Say Libro nen Ether

1 Tan natan siak, Moroni, ituloy ko so pañgiter na kasulatan na saray akaona a nanaayam a sikara so dineral na lima na Katawan ed tapew na saya a baybay a bansa.

2 Tan inaon ko so saya a kasulatan ed saray duamplo tan apat a piligo a nalmo na saray totoo nen Limhi, a saya so tinawag a Libro nen Ether.

3 Tan impasen ko a say unaan a kabiañgan na saya a kasulatan, a sasalitaen to so nipaakar ed inkapalsa na mundo, tan ontan met ed si Adan, tan sakey a kasulatan a nanlapu ed saman a panaon anga ed saman so baleg a tori, tan antokaman a beñgatla a dinmalan ed limog na saray anak na totoo ya anga ed saman a panaon, so wala ed limog na saray Judio—

4 Dia ed onia ag ko isulat so saray beñgatla a dinmalan manlapu ed saray agew nen Adan ya anga ed saman a panaon; balet saraya so wala ed saray piligo; tan siopaman a makarumog ed saraya, sikato met lamlamang so nawalaan na pakapanyari a naala to so nagnap a kasulatan.

5 Balet nia, ag ko idatak so nagnap a kasulatan, balet sakey a kabiañgan na kasulatan so iter ko, manlapu ed tori a mampaleksab anga ed sikara so aderal.

6 Tan unong ed onia idalatdat ko so kasulatan. Say nansulat ed saya a kasulatan si Ether, tan sikato so sakey ed saray kapolian nen Coriantor.

7 Si Coriantor so laki ya anak nen Moron.

8 Tan si Moron so laki ya anak nen Ethem.

9 Tan si Ethem so laki ya anak nen Ahah.

10 Tan si Ahah so laki ya anak nen Seth.

11 Tan si Seth so laki ya anak nen Shiblon.

12 Tan si Shiblon so laki ya anak nen Com.

13 Tan si Com so laki ya anak nen Coriantum.

14 Tan si Coriantum so laki ya anak nen Amnigaddah.

15 Tan si Amnigaddah so laki ya anak nen Aaron.

16 Tan si Aaron so kapolian nen Heth, a sikato so laki ya anak nen Hearthom.

17 Tan si Hearthom so laki ya anak nen Lib.

18 Tan si Lib so laki ya anak nen Kish.

19 Tan si Kish so laki ya anak nen Corom.

20 Tan si Corom so laki ya anak nen Levi.

21 Tan si Levi so laki ya anak nen Kim.

22 Tan si Kim so laki ya anak nen Morianton.

23 Tan si Morianton so kapolian nen Riplakish.

24 Tan si Riplakish so laki ya anak nen Shez.

25 Tan si Shez so anak a laki nen Heth.

26 Tan si Heth so laki ya anak nen Com.

27 Tan si Com so laki ya anak nen Coriantum.

28 Tan si Coriantum so laki ya anak nen Emer.

29 Tan si Emer so laki ya anak nen Omer.

30 Tan si Omer so laki ya anak nen Shule.

31 Tan si Shule so laki ya anak nen Kib.

32 Tan si Kib so laki ya anak nen Orihah, a laki ya anak nen Jared;

33 A saya a Jared so nanlapu a kaiba to so agi to tan saray boleg da, kaolop da so pigara ya arum ni tan saray boleg da, a nanlapu ed saman so baleg a tori, ed saman a panaon a say Katawan kinewkew to so salita na saray totoo, tan insamba to ed sanok to a sikara so itayak to ed tapew na dalin; tan unong ed sinalita na Katawan saray totoo so nitaytayak.

34 Tan say laki ya agi nen Jared lapu ed sikato so baleg tan mabiskeg a too, tan sakey a too a pinalaboan na Katawan, si Jared, say laki ya agi to, inkuan to ed sikato: Mikasi ka ed Katawan, ya ag to itayo kewkewen pian ag la piga ya ag tayo natalusan so saray salita tayo.

35 Tan agawa a say agi nen Jared so akikasi ed Katawan, tan say Katawan awalaan na panañgasi ed si Jared; dia ed ontan ag to kinewkew so salita nen Jared; tan si Jared tan si agi to a laki so ag ira akewkew.

36 Dia ed saman si Jared inkuan to ed si agi to: Mikasi ka lamet ed Katawan, tan komon iliñgaw to so sanok to ya iarawi ed saray kakaaro tayo, pian ag to kewkewen so salita ra.

37 Tan agawa a say agi nen Jared so akikasi ed Katawan, tan say Katawan awalaan na panañgasi ed saray kakaaro ra tan ontan met ed saray boleg da, kanian sikara so ag akewkew.

38 Tan agawa a si Jared akisalita lamet ed si agi to, a nankuan: Onla ka tan itepet mo ed Katawan no kasi sikatayo so sunsonen to a papawayen ed saya a dalin, tan no sikatayo so sunsonen to a papawayen ed saya a dalin, tepet ka ed sikato no iner so laen tayo. Tan siopa so makapikabat no say Katawan so mañgawit ed sikatayo ed sakey a dalin ya apili-pili ed amin a dalin? Tan no onia, sikatayo sirin so manmaliw a matuor ed Katawan, pian saya so awaten tayo ya onkana a tawir tayo.

39 Tan agawa a si agi nen Jared so akitungtong ed Katawan unong ed saman so imbalikas na sañgi nen Jared.

40 Tan agawa a say Katawan dineñgel to so laki ya agi nen Jared, tan awalaan na panañgasi ed sikato, tan inkuan to ed sikato:

41 Onla kayo tan tipon yo so saray ayayep yo, mandapag a kabaian tan kalakian, ed balang sakey a nengneng; tan ontan met ed saray bokel na dalin ed balang sakey a nengneng; tan saray boleg mo; tan ontan met nen Jared ya agim tan say boleg to; tan ontan met ed saray kakaarom tan saray boleg da, tan saray kakaaro nen Jared tan saray boleg da.

42 Tan sano asumpal mo la sika so onla ed unaan da ya onarap ed sakey a patar a wala ed mamabaybay. Tan diman siak so onabet ed sika, tan siak so onla ed unaan yo ya anga ed dalin a saya so apili-pili ed amin a dalin.

43 Tan diman sika so bendicionan ko tan saray boleg mo, tan mañgipatalindeg ka na onkana ed siak ed boleg mo, tan say boleg nen agim a laki, tan saraman so mila ed sika, a manmaliw a sakey a baleg a bansa. Tan angapo la so ontaluna ed kabaleg nen say bansa ya ipatalindeg ko ya onkana ed siak nen saray boleg mo, ed amin a tapew na dalin. Tan onia so gawaen ko ed sika lapu ed saya a dukey la na panaon a sika so akikasi ed siak.