Dios, Kinadios
Adda tallo nga aggigidiat a tao iti Kinadios: ti Dios, ti Agnanayon nga Ama; ti Anakna, ni Jesucristo; ken ti Espiritu Santo. Mamatitayo iti tunggal maysa kadakuada (PP 1:1). Manipud iti paltiing iti ud-udina nga aldaw maadaltayo nga addaan lasag ken tulang ti Ama ken ti Anak ken kinatao ti espiritu ti Espiritu Santo, nga awanan lasag ken tulang (DkK 130:22–23). Naan-anay ti panagkaykaysa ken panagtutunos dagitoy tallo a tao iti panggep ken doktrina (Jn. 17:21–23; 2 Ne. 31:21; 3 Ne. 11:27, 36).
Dios Ama
Iti ababa a pannao isu ti Ama, wenno Elohim, nga isu ti maaw-awagan iti Dios. Maawagan iti Ama ta isu ti ama dagiti espiritutayo (Mal. 2:10; Num. 16:22; 27:16; Mat. 6:9; Ef. 4:6; Heb. 12:9). Ti Dios Ama ti kangatuan nga agturay iti sangalubongan. Adda kenkuana ti amin a bileg (Gen. 18:14; Alma 26:35; DkK 19:1–3), mannakaammo (Mat. 6:8; 2 Ne. 2:24), ken adda iti sadino man babaen ti Espirituna (Sal. 139:7–12; DkK 88:7–13, 41). Adda naisangayan a pagkanaigan ti sangkataw-an iti Dios a nakaisalsaluminaan ti tao kadagiti amin a dadduma a banag a naparsua: dagiti lallaki ken babbai ti espiritu nga annak ti Dios (Sal. 82:6; 1 Jn. 3:1–3; DkK 20:17–18).
Manmano ti naisurat a pasamak a panagparang ti Dios Ama a makisao iti tao. Kuna ti nasantuan a kasuratan a nakisao kada Adan ken Eva (Moises 4:14–31) ken inyam-ammona ni Jesucristo iti sumagmamano a gundaway (Mat. 3:17; 17:5; Jn. 12:28–29; 3 Ne. 11:3–7). Nagparang ken ni Esteban (Ara. 7:55–56) ken Joseph Smith (JS—P 1:17). Kalpasanna nagparang kada Joseph Smith ken Sidney Rigdon (DkK 76:20, 23). Kadagiti mangipateg iti Dios ken mangpasudi iti bagbagida iti imatangna, ited no dadduma ti Dios ti gundaway a makakita ken mangammo iti bagbagida nga isu ti Dios (Mat. 5:8; 3 Ne. 12:8; DkK 76:116–118; 93:1).
Dios nga Anak
Ti Dios nga am-ammo a Jehova ti Anak, ni Jesucristo (Isa. 12:2; 43:11; 49:26; 1 Cor. 10:1–4; 1 Tim. 1:1; Apoc. 1:8; 2 Ne. 22:2). Agtrabaho ni Jesus babaen ti panangiturong ti Ama ket naan-anay ti panagtunosda. Kabsatna amin a sangkataw-an, ta isu ti inauna kadagiti espiritu nga annak ni Elohim. Sumagmamano a pagsurotan iti nasantuan a kasuratan ti mangitudo kenkuana iti balikas a Dios. Kas pagarigan, kuna ti nasantuan a kasuratan a “Pinarsua ti Dios ti langit ken ti daga” (Gen. 1:1), ngem ni Jesus ti talaga a Namarsua babaen ti panangiturong ti Dios Ama (Jn. 1:1–3, 10, 14; Heb. 1:1–2).
Dios nga Espiritu Santo
Dios met ti Espiritu Santo ken maaw-awagan iti Nasantuan nga Espiritu, ti Espiritu, ken ti Espiritu ti Dios, malaksid kadagiti sabali pay a mayarngi a nagan ken awag. Babaen ti tulong ti Espiritu Santo, maammuan ti tao ti pagayatan ti Dios Ama ken maamuan a ni Jesus ti Cristo (1 Cor. 12:3).