1 Tan natan, si ari Benjamin anunotan to a nakaukolan, kayari impansalita to ed saray totoo, ya isulat to so kañgaranan na saraman so linmoob ya akipaknaan ed Dios a manumpal ed saray gangan to.

2 Tan agawa ya angapo so angan sakey a kamarerua, likud ed saray ankekelag ya ugogaw, so ag linmoob ed paknaan tan ag añgako ed ñgaran nen Cristo.

3 Tan lamet, agawa a sanen si ari Benjamin sinampotan to la ya amin so saraya a beñgatla, tan pinasanto to so anak to a laki si Mosiah a manmaliw a sakey a manañgoley tan sakey ya ari ed saray totoo to, tan initer to ed sikato so amin a susumpalen ed panarian, tan ontan met anuro na saray sacerdote a mambañgat ed saray totoo, pian dia ed ontan sikara so makadñgel tan makapikabat ed saray gangan na Dios, tan pian pagalawen to ra ed pakanunot ed saray samba a ginawa ra, binolosan to la so saray karaklan, tan sinmempet la ra, balang sakey, unong ed saray boleg da, ed saray dili a kaaboñgan da.

4 Tan si Mosiah ginapoan to so manoley ed pasen nen ama to. Tan ginapoan to so manoley ed komatalumplo a taon to, dia ed amin, ñgalñgali apat a lasus tan pitumplo tan anem a taon la manlapu ed panaon ya intaynan nen Lehi ed Jerusalem.

5 Tan si ari Benjamin nambilay ni a talora a taon tan sikato so inatey.

6 Tan agawa a si ari Mosiah nankurang unong ed saray dalan na Katawan, tan sinumpal to so saray panañgokom tan saray pananontunan to, tan inonor to so saray gangan to ed amin a beñgatla a nigangan ed sikato.

7 Tan si ari Mosiah ingangan to ed saray totoo to a bokalkalen da so dalin. Tan sikato met, a dili, so nambokalkal ed dalin, pian dia ed ontan sikato so ag manmaliw a makabelat ed saray totoo to, pian gawaen to so siñga ginawa nen ama to ed amin a beñgatla. Tan angapo so baliñgaan ed limog na saray totoo to ed loob na talora a taon.