1 Chiwilampeʼ, in, Moroni kas quinqʼuis u banic ri u tzʼib ri in tat, ri Mormón. Chiwilampeʼ, xak cʼo jujun tak tzij ri quintzʼibaj na. Xak quintzʼibaj na jas ri u takbal ri in tat.

2 Xcʼulmataj cʼu riʼ, xbantaj jun nimalaj mayalaj chʼoʼj pa ri Cumorah. Cʼäte cʼu riʼ, kas jeʼ ri aj Lamanitas xequiterenej ri aj Nefitas ri xebel bic cʼä pa ri nim tinimit ri cʼo pa ri u wiquiakʼab ri relbal kʼij. Are riʼ xetzucux cumal ri aj Lamanitas, cʼä xetzelax qui wäch conojel.

3 Ri in tat xukujeʼ xcämisax cumal ri e areʼ. Y ri in cʼut xak xu ri in quincanaj canok nu tuquiel rech quintzʼibaj cʼut ri bisonalaj tzijobal chrij ri u sachic qui wäch nu winak. Chiwilampeʼ, cʼut, e benak chic, y xak quintzʼakatisaj ri u takom can ri in tat. Y man wetaʼm taj we tä quinquicämisaj o we tä man quinquicämisaj taj.

4 Rumal cʼu laʼ, quintzʼibaj na y quinmuk na ri tak tzʼib riʼ chupam ri ulew. Y xak junam chwe jawi quinbec na wi.

5 Chiwilampeʼ, ri in tat u banom we jun tzʼib, y ri areʼ u tzʼibam chrij jas ri u sucʼumal ri tzʼib. Chiwilampeʼ, in xukujeʼ xintzʼibaj waʼ chrij ri xaxalaj tak u xak chʼichʼ, xaʼ man cʼo tä jun cʼolbal chrij jawi quintzʼibaj wi. Y man cʼo tä chʼichʼ wucʼ, rumal rech cʼu in xaʼ nu tuquiel. Cäminak chic in tat pa ri nimalaj chʼoʼj, xukujeʼ conojel ri walaxic e cäminak chic. Y man cʼo tä majun wachil, mawi cʼo tä jawijeʼ quinbec wi. Y man wetaʼm tä joropa kʼij cuyaʼ na ulok ri Ajawaxel chwe.

6 Chiwilampeʼ, ocʼowinak chi cajib cien junab tzpa ri u petibal ri Kajawal, ri ka Colonel.

7 Chiwilampeʼ cʼut, ri aj Lamanitas e qui tzucum nu winak, ri aj Nefitas, pa conojel tak tinimit y pa conojel tak cʼolibal. Y man cäcanaj tä jun chic. Y nim e tzakinak wi. Kas jeʼ, bantajinak jun nimalaj y mayalaj sachibal qui wäch nu winak, ri aj Nefitas.

8 Chiwilampeʼ, bantajinak ronojel waʼ rumal ri u kʼab ri Ajawaxel. Chiwilampeʼ cʼut, xukujeʼ ri aj Lamanitas cätajin quechʼoʼjinic cachbil quib. Y man cʼo tä u qʼuisic ri qui cämisabal quib, y ri u turuwisabal qui quiqʼuel cho ronojel u wäch ri ulew. Y man cʼo tä jun ri retaʼm jampa cäqʼuis na u banic ri chʼoʼj.

9 Chiwilampeʼ cʼut, wachanim cʼu riʼ, man cʼo tä chic ri quinbij chquij ri e areʼ. Xak xuwi e cʼo aj Lamanitas y elakʼomab cho ri u wäch we ulew. Man cʼo tä juleʼ winak chic.

10 Are cʼu riʼ, man e cʼo taj ri quechʼobow ri u wäch ri Dios re kastzij. Xak xuwi ri u tijoxelab ri Jesús quechʼobowic. Areʼ cʼut xecanaj canok waral pa we tinimit cʼä xban sibalaj nim ri itzel tak qui chac ri winak. Cʼäte cʼu riʼ, ri Ajawaxel man xuyaʼ tä cʼolibal rech quecʼojiʼ chquixol ri winak. Y man cʼo tä jun ri retaʼm we tä e cʼolic cho ri uwächulew, o we tä man e cʼo taj.

11 Chiwilampeʼ cʼut, uj, ri in tat y ri in, uj e kilom wi. Areʼ qui banom lokʼalaj qui chac chkaxol.

12 Apachin cʼut ri cäcʼamow we tzʼib, are cächʼobow na ri jastak nim na qui banic. Are riʼ, we tä man cubij tä etzelanic che rumal man sucʼum tä ri u banic. Chiwilampeʼ, in ri Moroni, y ri in quinkʼalajisaj tä na ronojel ri jastak chiwe, we tä yatalic chwe.

13 Chiwilampeʼ, quinqʼuis u banic nu tzijonic chquij we winak. In ri u cʼojol ri Mormón, y ri in tat ri rijaʼlil ri Nefi.

14 In cʼu riʼ, quincʼuʼ wi we tzʼib che tak u beyal ri Ajawaxel. We chʼichʼ riʼ man cʼo tä rajil rumal rech ri u takbal ri Ajawaxel. Ri areʼ kas u bim chi man cʼo tä jun ri cäcʼojiʼ na we chʼichʼ rucʼ chuchʼequic ri u puak. Are cʼu riʼ ri jun tzijobal ri cäjuchʼ chrij we xaxalaj tak chʼichʼ, are ri sibalaj nim u patan. Y ri Ajawaxel cutewichij na ri jun ri quesaj na chi sak.

15 Man cʼo tä cʼu jun cʼo ri u cuinem rucʼ chresaxic chi sak we tä ma tä yatal che rumal ri Dios. Are riʼ ri u rayibal ri Dios, chi quesax na chi sak xak xuwi chunimarisaxic u kʼij ri Dios, y che ri u banic utzil paquiwiʼ ri u tinimit ri Ajawaxel ri u yaʼom u tzij chque areʼ. Areʼ riʼ jun ojer tinimit, ri e jabuninak apan najtir canok.

16 Y tewichital baʼ ri jun ri quesaj na waʼ chi sak. Are cʼut quesax na chupam ri kʼekum chi sak. Jewaʼ cʼut cubij ri u tzij ri Dios. Kas jeriʼ, cäcʼamtaj na bic riʼ chupam ri ulew, y cäjuluw na apan pa ri kʼekum. Y cächʼobtaj na cumal ri winak. Y cäban na ronojel waʼ rumal ri u cuinem ri Dios.

17 Y we tä cʼo jun tzij ri man sucʼ tä u banic, are riʼ ri u banom jun achi. Kas cʼu riʼ, we tä cʼo jun tzij ri man sucʼ tä u banic, kastzij man ka chʼobom taj. Pune Dios cʼut are retaʼm ronojel. Rumal cʼu riʼ, apachin ri cubij etzelanic puwiʼ waʼ, rilaʼ baʼ rib. Are riʼ cʼo chunakaj ri retzelaxic u wäch pa ri kʼakʼ re ri xibalba.

18 Y ri jun ri cubij: Chacʼutuʼ baʼ chnuwäch, y we man caban tä jewaʼ catinsoco. Apachin cʼu ri cubij jewaʼ, rilaʼ baʼ rib, rumal we ne cuban jun takbal awas ri man utz taj u bim ri Ajawaxel.

19 Chiwilampeʼ cʼut, we tä jun winak cukʼat na tzij puwiʼ jun chic rucʼ chʼuʼjilal, areʼ junam riʼ, are cäkʼat na puwiʼ ri areʼ, rucʼ jun etzelal. Are cʼut cätoj areʼ je ri u beyal ri u banom. Te cʼu riʼ, apachin ri cäsoconic, areʼ riʼ cäsoc na ri u wäch jumul chic rumal ri Ajawaxel.

20 Chiwilampeʼ cʼut, jas cubij ri jun lokʼalaj tzʼibatalic: Ri achi man cusoc taj, mawi man cukʼat tä tzij. Xak xuwi ri in quinkʼatow tzij, cächa ri Ajawaxel. Y xak xuwi ri in quintzelej u qʼuexel ri cʼäx paquiwiʼ ri xebanow cʼäx, y ri in quintoj na u qʼuexel ri qui banom.

21 Y cʼo jujun ri cäquibij na tak tzij re oyowal y re chʼoʼj. Quechʼachʼatic chrij ri lokʼalaj u chac ri Ajawaxel. Quechʼachʼatic chquij ri u tinimit ri Ajawaxel ri qui yaʼom qui tzij che, are ri rachoch ri Israel. Cäquibij na jewaʼ riʼ: Uj cäketzelaj na ri lokʼalaj u chac ri Ajawaxel. Y ri Ajawaxel man cunatajisaj tä na ri lokʼalaj tzij u yaʼom ulok chque ri e aj rachoch ri Israel. Apachin cʼut ri cubij jewaʼ riʼ, areʼ cuyaʼ rib rech cätʼoyic y che u qʼuiakic pa ri kʼakʼ.

22 Are cʼut cätakex na u banic ri lokʼalaj u chac ri Ajawaxel cʼä pa ri tzʼakatisabal ronojel yabal u tzij.

23 Chinicʼoj cʼut ri kʼalajisabal che ri cäpe na ri xubij ri Isaías. Chiwilampeʼ man quincuin tä che qui tzʼibaxic. Kas jeʼ quinbij chiwe chi e cʼo sibalaj tak chʼajchʼojaxelab ri e benak nabe chnuwäch in, y ri e areʼ cʼut xquechbej we ulew riʼ. Are cʼut tzpa ri cʼajcʼaj ulew cäquichʼabej ri Ajawaxel. Y kastzij ri e areʼ cäquinatajisaj na ri tzij ri xuyaʼ chque. Kastzij riʼ xak junam chi kastzij cʼaslic ri Ajawaxel.

24 Ri areʼ cʼut retaʼm jas u sucʼ ri tak qui chʼawem che, retaʼm chi qui banom tabal rumal quech ri cachalal. Ri areʼ cʼut retaʼm jas u sucʼ ri cojobal, rumal rech chi xecuin che qui slabaxic tak juyub pa ri u biʼ. Y pa ri u biʼ, xquibirbatisaj ri uwächulew. Y pa ri u chukʼab ri tzij ri areʼ xquitzak tak cheʼ pa ulew. Mawi ri tuj ri man xcuin taj xuban cʼäx che qui cʼatisaxic chque. Man xetzelex tä qui wäch cumal itzel tak awaj re juyub, mawi xukujeʼ cumal tak ri cumätz ri cʼo ri u qui. Ronojel waʼ rumal ri u cuinem ri u tzij.

25 Chiwilampeʼ, xquiban tak qui chʼawem che ri Ajawaxel. Xquitaʼ tokʼob che ri Ajawaxel puwiʼ ri jun ri cuyaʼ na che chresaxic ronojel waʼ chi sak.

26 Y man cʼo tä jun ri cubij na chi man quepe tä na ulok we jastak. Kastzij quepe na ulok, rumal chi jewaʼ u bim ri Kajawal. Y quebel na ulok chupam ri ulew, rumal ri u kʼab ri Ajawaxel, y man cʼo tä jun ri cutanabaʼ. Y cäcʼulmax na waʼ pa jun kʼij ri cäbix chi man cäban tä chi tak mayibal. Y cäcʼulmax na waʼ je jun cäminak cätzijonic.

27 Cäcʼulmax na waʼ pa jun kʼij are ri chʼajchʼojoxelab e cäminakib cäquisiqʼuij ri Ajawaxel rumal ri qui quiqʼuel xturuwisax y cumal ri itzel tak jastak chi cʼuyal, y ri itzel tak qui chac re kʼekumal.

28 Kas jeʼ, cäcʼulmax na waʼ pa ri jun kʼij are cäbix na chi man cʼo tä u chukʼab ri Dios. Y conojel ri e cʼo pa ri nicʼaj iglesias chic quetzʼilox na, y cäquinimarisaj na quib pa canimaʼ. Kas jeʼ, cäcʼulmax na waʼ pa ri jun kʼij ri cʼamal tak qui be ri iglesias chic y ri ajtijab xukujeʼ are cäquinimarisaj na quib pa canimaʼ cʼä itzel quil wi ronojel ri quetanic cucʼ ri nicʼaj iglesias chic.

29 Kas cäcʼulmax na waʼ pa ri jun kʼij ri cätatabex na ri u bixical tak cʼatinic y tak cakuljaʼ, y cätatabex na u bixical chi cʼo ri ruxlab ri sib pa juleʼ ulew chic, e naj e cʼo wi.

30 Y cätatabex na chi cʼo tak chʼoʼj. Cätatabex na u bixical tak chʼoʼj. Cätatabex na chi cʼo tak cabrakän pa tak juleʼ cʼolibal.

31 Kas jeʼ cäcʼulmax na pa ri jun kʼij ri nim tak tzʼilol ri cäbantaj na cho ri ulew, ri kʼij re cämisanic, re elakʼ, re banow tzij, ri kʼij re subunic, re joxonic, y re ronojel u wäch itzel tak chac. Cäcʼulmax na pa ri jun kʼij ri e qʼui winak cäquibij na: Chabanaʼ waʼ, chabanaʼ laʼ, y man cʼo tä a mac chubanic. Ri Ajawaxel man cuchʼob tä waʼ pa ri qʼuisbal kʼij. Xane tokʼob qui wäch riʼ, e kas cʼo pa ri u cʼayil ri cʼäxcʼol, e yutʼum che ri etzelal.

32 Kas jeʼ, cäcʼulmax na waʼ pa ri kʼij are quemulitaj na qʼui tak iglesias chic, y cäquibij na: Tisaj ulok wucʼ, y cäcuyutaj na i mac che u qʼuexel i puak.

33 Ix, ix jun itzelalaj y jechʼelaj winak, ¿Jasche e i mulim tak winakil iwachbil iwib rech quichʼic i puak? ¿Jasche i qʼuexom u banic ri u tzij ri Dios, rech jewaʼ quicʼam ulok ri cʼajisabal wächaj pa iwanimaʼ? Chiwilampeʼ ri tak u cʼutatajic ri Dios. Chanim cʼut cäpe ri kʼij re ri u tzʼakatisaxic u banic ronojel waʼ.

34 Chiwilampeʼ, ri Ajawaxel u cʼutum nimalaj y mayalaj jastak chwe. U cʼutum jas ri cäpe na chanim chic, ri cäpe na pa ri u kʼij ri cäcʼulmataj ronojel waʼ chixol.

35 Chiwilampeʼ, täjin quinchʼaw chiwe je tä ne ix cʼo chnuwäch. Xane man ix cʼo taj. Tzare ri Jesucristo ix u cʼutum chnuwäch, je cʼu riʼ wetaʼm jas ri quibano.

36 Wetaʼm cʼut chi ri ix xak quixbinic, quinimarisaj iwib pa iwanimaʼ. Y xaʼ cʼo jujun ri man cunimarisaj tä rib pa ranimaʼ. Xak cʼo jujun ri man cäquinimarisaj tä quib, xane cäquicoj ri pakalic tak catzʼiak, cäquirayij ri jastak re jun winak chic. Cʼo chʼoʼj ri cäban chquixol, cʼo noʼj pa canimaʼ chubanic ri etzelal chrij jun chic. Queyokʼon chquij ri nicʼaj winak chic, y cäquiban ronojel u wäch ri itzel tak qui chac. E tzʼilom ri tak i iglesias chquijujunal. Waʼ rumal ri nimarisam ib pa ri iwanimaʼ.

37 Chiwilampeʼ, kas quilokʼokʼej ri i puak, y ri i jastak, y ri pakal tak iwatzʼiak. Y quilokʼokʼej u wikobal ri tak ja re mulim ib. Nim na u banic ri i lokʼokʼenic che ronojel waʼ chuwäch ri i lokʼokʼenic chque ri mebayib y ri winak ri man cʼo tä qui jastak, y chque ri yawabib y ri winak ri qui rikom cʼäx.

38 Ixʼix tzʼilalaj winak, ix ri banel quieb i wäch, ix ajtijonelab. Quicʼayij i cʼaslemal chucʼamic ri jastak ri cäquichuluj quib. ¿Jasche i tzʼilom ri u winakil ri Dios? ¿Jasche quixej iwib chucʼamic ri u biʼ ri Cristo piwiʼ? Ri junalic quicotemal are nim na u banic chuwäch ri jun bis ri man cäqʼuis taj. ¿Jas u beyal ri i chomanic che? Man quicoj tä waʼ rumal ri u nimarisaxic i kʼij ri cäbanic cumal ri winak cho ri uwächulew. ¿Jasche quichomaj jewaʼ?

39 ¿Jasche quixwikonic che tak ri jastak? Are riʼ man e cʼas taj. Are cʼu riʼ, quebiyaʼ can ri winak ri quenumic, y ri winak ri man cʼo tä cucʼ jas rajwaxic chque, y ri e chʼanalic. Y quebiyaʼ can ri e yawabib y ri winak ri qui rikom cʼäx. ¿Jasche quekʼax chiwäch y man quebiwil tä apanok?

40 Kas jewaʼ, ¿jasche quiwalajisaj ri itzel tak jastak chi cʼuyal rech quicʼam i chʼecoj? ¿Jasche quiban etzelal rech cʼu jewaʼ quebokʼ ri malcaʼn ixokib chuwäch ri Ajawaxel? Quebokʼ chuwäch ri Ajawaxel ri acʼalab ri man cʼo tä qui nan qui tat, y xukujeʼ ri qui quiqʼuel ri cachajil y qui tat cusiqʼuij apan chupam ri ulew che ri Ajawaxel chi cutzelej u qʼuexel ri cʼäx piwiʼ?

41 Chiwilampeʼ, ri machet rech kʼatbal tzij cäraj cuban cʼäx piwiʼ. Chanim cäpe ri jun kʼij ri cutzelej na ri cʼäx piwiʼ rumal ri qui quiqʼuel turuwisam ri i banom chque ri chʼajchʼojoxelab. Man cukʼiʼ tä chic ri u pa qui chiʼ re tabal tokʼob.