Tej
Lus Qhuab Qhia thiab Kev Khi Lus

1 Cia li mloog, auj nej uas yog cov neeg ntawm kuv lub koom txoos, tus uas nyob saum ntuj thiab tus uas nws ob lub qhov muag ntsia ntsoov rau tag nrho txhua tus neeg, lub suab hais li; muaj tseeb tiag, kuv hais tseeb tias: Cia li mloog nej cov uas yog neeg nyob deb; thiab nej cov uas nyob rau hauv tej koog pov txwv hauv dej hiav txwv, cia li mloog ua ke.

2 Vim tus Tswv lub suab yeej yog hais tseeb rau tag nrho txhua tus neeg, thiab yuav tsis muaj ib tug dim li; thiab yuav tsis muaj ib lub qhov muag uas yuav tsis pom, los sis ib lub pob ntseg uas yuav tsis hnov, los yog ib lub siab uas tus Tswv lub suab yuav tsis tshoov.

3 Thiab cov uas ntxeev siab yuav raug chob nrog kev txom nyem heev; vim yuav muab lawv tej kev ua phem tshaj tawm nyob puag saum tej ruv tsev los, thiab tus Tswv yuav muab tej yam uas lawv ua ntsiag to tshwm sim los.

4 Thiab lub suab ceeb toom yuav yog mus rau tag nrho txhua haiv neeg, los ntawm kuv cov thwj tim lub qhov ncauj los, cov uas kuv tau xaiv nyob hauv tej hnub nyoog kawg no.

5 Thiab lawv yuav mus lawm tom ntej thiab yuav tsis muaj leej twg txwv tau lawv, vim kuv uas yog tus Tswv tau txib lawv.

6 Saib seb, nov yog kuv txoj cai, thiab txoj cai ntawm kuv cov tub qhe, thiab kuv zaj lus qhia ua ntej txog phau ntawv ntawm kuv cov lus txib, uas kuv tau muab rau lawv coj mus luam tawm los rau nej, auj cov neeg uas nyob hauv lub ntiaj teb.

7 Yog li ntawd, cia li ntshai thiab tshee hnyo, auj nej sawv daws, vim tej lus uas kuv uas yog tus Tswv tau tshaj tawm nyob rau hauv lawm ces yeej yuav muaj raws li ntawd.

8 Thiab kuv hais tseeb rau nej tias, twb muab hwj chim rau lawv cov uas mus thiab coj tej xov no mus rau cov neeg nyob hauv lub ntiaj teb, kom lawv yuav muab khi tau nyob hauv ntiaj teb thiab nyob saum ntuj ceeb tsheej tib si, cov uas tsis ntseeg thiab ntxeev siab.

9 Muaj tseeb tiag, tseeb tiag, muab lawv khi cia tos rau hnub uas yuav muab Vajtswv txoj kev npau taws nchuav tawm los tsis paub tag rau cov ua phem ua qias—

10 Txog hnub uas tus Tswv yuav los muab nqi zog rau txhua tus neeg raws li tej yam uas nws ua, thiab luj rau txhua tus neeg raws li qhov uas nws tau luj rau lwm tus.

11 Yog li ntawd tus Tswv lub suab yog mus kom thoob plaws lub ntiaj teb, kom tag nrho cov uas yeem hnov yuav hnov:

12 Nej cia li npaj, nej cia li npaj rau qhov uas tab tom yuav los, vim tus Tswv twb los txog ze lawm;

13 Thiab tus Tswv txoj kev npau taws twb pib lawm, thiab tau muab nws rab ntaj hov saum ntuj ceeb tsheej, thiab rab ntaj yuav viag los raug cov neeg ntiaj teb.

14 Thiab tus Tswv yuav muab nws txhais npab ua tshwm sim los; thiab hnub ntawd yuav los thaum cov uas yuav tsis mloog tus Tswv lub suab, thiab nws cov tub qhe lub suab, thiab tsis ua raws li cov yaj saub thiab cov thwj tim tej lus, yuav raug muab txiav tawm ntawm cov neeg mus;

15 Vim lawv tau yuam kev tsis ua raws li kuv cov kab ke, thiab tau rhuav kuv txoj kev khi lus uas kav ib txhis;

16 Lawv tsis nrhiav tus Tswv los tsa nws txoj kev ncaj ncees, tiam sis txhua tus neeg nyias taug nyias tus kheej txoj kev xwb, thiab raws li tus yam ntxwv ntawm nws tus kheej tus vaj tswv, uas muaj tus yam ntxwv zoo li neeg ntiaj teb, thiab nws lub cev yog zoo li tus niag mlom, uas yuav qub mus thiab yuav piam sij hauv Npanpiloos, twb yog Npanpiloos uas muaj zog heev, uas yuav vau mus.

17 Yog li ntawd, kuv uas yog tus Tswv, vim kuv paub tej kev puas tsuaj uas yuav los rau cov neeg hauv lub ntiaj teb, kuv thiaj hu kuv tus tub qhe Joseph Smith, tus Hluas, thiab hais lus saum ntuj ceeb tsheej los rau nws, thiab muab tej lus txib rau nws;

18 Thiab kuj tau muab tej lus txib rau lwm tus thiab, xwv kom lawv yuav tshaj tawm tej yam no mus rau neeg ntiaj teb; thiab tag nrho tej no xwv kom yuav muaj raws li tej uas cov yaj saub muab sau cia hais tias—

19 Tej uas qaug zog nyob hauv lub ntiaj teb yuav tawm los thiab ua kom tej uas muaj zog thiab muaj hwj chim tawg mus, xwv kom neeg txhob ntuas nws tej neeg zej zog, thiab kom txhob tso siab rau neeg lub hwj chim—

20 Tiam sis xwv kom txhua tus neeg yuav hais lus los ntawm Vajtswv uas yog tus Tswv lub npe, uas twb yog tus Cawm Seej ntawm neeg ntiaj teb;

21 Xwv kom txoj kev ntseeg yuav loj hlob tuaj nyob rau hauv lub ntiaj teb;

22 Xwv kom yuav muab kuv txoj kev khi lus uas kav ib txhis tsa;

23 Xwv kom cov neeg qaug zog thiab cov neeg dog dig yuav tshaj tawm txhij txhua ntawm kuv txoj moo zoo mus kom thoob ntiaj teb, thiab rau ntawm tej vaj ntxwv thiab tej neeg kav teb kav chaw xub ntiag.

24 Saib seb, kuv yog Vajtswv thiab kuv tau hais li no; tej lus txib no yog los ntawm kuv los, thiab kuv muab tej no rau kuv cov tub qhe thaum lawv qaug zog, raws li lawv yam lus hais, xwv kom lawv yuav to taub.

25 Thiab npaum li uas lawv tau ua yuam kev ces kuv yuav ua kom lawv paub;

26 Thiab npaum li uas lawv tau nrhiav laj lim tswv yim ces kuv yuav qhia lawv;

27 Thiab npaum li uas lawv tau ua txhaum ces lawv yuav raug qhuab ntuas, xwv kom lawv yuav hloov siab lees txim;

28 Thiab npaum li uas lawv tau txo hwj chim ces tus Tswv yuav ua kom lawv muaj zog, thiab tau koob hmoov los saum ntuj los, thiab tej lub sij hawm yuav tau txais kev txawj ntse.

29 Thiab tom qab uas tau txais cov Neeg Nifais cov ceev xwm txheej lawm, muaj tseeb tiag, twb yog kuv tus tub qhe Joseph Smith, tus Hluas, yuav muaj hwj chim txhais Phau Ntawv Maumoos los ntawm Vajtswv txoj kev hlub tshua, los ntawm Vajtswv lub hwj chim.

30 Thiab kuj yog rau cov neeg uas tau muab cov lus txib no rau thiab, kom lawv yuav muaj hwj chim teeb lub hauv paus ntawm lub koom txoos no, thiab kom coj lub koom txoos no tawm hauv txoj kev pom tsis tseeb thiab qhov tsaus ntuj los, tib lub koom txoos uas tseeb thiab muaj sia zees nyob tag nrho hauv lub ntiaj teb no, lub koom txoos uas kuv, tus uas yog tus Tswv, tau txaus siab rau, hais rau cov ntseeg sawv daws thiab tsis yog rau ib tug twg xwb—

31 Vim kuv uas yog tus Tswv ntsia tsis taus tej kev txhaum txawm yuav yog qhov me dua ntais;

32 Txawm li ntawd los, tus uas hloov siab lees txim thiab ua raws li tus Tswv tej lus txib ces tus Tswv yuav zam txim rau tus ntawd;

33 Thiab tus uas tsis hloov siab lees txim, txoj kev kaj uas nws twb tau txais lawm los yuav raug muab tshem mus; vim kuv tus Ntsuj Plig yuav tsis tshoov neeg lub siab tas mus li, Ib Tsoom Tub Rog tus Tswv hais li.

34 Thiab ntxiv, kuv hais tseeb rau nej tias, auj neeg hauv ntiaj teb: Kuv uas yog tus Tswv txaus siab muab tej yam no ua kom txhua tus tib neeg paub txog;

35 Vim kuv tsis xaiv neeg ntsej muag, thiab xav kom tag nrho neeg sawv daws paub hais tias lub caij nyoog los sai heev; tseem tsis tau txog lub sij hawm, tiam sis twb yuav txog lawm, thaum uas txoj kev thaj yeeb yuav raug muab tshem tawm hauv ntiaj teb no mus, thiab tus dab phem yuav muaj hwj chim tswj hwm tej uas nws kav.

36 Thiab tus Tswv kuj yuav muaj hwj chim tswj hwm nws haiv neeg ntseeg, thiab yuav kav nyob nrog nraim lawv, thiab yuav nqis los txiav txim rau Idumias, los yog neeg ntiaj teb.

37 Tshawb xyuas tej lus txib no, vim tej lus txib no muaj tseeb thiab ncaj, thiab tej kev qhia tej yuav muaj los yav tom ntej thiab tej lus cog tseg uas muaj nyob rau hauv tej lus txib no yeej yuav muaj raws li hais tag nrho.

38 Tej uas kuv uas yog tus Tswv tau hais, kuv yeej tau hais lawm, thiab kuv tsis thov txim rau kuv tus kheej; thiab txawm yog lub ntuj ceeb tsheej thiab lub ntiaj teb dhau mus lawm los, kuv txoj lus yeej yuav tsis dhau mus, tiam sis yuav muaj raws li tag nrho kuv txoj lus, txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.

39 Vim saib seb, thiab xyuas seb, tus Tswv yog Vajtswv, thiab tus Ntsuj Plig ua tim khawv, thiab cov lus tim khawv no muaj tseeb, thiab txoj kev tseeb yuav nyob mus ib txhiab thiab ib txhis. Amees.