1 O lenei, o a’u, o Moronae, ou te tusia lava ni mea ou te manatu lava a’u ua lelei; ma ou te tusi atu i o’u uso, o sa Lamanā; ma ou te manao ia latou iloa ua sili atu i le fa selau ma le lua sefulu tausaga ua mavae atu talu ona tuuina mai o le faailoga o le afio mai o Keriso.

2 Ma ou te faamaufaailogaina nei talafaamaumau, pe a uma ona ou tautala atu ni nai upu itiiti e ala i le apoapoai atu ia te outou.

3 Faauta, ou te apoapoai atu ia te outou pe a outou faitauina nei mea, pe afai e tusa ai ma le fingalo poto o le Atua ia outou faitauina, ina ia outou manatua ai le alofa mutimutivale tele o le Alii i le fanauga a tagata, mai i le foafoaga o Atamu seia oo mai lava i le taimi o le a outou maua ai nei mea, ma manatunatu i ai i o outou loto.

4 Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua lē moni ea nei mea; ma afai tou te ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.

5 Ma o le mana o le Agaga Paia e mafai ona outou iloa ai le moni o mea uma lava.

6 Ma o soo se mea ua lelei ua tonu ma moni; o le mea lea, e leai se mea ua lelei e faafitia le Keriso, ae tautino mai o loo soifua o ia.

7 Ma e mafai ona outou iloa o loo soifua o ia, i le mana o le Agaga Paia; o le mea lea ou te apoapoai atu ai ia te outou ia outou le faafitia le mana o le Atua; auā e galue o ia e ala i le mana, e tusa ma le faatuatua o le fanauga a tagata, e tutusa i le asō ma taeao, ma le faavavau.

8 O lenei foi, ou te apoapoai atu ia te outou, o’u uso e, ia outou le faafitia meaalofa a le Atua, ona e tele i latou; ma ua foaiina mai i latou mai le Atua e tasi. Ma e eseese ala e faatino ai ia meaalofa; ae o le Atua e tasi o lē na te galueaiina i soo se mea ma i mea uma; ma ua tuuina mai nei meaalofa e ala i faaaliga a le Agaga o le Atua i tagata, ina ia manuia ai i latou.

9 Auā faauta, ua tuuina mai i le tasi e le Agaga o le Atua, ina ia mafai ona ia a’oa’o atu le upu o le poto;

10 Ma i le isi, ina ia mafai ona ia a’oa’o atu le upu o le malamalama e le Agaga lava lea e tasi;

11 Ma i le tasi, o le faatuatua tele naua; ma i le isi, o meaalofa o faamalologa e ala i le Agaga e tasi;

12 O lenei foi, i le tasi, ina ia mafai ona ia faia vavega tetele;

13 O lenei foi, i le isi, ina ia mafai ona ia vavalo e uiga i mea uma;

14 O lenei foi, i le tasi, o le vaaia o agelu ma agaga o auaunaga;

15 O lenei foi, i le isi, o ituaiga uma o gagana;

16 O lenei foi, i le tasi, o le faaliliuga o gagana ma ituaiga o gagana eseese.

17 Ma o nei meaalofa uma e oo mai e ala i le Agaga o Keriso; ma e oo mai i latou i tagata uma taitoatasi, e tusa ma lona finagalo.

18 Ma ou te apoapoai atu ai ia te outou, o’u uso pele e, ia outou manatua o meaalofa lelei uma e mai ia Keriso.

19 Ma ou te fia apoapoai atu ia te outou, o’u uso pele e, ia outou manatua e tutusa o ia ananafi, le asō, ma le faavavau, ma o nei meaalofa uma ua ou tautala atu ai, ua faaleagaga ia, o le a le aveesea lava, pe o le a lava le umi e i ai le lalolagi, ae na’o le tusa ai ma le lē talitonu o le fanauga a tagata.

20 O le mea lea, e tatau ai ona i ai o le faatuatua; ma afai e tatau ona i ai o le faatuatua e tatau foi ona i ai o le faamoemoe; ma afai e tatau ona i ai o le faamoemoe, e tatau foi ona i ai o le alofa mamā.

21 Ma e vagana ai ua ia te outou le alofa mamā e le mafai lava i se ala ona faaolaina outou i le malo o le Atua; pe mafai foi ona faaolaina outou i le malo o le Atua pe afai e le ia te outou le faatuatua; pe mafai foi e outou pe afai e leai so outou faamoemoe.

22 Ma afai e leai so outou faamoemoe ua tatau ona outou lotovaivai; ma e oo mai le lotovaivai ona o le amioletonu.

23 Ma sa fetalai lava Keriso i o tatou tamā: Afai e ia te outou le faatuatua, e mafai ona outou faia o mea uma e tatau ai ia te a’u.

24 Ma ou te tautala atu nei i tuluiga uma o le lalolagi—afai e oo mai le aso e aveesea ai le mana ma meaalofa a le Atua mai totonu o outou, o le a faapea lava ona o le lē talitonu.

25 Ma oi talofa i le fanauga a tagata pe afai o le tulaga lea; ona o le a leai se tasi i totonu o outou e faia le lelei, e leai, e leai lava se tasi. Auā afai e i ai se tasi i totonu o outou e faia le lelei, o le a galue o ia i le mana ma meaalofa a le Atua.

26 Ma oi talofa ia te i latou o ē latou te le faia o nei mea ma feoti, ona latou te oti i a latou agasala, ma e le mafai ona faaolaina i latou i le malo o le Atua; ma ou te tautala atu lenei mea e tusa ma afioga a Keriso; ma ou te le pepelo lava.

27 Ma ou te apoapoai atu ia te outou ia outou manatua nei mea; ona e vave ona oo mai o le taimi o le a outou iloa ai ou te le pepelo, auā o le a outou vaai ia te a’u i le pa faamasino a le Atua; ma o le a fetalai mai le Alii le Atua ia te outou: Ou te le’i alaga atu ea ia te outou a’u upu, ia sa tusia e lenei tagata, e pei o sē tasi ua alaga mai ē ua oti, ioe, e faapei lava o sē tasi ua tautala mai i le palapala?

28 Ou te tautino atu nei mea i le faataunuuina o valoaga. Ma faauta foi, o le a tulei mai i latou mai le fofoga o le Atua tumau e faavavau; ma o le a oo malosi atu lana afioga mai lea tupulaga i lea tupulaga.

29 Ma o le a faaali atu e le Atua ia te outou, ua moni mea ua ou tusia.

30 Ma ou te toe apoapoai atu ia te outou, ia outou o mai ia Keriso, ma taofimau i meaalofa lelei uma, ma aua le pa’i atu i le meaalofa leaga, po o le mea ua lē mamā.

31 Ma ia ala mai, ma tulai mai i le palapala, Ierusalema e; ioe, ma ofu ou ofu matagofie, le afafine e o Siona; ma faamalolosi ou siteki ma faalautetele ou tuaoi e faavavau, ina ia lē toe faafenumiaiina oe, ina ia mafai ona faataunuuina o feagaiga a le Tamā Faavavau na faia e ia ia te oe, le aiga e o Isaraelu.

32 Ioe, o mai ia Keriso, ma faaatoatoaina ia te ia, ma faafitia outou lava mai mea uma e lē faaleatua; ma afai tou te faafitia outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso; ma afai tou te atoatoa ia Keriso e ala i le alofa tunoa o le Atua, e leai se ala e mafai ai ona outou faafitia le mana o le Atua.

33 Ma o lenei foi, afai tou te atoatoa ia Keriso e ala i le alofa tunoa o le Atua, ma lē faafitia lona mana, ona faapaiaina lea o outou ia Keriso i le alofa tunoa o le Atua, e ala i le faamaligiina o le toto o Keriso, lea ua i ai i le feagaiga a le Tamā mo le faamagaloina o a outou agasala, ina ia outou paia, ua aunoa ma se ila.

34 Ma o lenei ou te fai atu ia te outou uma, faasoifua ia. Ua lata ona ou alu atu e malolo i le parataiso o le Atua, seia toe faatasia lo’u agaga ma lo’u tino, ma aumai a’u i le ea ma le manumalo, e feiloai ma outou i luma o le pa faamasino logomalie a le Ieova silisili, le Faamasino Faavavau o ē o ola ma e ua oti. Amene.