Tekap 4
Si Moroni so nigangan a mañgikapot ed saray kasulatan na say laki ya agi nen Jared—Saraya so ag niparungtal anga ed saray totoo so nawalaan na pananisia angan siñga say laki ya agi nen Jared—Si Cristo ingangan to so saray totoo a manisia ed saray salita to tan ed saray salita na disipulos to—Saray totoo so nigangan a mambabawi, manisia ed evangelio, tan sikara so nilaban.
1 Tan say Katawan ingangan to so laki ya agi nen Jared ya onlasur ed palandey a manlapu ed arapan na Katawan, tan insulat to so saray beñgatla ya anengneng to; tan saraya so sinebelan a makasabi ed saray anak na totoo anga ed kayari to a nipasak ed krus; tan lapu ed saya a pamaakaran si ari Mosiah iniamot to so saraya, pian saraya so ag ompaway ed mundo anga ed si Cristo ipanengneng to so inkasikato ed saray totoo to.
2 Tan kayari a si Cristo so impanengneng to la so inkasikato ed saray totoo to ingangan to a saraya so iparungtal.
3 Tan natan, kayari to nia, sikara ya amin so linmasay ed ag pananisia; tan angapo la ed sikara so nakdaan likud labat ed saray Lamanite, tan ag da inawat so evangelio nen Cristo; kanian, siak so nigangan ya iamot ko lamet so saraya ed dalem na dalin.
4 Nia, insulat ko ed saraya a piligo so saray beñgatla a petepeteg ya anengneng na say laki ya agi nen Jared; tan angapo ni so babaleg a beñgatla a nipanengneng nen say saraman so nipanengneng ed say laki ya agi nen Jared.
5 Dia ed onia say Katawan ingangan to ak a saraya so isulat ko; tan saraya so insulat ko. Tan ingangan to ed siak a saraya so kapotan ko; tan ingangan to met ed siak a kapotan ko so patalus na saraya; dia ed ontan kinapotan ko so saray panañgipatalus, unong ed gangan na Katawan.
6 Tan say Katawan inkuan to ed siak: Saraya so ag makasabi ed saray Gentiles anga ed saman so agew a sikara so mambabawi ed saray kasalanan da, tan sikara so manmaliw a malinis ed arap na Katawan.
7 Tan dia ed saman ya agew a pampeleñgan da so peteg a pananisia ed siak, inkuan na Katawan, a siñga ginawa na say laki ya agi nen Jared, pian sikara so manmaliw a napasanto ed siak, dia ed ontan ipanengneng ko ed sikara so saray beñgatla ya anengneng na say laki ya agi nen Jared, angan say pañgiparungtal ko ed sikara na amin a puyan ko, inkuan nen Jesu Cristo, say Anak na Dios, say Ama na saray katawenan tan say dalin, tan amin a wala dia.
8 Tan siopaman so mibaliñgaan sumpa ed salita na Katawan, sikato so naayew; tan siopaman so mañgiburi ed saraya a beñgatla, sikato so naayew; tan dia ed sikara ag ko ipanengneng so babaleg a beñgatla, inkuan nen Jesu Cristo; lapu ed siak so saman so mansasalita.
9 Tan dia ed gangan ko saray katawenan so nalukasan tan nakapotan; tan dia ed salitak say dalin so onyegyeg; tan dia ed gangan ko saray manaayam ed saraya so ompatey, angan dia ed panamegley na apoy.
10 Tan siopaman so ag manisia ed salitak ag to met manisia ed saray disipulos ko; tan no peteg ya ag ak nansalita, okom yo; tan nakabatan yo a siak so nansalita, ed saray sampot ya agew.
11 Balet siopaman so manisia ed saraya a beñgatla a sinalitak, sikato so dalawen ko ed pañgipalikna na Espirituk, tan nakabatan to tan sikato so mantasi. Tan lapu ed Espirituk nakabatan to a saraya a beñgatla so tua; lapu ed kuyoñgen to so too a mangawa na maong.
12 Tan antokaman a beñgatla a mankuyong ed too a mangawa na maong so nanlapu ed siak; tan say maong angapo so arum a panlapuan to likud ed siak. Siak lamlamang so mañgiwanwan ed saray totoo ed amin a maong; siopaman so ag manisia ed saray salitak ag to manisia met ed siak—a siak so siak; tan siopaman so ag manisia ed siak so ag to manisia ed Ama ya añgibaki ed siak. Tan nia, siak so Ama, siak so liwawa, tan say bilay, tan say katuaan ed mundo.
13 Ondago kayo ed siak, O sikayo a Gentiles, tan ipanengneng ko ed sikayo so saray babaleg a beñgatla, say kakabatan a niamot lapu ed ag-pananisia.
14 Ondago kayo ed siak, O sikayo a kailalakan na Israel, tan nagawa a nipanengneng ed sikayo no kaonoñgan kabaleg a beñgatla so imparaan na Ama ya onkana ed sikayo, nanlapu la ed inletneg na mundo; tan saraya so ag sinmabi ed sikayo, lapu ed ag-pananisia.
15 Nia, sano napaldua so saman a sakbong na ag-pananisia a señgeg na impansiansia yo ed makapataktakot a kipapasen na karelmeñgan, tan awet na puso, tan inkapereñgan na kanunotan, dia ed ontan saray makana tan makapakelaw a beñgatla a saraya so niamot nanlapu la ed inletneg na mundo ed sikayo—on, sano ontawag kayo ed Ama dia ed ñgaran ko, ed maermen a puso tan mambabawi ya espiritu, dia ed ontan nakabatan yo a say Ama anunotan to so paknaan a ginawa to ed saray ama yo, O kailalakan na Israel.
16 Tan dia ed ontan saray puyan ko a saraya so ingagangan ko ya isulat na igagangan ko a Juan so nalukasan ed mata na amin a totoo. Nunot yo, sano nanengneng yo so saraya a beñgatla, nakabatan yo a say panaon so asinger la a saraya so ipanengneng ed peteg a gawa.
17 Dia ed ontan, sano naawat yo so saya a kasulatan nakabatan yo a say kimey na Ama so ginmapo la ed tapew na amin a dalin.
18 Dia ed ontan, mambabawi kayo amin a sampot na dalin, tan ondago kayo ed siak, tan manisia kayo ed evangeliok, tan mampabiniag kayo ed ñgaran ko; lapu ed siopaman so manisia tan nabiniagan sikato so nilaban; balet siopaman so ag manisia sikato so naayew; tan saray pakapatnagan so ontumbok ed saray manisia ed ñgaran ko.
19 Tan mapalar so siopaman a narumog a matuor ed ñgaran ko dia ed sampot ya agew, lapu ed sikato so nitanduro a miayam ed panarian a niparaan ya onkana ed sikato a nanlapu la ed inletneg na mundo. Tan nia siak so nansalita ed saya. Amen.