E pei ona faaaogaina i tusitusiga paia, o le togiolaina o le mafatia lea i le faasalaga ona o se agasala na faia, o le a mafai ai ona aveese le taunuuga o le agasala mai le tagata agasala ua salamō ma faatagaina ai o ia e toe lelei ma le Atua. E naʼo Iesu Keriso lava le toatasi e mafai ona faia se togiola atoatoa mo tagata uma. Sa mafai e ia ona faia lea mea auā sa filifilia ma faauuina ai o ia i le Fono Sili a o lei faia le lalolagi (Eteru 3:14; Mose 4:1–2; Ape. 3:27), ona o lona tulaga paia Faale-Atalii, ma lona olaga e aunoa ma le agasala. O lana togiola e aofia ai lona mafatiaga ona o agasala a tagata i le Faatoaga o Ketesemane, le faamasaaina o lona toto, lona maliu ma lona toetu mai mai le tuugamau (Isai. 53:3–12; Mosaea 3:5–11; Alema 7:10–13). Ona o le Togiola, o le a toetutū ai tagata uma mai le oti ma tino ola pea (1 Kori. 15:22). O le Togiola ua saunia ai foi le ala mo i tatou e faamagaloina ai a tatou agasala ma ola ai e faavavau ma le Atua. Ae peitai o se tagata ua oo atu i tausaga e faamasino ai ma ua maua le tulafono, e na ona mafai ai ona maua nei faʼamanuiaga pe afai ua faatuatua o ia ia Iesu Keriso, ua salamo i ana agasala, ua maua sauniga o le faaolataga, ma usiusitai i poloaiga a le Atua. O i latou o e lei oo atu i tausaga e faamasino ai ma i latou ua aunoa ma le tulafono ua togiolaina i latou na e ala i le Togiola (Mosaea 15:24–25; Moro. 8:22). Ua manino ona aoao mai i tusitusiga paia ana fai e lei togiolaina e Keriso a tatou agasala, e leai se tulafono, e leai se sauniga, po o se taulaga e mafai ona faamalie ai manaoga o le faamasinogatonu, ma e le mafai lava e le tagata ona toe maua le afioaga o le Atua (2 Ni. 2; 9).