1 Jumul chic quinwaj chi quiwilo, wachalal, rumal cʼo na ri quinbij chiwe. Je baʼ, cʼo na chi quinbij chiwe chrij ri cäpe na.

2 Cʼu ri quinbij na chiwe, u kʼalajisam chnuwäch jun u takom aj chicaj rech ri Dios. Y areʼ xubij chwe: Chatwalajok, y xinwalajic. Je cʼu riʼ are cʼo chnuwäch.

3 Y xubij chwe: Chatawalajok, y chatatabej ri tzij ri quinbij na chawe, rumal cʼu ri in petinak che kʼalajisaxic chawe ri cʼacʼ tak tzij ri cäquiyaʼ quicotemal.

4 Rumal ri Kajaw u tom ri a chʼawem rucʼ, y u kʼatom tzij pa ri a suqʼuilal, y xinutak awucʼ che u kʼalajisaxic chawe rech sibalaj catquicotic na, y rech catzijobej waʼ chque ri a winak, rech ri areʼ quequicotic na xukujeʼ.

5 Je cʼu riʼ, cäpe na ri kʼij, y man naj tä riʼ, chi rucʼ ri u chukʼab, ri Kajawal, ri kas cuinel, ri cajawinic, ri xcʼojiʼc najtir, y ri cäcʼojiʼ chque conojel junalic tak cʼaslemal che conojel tak cʼaslemal, areʼ cäkaj na lok pa ri caj chquixol tak ri alcʼualab que ri achijab. Y cäcʼojiʼ na pa jun tiojil re xakʼol, y cäbec na chquixol ri achijab, y cuban nimalaj tak mayibal, jeʼ, quebucunaj na ri yawabib, quebucʼastaj na ri cäminakib, xukujeʼ cuban na chi quebinic ri winak quechʼocnajic chic. Cuban na chi cäquil na ri moyib, y cuban na cʼu chi cäquita ri tʼoyib, y cucunaj na jachique tak ri yabil.

6 Queresaj na cʼut ri itzelab, cʼu ri itzel tak uxlabal ri quecʼojiʼ pa ri canimaʼ ri calcʼual ri winak.

7 Chawilampeʼ, cukʼiʼ na takchibal che mac, y cʼäxcʼol pa ri u tiojil. Cʼo na u numical, cächakiʼj na u chiʼ, y cäcos na. Kas nim na chuwäch jachique tak cʼäxcʼol ri cukʼiʼ jun achi, man rucʼ tä waʼ cäcämic. Are cʼu jewaʼ, cäbuxlajic ri u quiqʼuel pa ri bakil, kas nim na ri u jikʼanem cumal ri qui mac y ri itzel jastak que ri u winak.

8 Y cäyataj na jun u biʼ, are ri Jesucristo, ri u Cʼojol ri Dios. Ri Tat re ri caj y ri uwächulew, ri Banal que conojel ri jastak tzpa ri tiquiribal, cʼo na ri u nan u biʼ, María.

9 Chawilampeʼ cʼut, are cäpe na cucʼ ri u winak rech jeriʼ copan ri colotajibal cucʼ ri calcʼual ri achijab rumal ri cojobal che u biʼ, cäte cʼu waʼ, cäquibij na chi are xak jun achi, y chi cʼo ri itzel rucʼ. Cʼäte riʼ, cäquichʼay na, y cäquirip na pa jun ripibal.

10 Cʼu pa ri urox kʼij, cäcʼastaj na chquixol ri cäminakib. Chiwilampeʼ cʼut, cäwalajisax cʼu na rech cukʼat tzij puwiʼ ri uwächulew. Je cʼu baʼ, ronojel waʼ cäbantajic rech cucʼulmaj jun kas sucʼalaj kʼatbal tzij paquiwiʼ ri calcʼual ri winak.

11 Chawilampeʼ cʼut, y xukujeʼ ri u quiqʼuel cutoj ri qui mac ri nicʼaj ri e kajinak rumal ri u kajic ri Adán, ri e caminak y majaʼ cʼo cucʼ ri quetamabal chrij ri u rayibal ri Dios paquiwiʼ, o e macuninak rumal man quetaʼm taj.

12 Tzare, ¡tokʼob qui wäch ri e areʼ ri retaʼm chic, y cäquicʼululaj ri Dios! Are cʼu majun chque tak waʼ cäquirik ri colotajibal, xak xuwi we cäquiqʼuex qui cʼux xukujeʼ rumal ri cojobal che ri Jesucristo.

13 Cʼu ri Ajawaxel Dios u takom ri lokʼalaj tak u kʼalajisanelab che ri cäpe na chquixol ri calcʼual ri achijab che u kʼalajisaxic waʼ jastak chque ronojel ri calaxic winak, ri nim tak tinimit, y ri quechʼaw pa nicʼaj tzijobal chic, rech jeriʼ jachin tak cäquicojo chi kas cäpe na ri Cristo, cuyaʼ chi cäquicʼam ri esabal ri qui mac, y chi quequicotic rucʼ jun nimalaj quicotemal, je jas we tä areʼ petinak chic chquixol.

14 Rucʼ ronojel riʼ, ri Ajawaxel Dios xrilo chi ri u winak co ri canimaʼ. Xuyaʼ cʼut jun kʼatbal tzij, je ri takbal tzij rech ri Moisés.

15 Y xucʼut chque qʼui tak cʼutbal, mayibal, retal, y nanoch chrij ri u petic. Y ri lokʼalaj kʼalajisanelab che, ri cäpe na xukujeʼ xechʼaw chque chrij ri u petic. Pune tä jeriʼ, ri e areʼ xquicowirisaj ri canimaʼ, y canimaʼ, y man xquichʼob tä cʼut chi ri takbal tak tzij rech ri Moisés man cʼo tä u patan we man cʼo tä ri tojbal macaj rech ri u quiqʼuel.

16 We cuyaʼ chi quemacunic ri alaj tak acʼalab, man quecuin taj quecolotajic. Xane quinbij chiwe chi areʼ e tewichitalic. Are je cʼu waʼ, rumal ri Adán o rumal ri qui banic, quekajic, xukujeʼ jeriʼ ri u quiqʼuel ri Cristo cutoj ri qui mac.

17 Xukujeʼ cʼut, quinbij chawe chi man cuyaʼ tä na jun biʼaj chic, o jun be chic, o jun banbal chic, rech rumal riʼ ri calcʼual que ri achijab cäquirik ri colotajibal, xak xuwi rumal, y rucʼ ri u biʼ ri Cristo, ri Ajawaxel, ri Ronojel Cuinel.

18 Chawilampeʼ cʼut, areʼ cukʼat tzij, y kas sucʼ ri u kʼatbal tzij. Cʼu ri acʼal ri cäcämic pa ri racʼalil man cäsach tä u wäch. Xane ri achijab cäquikumuj jun cʼajisabal wächaj chque tak ri canimaʼ we man cäquimachʼachʼej tä quib, we man quebux taj cʼut je jas ri alaj tak acʼalab, y we man cäquicojo chi areʼ, ri colotajibal xbantajic, y cäbantajic, y cäbantaj na xukujeʼ rucʼ, y rumal ri quiqʼuel re ri esabal macaj re ri Cristo, ri Ajawaxel, ri Ronojel Cuinel.

19 Ri achi aj uwächulew are jun u cʼulel ri Dios. Jeriʼ xubano tzpa ri u kajibal ri Adán. Jeriʼ cʼut cuban na che junalic, xak xuwi we coc chuxeʼ ri u takanic ri cubano ri lokʼalaj Uxlabixel, y man junam tä chic cuban rucʼ ri achi ri xak rech wi ri u noʼj, rech cux chʼajchʼoj rumal ri tojbal macaj ri xuban ri Cristo ri Ajawaxel, y chi cux je jas jun acʼal are nimanel, cʼamel, machʼachʼem, kas cukʼiʼ che reyexic, kas nojinak rucʼ lokʼokʼebal cʼuxaj, kas cʼo ri u rayibal che u banic ronojel cʼäx ri cuchomaj ri Dios chi utz cutak puwiʼ, jeriʼ je jas jun acʼal ri cäniman che ri u tat.

20 Xukujeʼ cʼut, quinbij chiwe chi cäpe na ri kʼij jampa ri etamabal rech ri Colonel cäjabuxic na pa tak ri nimak tak ulew, ri calpuk winak, y ri quechʼaw pa nicʼaj chic tzijobal, y pa tak tinimit.

21 Chawilampeʼ, aretak cʼu copan we kʼij riʼ, xak xuwi ri acʼalab man cʼo tä qui mac chuwach Dios, xak xuwi we cäquiqʼuex ri qui cʼux, y we cʼo ri qui cojobal che ri u biʼ ri Ajawaxel Dios, ri Ronojel Cuinel.

22 Je cʼu waʼ, pa we jun kʼij, are xatijoj che we winak riʼ ri u takom chawe ri Ajawaxel ri a Dios, cʼäte cʼu riʼ, cʼo chi na ri qui mac chuwäch ri Dios, xak xu je jas ri cubij ri tzij ri xintzijoj chawe.

23 Wachanim cʼut, in nu kʼalajisam chic ri tzij ri u takom ulok chwe ri Ajawaxel Dios.

24 Jeriʼ cʼut cubij ri Ajawaxel: Ri e areʼ quetaqʼuiʼ na je jas jun sakalaj kʼalajisabal chquij we winak riʼ pa ri kʼij re ri kʼatbal tzij. Cäkʼat na tzij paquiwiʼ conojel je jas qui banom, we utz o we man utz taj.

25 Y we areʼ man utz taj, quecʼam na bic che jun itzelalaj ilonem jawi cäquil na wi ri itzel tak qui mac, y xukujeʼ ri itzel qui banom. Waʼ cʼut cuban na chi cäquixej quib chuwäch ri Ajawaxel cʼä jun itzelalaj cʼolibal jawi cäquirik na jun nimalaj cʼäx. Chilaʼ cʼut, man cʼo tä qui tzelejem. Rumal riʼ, qui tijom jun cʼajisabal wachaj che ri canimaʼ.

26 Rumal riʼ, qui tijom che ri kumubal re ri royowal ri Dios, ri man xuqʼueqʼuej taj ri kʼatbal tzij chqe. Xukujeʼ man xuqʼueqʼuej taj che ri Adán chi cäkajic rumal ri u tijowic ri u wäch ri cheʼ ri man yatal taj cätijowic. Rumal cʼu riʼ, ri elibal cʼuxaj man cʼo tä cʼolibal cucʼ che junalic.

27 Y ri qui cʼäxcʼol je ri u banic jun nimalaj cho re kʼakʼ y azufre. Cʼu man cächup taj ri u reb, y ri u sibal cäpakiʼc che junalic. Jeriʼ u takom ulok ri Ajawaxel chwe. Amen.