Puk lal Helaman

1 Ac na liye, tukun ma inge ke muhtwacwacackiyacn yac ahkangngaul ke kolyuck luhn mwet nuhnuhnkuh fin mwet lal Nephi, muhtwacwacack in oasr ma upac sikyak inmahsrlon mwet luhn mwet Nephi.

2 Tuh liye, Pahoran el misac, ac som liki facluh; ke ma inge muhtwacwacack in oasr sie fohs na upac lah suc ac eis siyah in nuhnuhnkuh inmahsrlon mwet wiyacl, suc pa wen nahtuhl Pahoran.

3 Na pa inge inelos suc tuh srihke nuh ke siyah in nuhnuhnkuh, suc tuh oacyacpac oruh tuh mwet uh in fohs: Pahoran, Paanchi, ac Pacumeni.

4 Na tiac pa inge nohfohn wen nahtuhl Pahoran (tuh puhs nahtuhl), tuhsruhk pa inge elos suc tuh srihke nuh ke siyah in nuhnuhnkuh; ke ma inge, elos tuh oruh oasr u tolu fahsrelihk inmahsrlon mwet uh.

5 Ne ohinge, tukun ma inge Pahoran el srihsrngiyucki ke puhsrwen mwet uh tuh elan mwet nuhnuhnkuh fuhlwact ac kafuhnah luhn mwet lal Nephi.

6 Ac tukun ma inge Pacumeni, ke el liye tuh el tiac kuh in sruokyac siyah in nuhnuhnkuh, el tuh welah puhsrwen mwet uh.

7 Tuhsruhk liye, Paanchi, ac sie un mwet suc kena tuh elan kafuhnah lalos, elos arulacna kasrkuhsrak; ke ma inge, el oruh elan kahs in eyeinse uslah mwet uh in tuyak in lain tamuhlwel wiyacl.

8 Ac tukun ma inge ke el apkuhran in oruh ma se inge, liye, el utucklac, ac tuh srihkeyuck in fal nuh ke puhsrwen mwet uh, ac nuhnuhnkweyucki in misac; tuh el tuyak in lain ac suk in kuhnahoslah moul sukohsohk luhn mwet uh.

9 Inge ke elos mwet suc kena tuh elan kafuhnah lalos liye lah el nuhnuhnkweyucki in misac, ke ma inge elos kasrkuhsrak, ac liye, elos suhpwacllah Kishkumen, finne nuh ke siyah in nuhnuhnkuh lal Pahoran, ac unilyac Pahoran ke el muhta fin siyah in nuhnuhnkuh.

10 Ac el ukweyuck sin mwet kuhlwacnsap lal Pahoran; tuhsruhk liye, pihsrpihsr na pwacye kahing se lal Kishkumen ah pwacnwacng tiac sie mwet kuh in falkelyac.

11 Ac el som nuh yohrohlos suc suhpwacllah, ac elos nohfohn ilyak nuh ke sie wuhlweacng, ahok, fuhlahk ke Mwet in Oraclah ma pahtpaht lalos, lah elos ac tiac fahk nuh sin kuhtwena mwet lah Kishkumen el unilyac Pahoran.

12 Ke ma inge, Kishkumen el tiacna etweyuck inmahsrlon mwet lal Nephi, tuh el ekuhllah atacl ke pacl se ma el unilyac Pahoran ah. Ac Kishkumen ac un mwet lal, suc tuh olweacng nuh sel, elos tuh sramsram inmahsrlon mwet uh, ke sie ohiyac ma elos nuhkwewa tiac kuh in sukokyak; tuhsruhk elos nuhkwewa suc sukokyak ah nuhnuhnkweyucki in misac.

13 Ac inge liye, Pacumeni el srihsrngiyucki, in fal nuh ke puhsrwen mwet ah, in sie mwet nuhnuhnkuh fuhlwact ac sie kafuhnah luhn mwet ah, in kol aholuhl Pahoran tamuhlwel wiyacl; ac ma se inge fal nuh ke kuh lal. Ac ma inge nuhkwewa sikyak ke yac ahkangngaul ke kolyuck luhn mwet nuhnuhnkuh; ac ma inge oasr sahflahiyac.

14 Ac tukun ma inge ke yac ahkangngaul ac sie ke kolyuck luhn mwet nuhnuhnkuh, mwet Laman elos oracni sie un mwet mweun pucspucs, ac sang nuh selos katlas, ac mitmit kuhruh ac pihsr, ac suhkanpihsr, ac mwe loang sifac, ac mwe loang inniwac, ac kain in mwe loang nuhkwewa.

15 Ac elos sifilpac tuhkuh tuh elos in mweun lain mwet Nephi. Ac elos kolyuck sin sie mwet suc inel pa Coriantumr; ac el sie mwet ke sucu lal Zarahemla; ac el sie mwet lain som liki inmahsrlon mwet Nephi; ac el sie mwet yohk pihsac ac fokoko.

16 Ke ma inge, tohkohsrah luhn mwet Laman, suc inel pa Tubaloth, suc pa wen nahtuhl Ammoron, el nuhnkuh muh Coriantumr, sie mwet fokoko, el kuh in tuyak lain mwet Nephi, ke kuhiyacl ac oacyacpac ke lahlmwetmwet yohk lal, yohkna oruh el suhpwacllah tuh elan kuhtanglah mwet Nephi—

17 Ke ma inge el puhrakuhlosyak in kasrkuhsrak, ac el tuh oracni nuh sie un mwet mweun lal, ac el tuh srihsrngilyac Coriantumr tuh elan mwet kol lalos, ac el oruh tuh elos in fahsr som nuh ke acn lal Zarahemla in mweun lain mwet Nephi.

18 Ac tukun ma inge ke srihpen yohk fohs ac ma upac ke kafucrmacn, tiacna oasr suhnuhn mwet topang lalos fin acn lal Zarahemla; tuh elos nuhnkuh muh mwet Laman ah elos tiac kuh in tuhkuh nuh ke acn selos in mweuni siti luhlahp Zarahemla.

19 Tuhsruhk tukun ma inge Coriantumr el fahsr som us sifac ke un mwet pucspucs lal, ac ohsun nuh sin mwet ke siti uh, ac fahsr se lalos ah arulacna pihsrpihsr pwacnwacng wacngihn pacl luhn mwet Nephi ah in oracni nuh sie un mwet mweun lalos.

20 Ke ma inge Coriantumr el pakiyac uniyac mwet topang se ke motonoac ke siti uh, ac tuh fahsr som wi un mwet mweun nuhkwewa lal nuh ke siti uh, ac elos tuh uniyac elos nuhkwewa suc lainuhlos, yohkna oruh elos tuh sruokyac nohfohn siti sac.

21 Ac tukun ma inge Pacumeni, suc pa mwet nuhnuhnkuh fuhlwact, el kahing luhkwel Coriantumr, finne nuh ke pot ke siti uh. Ac tukun ma inge Coriantumr el sruhngluhl ke pihsinkacn pot uh, yohkna oruh el misac. Ac ohinge sahflah pacl lal Pacumeni.

22 Ac inge ke Coriantumr el liye lah el sruokyac siti lal Zarahemla, ac liye lah mwet Nephi ah kahing luhkwelos, ac acnwucki, ac utucklac, ac tolyuckyang nuh ke nien srohoh, ac lah el sruokyac acn se ma fokoko emet ke acn nuhkwewa, insiacl puhlaikyak yohkna pwacnwacng el oruh in som lain acn nuhkwewa.

23 Ac inge el tiac muhta fin acn lal Zarahemla, tuhsruhk el fahsr som wi sie un mwet mweun luhlahp, finne nuh ke siti Puhs; tuh el kwacfeacng na in som ac fahsr na pakpuck ke katlas, tuh elan kuh in sruokyac acn acir ke acn uh.

24 Ac, nuhnkuh muh acn fokoko emet lalos uh oasr ke infulwen acn ah, ke ma inge el tuh fahsr som, tiacna sang pacl elos in toweni nuh sie sahyacn na ke u srihsrihk; ac ke ohiyac se inge elos tuhkuh nuh yohrohlos in pakwelosi nuh infohk uh.

25 Tuhsruhk liye, fahsr se lal Coriantumr in ut infulwen acn ah sang nuh sel Moronihah ohiyac wo luhkwelos, finne puhslac na pwacye mwet Nephi suc acnwucki.

26 Tuh liye, Moronihah el pahngon muh mwet Laman ah elos tiac kena in tuhkuh nuh ke infulwen acn ah, tuhsruhk tuh elos ac mweuni siti uh raunyak ke inmahsrol luhn acn we oacna ke elos tuh oruh met; ke ma inge Moronihah el oruh tuh un mwet mweun fokoko lalos in karuhnguhnwacng na acn ma oan raunweack inmahsrol we.

27 Tuhsruhk liye, mwet Laman ah elos tiacna sahngweng in fal nuh ke kena lal, tuhsruhk elos tuhkuh nuh ke infulwen acn ah, ac eislah siti luhlahp sac suc pa siti lal Zarahemla, ac elos fahsr sahslah ke acn luhlahp emet fin acn uh, uniyac mwet ke sie ahkmas na upac, kwewana mukul, muhtwacn, ac tuhlihk, sruokyac siti pucspucs ac pot kuhlacna pucspucs.

28 Tuhsruhk ke Moronihah el konwacack ma inge, el sa na suhpwacllah Lehi wi sie un mwet mweun in raunyak in sonolos met liki elos tuhkuh nuh fin acn Puhs.

29 Ac ohinge el oruh; ac el tuh sonolos met liki elos tuhkuh nuh fin acn Puhs, ac mweun nuh selos, yohkna oruh elos muhtwacwacack in kaihng fohlohk nuh fin acn lal Zarahemla.

30 Ac tukun ma inge Moronihah el sonolos ke kahing lalos, ac tuh mweun nuh selos, yohkna oruh ma inge eklac sie mweun arulacna srah fohn; ahok, puhslac mwet acnwucki, ac inmahsrlon mwet suc acnwucki ah Coriantumr el oacyacpac sukokyak.

31 Ac inge, liye, mwet Laman ah elos tiacna kuh in kahing ke kuhtwena inkacnek, tiac nuh acir, tiac pac nuh epang, tiac pac nuh kuhtuhlacp, tiac pac nuh rohtoh, tuh elos rauniyucklac sin mwet Nephi.

32 Ac ohinge Coriantumr el kohllah mwet Laman ah nuh inmahsrlon mwet Nephi, yohkna oruh elos muhta ye kuh luhn mwet Nephi, ac el sifacna el acnwucki, ac mwet Laman ah tuh sifacna isaclosyang nuh in poun mwet Nephi.

33 Ac tukun ma inge Moronihah el sifilpac sruokyac siti lal Zarahemla, ac el oruh tuh mwet Laman suc tuh srohoh utucklac ah in som liki acn uh ke mislac.

34 Ac ohinge sahflah yac ahkangngaul ac sie ke kolyuck luhn mwet nuhnuhnkuh.