1 Na bio m’enuanom, morobɔtwe hom adwen aba ha bio, osiandɛ mowɔ nsɛm pii kã kyerɛ hom; na hom nhwɛ, mowɔ nsɛm pii kã kyerɛ hom wɔ ndzɛmba a ɔbɛba ho.

2 Na nsɛm a merebɛkã akyerɛ hom yi Nyame no bɔfoe na ɔdaa no edzi kyerɛɛ me. Na ɔsee me dɛ: Soɛr; na mosoɛree, na hwɛ obegyinaa m’enyim.

3 Na ɔsee me dɛ; Soɛr, na tsie nsɛm a merebɛkã akyerɛ wo yi; na hwɛ, maba dɛ merebɛda nsɛm a ɔyɛ enyigye na ɔyɛ dɛw kɛse edzi akyerɛ wo.

4 Na Ewuradze atse wo mpaabɔ, na oehu wo tseneneeyɛ, na ɔasoma me dɛ membɛda no edzi nkyerɛ wo ama w’enyi aagye; ama aada no edzi akyerɛ wo nkorɔfo, ama hɔn so dɛw aahyɛ hɔn mã.

5 Na hwɛ mber reba, na onnyi ekyir, Ewuradze Otumfo a odzi hen no, nyia tsetse no na ɔwɔ hɔ, na ɔwɔ hɔ sesei fi mbersantsen nyina kesi mbersantsen nyina, dze tum befi sor esian adasamba mu, na ɔabɛfa dɛtse honandua ahyɛ, na oekyima adasa mu, ayɛ etumdze ndwuma akɛse, ɔbɛsa ayarfo yar, obenyan ewufo, ɔbɛma ebubuafo anantsew, efurafo ehu adze, etsitsifo atse asɛm, na ɔasã nyarba horow nyina.

6 Na ɔbɛpam mbɔnsam anaa esunsumfĩ a wɔtsetse adasamba hɔn akoma mu no efi hɔ.

7 Na hwɛ obehyia nsɔhwɛ nye ɔyaw, ɔkɔm, nsukɔm, ɔfona, na ɔbɔsɔw akyɛn ma ɔdasanyi botum asɔw mpo, dze ekesi owu mu; na hwɛ, bɔgya befi honam tokura biara mu egu, na n’amandzehu bɔdɔɔ sõ osian no nkorɔfo hɔn emumuyɛdze na ebusudze ntsi.

8 Na wɔbɛfrɛ no Jesus Christ, Nyame ne Ba, sor nye asaase Egya, adze nyina a ofi ahyɛse Bɔadze; na wɔbɛfrɛ ne nã Mary.

9 Na hwɛ ɔbɛba nankasa ne dze hɔ, ama sɛ wonya gyedzi wɔ ne dzin mu mpo a, nkwagye nam no mu aba adasamba do; na iyi nyina ekyir no mpo wobosusu dɛ ɔyɛ nyimpa, na wɔakã dɛ ɔwɔ sunsum bɔn, na wɔakã no mpire, na wɔabɔ no mbeamudua mu.

10 Na ɔbɔsoɛr wɔ da a otsĩa ebiasa no efi owu mu; na hwɛ, ogyina hɔ rubu wiadze atsɛn; na hwɛ, ɔayɛ ndzɛmba yi nyina ama atsɛmbu tsenenee aaba adasamba do.

11 Na hwɛ, no bɔgyaa so abɔ werdam dze etua bɔn a ɔwɔ hɔn a wɔahwe ase wɔ Adam ne mbrato ntsi no, hɔn a woewuwu a wonnyim Nyankopɔn ne pɛ a ɔfa hɔn ho anaa wɔyɛɛ bɔn a nna wonnyim.

12 Mbom ondue, ondue onyia onyim dɛ ɔretsew Nyankopɔn do etua! Osiandɛ nkwagye mmba obiara a ɔtse dɛm do gyedɛ dza oenya nnuho, na ɔwɔ gyedzi wɔ Ewuradze Jesus Christ mu.

13 Na Ewuradze Nyankopɔn asoma no nkɔnhyɛfo krɔnkrɔn wɔ adasamba nyina mu, dɛ wɔnda ndzɛmba yinom edzi nkyerɛ ebusuafo, aman, nye kasa horow nyina, ama obiara a ɔbɛgye edzi dɛ Christ bɛba no, eenya bɔnfakyɛ, na ɔdze enyigye edzi dɛw kɛsenara, tse dɛ ɔaba hɔn mu dada mpo.

14 Naaso Ewuradze Nyankopɔn hun dɛ no nkorɔfo no yɛ akɔnkyefo, na ɔmaa hɔn mbra, Moses mbra no mpo.

15 Na nsɛnkyerɛdze pii, na anwanwadze, na ngyinahɔmadze asorɔtow nye mununkum na oyii kyerɛɛ hɔn wɔ ne mbaa ho; nna nkɔnhyɛfo krɔnkrɔn so kãa ne mbaa no ho nsɛm; naaso wopiriim hɔn akoma, na wɔanntse ase dɛ Moses mbra no nnkã hwee dɛ, gyedɛ wɔnam no werdambɔ do.

16 Na sɛ ɔwɔ mu dɛ mbofra nkakraba mpo tum yɛ bɔn a wɔrenngye hɔn nkwa; mbom mekã kyerɛ hom dɛ woehyira hɔn; na hwɛ, dɛ ɔnam Adam do, anaa ɔnam abɔdze do wɔhwe ase a, dɛmara so na Christ no bɔgyaa bo hohor hɔn bɔn.

17 Na bio, mese hom dɛ dzin biara nnyi hɔ a wɔdze ama anaa kwan biara nnyi hɔ a wobodua do ama nkwagye aba adasamba do, gyedɛ ɔnam Christ, Ewuradze Tumfo nkotoo ne dzin mu.

18 Na hwɛ obua atsɛn, na n’atsɛmbu yɛ pɛrpɛr; na abofraba a owu wɔ ne mbafobermu no rennhera na nyimpa nom dza ɔyɛ afɔbu ma hɔnankasa hɔn akra, gyedɛ wɔbrɛ hɔnho adze na wɔbɛyɛ dɛ mbofra nkakraba, na wɔgye dzi dɛ nna nkwagye wɔ hɔ, na ɔda ho wɔ hɔ, na ɔbɛba, na ofi Christ, Ewuradze Tumfo no bɔgyaa a ɔdze bɔɔ werdam no mu bɛba.

19 Honammunyi no yɛ ɔtamfo ma Nyankopɔn, na ɔayɛ dɛm fitsi Adam n’asehweberdo, na ɔbɔkɔ do ayɛ dɛm afebɔɔ kesi afebɔɔ, gyedɛ ogyaa noho ma Sunsum Krɔnkrɔn no ne nkenyan, na ɔpɔr nyimpa su no gu nkyɛn na ɔnam Ewuradze Christ no werdambɔ no no do bɛyɛ ɔhotsewnyi, na ɔbɛyɛ dɛ abofra, na ogyaa noho ma; ɔdwe, ahobrɛadze, onya abotar, ɔdɔ hyɛ no mã, onya pɛ dɛ ɔbɔsɔw biribiara a Ewuradze noara nyim dɛ oye dɛ ɔdze ba no do, koraa mpo ɔyɛ dɛ mbrɛ abofra gyaa noho ma n’egya no.

20 Na bio, mese hom dɛ mber bi bɛba a Agyenkwa no ho nyimdzee bɛtahye ɔman biara, ebusuafo, kasa horow, nye nyimpa nyina mu.

21 Na hwɛ sɛ dɛm mber no du a, obiara rinndzi bem wɔ Nyame enyim, gyedɛ wɔyɛ mbofra nkakraba, na gyedɛ wɔnam nnuho na gyedzi a ɔwɔ Ewuradze Nyankopɔn Tumfo ne dzin mu.

22 Na obodu dɛm mber yi mpo, ber a akyerɛkyerɛ wo nkorɔfo ndzɛmba a Ewuradze wo Nyankopɔn ahyɛ wo no worinndzi bem wɔ Nyame enyim, wɔ nsɛm noara a makã akyerɛ wo no ntsi.

23 Na afei makã nsɛm a Ewuradze Nyankopɔn hyɛɛ me dɛ menkã no.

24 Na dɛm na Ewuradze se: Wobegyina dɛ dase a ɔhyerɛn dze etsia dɛm nkorɔfo yi wɔ atsɛmbu da no mu; hɔ na wobobu hɔn atsɛn, ɔdasanyi biara, dɛ mbrɛ no ndwuma tse, sɛ oye o, sɛ omuo o.

25 Na sɛ omuo a wobegya hɔn ma wɔahwɛ hɔnankasa hɔn fɔdzi na ebusudze huhu no, a ɔbɛma wɔawodow wɔ Ewuradze enyim dze hɔn akɔ awerɛhow na ahohyehye a onnyi ewiei mu, hɔ na wonnkotum asan hɔn ekyir bio; dɛm ntsi wɔanom afɔbu ama hɔnankasa hɔn akra.

26 Dɛm ntsi, wɔanom Nyame n’ebufuhyew kɔɔpow no ano, dza pɛrpɛrdzi enntum ennsiw ho kwan amma hɔn no, dɛ mbrɛ oenntum ennsiw ho kwan amma Adam ber a ɔwɔ dɛ ɔhwe ase wɔ ber a odzii eduaba no a wɔabra no; dɛm ntsi, wonnkohu hɔn mbɔbɔr bio ekesi afebɔɔ.

27 Na hɔn ahohyehye tse dɛ ogya baka nye brimstone a ɔdzɛw na onndum da, na no wusiw fow kɔ sor afebɔɔ kesi afebɔɔ. Dɛm na Ewuradze ahyɛ me dɛ menkã. Amen.