ບົດທີ 8
ມັນມີການຜິດຖຽງກັນ ແລະ ມີການຂັດແຍ້ງກັນເລື່ອງອານາຈັກ—ເອຄິດຈັດຕັ້ງຄຳສາບານການມົ້ວສຸມລັບເພື່ອປະຫານຊີວິດກະສັດ—ການມົ້ວສຸມລັບເປັນຂອງມານ ແລະ ຜົນຄືການທຳລາຍປະຊາຊາດ—ຄົນຕ່າງຊາດໃນສະໄໝປະຈຸບັນຖືກເຕືອນໃຫ້ຕໍ່ຕ້ານການມົ້ວສຸມລັບຊຶ່ງພະຍາຍາມໂຄ່ນລົ້ມອິດສະລະພາບຂອງແຜ່ນດິນ, ປະຊາຊາດ, ແລະ ປະເທດຊາດທັງໝົດ.
1 ແລະ ເຫດການໄດ້ບັງເກີດຂຶ້ນຄື ຊູນໄດ້ລູກຊາຍອີກຄົນໜຶ່ງຊື່ວ່າ ໂອເມ, ແລະ ໂອເມໄດ້ປົກຄອງແທນລາວ. ແລະ ໂອເມໄດ້ມີລູກຊາຍຊື່ວ່າ ຢາເຣັດ; ແລະ ຢາເຣັດໄດ້ມີລູກຊາຍ ແລະ ລູກສາວຫລາຍຄົນ.
2 ແລະ ຢາເຣັດໄດ້ກະບົດຕໍ່ບິດາຂອງຕົນ, ແລະ ມາຢູ່ໃນແຜ່ນດິນຂອງເຫັດ. ແລະ ເຫດການໄດ້ບັງເກີດຂຶ້ນຄື ລາວໄດ້ເວົ້າຍ້ອງຍໍຜູ້ຄົນຢ່າງຫລວງຫລາຍ, ຍ້ອນວ່າຄຳເວົ້າອັນມີເລ່ຫລ່ຽມຂອງລາວຈົນວ່າລາວໄດ້ອານາຈັກເຄິ່ງໜຶ່ງມາປົກຄອງ.
3 ແລະ ເມື່ອລາວໄດ້ອານາຈັກມາເຄິ່ງໜຶ່ງແລ້ວ, ລາວກໍໄດ້ມາສູ້ຮົບກັບບິດາຂອງຕົນ, ແລະ ລາວໄດ້ຈັບເອົາບິດາຂອງຕົນໄປເປັນຊະເລີຍ, ແລະ ເຮັດໃຫ້ບິດາຂອງຕົນທຳງານໃນຂະນະທີ່ເປັນຊະເລີຍ;
4 ແລະ ບັດນີ້, ໃນໄລຍະເວລາແຫ່ງການປົກຄອງຂອງໂອເມ, ລາວໄດ້ຕົກຢູ່ໃນຄວາມເປັນຊະເລີຍເຄິ່ງໜຶ່ງຂອງຊີວິດຂອງລາວ. ແລະ ເຫດການໄດ້ບັງເກີດຂຶ້ນຄື ລາວໄດ້ມີລູກຊາຍ ແລະ ລູກສາວຫລາຍຄົນ, ຊຶ່ງໃນບັນດາລູກພວກນີ້ ມີສອງຄົນຊື່ວ່າ ເອຊະໂຣມ ແລະ ໂຄຣິອານທະເມີ.
5 ແລະ ພວກເຂົາຄຽດແຄ້ນຫລາຍທີ່ສຸດ ຍ້ອນການກະທຳຂອງຢາເຣັດອ້າຍຂອງຕົນ, ເຖິງຂະໜາດທີ່ພວກເຂົາໄດ້ຈັດກອງທັບ ແລະ ໄດ້ສູ້ຮົບກັບຢາເຣັດ. ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ສູ້ຮົບກັບຢາເຣັດໃນເວລາກາງຄືນ.
6 ແລະ ເຫດການໄດ້ບັງເກີດຂຶ້ນຄື ເວລາພວກເຂົາໄດ້ຂ້າຄົນໃນກອງທັບຂອງຢາເຣັດແລ້ວ ແລະ ກຳລັງຈະຂ້າລາວນຳອີກ; ແລະ ລາວໄດ້ວິງວອນພວກເຂົາໃຫ້ໄວ້ຊີວິດລາວ, ແລະ ລາວຈະຍົກອານາຈັກຄືນໃຫ້ບິດາຂອງຕົນ. ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ໄວ້ຊີວິດລາວ.
7 ແລະ ບັດນີ້ຢາເຣັດໄດ້ມີຄວາມເສົ້າສະຫລົດໃຈຫລາຍທີ່ສຸດ ຍ້ອນການສູນເສຍອານາຈັກໄປນັ້ນ, ເພາະວ່າໃຈຂອງລາວຢູ່ກັບອານາຈັກ ແລະ ການຍ້ອງຍໍສັນລະເສີນຂອງໂລກ.
8 ບັດນີ້ໂດຍທີ່ລູກສາວຂອງຢາເຣັດເປັນຄົນຊຳນິຊຳນານທີ່ສຸດ, ແລະ ໂດຍທີ່ໄດ້ເຫັນຄວາມເສົ້າສະຫລົດໃຈຂອງບິດາຕົນ, ນາງຈຶ່ງໄດ້ຄິດວາງແຜນເພື່ອຈະກູ້ເອົາອານາຈັກຄືນມາໃຫ້ບິດາຂອງນາງໃຫ້ໄດ້.
9 ບັດນີ້ລູກສາວຂອງຢາເຣັດເປັນຄົນງາມທີ່ສຸດ. ແລະ ເຫດການໄດ້ບັງເກີດຂຶ້ນຄື ນາງໄດ້ເວົ້າກັບບິດາຂອງນາງວ່າ: ແມ່ນຫຍັງທີ່ເຮັດໃຫ້ພໍ່ມີຄວາມເສົ້າສະຫລົດໃຈເຊັ່ນນີ້? ພໍ່ບໍ່ໄດ້ອ່ານບັນທຶກຊຶ່ງບັນພະບຸລຸດຂອງພວກເຮົານຳຂ້າມຄວາມເລິກທີ່ສຸດຂອງທະເລອັນກວ້າງໃຫຍ່ມາບໍ? ຈົ່ງເບິ່ງ, ມັນບໍ່ມີເລື່ອງລາວກ່ຽວກັບຄົນໃນສະໄໝກ່ອນບໍທີ່ໃຊ້ແຜນການ ກລັບຂອງພວກເຂົາ, ຊຶ່ງໃນແຜນການນັ້ນພວກເຂົາໄດ້ຍຶດເອົາອານາຈັກຫລາຍແຫ່ງ ແລະ ມີຄວາມຮຸ່ງເຮືອງເຫລືອງເຫລື້ອມ?
10 ແລະ ບັດນີ້, ສະນັ້ນ, ຂໍໃຫ້ພໍ່ຈົ່ງໃຫ້ຄົນໄປນຳເອົາເອຄິດລູກຊາຍຂອງຄິມນໍມາ; ແລະ ຈົ່ງເບິ່ງ, ລູກເອງເປັນຄົນງາມ, ແລະ ລູກຈະ ກຟ້ອນລຳຕໍ່ໜ້າລາວ, ແລະ ລູກຈະເຮັດໃຫ້ລາວພໍໃຈ, ຈົນວ່າລາວຢາກໄດ້ລູກໄປເປັນພັນລະຍາຂອງລາວ; ດັ່ງນັ້ນຖ້າຫາກລາວປາດຖະໜາຈາກພໍ່ວ່າໃຫ້ພໍ່ຍົກລູກໃຫ້ເປັນພັນລະຍາຂອງລາວ, ເມື່ອນັ້ນພໍ່ຈົ່ງກ່າວວ່າ: ຂ້າພະເຈົ້າຈະຍົກນາງໃຫ້ທ່ານ ຖ້າຫາກທ່ານເອົາຫົວບິດາຂອງຂ້າພະເຈົ້າ, ຜູ້ເປັນກະສັດມາໃຫ້ຂ້າພະເຈົ້າ.
11 ແລະ ບັດນີ້ໂອເມ ແມ່ນເພື່ອນຂອງເອຄິດ; ດັ່ງນັ້ນ, ເມື່ອຢາເຣັດໄດ້ສັ່ງໃຫ້ຄົນໄປເອີ້ນເອຄິດມາຫາ, ລູກສາວຂອງຢາເຣັດກໍໄດ້ຟ້ອນລຳຕໍ່ໜ້າລາວ, ເຖິງຂະໜາດທີ່ເຮັດໃຫ້ລາວພໍໃຈ, ເຖິງຂະໜາດທີ່ລາວຢາກໄດ້ນາງມາເປັນພັນລະຍາ. ແລະ ເຫດການໄດ້ບັງເກີດຂຶ້ນຄື ເອຄິດໄດ້ເວົ້າກັບຢາເຣັດວ່າ: ໃຫ້ນາງມາເປັນພັນລະຍາຂອງຂ້າພະເຈົ້າສາ.
12 ແລະ ຢາເຣັດເວົ້າກັບລາວວ່າ: ຂ້າພະເຈົ້າຈະຍົກນາງໃຫ້ທ່ານ, ຖ້າຫາກທ່ານຈະເອົາຫົວຂອງບິດາຂອງຂ້າພະເຈົ້າຜູ້ເປັນກະສັດມາໃຫ້ຂ້າພະເຈົ້າ.
13 ແລະ ເຫດການໄດ້ບັງເກີດຂຶ້ນຄື ເອຄິດໄດ້ເຕົ້າໂຮມຍາດພີ່ນ້ອງທັງໝົດຂອງຕົນໃນຄອບຄົວຂອງຢາເຣັດ ແລະ ໄດ້ເວົ້າກັບພວກເຂົາເຫລົ່ານັ້ນວ່າ: ພວກທ່ານຈະສາບານກັບຂ້າພະເຈົ້າໄດ້ບໍວ່າ ພວກທ່ານຈະຊື່ສັດຕໍ່ຂ້າພະເຈົ້າໃນສິ່ງທີ່ຂ້າພະເຈົ້າປາດຖະໜາຈາກພວກທ່ານ?
14 ແລະ ເຫດການໄດ້ບັງເກີດຂຶ້ນຄື ພວກເຂົາທັງໝົດໄດ້ ກສາບານກັບລາວ, ໂດຍອ້າງເຖິງພຣະເຈົ້າແຫ່ງສະຫວັນ, ແລະ ອ້າງເຖິງຟ້າສະຫວັນນຳອີກ, ແລະ ອ້າງເຖິງແຜ່ນດິນໂລກນຳອີກ, ແລະ ອ້າງວ່າຖ້າຫາກຜູ້ໃດຫັນປ່ຽນບໍ່ປະຕິບັດຕາມສິ່ງທີ່ເອຄິດປາດຖະໜາ ຜູ້ນັ້ນຈະສູນເສຍຫົວຂອງຕົນ; ແລະ ຜູ້ໃດທີ່ເປີດເຜີຍອັນໃດກໍຕາມທີ່ເອຄິດບອກໃຫ້ຕົນຮູ້, ຜູ້ນັ້ນຈະສູນເສຍຊີວິດຂອງຕົນ.
15 ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ເຫັນດີກັບເອຄິດດັ່ງນັ້ນ. ແລະ ເອຄິດໄດ້ໃຫ້ພວກເຂົາກ່າວ ກຄຳສາບານ ຊຶ່ງມອບໃຫ້ຄົນໃນສະໄໝບູຮານຜູ້ທີ່ສະແຫວງຫາອຳນາດ, ຊຶ່ງຕໍ່ກັນມາຈາກ ຂກາອິນຜູ້ເປັນຄາດຕະກອນນັບຕັ້ງແຕ່ການເລີ່ມຕົ້ນມາ.
16 ແລະ ອຳນາດຂອງມານໄດ້ຮັກສາຄຳສາບານນີ້ໄວ້ ເພື່ອຈະໄດ້ມອບຄຳສາບານເຫລົ່ານີ້ໃຫ້ແກ່ຜູ້ຄົນຕໍ່ໄປ, ເພື່ອໃຫ້ພວກເຂົາຄົງຢູ່ໃນຄວາມມືດ, ເພື່ອຊ່ວຍເຫລືອຜູ້ທີ່ສະແຫວງຫາອຳນາດໃຫ້ມີອຳນາດ, ແລະ ເພື່ອຂ້າ, ແລະ ເພື່ອປຸ້ນຈີ້, ແລະ ເພື່ອຕົວະຍົວະ, ແລະ ເພື່ອເຮັດຄວາມຊົ່ວຮ້າຍນາໆປະການ ແລະ ການໂສເພນີ.
17 ແລະ ແມ່ນລູກສາວຂອງຢາເຣັດນີ້ແຫລະທີ່ໄດ້ນຳມັນມາໄວ້ໃນໃຈຂອງລາວ ເພື່ອໃຫ້ຄົ້ນຄວ້າຫາສິ່ງເກົ່າແກ່ເຫລົ່ານີ້; ແລະ ຢາເຣັດໄດ້ນຳມັນມາໄວ້ໃນໃຈຂອງເອຄິດ; ດັ່ງນັ້ນ ເອຄິດຈຶ່ງໄດ້ມອບມັນໃຫ້ແກ່ຍາດພີ່ນ້ອງ ແລະ ໝູ່ເພື່ອນຂອງລາວ, ແລະ ນຳພວກເຂົາໄປດ້ວຍຄຳສັນຍາທີ່ຈົບງາມໃຫ້ເຮັດສິ່ງໃດກໍຕາມທີ່ລາວປາດຖະໜາ.
18 ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ຈັດຕັ້ງ ກການມົ້ວສຸມລັບຂຶ້ນ, ຄືກັນກັບໃນສະໄໝກ່ອນ; ຊຶ່ງການມົ້ວສຸມລັບນັ້ນເປັນໜ້າກຽດຊັງ ແລະ ຊົ່ວຮ້າຍຍິ່ງກວ່າສິ່ງໃດໆ, ໃນສາຍພຣະເນດຂອງພຣະເຈົ້າ;
19 ເພາະວ່າພຣະຜູ້ເປັນເຈົ້າບໍ່ໄດ້ເຮັດວຽກໃນການມົ້ວສຸມລັບ, ທັງພຣະອົງບໍ່ມີພຣະປະສົງໃຫ້ມະນຸດຂ້າຟັນກັນ, ແຕ່ໃນທຸກສິ່ງພຣະອົງຊົງຫ້າມມັນນັບຕັ້ງແຕ່ການເລີ່ມຕົ້ນຂອງມະນຸດເປັນຕົ້ນມາ.
20 ແລະ ບັດນີ້ຂ້າພະເຈົ້າໂມໂຣໄນບໍ່ໄດ້ຂຽນແບບສະບັບຂອງຄຳສາບານ ແລະ ການມົ້ວສຸມລັບຂອງພວກເຂົາໄວ້, ເພາະມັນເປັນທີ່ຮູ້ຈັກແກ່ຂ້າພະເຈົ້າວ່າ ມັນມີຢູ່ແລ້ວກັບຄົນທັງປວງ, ແລະ ມັນມີຢູ່ແລ້ວໃນບັນດາຊາວເລມັນ.
21 ແລະ ມັນເປັນເຫດໃຫ້ເກີດ ກຄວາມພິນາດແກ່ຜູ້ຄົນພວກນີ້ ຊຶ່ງຂ້າພະເຈົ້າກຳລັງເວົ້າເຖິງຢູ່ດຽວນີ້, ແລະ ມັນນຳຄວາມພິນາດມາໃຫ້ຜູ້ຄົນຂອງນີໄຟນຳອີກ.
22 ແລະ ປະຊາຊາດໃດກໍຕາມທີ່ຈະສະໜັບສະໜູນການມົ້ວສຸມລັບແບບນີ້, ເພື່ອໃຫ້ໄດ້ອຳນາດ ແລະ ຜົນປະໂຫຍດຈົນໃຫ້ມັນແຜ່ຂະຫຍາຍໄປທົ່ວປະຊາຊາດ; ຈົ່ງເບິ່ງ, ປະຊາຊາດນັ້ນຈະຖືກທຳລາຍ; ເພາະວ່າພຣະຜູ້ເປັນເຈົ້າຈະບໍ່ຍອມໃຫ້ ກເລືອດຂອງໄພ່ພົນຂອງພຣະອົງຊຶ່ງຖືກພວກເຂົາຫລັ່ງ ຮ້ອງທູນພຣະອົງຈາກພື້ນດິນສະເໝີໄປເພື່ອ ຂການແກ້ແຄ້ນຄົນເຫລົ່ານັ້ນ ແລະ ພຣະອົງບໍ່ແກ້ແຄ້ນພວກເຂົາ.
23 ດັ່ງນັ້ນ, ໂອ້ ທ່ານຄົນຕ່າງຊາດ, ມັນແມ່ນຄວາມສະຫລຽວສະຫລາດຂອງພຣະເຈົ້າທີ່ຈະໃຫ້ສິ່ງເຫລົ່ານີ້ເປັນທີ່ຮູ້ຈັກແກ່ທ່ານ, ເພື່ອໂດຍການນີ້ທ່ານຈະກັບໃຈຈາກບາບຂອງທ່ານ, ແລະ ບໍ່ປ່ອຍໃຫ້ການມົ້ວສຸມລັບຢູ່ເໜືອທ່ານ, ຊຶ່ງສ້າງຂຶ້ນເພື່ອໃຫ້ມີ ກອຳນາດ ແລະ ຮັບຜົນປະໂຫຍດ—ແລະ ວຽກງານ, ແທ້ຈິງແລ້ວ, ວຽກງານແຫ່ງຄວາມພິນາດຍ່ອມມາສູ່ທ່ານ, ແທ້ຈິງແລ້ວ, ແມ່ນດາບແຫ່ງຄວາມຍຸດຕິທຳຂອງພຣະເຈົ້າຜູ້ສະຖິດນິລັນດອນຈະຕົກລົງມາໃສ່ທ່ານເພື່ອການໂຄ່ນລົ້ມ, ແລະ ເພື່ອຄວາມພິນາດຂອງທ່ານ ຖ້າຫາກທ່ານຈະປ່ອຍໃຫ້ສິ່ງເຫລົ່ານີ້ມີຢູ່.
24 ດັ່ງນັ້ນ, ພຣະຜູ້ເປັນເຈົ້າໄດ້ບັນຊາທ່ານ, ເມື່ອທ່ານເຫັນສິ່ງເຫລົ່ານີ້ເກີດຂຶ້ນໃນບັນດາພວກທ່ານ, ທ່ານຄວນຈະຕື່ນຂຶ້ນສູ່ຄວາມເຂົ້າໃຈເຖິງສະພາບອັນເປັນຕາຢ້ານຂອງທ່ານ, ຍ້ອນວ່າການມົ້ວສຸມລັບນີ້ ຊຶ່ງຈະມີຢູ່ໃນບັນດາພວກທ່ານ; ຖ້າບໍ່ດັ່ງນັ້ນ ວິບັດຈົ່ງມີກັບມັນ, ເພາະເລືອດຂອງຄົນທັງຫລາຍທີ່ຖືກຂ້າຕາຍໄດ້ຮ້ອງຂຶ້ນຈາກພື້ນດິນເພື່ອແກ້ແຄ້ນມັນ, ແລະ ແກ້ແຄ້ນຜູ້ທີ່ສ້າງມັນຂຶ້ນມາ.
25 ເພາະວ່າເຫດການຈະບັງເກີດຂຶ້ນຄື ຜູ້ໃດທີ່ສ້າງມັນ ຍ່ອມສະແຫວງຫາທີ່ຈະລົບລ້າງ ກອິດສະລະພາບຂອງແຜ່ນດິນ, ປະຊາຊາດ, ແລະ ປະເທດຊາດທັງໝົດ; ແລະ ຈະນຳເອົາຄວາມພິນາດມາສູ່ຜູ້ຄົນທັງໝົດ, ເພາະວ່າມັນຖືກສ້າງຂຶ້ນໂດຍບິດາຂອງຄວາມຂີ້ຕົວະທັງໝົດ, ແມ່ນຄົນຂີ້ຕົວະຜູ້ດຽວກັນນັ້ນທີ່ ຂຫລອກລວງບິດາມານດາຜູ້ທຳອິດຂອງເຮົາ, ແທ້ຈິງແລ້ວ, ແມ່ນຄົນຂີ້ຕົວະຜູ້ດຽວກັນນີ້ແຫລະທີ່ເຮັດໃຫ້ມະນຸດເຮັດຄາດຕະກຳນັບຕັ້ງແຕ່ການເລີ່ມຕົ້ນມາ; ເປັນຜູ້ທີ່ເຮັດໃຫ້ໃຈຂອງມະນຸດແຂງກະດ້າງ ຈົນໄດ້ຂ້າສາດສະດາທັງຫລາຍ, ແລະໄດ້ແກວ່ງກ້ອນຫີນໃສ່ພວກເພິ່ນ, ແລະ ຂັບໄລ່ພວກເພິ່ນອອກໄປນັບແຕ່ຕອນຕົ້ນ.
26 ດັ່ງນັ້ນຂ້າພະເຈົ້າໂມໂຣໄນຈຶ່ງໄດ້ຮັບບັນຊາໃຫ້ຂຽນເລື່ອງເຫລົ່ານີ້ ເພື່ອຄວາມຊົ່ວຕ່າງໆຈະໄດ້ໝົດໄປ, ແລະ ວ່າເວລາຈະມາຮອດ ຊຶ່ງຊາຕານຈະ ກບໍ່ມີອຳນາດເໜືອໃຈຂອງລູກຫລານມະນຸດ, ມີແຕ່ເຂົາຈະຖືກ ຂຊັກຈູງໃຫ້ເຮັດແຕ່ຄວາມດີຕະຫລອດໄປ, ເພື່ອເຂົາຈະໄດ້ມາຫາອ່າງນ້ຳແຫ່ງຄວາມຊອບທຳທັງປວງ ແລະ ລອດ.