Nyob rau lub Cuaj Hlis Ntuj hnub tim 30, xyoo 1978, nyob hauv lub Tuam Rooj Sab laj thib 148 ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, Thawj Tswj Hwm N. Eldon Tanner, Pab Cuam Ib ntawm Thawj Pawg Thawj Tswj Hwm ntawm lub Koom Txoos, tau muab cov nram no hais rau cov ntseeg:

Thaum ntxov ntawm lub Rau Hli Ntuj xyoo no, Thawj Pawg Thawj Tswj Hwm tau tshaj hais tias Thawj Tswj Hwm Spencer W. Kimball tau txais ib txoj kev tshwm sim kom muab lub pov thawj hwj thiab lub tuam tsev tej koob hmoov pub rau tag nrho cov txiv neej uas tsim nyog ntawm lub Koom Txoos. Thawj Tswj Hwm Kimball tau hais kom kuv qhia rau lub rooj sab laj hais tias tom qab nws tau txais txoj kev tshwm sim no, uas tau los rau nws tom qab tau xav ntev thiab thov Vajtswv ntau nyob hauv tej chav tsev dawb ceev hauv lub tuam tsev dawb huv, nws tau muab qhia rau nws ob tug pab cuam, nkawd tau txais yuav qhov no thiab pom zoo rau qhov no. Tom qab ntawd tau muab qhov no qhia rau Pawg Kaum Ob tug Thwj Tim, lawv sawv daws pom zoo, thiab tom qab ntawd coj mus qhia rau tag nrho lwm cov Tuam Thawj Coj, lawv sawv daws pom zoo tib yam nkaus.

Thawj Tswj Hwm Kimball tau hais kom kuv nyeem tsab ntawv no rau lub sij hawm no:

Thaum peb tau pom qhov uas tus Tswv txoj hauj lwm nthuav mus rau hauv lub ntiaj teb no, peb zoo siab ua tsaug hais tias muaj cov neeg ntawm ntau lub teb chaws uas txais tsab xov ntawm txoj moo zoo uas tau muab txum tim rov qab los, thiab tau zwm rau lub Koom Txoos ntau zuj zus mus ntxiv. Yog li ntawd, qhov no, tau tshoov peb lub siab kom muaj lub siab xav muab tag nrho tej txiaj ntsim thiab cov koob hmoov uas txoj moo zoo muab tau pub rau txhua tus mej zeej uas tsim nyog ntawm lub Koom Txoos.

Paub ntsoov txog cov yaj saub thiab cov thawj tswj hwm ntawm lub Koom Txoos uas tau ua peb ntej cov lus cog tseg hais tias yuav muaj ib lub sij hawm, nyob hauv Vajtswv txoj hau kev nyob mus ib txhis, tag nrho peb tej kwv tij uas tsim nyog yuav tau txais lub pov thawj hwj, thiab tau pom txoj kev rau siab ntseeg ntawm cov neeg uas tsis tau pub tsa rau lub pov thawj hwj, peb tau thov Vajtswv ntev thiab sib zog heev txog cov no, uas yog peb cov kwv tij uas rau siab ntseeg, tau siv ntau teev nyob hauv lub Tuam Tsev Chav Txheej Saud los thov tus Tswv kom muab nws txoj lus qhia rau peb.

Nws tau hnov peb tej lus thov, thiab los ntawm kev tshwm sim nws twb qhia meej hais tias hnub tau cog lus los lawm ntev ntawd twb los txog lawm thaum txhua tus txiv neej uas rau siab ntseeg, thiab tsim nyog nyob hauv lub Koom Txoos yuav tau txais lub pov thawj hwj dawb huv, muaj hwj chim mus siv Vajtswv txoj cai, thiab nrog cov neeg nws hlub tau txais txhua txoj koob hmoov los ntawm lub pov thawj hwj, suav tag nrho cov koob hmoov hauv lub tuam tsev thiab. Yog li ntawd, yeej muaj cai tsa txhua tus txiv neej mej zeej uas tsim nyog ntawm lub Koom Txoos rau lub pov thawj hwj tsis hais yam neeg twg los yog tawv nqaij xim dab tsi. Thawj Pawg Thawj Tswj Hwm qhia cov thawj coj ntawm lub pov thawj hwj kom ua raws li txoj cai ua tib zoo xam phaj txhua tus uas yuav txais txoj kev tsa rau lub Pov Thawj Hwj Aloos los yog Mekhixedes kom paub meej hais tias lawv cuag tej txhooj kev tsim nyog uas tau tsim muaj.

Peb tshaj tiag tiag hais tias ziag no tus Tswv tau qhia nws lub siab nyiam rau txoj kev foom koob hmoov rau tag nrho nws cov me nyuam nyob thoob plaws lub ntiaj teb cov uas yuav mloog nws cov tub qhe muaj cai lub suab, thiab npaj lawv tus kheej los txais txhua yam koob hmoov ntawm txoj moo zoo.

Vim peb txais yuav Spencer W. Kimball ua tus yaj saub, tus pom tau, thiab tus txais kev tshwm sim, thiab thawj tswj hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, xav kom peb pawg koom txoos sawv cev no txais yuav txoj kev tshwm sim no ua tus Tswv txoj lus thiab lub siab nyiam. Tag nrho cov pom zoo thov tsa nej sab tes xis qhia. Leej twg tsis pom zoo tsa tes.

Txoj kev tsa tes pom zoo los txhawb qhov tau hais los no tau yog tag nrho txhua tus pom zoo.