O le fesootaiga mai le Atua i lana fanau i luga o le lalolagi. O faaaliga e mafai ona oo mai e ala i le Malamalama o Keriso ma le Agaga Paia e ala lea i le musumusuga, faaaliga vaaia, miti, po o asiasiga e agelu. O faaaliga e maua mai ai le taitaiga e mafai ona taitai atu ai le au faatuatua i le faaolataga e faavavau i le malo selesitila.
E faaali mai e le Alii lana galuega i ana perofeta ma faamaonia ai i e talitonu le moni o faaaliga na tuuina mai i perofeta (Amo. 3:7). E ala i faaaliga, ua saunia ai e le Alii le taitaiga mo tagata taitoatasi o e ua saili i ai ma e ua maua le faatuatua, salamo, ma ua usiusitai i le talalelei a Iesu Keriso. “O le Agaga Paia o se e tuu maia faaaliga,” le saunoaga a Iosefa Samita, ma “e leai se tasi e mafai ona maua le Agaga Paia e aunoa ma le mauaina o faaaliga.”
I le Ekalesia a le Alii, o le Au Peresitene Sili ma le Korama a Aposetolo e Toasefululua o ni perofeta, tagatavāai, ma talifaaaliga i le Ekalesia ma le lalolagi. O le Peresitene o le Ekalesia ua nao ia lava le toatasi ua faatagaina e le Alii e mauaina faaaliga mo le Ekalesia (MF&F 28:2–7). E mafai e tagata taitoatasi ona maua faaaliga mo lona lava lelei.