1 Koʼág̃a, péina ápe, haʼe ndéve, remoĩ haguére peteĩ kuimbaʼe aña pópe umi jehai oñemeʼẽvaʼekue ndéve puʼaka ikatu hag̃ua rembohasa, Urim ha Tumim rupive, koʼág̃a rehundíma umíva.

2 Ha rehundi avei ne don upe jave, ha oñemoytytũ pe ne akãmegua.

3 Upevére, oñemeʼẽ jey ndéve; upévare, eñehaʼã ndejeroviareko ha eho meme ejapopa peve pe ñembohasa rembyre, reñepyrũ haguéicha.

4 Ani eñani pyaʼeve térã embaʼapo hetave umi ne mbarete ha tembiporu eguerekóva ohejávagui ndéve rembohasa hag̃ua; ha katu ejesareko ipahaite peve.

5 Akóinte eñemboʼe egueropuʼaka hag̃ua; heẽ, ndepuʼaka hag̃ua Satanáre, ha resẽ hag̃ua Satana rembiguaikuéra pógui, omoporãva pe hembiapo.

6 Péina ápe, ne rundise hikuái; heẽ, pe kuimbaʼe rejeroviavaʼekuére jepeve oñehaʼã nerundise.

7 Ha upéva rupi haʼe hese haʼeha peteĩ kuimbaʼe aña, oipeʼaségui umi mbaʼe oñemeʼẽvaʼekue ndéve; ha oñehaʼãkuri avei ohundi ne don.

8 Ha remoĩ haguére umi jehai ipópe, péina ápe, umi yvypóra ñaña oipeʼákuri ndehegui.

9 Upévare, remeʼẽkuri umíva, heẽ, upe imarangatúva, umi hekoañávape.

10 Ha, péina ápe, Satana omoĩ ikorasõkuérape omoambue hag̃ua umi ñeʼẽ rehaikavaʼekue, térã, rembohasavaʼekue, umi osẽvaʼekue nde pógui.

11 Ha péina ápe, che haʼe ndéve, omoambue haguére hikuái umi ñeʼẽ, omoñeʼẽ joavývo umi nde rembohasa ha rehaikavaʼekue.

12 Ha péicha, pe aña oñehaʼã omopuʼã peteĩ plan katupyry ohundi hag̃ua ko tembiapo;

13 Omoĩgui ikorasõkuérape kóva ojapo hag̃ua, ijapúvo, heʼi hag̃ua ndepillahague hikuái umi ñeʼẽ rembohasa guaʼuvaʼekuépe.

14 Añetehápe, haʼe ndéve, ndahejamoʼãiha Satana ojapo iplan aña kóvape.

15 Ha péina ápe, omoĩ ikorasõkuérape retenta hag̃ua Ñandejára ne Tupãme, rejerurévo rembohasa jey hag̃ua upéva.

16 Ha upérõ, péina ápe, heʼi ha opensa ikorasõkuérape—Jahecháta omeʼẽpa chupe Tupã pokatu ombohasa hag̃ua; ha upéicharõ, omeʼẽ jeýta chupe pokatu;

17 Ha Tupã omeʼẽ jeýramo chupe pokatu, térã ombohasa jeýramo, térã ambue ñeʼẽme, upeichag̃uaite ñeʼẽ ohai jeýramo, péina ápe, jaguereko umíva, ha ñamoambuékuri;

18 Upévare na peteĩchamoʼãi, ha jaʼéta ijapuhague iñeʼẽme, ha haʼe ndoguerekoiha mbaʼevéichag̃ua don, ni mbaʼevéichag̃ua pokatu;

19 Upévare ñahundíta chupe, ha upe tembiapo avei; ha jajapóta kóva ani hag̃ua ñañemotĩ ipahápe, ha jahupyty hag̃ua mundogua glória.

20 Añetehápe, añetehápe, haʼe ndéve, Satana oguerekoha tuicha puʼaka ikorasõkuérare; ha omyaña chupekuéra tembiapovairã pe iporãva rehe;

21 Ha oñembyaipa ikorasõkuéra, ha henyhẽ tembiapoaña ha tembiapovaígui; ha haʼekuéra ohayhuve pytũmby tesapégui, iñañágui hembiapokuéra; upévare, ndojeruréi hikuái chéve.

22 Satana omyaña chupekuéra ogueraha hag̃ua hiʼangakuéra ñehundípe.

23 Ha upéicha omopuʼã peteĩ plan katupyry, opensávo ohundi Tupã rembiapo; ha katu kóva ipoguikuéra ajeruréta, ha omotĩta ha okondenáta chupekuéra pe huísio árape.

24 Heẽ, haʼe omyaña ikorasõkuéra pochýpe ko tembiapo rehe.

25 Heẽ, heʼi chupekuéra: Pepombotavy ha pemoñuhã, peporohundi hag̃ua; péina ápe, pévako ndaʼivaíri. Ha péicha ombojuruheʼẽ ha heʼi chupekuéra ndahaʼeiha angaipa oporombotavy, opilla hag̃ua peteĩ tekovépe ijapu jave hina, ohundi hag̃ua chupe.

26 Ha péicha ombojuruheʼẽ ha ogueraha chupekuéra, ombotyryry peve umi hiʼánga yvýgotyo añaretãme; ha péicha oity chupekuéra ñuhã haʼekueraite omoĩvaʼekuépe.

27 Ha péicha oho yvate ha yvy gotyo, ápe ha pépe yvy ári, ohekávo ohundi umi yvypóra ánga.

28 Añetehápe, añetehápe, haʼe ndéve, ái pe ijapúvagui oporombotavy hag̃ua, oimoʼãgui ambuéva ijapu oporombotavy hag̃ua, koʼãvape noñemombiáigui Tupã hustísiagui.

29 Koʼág̃a, péina ápe, omoambuékuri hikuái koʼã ñeʼẽ, Satana heʼígui chupekuéra: Haʼe ningo pene mbotavýkuri—ha péicha ombojuruheʼẽ chupekuéra ojapo hag̃ua tembiapovai, nde retenta hag̃ua Ñandejára ne Tupãme.

30 Péina ápe, haʼe ndéve, nerembohasamoʼãvéima umi ñeʼẽ osẽvaʼekue nde pógui;

31 Ha péina ápe, ndojapomoʼãigui hikuái iplan ñaña ijapúvo koʼã ñeʼẽ rehe. Ha péina ápe, rejapóramo umichaguaite ñeʼẽ, heʼíta hikuái ndejapuha, ha rembohasa guaʼuhague, ha katu ndete rejerehague pe erevaʼekuégui.

32 Ha péina ápe, oguenohẽta hikuái kóva, ha Satana omohatãta tavayguakuéra korasõ, omyañávo pochýpe nde rehe, ani hag̃ua oguerovia hikuái umi che ñeʼẽ.

33 Péicha opensa Satana ipuʼakávo ne testimóniore ko ñemoñareatýpe, ani hag̃ua osẽ tembiapo ko ñemoñareatýpe.

34 Ha katu emaʼẽ, ápe oĩ arandu, ha ahechauka rupi ndéve arandu, ha ameʼẽ ndéve umi tembiapoukapy rejapovaʼerã koʼã mbaʼére, ani ehechauka múndope ejapopa peve ko ñembohasa rembiapo.

35 Ani remombaʼeguasu haʼehague ndéve: Ápe oĩ arandu, ani rehechauka múndope—che haʼégui, ani rehechauka múndope, reñemoʼã hag̃ua.

36 Péina ápe, ndaʼéi ndéve ani hag̃ua rehechauka umi hekojojávape;

37 Ha katu ndaikatúigui akóinte rehusga mávapa umi hekojojáva, térã ndaikatúigui akóinte rehechakuaa umi iñañáva hekojojávagui, upévare haʼe ndéve, eguerokirirĩ, iporã meve chéve aikuaauka múndope opa mbaʼe upéva rehegua.

38 Ha koʼág̃a, añetehápe haʼe ndéve, peteĩ ñemombeʼu umi mbaʼe ehaivaʼekuégui, osẽvaʼekue nde pógui, ojehaiha umi Nefi pláncha ári.

39 Heẽ, ha nemanduʼa umi jehaípe ojeʼehague oñemeʼẽveha peteĩ ñemombeʼu koʼã mbaʼe rehegua umi Nefi pláncha ári.

40 Ha koʼág̃a, pe ñemombeʼu ojehaíva umi Nefi pláncha ári, oñeʼẽve rupi umi mbaʼe che arandúpe, aikuaaukaséva tavayguakuérape ko ñemombeʼúpe—

41 Upévare, rembohasáta jehaikuéra oĩva umi Nefi plánchape, rehupyty peve rréi Benjamin rreinádo jepe, térã reg̃uahẽ meve umi rembosavaʼekuépe, ha reñongatuvaʼekue;

42 Ha péina ápe, reguenohẽta Nefi jehaipyre ramo; ha péicha amoapoñuãita umi omoambuevaʼekuépe che ñeʼẽ.

43 Ndahejamoʼãi ohundi hikuái che rembiapo; heẽ, ahechaukáta chupekuéra che arandu tuichaveha pe aña katupyrýgui.

44 Péina ápe, peteĩ pehẽnguénte oguereko hikuái, térã peteĩ Nefi ñemombeʼu ñemombykýnte.

45 Péina ápe, õi heta mbaʼe Nefi plácha ári ojehaíva, omyesakãvéva che evanhélio; upévare, haʼe che arandúpe, embohasa hag̃ua umi Nefi jehaipyre pehẽngue peteĩha, ha emoĩ ko tembiapo ryepýpe.

46 Ha péina ápe, ko tembiapo rembyre oguereko opa umi che evanhélio pehẽngue che profetakuéra marangatu, heẽ, ha avei che discípulo-kuéra, ojerurevaʼekue iñemboʼépe og̃uahẽ hag̃ua ko tavayguápe.

47 Ha haʼe chupekuéra, umíva oñemeʼẽtaha, ojeroviaháicha iñemboʼekuérape;

48 Heẽ, ha kóva haʼékuri ijerovia—pe che evanhélio, ameʼẽvaʼekue chupekuéra omboʼe hag̃ua hiʼárape, tog̃uahẽ umi ijoykeʼy, Lamanita-kuérape, ha avei opa umi oikóva chugui lamanita iñesẽ rupive.

49 Koʼág̃a, ndahaʼéi kóva añónte—ijerovia iñemboʼekuérape haʼékuri, tojeikuaauka avei ko evanhélio, ikatúramo g̃uarã ambue tetãnguéra ohupyty ko yvy;

50 Ha péicha oheja hikuái peteĩ jehovasa ko yvy ári iñemboʼekuérape, oimeraẽva ogueroviáva ko evanhélio kóva ko yvýpe, oguereko hag̃ua tekove ijapyraʼỹra;

51 Heẽ, ikatu hag̃ua opavave ohupyty, tahaʼe haʼéva tetã, avaretã, ñeʼẽ, térã tavaygua.

52 Ha koʼág̃a, péina ápe, ojeroviaháicha iñemboʼekuérape, aguerúta ko che evanhélio pehẽngue che tavayguakuéra jeikuaápe. Péina ápe, ndaguerúi umíva ambyai hag̃ua umi haʼekuéra ohupytymavaʼekue, ha katu amombareteve hag̃ua.

53 Ha péva rupi che haʼevaʼekue: Ko ñemoñareaty nomohatãirõ ikorasõkuéra, amopuʼãta che tupao ijapytepekuéra.

54 Koʼág̃a, che ndaʼéi péva ahundi hag̃ua che tupao, ha katu amongakuaa hag̃ua che tupao;

55 Upévare, oimeraẽva che tupaogua natekotevẽi okyhyje, umívape oñemeʼẽtagui jehejapyre ramo, yvága rréino.

56 Ha katu umi ndokyhyjéiva chehegui ni noñongatúiva che rembiapoukapykuéra, ha katu omopuʼãva tupao ijupe g̃uarã, ohupyty hag̃ua tembiaporepy, heẽ, ha opa heko ñaña ha omopuʼãva umi aña rréino—heẽ, añetehápe, añetehápe haʼe ndéve, umívape amyangekoitaha, ha amboryrýi ha amosusũta ipyʼa mbytete peve.

57 Péina ápe, che haʼe Jesucristo, Tupã Raʼy. Ajuvaʼekue umi chembaʼévape, ha umi chembaʼéva nachemog̃uahẽi.

58 Che haʼe tesape omimbíva pytũmbýpe, ha umi pytũmby ndoikũmbýi.

59 Che ningo pe haʼevaʼekue—Ambue ovecha aguereko ndahaʼéiva ko rredilpegua—che discípuko-kuérape, ha oĩ heta nacheikũmbýiva.

60 Ha ahechaukáta ko tavayguápe arekohague ambue ovechakuéra, ha haʼekuéra haʼeha peteĩ Jacob róga rakã;

61 Ha aguenohẽta tesakãme umi tembiapo hechapyrãva, haʼekuéra che rérape ojapovaʼekue;

62 Heẽ, ha aguenohẽta avei tesakãme che evanhélio oñemboʼevaʼekue chupekuéra, ha péina ápe, nonegamoʼãi hikuái umi nde rehupytyvaʼekue, ha katu omongakuaáta ha aguenohẽta tesakãme umi che doctrina-gua añetegua, heẽ, ha peteĩete doctrina chepype oĩva.

63 Ha ajapo kóva amopuʼã hag̃ua che evanhélio, ani hag̃ua oĩ hetaite joavy; heẽ, Satana omyaña tavayguakuéra korasõ oñorairõ hag̃ua umi che doctrina-pe oĩvare; ha koʼã mbaʼépe ojavy hikuái, omokarẽgui umi escritura ha noikũmbýi hikuái umíva.

64 Upévare, che aikuaaukáta chupekuéra ko ñemimby tuicháva;

65 Ha, péina ápe, ambyatýta chupekuéra ryguasu ombyatyháicha iryguasuraʼykuéra umi ipepo guýpe, nomohatãirõ ikorasõkuéra;

66 Heẽ, ha haʼekuéra ouséramo, oukuaa, ha hoyʼu umi y tekove reheguágui jejopyʼỹme.

67 Péina ápe, kóva haʼe che doctrina—oimeraẽva umi oñearrepenti ha oúva cherendápe, umíva haʼe che tupao.

68 Oimeraẽva omombeʼu heta térã saʼive kóvagui, ndahaʼéi chembaʼe, ha katu oñemoĩ cherehe; upévare, ndahaʼéi che tupaogua.

69 Ha koʼág̃a, péina ápe, oimerãeva che tupaogua, ha opytáva che tupaópe ipahaite peve, amopuʼãta che itaguasu ári, ha umi añaretã rokẽ ndaipuʼakamoʼãi hesekuéra.

70 Ha koʼág̃a, nemanduʼáke upe haʼéva múndo rekove ha resape ñeʼẽre, ne Redentor, ne Ñandejára ha ne Tupã. Amén.