1 Añetehápe, péicha heʼi ndéve Ñandejára, che rembiguái José, rejerure haguére che pógui reikuaa ha reikũmby hag̃ua mbaʼéichapa Che, Ñandejára, ahustifika che rembiguaikuéra Abraham, Isaac ha Jacob-pe, ha avei che rembiguaikuéra, Moisés, David ha Salomón-pe, principio ha doctrina oguereko hag̃ua hikuái heta tembireko ha konkuvína—

2 Péina ápe, péicha, Che haʼe Ñandejára nde Tupã, ha ambohováita ndéve ko mbaʼe rehegua.

3 Upévare, embosakoʼi ne korasõ remog̃uahẽ ha neñeʼẽrendu hag̃ua tekomboʼekuéra ameʼẽmbotávare ndéve; opa umi ojeikuaaukávape ko léi, kóvare iñeʼẽrenduvaʼerã.

4 Ha péina ápe, Che aikuaauka ndéve peteĩ konvénio pyahu ha opaveʼỹva; ha nerekumplíriramo upe konvénio, reñekondenáta; ndaikatúigui avave ombotove ko konvénio ha oike che glóriape.

5 Opavave ohupytyséva peteĩ tovasa che pógui, iñeʼẽrenduvaʼerã upe léi oñemoĩvaʼekuére upéva upe tovasarã, ha umi mbaʼe ojerurévare, oñemoĩ haguéicha múndo ojejapo mboyve guive.

6 Ha pe konvénio pyahu ha opaveʼỹva rehegua, oñemoĩvaʼekue che glória pleniturã; ha pe ohupytýva iplenitúgui iñeʼẽrenduvaʼerã upe léire, ha iñeʼẽrendúta, térã oñekondenáta, heʼi Tupã Ñandejára.

7 Ha añetehápe Che haʼe ndéve, upe léi kondisiõ haʼeha koʼãva: Opa konvénio, kontráto, joapy, apoukapy, ñeʼẽmeʼẽ, vóto, apopy, joaju, ñemopeteĩ térã ñehaʼarõ, ndojejapóiva ni noñemeʼẽiva, ni ndojeselláiva pe Espíritu Marangatu promésare, ára ha opa ára apyraʼỹme, pe oñeunhivaʼekue rupive, ha avei kóva imarangatuveháicha, rrevelasiõ ha tembiapoukapy rupi, che unhído rupive, Che ahenoivaʼekue yvy ári oguereko hag̃ua ko puʼaka (ha Che ahenóikuri che rembiguái José-pe oguereko hag̃ua ko puʼaka umi ára pahápe, ha arakaʼeve ndaipóri ndahaʼéirõ peteĩ tekovénte yvy ári oñemeʼẽvape ko puʼaka ha ko sacerdocio llavekuéra), ndoguerekói mbaʼevéichagua efikásia, puʼaka térã mbarete omanovaʼekue jeikovejeýpe, ni uperire; opa kontráto upevarã ndojejapóiva opágui yvyporakuéra omano vove.

8 Péina ápe, che róga haʼe peteĩ orden róga, heʼi Tupã Ñandejára, ha ndahaʼéi apañuãi róga.

9 Amboajénepa peteĩ ñemeʼẽmby ndojejapóiva che rérape?, heʼi Ñandejára.

10 Térã amog̃uahẽnepa nde pógui upe Che ndaʼeivaʼekue?

11 Ha haʼéta piko Che peẽme peteĩ mbaʼe, heʼi Ñandejára, ndahaʼéiva léi rupive, Che ha che Ru romoĩ haguéicha peẽme g̃uarã, múndo ojejapo mboyve?

12 Che haʼe Ñandejára nde Tupã; ha Che ameʼẽ ko tembiapoukapy—avave tekove outaha Túvape, ndahaʼéiramo Che térã che ñeʼẽ rupive, haʼéva che léi, heʼi Ñandejára.

13 Ha opa mbaʼe múndope oĩva, tahaʼe tekovekuérare oñemeʼẽmbyre, tróno, térã prinsipádo, térã puʼakakuérare, térã umi mbaʼe herakuãporãvare, tahaʼe haʼéva, ha ndahaʼéiva chehegui ni che ñeʼẽ rupive, ojeitýta, heʼi Ñandejára, ha ndopytamoʼãi tekovekuéra omano rire, ni pe jeikovejeýpe, ni upéi, heʼi Ñandejára nde Tupã.

14 Opa mbaʼe opytáva haʼégui che rupive; ha oimeraẽ mbaʼe ndahaʼéiva che rupive, ojeityvyróta ha oñehundíta.

15 Upévare, peteĩ kuimbaʼe omendárõ peteĩ kuñáre múndope, ha nomendái hese ni che ni che ñeʼẽ rupive, ha haʼe ojapo hendive konvénio, haʼe oĩ aja ko múndope, ha haʼe hendive, ndovalemoʼãi pe ikonvénio ha iñemenda, omanóvo hikuái, ha osẽ vove hikuái ko múndogui; upévare, ndojojajúi hikuái mbaʼevéichagua léire osẽvo ko múndogui.

16 Upévare, osẽvo hikuái ko múndogui, ni nomendái ni noñemeʼẽi ñemendarã, ha katu oñehenói haʼe hag̃ua anhelkuéra yvágape, ánhel haʼéva siervo ministrante, oministra hag̃ua umi hekojojávape peteĩ glória rasa tuichaitevéva, ha ipohyivéva ha ijapyraʼỹvare.

17 Koʼã ánhel naiñeʼẽrendúigui che léire; upévare, ndaikatúi oñembotuicha, ha katu opyta ñemboyke ha haʼeño, exaltasiõʼỹre, peteĩ salvasiõ estádope, opa ára apyraʼỹ meve; ha tenondeve ndahaʼéi umi tupã, uperãngue katu Tupã anhelkuéra akói ha tapiaite g̃uarã.

18 Ha avei, añetehápe Che haʼe peẽme, peteĩ kuimbaʼe omendárõ peteĩ kuñáre, ha ojapo hendive konvénio ára ha opa ára apyraʼỹme, ha upe konvénio ndojejapói che rupive ni che ñeʼẽ rupive, haʼéva che léi, ni ndojesellái pe Espíritu Marangatu promésare, pe Che aunhivaʼekue ha ahenoivaʼekuére ko puʼakápe, upérõ ndovaléi ni naimbaretéi osẽ vove hikuái múndogui, ndojoajúigui hikuái ni cherehe ni che ñeʼẽre, heʼi Ñandejára; osẽ vove múndogui ndaikatumoʼãi oñemog̃uahẽ upépe, umi ánhel ha tupãnguéra oñehenóiva rupi oĩ hag̃ua upépe, ndohejamoʼãiva chupekuéra ohasa; ndaikatumoʼãi, upévare, ohupyty hikuái che glória; che róga haʼégui peteĩ orden róga, heʼi Tupã Ñandejára.

19 Ha avei, añetehápe Che haʼe peẽme, peteĩ kuimbaʼe omendárõ peteĩ kuñándi che ñeʼẽ rupive, haʼéva che léi, ha konvénio pyahu ha opaveʼỹva rupive, ha ojesella chupekuéra pe Espíritu Marangatu promésare, pe oñeunhivaʼekue rupi, Che ameʼẽvaʼekuépe ko pokatu ha ko sacerdocio llavekuéra; ha ojeʼe chupekuéra—Pesẽta jeikovejey peteĩháme, ha upe peteĩha riréramo, uperiregua jeikovejeýpe, ha pehupytýta umi tróno, rréino, prinsipádo, potesta ha poguykuéra, opa yvatekue ha pypukukuégui—upérõ ojehaíta pe Cordero Tekove rehegua Kuatiañeʼẽme, ndoporojukamoʼãiha oñohẽ hag̃ua iñangaipaʼỹva ruguy, ha opytáramo che konvéniope, ha ndoporojukái, oñohẽvo iñangaipaʼỹva ruguy, oñekumplipaitéta hesekuéra opa mbaʼe che rembiguaikuéra omoĩvaʼekue hiʼarikuéra, árare, ha opa ára apyraʼỹre; ha imbaretéta osẽ vove hikuái múndogui; ha umi ánhel ha umi tupã upépe oĩva, ombohasáta chupekuéra iñexaltasiõ ha iglóriape opa mbaʼépe, ojesella haguéicha iñakã arikuéra, ha ko glória haʼéta peteĩ plenitu ha umi ñemoñare jeikomeme, akói ha tapiaite g̃uarã.

20 Upérõ haʼéta hikuái umi tupã, ndopamoʼãigui hikuái; upévare, oikóta ára ijapyraʼỹva guive ára ijapyraʼỹva peve, oho memétagui hikuái; upérõ oĩta hikuái opa mbaʼe ári, opa mbaʼe oĩgui ipoguypekuéra. Upérõ haʼéta hikuái umi tupã, oguerekótagui hikuái opa pokatu, ha umi ánhel oĩta ipoguypekuéra.

21 Añetehápe, añetehápe, Che haʼe peẽme, ndahaʼéiramo pene ñeʼẽrendu che léire, ndaikatumoʼãi pehupyty ko glória.

22 Michĩgui upe okẽ, ha ipoʼi upe tape oporogueraháva exaltasiõ ha tekovekuéra ñemoheñóime, ha mbovy umi ojuhúva, nachemog̃uahẽiri múndope ni ndachekuaái.

23 Ha katu chemog̃uahẽramo múndope, upérõ cheikuaáta, ha pehupytýta pene exaltasiõ; Che aimeháme peime hag̃ua avei.

24 Kóva haʼe umi tekoveita ijapyraʼỹva—tojeikuaa Tupã peteĩetéva ha añeteguápe, ha Jesucristo-pe, haʼe ombouvaʼekue. Che ningo haʼe. Pemog̃uahẽ, upévare, che léi.

25 Tuichágui upe okẽ ha ipyrusu upe tape oporogueraháva umi ñemanóme; ha heta umi upérupi oikéva, nachemog̃uahẽigui, ni naiñeʼẽrendúi hikuái che léire.

26 Añetehápe, añetehápe, Che haʼe peẽme, peteĩ kuimbaʼe omendárõ peteĩ kuñáre che ñeʼẽme heʼiháicha, ha ojesella chupekuéra pe Espíritu Marangatu promésare, che amoĩ haguéicha, ha pe kuimbaʼe térã pe kuña ojapóramo oimeraẽ angaipa térã jejapyhara upe konvénio pyahu ha opaveʼỹvare, tahaʼe haʼéva, ha opáichagua ñeʼẽjapu, ha ndoporojukáirõ oñohẽvo iñangaipaʼỹva ruguy, osẽta gueteri jeikovejey peteĩháme, ha oikéta iñexaltasiõme; ha katu oñehundíta hetépe ha oñemeʼẽta Satana tovajepetépe, rredensiõ ára peve, heʼi Tupã Ñandejára.

27 Pe ñeʼẽjapu Espíritu Sántore, noñeperdonamoʼãiva ko múndope ni múndogui oñesẽ rire, heʼise ojeporojuka oñeñohẽvo iñangaipaʼỹva ruguy, ha oñemoañete che ñemano, ojehupyty rire che konvénio pyahu ha opaveʼỹva, heʼi Tupã Ñandejára; ha pe naiñeʼẽrendúiva ko léire, mbaʼevéicharõ ndoikemoʼãi che glóriape, ha katu oñekondenáta, heʼi Ñandejára.

28 Che haʼe Ñandejára nde Tupã, ha ameʼẽta ndéve che Santo Sacerdocio léi, che ha che Ru romoĩ haguéicha pe múndo ojejapo mboyve.

29 Abraham-pe oñemeʼẽ opa mbaʼe, opaite mbaʼe ohupytyvaʼekue, rrevelasiõ ha tembiapoukapy rupi, che ñeʼẽ rupi, heʼi Ñandejára, ha oikékuri iñexaltasiõme ha oguapy ijapykajegua ári.

30 Abraham ohupytyvaʼekue umi promésa iñemoñare rehegua, ha ilomoʼa rehegua—ha nde haʼe ilomoguigua, che rembiguái José—umi promésa oho memétante oĩ aja hikuái múndope; ha Abraham ha iñemoñare rehegua, oho memétante múndogui osẽ rire; ko múndope ha múndogui osẽ riréicha avei, oho memétante hikuái mbyjakuéraicha ojeipapakuaaʼỹva; térã, reipaparõguáicha umi yguasu rembeʼypegua yvykuʼi, ndaikatumoʼãiva reipapa.

31 Ko promésa ndéve g̃uarã avei, nde haʼégui Abraham-guigua, ha Abraham-pe ojejapovaʼekue upe promésa; ha ko léi rupive, ojejapo ohóvo che Ru rembiapokuéra, ha umívape ojeglorifikaha ijupe.

32 Tereho, upévare, ha ejapo Abraham rembiapokuéra; eike che léipe ha ejesalváta.

33 Ha katu ndereikéiramo che léipe, ndaikatúi rehupyty che Ru promésa, pe haʼe ojapovaʼekue Abraham-pe.

34 Tupã omandavaʼekue Abraham-pe, ha Sara omeʼẽ Agar-pe, Abraham rembirekorã. Ha mbaʼére haʼe ojapo kóva? Kóva haʼégui pe léi; ha Agar-gui heñoivaʼekue heta tavayguakuéra. Kóicha, upévare, kóva okumplíkuri umi promésa, ambue mbaʼe apytépe.

35 Oĩpa Abraham upévare kondenasiõ guýpe? Añetehápe Che haʼe peẽme, Nahániri; Che, Ñandejára, amandaguikuri.

36 Abraham-pe oñemanda oikuaveʼẽ hag̃ua itaʼýra Isaac; upevére, ojehaíkuri: Ndereporojukamoʼãi. Abraham, upevére, noñenegáikuri, ha ojeipapa chupe tekojojáramo.

37 Abraham ohupytyvaʼekue umi konkuvína, ha omeʼẽ hikuái chupe taʼyrakuéra; ha ojeipapa chupe tekojojáramo, oñemeʼẽgui chupe, ha iñeʼẽrendu che léire; ni Isaac ni Jacob ndojapoivaʼekue avei mbaʼeve, ndahaʼéirõ upe oñemandáva chupekuéra; ha ndojapóigui hikuái mbaʼeve, ndahaʼéirõ upe oñemandáva chupekuéra, oikékuri hikuái iñexaltasiõme, umi promésape heʼiháicha, ha oguapy ijapykajeguakuéra ári, ha ndahaʼéi anhelkuéra, umi tupã uvei.

38 David ohupytyvaʼekue avei heta tembireko ha konkuvína, ha avei Salomón ha Moisés, che rembiguaikuéra, avei heta ambue che rembiguaikuéraicha, apopyre ñepyrũmby guive ko ára peve; ha mbaʼevépe naiñangaipái hikuái, ndahaʼéirõ umi mbaʼe chehegui nomog̃uahẽivaʼekuépe.

39 David ohupytyvaʼekue chehegui umi hembireko ha konkuvína, che rembiguái Natán po rupive, ha ambue profetakuéra oguerekovaʼekuégui ko puʼaka llavekuéra; ha mbaʼeve koʼã mbaʼépe naiñangaipáikuri cherehe, ndahaʼéirõ Urías ha hembireko kásope; ha upévare, hoʼákuri iñexaltasiõgui ha ohupytýkuri ipehẽngue; ha ndoguerekomoʼãi umívape jehejapyréramo ko múndogui osẽvo, Che ameʼẽgui umíva ambuévape, heʼi Ñandejára.

40 Che haʼe Ñandejára nde Tupã, ha Che ameʼẽkuri ndéve, che rembiguái José, peteĩ ñehenói, ha amoĩjey opa mbaʼe. Ejerure upe reipotáva, ha oñemeʼẽta ndéve che ñeʼẽme heʼiháicha.

41 Ha reporandúgui ñemoakãratĩ rehegua, añetehápe, añetehápe, Che haʼe ndéve, peteĩ kuimbaʼe omog̃uahẽramo peteĩ tembireko, konvénio pyahu ha opaveʼỹvape, ha pe kuña ojoajúramo ambue kuimbaʼére, ha Che ndaʼéikuri chupe upe sánto unhimiénto rupi, haʼe ojapókuri ñemoakãratĩ ha oñehundíta.

42 Ha pe kuña ndoikéiramo konvénio pyahu ha opaveʼỹvape, ha ojoaju ambue kuimbaʼére, haʼe ojapúkuri ñemoakãratĩ.

43 Ha pe iména ojoajúramo ambue kuñáre, ha haʼe oĩkuri vóto guýpe, haʼe ojapyharákuri ivóto ha ojapókuri ñemoakãratĩ.

44 Ha pe kuña ndojapóiramo ñemoakãratĩ, ha katu iñangaʼỹ ha ndojapyharáikuri ivóto, ha haʼe oikuaa, ha Che aikuaauka ndéve, che rembiguái José, upérõ reguerekóta puʼaka, che Santo Sacerdocio pokatu rupive, rejapyhy hag̃ua chupe, ha emeʼẽ chupe pe ndojapoivaʼekuépe ñemoakãratĩ ha katu ijeroviareko uvei; kóvape oñemoĩtagui sãmbyhyháramo heta ári.

45 Che ameʼẽgui ndéve pe sacerdocio llavekuéra ha puʼaka, ha kóva rupive Che amoĩjey opa mbaʼe, ha aikuaauka ndéve opa mbaʼe hiʼárape.

46 Ha añetehápe, añetehápe, Che haʼe ndéve, umi reselláva yvy ári ojeselláta yvágape; ha reñapytĩva yvy ári, che rérape ha che ñeʼẽ rupive, heʼi Ñandejára; oñeñapytĩta tapiaite g̃uarã yvagakuérape; ha oimeraẽ tekove angaipa reñyrõva yvy ári, oñeñyrõta tapiaite g̃uarã umi yvagakuérape; ha oimeraẽ tekove angaipa rejokóva yvy ári, ojejokóta yvágape.

47 Ha avei, añetehápe Che haʼe, oimeraẽ rehovasávape Che ahovasáta, ha oimeraẽ remoñeʼẽngaivape Che amoñeʼẽngáita, heʼi Ñandejára; Che, Ñandejára, haʼégui nde Tupã.

48 Ha avei, añetehápe Che haʼe ndéve, che rembiguái José, upe remeʼẽva yvy ári, ha pe ndehegui omog̃uahẽva oimeraẽvape ko yvy ári, che ñeʼẽ rupive ha che léipe heʼiháicha, ojevisitáta umi jehovasa reheve ha ndahaʼéi ñeʼẽngaikuéra reheve, ha Che pokatúre, heʼi Ñandejára, ha ndoguerekomoʼãi kondenasiõ yvy ári ha yvágape.

49 Che haʼégui Ñandejára nde Tupã, ha aiméta nendive múndo opaha peve jepeve, ha opa ára apyraʼỹ meve; añetehápe, Che asellágui nde ári nde exaltasiõ, ha ambosakoʼi peteĩ apykajegua ndéve g̃uarã che Ru rógape, nde ru Abraham-ndi.

50 Péina ápe, Che ahechákuri umi nde jehasaʼasy, ha aperdonambáta opa ne angaipa; Che ahechákuri nde jehasaʼasy neñeʼẽrendúvo Che haʼevaʼekuére ndéve. Tereho upéicha, ha Che ambosakoʼíta tape rekañy hag̃ua, Che aguerohory haguéicha Abraham-gui itaʼýra Isaac ñemeʼẽmby.

51 Añetehápe, Che haʼe ndéve: Peteĩ tembiapoukapy Che ameʼẽ, che rembiguái Emma Smith, tembireko Che ameʼẽvaʼekue ndévepe, tojejoko ha ani oike upe Che amandavaʼekuépe ndéve reikuaveʼẽ hag̃ua chupe; Che ajapógui upéva poipyʼaraʼã hag̃ua, heʼi Ñandejára, Abraham-pe aipyʼaraʼã haguéicha, ha Che ajerure hag̃ua peteĩ ñemeʼẽmby nde pógui, konvénio ha temikuaveʼẽ rupive.

52 Ha tomog̃uahẽ che rembiguái Emma Smith, opa umi oñemeʼẽvaʼekue che rembiguái José-pe, ha umi hekopotĩva ha imaraʼỹva che renondépe; ha umi ikyʼáva, ha heʼivaʼekue imaraʼỹha, oñehundíta, heʼi Tupã Ñandejára.

53 Che haʼégui Ñandejára nde Tupã, ha neñeʼẽrendúta che ñeʼẽre; ha Che ameʼẽ che rembiguái José-pe haʼe hag̃ua sãmbyhyhára heta mbaʼe ári; ijeroviarekógui mbovy mbaʼe ári, ha Che amombaretéta chupe koʼág̃a guive tenondeve gotyo.

54 Ha Che amanda che rembiguái Emma Smith-pe, topyta ha tojoaju che rembiguái José-re, ha hese añónte. Ha katu naiñeʼẽrenduséiramo ko tembiapoukapýre, oñehundíta, heʼi Ñandejára; Che haʼégui Ñandejára nde Tupã, ha ahundíta chupe ndopytáiramo che léipe.

55 Ha katu haʼe naiñeʼẽrenduséiramo ko tembiapoukapýre, upérõ che rembiguái José ojapóta opa mbaʼe hese, jepe haʼe heʼi haguéicha; ha Che ahovasáta ha ambohetáta chupe, ha ameʼẽvéta chupe cién jeyve ko múndope, túva ha sykuéra, ryvy ha reindykuéra, umi óga ha yvy, tembireko ha mitãnguéra, ha tekovekuéra ijapyraʼỹva koróna umi múndo ijapyraʼỹvape.

56 Ha avei, añetehápe Che haʼe, toperdona che rembiguái Emma, che rembiguái José-pe hembiapovaikuéra; upérõ oñeperdonáta chupe hembiapovaikuéra, umi cherehe ojapovai haguépe; ha Che, Ñandejára nde Tupã, ahovasáta chupe, ha amoñemoñáta chupe, ha ambovyʼáta ikorasõ.

57 Ha avei, Che haʼe, aníke che rembiguái José oguenohẽ imbaʼerepykuéra ipógui, ani ou peteĩ ihayhuʼỹhára ha ohundi chupe, Satana oñehaʼãgui oporohundi; ha Che haʼégui Ñandejára nde Tupã, ha haʼe che rembiguái; ha péina ápe, péicha, Che aime hendive, Che aime haguéicha nde ru Abraham-ndi, jepe iñexaltasiõ ha iglória peve.

58 Koʼág̃a, sacerdocio léi rehegua, oĩ heta mbaʼe ipypeguáva.

59 Añetehápe, peteĩ kuimbaʼe oñehenóiramo che Rúre, Aarón-cha, che ñeʼẽpu rupi, ha pe chembouvaʼekue ñeʼẽpu rupi, ha Che ainvestíkuri chupe ko sacerdocio puʼaka llavekuéra reheve, haʼe ojapóramo peteĩ mbaʼe che rérape, che léi ha che ñeʼẽme heʼiháicha, ndojapomoʼãi angaipa, ha Che ahustifikáta chupe.

60 Upévare, ani avave oñeʼẽvai che rembiguái José-re; Che ahustifikatágui chupe; haʼe ojapótagui upe jehasaʼasy che ajeruréva ipógui umi ijejapyharáre, heʼi Ñandejára nde Tupã.

61 Ha avei, pe sacerdocio léi rehegua—peteĩ kuimbaʼe omendáramo peteĩ virgen-re, ha omendase ambuére, ha upe peteĩha omboaje, ha haʼe omenda upe mokõiháre, ha virgen hikuái, ha noñeʼẽmeʼẽikuri avave ambue kuimbaʼépe, upérõ ojehustifika chupe; haʼe ndaikatúigui ojapo ñemoakãratĩ umi chupe oñemeʼẽvare; haʼe ndaikatúigui ojapo ñemoakãratĩ upe imbaʼévare ha ndahaʼéivare avave mbaʼe.

62 Ha oñemeʼẽramo chupe die virgen ko léi rupive, haʼe ndaikatúi ojapo ñemoakãratĩ, imbaʼégui hikuái, ha oñemeʼẽ chupe umíva; upévare, ojehustifika chupe.

63 Ha katu peteĩ térã oimeraẽ umi die virgen, omenda rire, oikóramo ambue kuimbaʼéndi, haʼe ojapókuri ñemoakãratĩ ha oñehundíta; oñemeʼẽgui upe kuimbaʼépe oñemoña ha omyenyhẽ hag̃ua ko yvy, che rembiapoukapýpe heʼiháicha, ha okumpli hag̃ua promésa oñemeʼẽvaʼekue che Ru rupive, ko múndo ojejapo mboyve, ha iñexaltasiõrã umi múndo ijapyraʼỹvape, omoheñói hag̃ua hikuái yvyporakuéra ánga; kóvape ojejapógui ohóvo che Ru rembiapo, haʼe ojeglorifika hag̃ua.

64 Ha avei, añetehápe, añetehápe, Che haʼe ndéve, oimeraẽ kuimbaʼe hembirekóva, oguerekóva ko puʼaka rehegua lláve ha omboʼe chupe che sacerdocio léi koʼã mbaʼépe, upérõ haʼe oguerovia ha oministravaʼerã chupe, térã oñehundíta, heʼi Ñandejára nde Tupã; Che ahundítagui chupe; ha Che ambotuichátagui che réra opa umi chemog̃uahẽva ári, ha opytáva che léipe.

65 Upévare, oĩporãta chéve, pe kuña nomboajéiramo ko léi, pe kuimbaʼe ohupyty hag̃ua opaite mbaʼe Che, Ñandejára Itupã, ameʼẽva chupe, haʼe ndogueroviáigui ha noministráigui chupe che ñeʼẽme heʼiháicha; upérõ oiko chugui ojapyharáva; ha haʼe natekotevẽvéima ojapo Sara léi, oministravaʼekue Abraham-pe, léipe heʼiháicha, Che amandarõguare chupe ojapyhy Agar-pe hembirekorã.

66 Ha koʼág̃a, ko léi rehegua, añetehápe, añetehápe, Che haʼe ndéve, Che aikuaaukavéta ndéve tenondeve; upévare, ko árape iporãntema kóva. Péina ápe, Che haʼe pe Alfa ha Omega. Amén.