1 Na afei, ɔbaa dɛ aber a ɔhen Benjamin kãa nsɛm a Ewuradze no bɔfoe dze maa no kyerɛɛ hɔn wiei no, ɔdze n’enyi kɔr aprɔw wɔ dɔmtutuw no do, na hwɛ ohun dɛ wɔahwehwe ase osiandɛ nna Ewuradze ho suro aba hɔn do.

2 Na wohun hɔnankasa hɔn nyimpa su na tsebea dɛ wɔnnsɛ asaase do huntuma mpo. Na hɔn nyina dze ndze kor tsẽaa mu see dɛ: O hu hɛn mbɔbɔr, na ma Christ no werdam bɔgyaa no nyɛ edwuma mma yenya bɔnfakyɛ ama hɛn akoma mu aatsew; na yɛgye Jesus Christ, Nyankopɔn ne Ba no, nyia ɔbɔɔ sor nye asaase na ndzɛmba nyina no; ɔno a obesian adasamba mu no dzi.

3 Na ɔbaa dɛ wɔkãa dɛm nsɛm yi ekyir no, Ewuradze no Sunsum baa hɔn do, na dɛw hyɛɛ hɔn mã, nna woenya bɔnfakyɛ nye adwenmutsewee, osian gyedzi mbordo a wonyaa wɔ Jesus Christ a ɔbɛba, dɛ mbrɛ ɔhen Benjamin kãa kyerɛɛ hɔn no ntsi.

4 Na ɔhen Benjamin buee n’ano bio na ɔhyɛɛ ase dɛ ɔrekasa kyerɛ hɔn se dɛ: M’anyɛnkofo nye mo nuanom, m’ebusuafo nye mo nkorɔfo, morotwe hom adwen bio, ama hom eetsie na hom atse me nsɛm a odzi ewiei yi a merebɛkã akyerɛ hom yi.

5 Na hwɛ, sɛ Nyankopɔn ne papayɛ ho nyimdzee enyan hom dɛm aber yi mu ma hom ehu dɛ hom yɛ egyangyandze na hom nnsɛ hwee wɔ hom asehwe gyinabew mu a—

6 Mese hom dɛ, sɛ hom enya Nyankopɔn ne papayɛ ho nyimdzee nye no tum a onnyi kabea, na ne nyansaa, na n’abotar, nye ne penkyɛr wɔ adasamba ho; nye werdambɔ no a wɔahyehyɛ ato hɔ fitsi wiadze ne fapem, dɛ ɔnam do ma nkwagye bɛba nyia ɔdze no werɛ bɔtwer Ewuradze no, na ɔbɔbɔ mbɔdzen enyiberdo edzi ne mbrasɛm do, na oegyina gyedzi no mu mpo dze akɔ no nkwa ewiei mu, mekyerɛ honandua nkwa mu—

7 Mese dɛ dɛm nyimpa yi nye nyia ɔnam werdambɔ no a wɔhyehyɛɛ too hɔ fitsi wiadze ne fapem dze maa adasamba nyina, hɔn a wɔwɔ hɔ fitsi Adam n’asehweberdo, anaa hɔn a wɔwɔ hɔ aber yi mu, anaa wɔbɛba, dze ekesi wiadze ewiei mpo no onya nkwagye.

8 Na dɛm kwan yi do na nkwagye nam ba. Na nkwagye biara nnyi beebiara gyedɛ dza wɔakã ho asɛm yi; anaa nhyehyɛɛ biara nnyi hɔ a wobegyina do dze agye nyimpa nkwa gyedɛ dza makã ho asɛm akyerɛ hom yi.

9 Hom ngye Nyame ndzi; hom ngye ndzi dɛ ɔwɔ hɔ, na dɛ ɔno na ɔbɔɔ adze nyina, dza ɔwɔ sor nye dza ɔwɔ ase nyina, hom ngye ndzi dɛ ɔwɔ nyansa nyina, nye tum a ɔwɔ sor nye ase nyina, hom ngye ndzi dɛ nyimpa runntum nnhu adze nyina a Ewuradze nyim.

10 Na hom ngye ndzi bio, dɛ ɔwɔ dɛ hom nu homho wɔ hom bɔn ho na hom yi no akwa, na hom brɛ homho adze wɔ Nyame enyim; dze akoma a no mu tsew bisa ma ɔdze hom bɔn kyɛ hom; na afei, sɛ hom gye dɛm ndzɛmba yi nyina dzi a, nna hom nhwɛ na hom nyɛ ne nyina.

11 Na bio, mekã kyerɛ hom, dɛ mbrɛ makã no dada no, dɛ mbrɛ hom ebenya nyimdzee wɔ Nyame n’enyimnyam ho no, anaa sɛ hom ehu ne papayɛ na hom asɔ no dɔ ahwɛ, na sɛ hom enya bɔnfakyɛ, dza ɔama dɛw mbordo ahyɛ hom akra mã no, dɛmara so na mebɛpɛ dɛ hom kaa, na hom kaa daa Nyame ne kɛseyɛ na hwee a hom nnsɛ, nye ne papayɛ na ne penkyɛr wɔ hom a hom yɛ abɔdze a hom nnsɛ hwee yi do, na hom mbrɛ homho adze wɔ ahobrɛadze no bun mu mpo, hom mbɔ Ewuradze ne dzin daadaa, na hom ngyina pintsinn wɔ gyedzi no mu mma dza ɔreba no, dɛ mbrɛ ofi ɔbɔfo no ano kãe no.

12 Na hwɛ mese hom dɛ sɛ hom yɛ iyi a hom enyi bɛgye daa, na Nyame no dɔ bɛhyɛ hom mã, na hom benya bɔnfakyɛ daa; na hom benyin wɔ nyia ɔbɔɔ hom no n’enyimnyam na ne nyimdzee mu, anaa wɔ dza ɔyɛ pɛrpɛr na nokwar nyimdzee mu.

13 Na hom rinnya adwen biara dɛ obi bepira ne nyɛnko, mbom hom bɛtsena asomdwee mu, na wɔdze ɔdasanyi biara dza odzi wɔ no no ama no.

14 Na hom remma kwan ma ɔkɔm nndze hom mba, anaa wɔnnda adagyaw, anaa hom ronnhwɛ ma wɔnntõ Nyame ne mbra, na kor nye kor nnkõ, na wɔnnham, na wɔnnsom abɔnsam, nyia ɔyɛ bɔn wura no, anaa nyia ɔyɛ sunsumfĩ no a hɛn egyanom akã noho asɛm dada no, ɔno na ɔyɛ ɔtamfo dze ma dza ɔtsen nyina.

15 Mbom hom bɛkyerɛkyerɛ hɔn ma wɔanantsew nokwar nye botooyɛ mu; hom bɛkyerɛkyerɛ hɔn ma wɔadodɔ hɔnho nkorkor, na wɔasom hɔnho nkorkor.

16 Na hom so hom bɔboa hɔn a wohia hom mboa; hom dze hom ahodze bɛma nyia ɔwɔ ahokyer mu; na hom remma nyia ɔserɛserɛ adze n’ebisadze nnyɛ gyan, na hom nnyi no edzi ma ɔnnhera.

17 Annhwɛ a hom bɛse dɛ: Nyimpa no ara na ɔama dɛm ɔhaw no aba no do; dɛm ntsi merenntsen me nsa, na memmfa m’edziban mma no, anaa m’ahodze mma no ma onnya ahotɔ, osiandɛ n’asotwe dzi mu—

18 Mbom mese hom dɛ O nyimpa, obiara a ɔyɛ dɛm adze yi no otwar dɛ onu noho; na gyedɛ onu noho wɔ dza ɔayɛ no ho annyɛ dɛm a ɔbɛhera afebɔɔ, na onnyi enyigye biara wɔ Nyankopɔn n’ahenman no mu.

19 Na hwɛ, ana hɛn nyina yɛnnserɛserɛ adze? Ana hɛn nyina yɛnndan Nyimpa kor, Nyame mpo, wɔ dza yɛwɔ nyina ho, edziban nye atar, sika nye dwetɛ, nye ahodze ahorow nyina a yɛwɔ?

20 Na hwɛ, mber yi mu mpo hom robɔ ne dzin, na hom reserɛ no hɔ bɔnfakyɛ. Ana ɔama hom ebisadze ayɛ gyan? Oho; oehue no Sunsum egu hom do, na ɔama enyigye ahyɛ hom akoma mã, na ɔama hom ano esiw ma hom nntum nnkasa, hom enyigye ayɛ kɛse.

21 Na afei, sɛ Nyame a ɔbɔɔ hom a hom nya hom nkwa na dza hom wɔ na mbrɛ hom tse nyina fi no hɔ no, dze biribiara a oye a hom bisa wɔ gyedzi mu, na hom gye dzi dɛ hom nsa bɛkã no ma hom a, O nna ɔyɛ dɛn ntsi na hom mmfa hom ahodze mmema homho nkorkor.

22 Na sɛ hom bu nyimpa a ɔdze n’ebisadze to hom enyim dze reserɛ ahodze bi efi hom hɔ ama ɔannhera no atsɛn, na hom bu no fɔ a, nna ɔbɛyɛ pɛrpɛr koraa dɛ hom bɔkɔ afɔbu mu ɔnam dɛ hom dze hom ahodze esie, dza ɔnnyɛ hom dze na ɔyɛ Nyame dze, ɔno so na hom nkwa wɔ ne nsamu; na hom nntotɔ nnserɛ no, eso hom nnu homho wɔ dza hom ayɛ no ho.

23 Mese hom dɛ, dɛm nyimpa no ndue, osiandɛ n’ahodze nye no bɛhera; na afei, mekã iyi kyerɛ hɔn a wɔyɛ esikafo wɔ wiadze ndzɛmba mu.

24 Na bio, mese hom ehiafo a hom nnyi bi na hom wɔ dza ɔbɔso hom, dɛ hom tse hɔ ofi da to da; mekyerɛ hom a hom pow ehiafo, osiandɛ hom nnyi bi ntsi; mebɛpɛ dɛ hom kã wɔ hom akoma mu dɛ: memma osiandɛ minnyi bi ntsi, mbom sɛ mowɔ bi a nkyɛ medze bɛma.

25 Na afei, sɛ hom kã dɛm wɔ hom akoma mu a nna hom nndzi fɔ, na sɛ annyɛ dɛm a, wobobu hom fɔ; na hom afɔbu dzi mu osiandɛ hom wia dza ɔnnyɛ homdze.

26 Na afei, osian dɛm nsɛm yi a makã akyerɛ hom ntsi—ɔno nye dɛ, ɔnam hom akɔdo enya hom bɔnfakyɛ daa nyina, ma hom anantsew a fɔdzi biara nnyi mu wɔ Nyame enyim ntsi—mebɛpɛ dɛ hom dze hom ahodze bɛma ehiafo, obiara dɛ mbrɛ ɔwɔ, dɛ hom bɛma hɔn a ɔkɔm dze hɔn edziban, wobofura hɔn a wɔda adagyaw tam, wɔbɛsera ayarfo na wɔama woenya ahotɔ, wɔ sunsum nye honam afamu nyina; dɛ mbrɛ hɔn ehiadze tse.

27 Na hom nhwɛ ma wɔnyɛ ndzɛmba nyina wɔ nyansa nye no kwan do; osiandɛ onnhia mma ɔdasanyi dɛ obotu mbirika ntsɛntsɛm asen mbrɛ n’ahom botum. Naaso ohia dɛ omia noho ama oeenya mbirikatu no mu akyɛdze; dɛm ntsi, ɔsɛ dɛ wɔyɛ ndzɛmba nyina wɔ no kwan do.

28 Na mebɛpɛ dɛ hom kaa dɛ hom mu biara a ɔbɛserɛ adze efi ne nyɛnko hɔ no ɔsɛ dɛ ɔdze adze kor no a ɔserɛe no san ma no, dɛ mbrɛ nhyehyɛɛ a ɔnye no yɛe no tse, annyɛ dɛm a ɔyɛ bɔn; na annhwɛ so a ɔbɛma no nua no so ayɛ bɔn.

29 Na n’ewiei ara nye dɛ murunntum nnkã ndzɛmba nyina a hom nam do bɛyɛ bɔn; osiandɛ ɔnam akwan horow pii do a murunntum nnkenkan ne nyina.

30 Mbom iyi dze mobotum akã akyerɛ hom dɛ, sɛ hom annweɔn homho, nye hom adwendwen, nye hom nsɛm, nye hom ndzeyɛɛ yie, na hom enndzi Nyankopɔn ne mbrasɛm do, na hom annkɔ do anntsena wɔ gyedzi no mu wɔ dza hom atse a ɔfa hɛn Ewuradze ne mbaa no ho ennkesi hom nkwa n’ewiei mpo a, hom bɛhera. Na afei, O nyimpa, kaa amma annhera.