsem na Sis bin tokim ol pipol bilong em olsem ol i no ken bihainim ol ami bilong Koriantuma, olsem na, ol i go bek long kem bilong ol.