1 Ket ita kinuna ni Abinadi kadakuada: Kayatko a maawatanyo a mismo a ti Dios ti bumabanto kadagiti annak ti tattao, ken subbotenna dagiti taona.

2 Ket gapu ta agtaengto a nainlasagan maawaganto iti Anak ti Dios, ken gapu ta impasakupna ti lasag iti pagayatan ti Ama, ta isu ti Ama ken ti Anak—

3 Ti Ama, agsipud ta nainaw babaen iti bileg ti Dios; ken ti Anak, gapu iti lasag; isu a nagbalin nga Ama ken Anak—

4 Ket maymaysada a Dios, wen, ti pudno nga Agnanayon nga Ama iti langit ken iti daga.

5 Ket kasta nga agpasakup ti Espiritu ti lasag, wenno ti Anak iti Ama, a maymaysa a Dios, agsagaba iti pannulisog, ket saan a simmuko iti pannulisog, ngem impalubosna ti bagina a mauyaw, ken masaplitan, ken mapapanaw, ken mailaksid dagiti taona.

6 Ket kalpasan amin daytoy, kalpasan ti panagaramidna iti adu a naindaklan a milagro kadagiti annak ti tattao, maabogto, wen, a kas iti kinuna ni Isaias, a kas iti umel a karnero iti sango ti mammukis, saanna ngarud innganga ti ngiwatna.

7 Wen, uray kasta maabogto, mailansa iti krus, ken mapapatay, agpasakup ti lasag uray inggana patay, maipamaysanto ti pagayatan ti Ama ti pagayatan ti Anak.

8 Ket isu a pugsatento ti Dios dagiti bedbed ti ipapatay, ta nagun-odna ti balligi ken patay; inikkanna ti Anak iti bileg a mangaramid iti panangibabaet kadagiti annak ti tattao—

9 Gapu ta nagpangaton iti langit, gapu ta addaan kadagiti lalaem ti panangngaasi; napnuan ti pannakipagrikna kadagiti annak ti tattao; sitatakder iti nagbaetanda ken iti hustisia; napekkanan ti bedbed ti ipapatay, inako ti bagina ti kinadangkes ken dagiti panaglabsingda, nasubbotnan ida, ken nasungbatanna dagiti kalikagum ti hustisia.

10 Ket ita kunak kadakayo, asinonto ti mangipakdaar iti sangkaputotanna? Kitaen, kunak kadakayo, nga inton maidaton ti karuruana para iti basol makitananto ti kaputotanna. Ket ita ania ti makunayo? Ken asinonto ti kaputotanna?

11 Kitaen kunak kadakayo, nga asino man ti dimngeg kadagiti balikas dagiti propeta, wen, iti amin a nasantuan a propeta a nangipadton maipanggep iti yaay ti Apo—kunak kadakayo, nga amin kadagiti nangipangag kadagiti balikasda, ken namati a subboten ti Apo dagiti taona, ken nangnamnama iti dayta nga aldaw para iti pannakaugas kadagiti basolda, kunak kadakayo, a dagitoy dagiti kaputotanna, wenno isuda dagiti agtawid iti pagarian ti Dios.

12 Ta dagitoy dagiti nakaipuonan nga isuna ti nangibaklay ti basbasolda; dagitoy dagiti nakaipuonan ti ipapatayna, tapno subbotenna ida manipud kadagiti panaglabsingda. Ket ita, saan kadi a kaputotanna ida?

13 Wen, ken saan kadi a dagiti propeta, tunggal maysa a nangungap iti ngiwatna tapno mangipadto, a saan a natnag iti panaglabsing, kayatko a sawen dagiti amin a nasantuan a propeta manipud pay idi punganay ti lubong? Kunak kadakayo a kaputotanna ida.

14 Ket isuda dagitoy nangipakaammo iti kappia, a nangyeg iti naimbag a damag ti naimbag, a nangipakaammo ti pannakaisalakan; ken nagkuna iti Zion: Agturay ti Diosyo!

15 Ket O anian ti kinapintas kadagiti bambantay dagiti sakada!

16 Ket manen, anian ti kinapintas kadagiti bambantay dagiti saka dagidiay mangipakpakaammo pay laeng iti kappia!

17 Ket manen, anian ti kinapintas kadagiti bambantay dagiti saka dagidiay mangipakaammonto iti kapia manipud ita, wen, manipud itoy a kanito ken iti agnanayon!

18 Ket kitaen, kunak kadakayo, saan laeng a dagitoy. Ta O anian ti kinapintas kadagiti bambantay dagiti saka ti mangyeg iti naimnag a damag, nga isu ti namunganay iti kappia, wen, nga isu ti Apo, a nangsubbot kadagiti taona; wen, isu a nangipaay iti pannakaisalakan kadagiti taona;

19 Agsipud ta no saan a gapu iti pannubbot nga inaramidna para kadagiti taona, a naisagana manipud iti pundasion ti lubong, kunak kadakayo, no saan a gapu kadaytoy, nasken nga amin a sangatauan ket naungawen.

20 Ngem kitaen, mapekkanto ti bedbed ti ipapatay, ket agturayto ti Anak, ket adda bilegna kadagiti natay; ngarud, ipatungpalna ti panagungar dagiti natay.

21 Ket dumteng ti panagungar, uray ti umuna a panagungar; wen, uray iti panagungar dagidiay immunan, ken dagiti agdama, ken dagiti sumarsaruno, uray pay agingga iti panagungar ni Cristo—ta isu ti awagto kenkuana.

22 Ket ita, ti panagungar dagiti amin a propeta, ken amin dagidiay namati kadagiti balikasda, wenno amin dagiti nangtungpal kadagiti bilin ti Dios, bumangonto iti umuna a panagungar; ngarud, isuda ti umuna a panagungar.

23 Napagungarda tapno makipagnaed iti Dios a nangsubbot kadakuada; isu nga addaanda iti agnanayon a biag babaen ni Cristo, a nangpekka iti bedbed ti ipapatay.

24 Ket dagitoy dagidiay adda lugarna iti umuna a panagungar; ket isuda dagiti natay sakbay a dimteng ni Cristo, iti kinakunengda, saan a naipakaammo ti pannakaisalakan kadakuada. Ket isu nga ipatungpal ti Apo ti pannakaisubli dagitoy; ket adda lugarda iti umuna a panagungar, wenno addaan iti agnanayon a biag, kas sinubbot ti Apo.

25 Ket addaan met dagiti ubbing iti agnanayon a biag.

26 Ngem kitaen, ken agbutengkayo, ken agpigergerkayo iti sanguanan ti Dios, ta nasken nga agpigergerkayo; ta awan ti subboten ti Apo nga sumupring kenkuana ken matay kadagiti basolda; wen, uray pay amin dagiti naungaw kadagiti basolda manipud pay idi punganay ti lubong, a nangiranta a nagsupring maibusor iti Dios, a makaammon kadagiti bilin ti Dios, ken saanda a tungpalen; dagitoy dagiti awanan iti lugar iti umuna a panagungar.

27 Ngarud saankayo kadi agpigerger? Agsipud ta awan ti pannubot a dumteng iti kakasta; agsipud ta awan ti kasta a sinubbot ti Apo; wen, ken saan a masubbot ti Apo ti kasta; agsipud ta saanna mailibak ti bagina; agsipud ta no tuntonen ti hustisia saanna mailibak daytoy.

28 Ket ita kunak kadakayo a dumtengto ti kanito a maiwaragawagto ti panangisalakan ti Apo iti tunggal pagilian, puli, pagsasao, ken tattao.

29 Wen, Apo, dagiti bantaymo ket agpukkawto; sangsangkamaysadanto nga agkanta; agsipud ta agkikitadanto, inton iyeg manen ti Apo ti Zion.

30 Agrag-okayo, agkantayo a sangsangkamaysa, dakayo a nabaybay-an a luglugar ti Jerusalem; agsipud ta liniwliwa ti Apo dagiti taona, sinubbotna ti Jerusalem.

31 Impakita ti Apo ti nasantuan a takiagna iti amin a pagilian; ket makitanto ti amin nga ungto ti daga ti panangisalakan ti Diostayo.