Tshooj 10
Kev tshwm sim uas tus Yaj Saub Joseph Smith tau txais, nyob hauv Harmony, Pennsylvania, kwv yees li thaum lub Plaub Hlis Ntuj xyoo 1829, tiam sis tej zaum twb tau txais ib feem ua ntej li thaum lub caij ntuj sov xyoo 1828. Nyob hauv tshooj no tus Tswv qhia Joseph txog tej uas cov neeg phem tau muab hloov nyob hauv 116 phab ntawv uas yog muab txhais los ntawm Lihais phau ntawv, nyob hauv Phau Ntawv Maumoos. Cov ntawv sau no tau ploj ntawm Martin Harris tes mus lawm, tus uas tau tso siab muab cov ntawv rau nws coj mus saib ob peb hnub. (Saib cov lus piav lub ntsiab ntawm tshooj 3.) Lub tom txwv phem yog cuab tos thaum muab cov ntawv uas ploj lawm no txhais dua tshiab es yuav liam tus txhais lus los ntawm tej qho uas sib txawv ntawm cov ntawv txhais dua tshiab thiab tej uas tau muab hloov ntawm tej phab ntawv uas ploj lawm. Hais tias lub tswv yim phem no yog tus niag phem xav tawm los thiab tus Tswv twb paub txij puag thaum Maumoos, uas yog tus kws sau cov Neeg Nifais zaj keeb kwm puag thaum ub, tab tom sau ntsiab lus txog cov phiaj thiab txiav los tso ua ke, twb muaj nyob hauv Phau Ntawv Maumoos (saib Maumoos cov Lus 1:3–7).
1–26, Dab Ntxwg Nyoog txhaub cov neeg phem kom tawm tsam tus Tswv txoj hauj lwm; 27–33, Nws nrhiav kev ua kom neeg tus ntsuj plig puas tsuaj; 34–52, Txoj moo zoo yuav tsum mus rau cov Neeg Lamas thiab rau txhua haiv neeg los ntawm Phau Ntawv Maumoos; 53–63, Tus Tswv yuav tsa Nws lub Koom Txoos thiab Nws txoj moo zoo nyob hauv cov neeg; 64–70, Nws yuav sau cov neeg uas hloov siab lees txim los nkag rau hauv Nws lub Koom Txoos thiab yuav cawm cov uas mloog lus.
1 Nim no, saib seb, kuv hais rau koj tias, vim koj tau coj cov ntawv sau uas tau muab hwj chim rau koj txhais los ntawm lub Ulees thiab Thumees, mus rau ib tug neeg phem txhais tes, koj thiaj ua cov ntawv poob lawm.
2 Thiab koj kuj poob koj lub txiaj ntsim tib lub sij hawm ntawd, thiab koj lub cim xeeb hloov los muaj kev tsaus ntuj.
3 Txawm li ntawd los, ziag no twb muab koj lub txiaj ntsim rov qab txum tim rau koj dua; yog li ntawd xyuas kom koj yuav rau siab thiab ua mus ntxiv kom txog thaum tag txoj hauj lwm txhais lus uas tseem tshuav zoo ib yam li koj tau pib ua.
4 Tsis txhob khiav nrawm dua los yog ua hauj lwm ntau dua li koj muaj zog thiab ntau dua li tej kev tau npaj pab koj txhais lus; tiam sis rau siab kom txog thaum kawg.
5 Thov Vajtswv tas mus li, xwv kom koj yuav yog tus kov yeej; muaj tseeb tiag, xwv kom koj yuav kov yeej Dab Ntxwg Nyoog, thiab xwv kom koj yuav dim ntawm Dab Ntxwg Nyoog cov tub qhe txhais tes uas txhawb nqa nws txoj hauj lwm.
6 Saib seb, lawv tau nrhiav kev ua kom koj puas tsuaj; muaj tseeb tiag, txawm yog tus txiv neej uas koj tau tso siab rau los tseem tau nrhiav kev ua kom koj puas tsuaj.
7 Thiab yog vim rau qhov no kuv thiaj hais tias nws yog ib tug neeg phem, vim nws tau nrhiav kev muab tej yam uas tau tso siab muab rau koj lawm nqa mus; thiab nws kuj tau nrhiav kev ua kom koj lub txiaj ntsim puas tsuaj mus.
8 Thiab vim yog koj tau muab cov ntawv sau coj mus rau hauv nws txhais tes, saib seb, tej neeg phem tau txeeb cov ntawv ntawm koj mus.
9 Yog li ntawd, muaj tseeb tiag, koj tau muab tej uas dawb ceev ntawd nqa coj mus rau cov neeg phem.
10 Thiab, saib seb, Dab Ntxwg Nyoog ua rau lawv lub siab xav tias yuav muab tej lus hloov, tej lus uas koj tau hais kom muab sau cia, los yog tej lus uas koj tau txhais, uas tau tawm ntawm koj txhais tes mus.
11 Thiab saib seb, kuv hais rau koj tias, vim lawv tau muab tej lus hloov, tej lus ntawd sib txawv tej uas koj tau txhais thiab kom muab sau cia;
12 Thiab, tus dab phem tau nrhiav kev tsim ib lub tom txwv ntse heev zoo li no, xwv kom nws yuav rhuav tau txoj hauj lwm no;
13 Vim nws tau ua lawv lub siab xav ua li no, xwv kom los ntawm txoj kev dag lawv yuav hais tias lawv tshawb tau koj tej lus uas koj tau ua txuj tias koj muab txhais.
14 Kuv hais tseeb rau koj tias, kuv yuav tsis pub kom Dab Ntxwg Nyoog yuav ua tau raws li nws lub tom txwv phem rau qhov no.
15 Vim saib seb, nws tau ua rau lawv lub siab xav ua rau koj sim tus Tswv koj tus Vajtswv lub siab, kom thov rov qab muab cov lus txhais dua.
16 Thiab tom qab ntawd, saib seb, lawv hais thiab xav rau hauv lawv lub siab tias—Peb yuav saib seb puas yog Vajtswv tau muab hwj chim rau nws txhais lus; yog tias yog, ces Vajtswv yeej yuav rov qab muab hwj chim rau nws dua;
17 Thiab yog Vajtswv muab dua hwj chim rau nws, los yog nws txhais dua, los yog hais tias, yog nws txhais tau tib cov lus qub, saib seb, peb twb tau tib cov lus ntawd nrog peb, thiab peb twb tau muab cov lus ntawd hloov.
18 Yog li ntawd cov lus ntawd yuav tsis zoo ib yam, ces peb yuav hais tias nws tau dag txog nws cov lus, thiab hais tias nws twb tsis muaj txiaj ntsim dab tsi, thiab hais tias nws twb tsis muaj hwj chim dab tsi li;
19 Yog li ntawd peb yuav ua kom nws puas tsuaj, thiab rau txoj hauj lwm thiab; thiab peb yuav ua li no xwv kom thaum kawg peb yuav tsis poob ntsej muag, thiab kom peb yuav tau yeeb koob ntawm neeg ntiaj teb.
20 Kuv hais tseeb tseeb rau koj tias, Dab Ntxwg Nyoog tuav tau lawv lub siab ruaj heev; nws txhaub lawv rau txoj kev ua phem tawm tsam tej uas zoo;
21 Thiab lawv lub siab liam sij lawm, thiab muaj kev phem thiab kev qias puv nkaus; thiab lawv nyiam txoj kev tsaus ntuj dua li txoj kev kaj, vim tej yam lawv ua yog tej yam phem; yog li ntawd lawv yuav tsis thov kuv.
22 Dab Ntxwg Nyoog txhaub lawv, kom nws yuav coj tau lawv tej ntsuj plig mus rau txoj kev puas tsuaj.
23 Thiab li no nws tau siv ib lub tom txwv ntse, xav hais tias yuav ua kom Vajtswv txoj hauj lwm puas tsuaj; tiam sis kuv yuav kom yuav tsum muaj qhov no los ntawm lawv txhais tes, thiab qhov lawv ua li ntawd yuav tig los ua lawv txoj kev txaj muag thiab kev raug txim nyob rau hnub txiav txim.
24 Muaj tseeb tiag, nws yeej txhaub lawv lub siab kom chim tawm tsam txoj hauj lwm no.
25 Muaj tseeb tiag, nws hais rau lawv tias: Dag thiab ntxias mus cuab ntxiab tos, xwv kom nej yuav ua tau puas tsuaj; saib seb, qhov no twb tsis txhaum. Thiab li no nws ntxias lawv, thiab qhia rau lawv hais tias tsis muaj kev txhaum thaum dag kom lawv yuav tshawb tau ib tug neeg thaum tab tom dag, xwv kom lawv yuav ua kom nws puas tsuaj.
26 Thiab li no nws ntxias lawv, thiab coj lawv mus kom txog thaum nws cab tau lawv tus ntsuj plig mus rau hauv ntuj txiag teb tsaus; thiab li no nws ua kom lawv yuav cuab tau lawv tus kheej rau ntawm lawv rab ntxiab.
27 Thiab li no nws mus rau ped rau nrad, rau ub rau no nyob hauv lub ntiaj teb, nrhiav kev ua kom tib neeg tus ntsuj plig puas tsuaj mus.
28 Kuv hais tseeb tseeb rau koj tias, txoj kev txom nyem raug tus uas dag ntxias vim nws xav hais tias twb muaj lwm tus dag ntxias thiab, vim cov zoo li ntawd yeej tsis dim ntawm Vajtswv txoj kev txim lij.
29 Nim no, saib seb, lawv tau muab cov lus no hloov lawm, vim Dab Ntxwg Nyoog hais rau lawv tias: Nws tau dag ntxias nej—thiab nws ntxias lawv mus ua tej kev phem li no, los ua kom koj sim tus Tswv koj tus Vajtswv lub siab.
30 Saib seb, kuv hais rau koj tias, koj tsis txhob muab cov lus uas tau poob ntawm koj txhais tes mus coj los txhais dua;
31 Vim, saib seb, lawv yuav ua tsis tau kom muaj raws li lawv tej tom txwv phem los ntawm kev dag tawm tsam cov lus ntawd. Vim, saib seb, yog koj txhais tau tib co lus qub ces lawv yuav hais tias koj dag thiab hais tias koj ua txuj tias koj muab txhais, tiam sis koj hais txawv ntawm koj tus kheej.
32 Thiab, saib seb, lawv yuav muab qhov no luam tawm, thiab Dab Ntxwg Nyoog yuav ua kom cov neeg lub siab tawv qhawv txhaub kom lawv chim siab rau koj, xwv kom lawv yuav tsis ntseeg kuv tej lus.
33 Li no Dab Ntxwg Nyoog xav ua kom kov yeej koj cov lus tim khawv nyob hauv tiam neeg no, xwv kom phau ntawv no yuav tsis muaj tawm los mus nyob hauv tiam neeg no.
34 Tiam sis saib seb, qhov no yog tswv yim, thiab vim kuv muab tswv yim qhia rau koj, thiab muab tej lus txib rau koj ntsig txog tej yam no, qhov uas koj yuav ua, tsis txhob muab qhia rau neeg ntiaj teb kom txog thaum koj ua txoj hauj lwm txhais lus tiav tso.
35 Tsis txhob xav tsis thoob uas kuv tau hais rau koj tias: Qhov no yog tswv yim, tsis txhob muab qhia rau neeg ntiaj teb—vim kuv tau hais tias, tsis txhob muab qhia rau neeg ntiaj teb, xwv kom koj yuav txais kev tsom kwm.
36 Saib seb, kuv tsis hais tias koj yuav tsis muab qhia rau cov ncaj ncees;
37 Tiam sis vim koj twb tsis muaj peev xwm paub tau cov ncaj ncees txhua zaus, los sis vim koj twb tsis muaj peev xwm paub tau cov phem txawv ntawm cov ncaj ncees txhua zaus, yog li ntawd kuv hais rau koj tias, nyob twj ywm kom txog thaum kuv pom zoo muab txhua yam ua kom neeg ntiaj teb paub txog qhov ntawd tso.
38 Thiab nim no, kuv hais tseeb rau koj tias, ib zaj ntawm tej yam uas koj tau sau, uas tau tawm ntawm koj txhais tes mus lawm, twb muaj sau nyob rau hauv Nifais cov phiaj;
39 Muaj tseeb tiag, thiab koj nco qab hais tias tau hais nyob hauv cov lus sau ntawd tias muaj ib zaj uas hais meej dua txog tej yam no nyob hauv Nifais cov phiaj.
40 Thiab nim no, vim zaj uas muab sau rau hauv Nifais cov phiaj hais meej dua ntsig txog tej yam, uas raws li kuv lub tswv yim, kuv yuav ua kom cov neeg paub los ntawm zaj no—
41 Yog li ntawd, koj mam txhais tej lus sau uas muaj nyob hauv Nifais cov phiaj, kom mus txog rau thaum koj txhais txog vaj ntxwv Npeyamis kav teb chaws, los sis txog thaum koj los txog rau ntawm qhov uas koj twb tau txhais, uas koj tseem khaws cia;
42 Thiab saib seb, koj yuav muab tej lus no luam tawm ua Nifais cov ceev xwm txheej; thiab li no, kuv yuav ua kom cov neeg uas tau muab kuv cov lus hloov lawm poob ntsej muag.
43 Kuv yuav tsis pub lawv ua rau kuv phau ntawv no puas tsuaj; muaj tseeb tiag, kuv yuav ua qhia rau lawv tias kuv laj lim tswv yim loj dua tus dab phem txoj kev ntse.
44 Saib seb, lawv tsuas tau ib feem, los yog ib zaj ntsiab lus ntawm Nifais zaj xwb.
45 Saib seb, muaj ntau yam uas muab sau rau saum Nifais cov phiaj uas qhia tau tej ntsiab zoo dua txog kuv txoj moo zoo; yog li ntawd, yog kuv lub tswv yim uas koj yuav tsum txhais qhov thawj feem ntawm Nifais cov lus sau, thiab muab luam tawm hauv phau ntawv no.
46 Thiab, saib seb, tag nrho tej tseem tshuav ntawm phau ntawv no yeej muaj tag nrho tej feem ntawm kuv txoj moo zoo uas kuv cov yaj saub dawb huv, muaj tseeb tiag, thiab kuv cov thwj tim thiab, tau thov Vajtswv thiab xav kom muab tawm los rau cov neeg no.
47 Thiab kuv hais rau lawv tias, yuav muab rau lawv raws li lawv txoj kev ntseeg thaum lawv thov Vajtswv;
48 Muaj tseeb tiag, thiab qhov no yog lawv txoj kev ntseeg—xwv kom kuv txoj moo zoo, uas kuv tau muab rau lawv kom lawv yuav tau coj mus tshaj tawm thaum lawv ua neej nyob, yuav los rau lawv cov kwv tij uas yog cov Neeg Lamas, thiab rau tag nrho cov uas tau hloov los ua Neeg Lamas vim yog lawv tej kev tsis sib haum xeeb.
49 Nim no, tsis tas li no xwb—lawv txoj kev ntseeg thaum lawv thov Vajtswv yog xwv kom neeg paub txog txoj moo zoo no thiab, yog muaj taus hais tias lwm haiv neeg tuaj nyob thaj av no.
50 Thiab yog li ntawd lawv tau foom ib txoj koob hmoov rau thaj av no thaum lawv thov Vajtswv, xwv kom tus uas yuav ntseeg txoj moo zoo no nyob hauv thaj av no ces yuav tau txoj sia nyob mus ib txhis;
51 Muaj tseeb tiag, xwv kom yuav muaj kev ywj pheej rau txhua tus txawm lawv los ntawm haiv neeg, xeem neeg, yam lus, los sis yam neeg twg los yog.
52 Thiab nim no, saib seb, raws li lawv txoj kev ntseeg thaum lawv thov Vajtswv kuv yuav coj feem ntawm kuv txoj moo zoo no los rau kuv cov neeg paub. Saib seb, kuv tsis yog coj txoj moo zoo los rhuav qhov uas lawv tau txais, tiam sis yog los txhawb tej ntawd kom muaj zog.
53 Thiab vim yog rau qhov no kuv tau hais tias: Yog hais tias tiam neeg no tsis ua lawv lub siab tawv qhawv, kuv yuav tsa kuv lub koom txoos nyob hauv lawv.
54 Nim no kuv tsis hais qhov no los rhuav kuv lub koom txoos, tiam sis kuv hais qhov no los txhim tsa kuv lub koom txoos;
55 Yog li ntawd, tus uas zwm rau kuv lub koom txoos ces tsis tas yuav ntshai, vim tus ntawd yuav tau txais lub nceeg vaj ceeb tsheej los ua nws tug.
56 Tiam sis twb yog lawv cov uas tsis ntshai kuv, thiab tsis ua raws li kuv tej lus txib tiam sis mus txhim tsa tej koom txoos rau lawv tus kheej kom muaj nyiaj nplua nuj, muaj tseeb tiag, thiab tag nrho cov ua phem thiab txhim tsa tus dab phem lub nceeg vaj—muaj tseeb tiag, kuv hais tseeb tseeb rau koj tias, cov uas kuv yuav mus cuam tshuam ces twb yog lawv, thiab yuav ua kom tshee hnyo thiab co nto txog ntua nruab siab.
57 Saib seb, kuv yog Yexus Khetos, Vajtswv Leej Tub. Kuv los rau kuv cov neeg, thiab kuv cov neeg tsis txais yuav kuv.
58 Kuv yog txoj kev kaj uas ci nyob hauv qhov tsaus, thiab qhov tsaus tsis to taub txoj kev kaj.
59 Kuv yog tus uas tau hais rau kuv cov thwj tim hais tias—Kuv muaj lwm cov yaj uas tsis yog los ntawm pab no—thiab tau muaj ntau tus uas tsis to taub kuv.
60 Thiab kuv yuav qhia rau cov neeg no hais tias kuv muaj lwm cov yaj, thiab hais tias lawv yog ib ceg ntawm tsev neeg Yakhauj;
61 Thiab kuv yuav ua kom lawv tej hauj lwm zoo kawg nkaus tshwm los, uas lawv tau ua los ntawm kuv lub npe.
62 Muaj tseeb tiag, thiab kuv kuj yuav ua kom neeg paub txog kuv txoj moo zoo uas tus Tswv cov yaj saub thiab cov thwj tim tau qhia rau lawv, thiab, saib seb, lawv yuav tsis xyeej qhov uas koj tau txais, tiam sis lawv yuav txhim tsa tej ntawd, thiab yuav ua kom neeg paub tej ntsiab lus tseeb ntawm kuv txoj lus qhuab qhia, muaj tseeb tiag, thiab tib txoj lus qhuab qhia uas los ntawm kuv.
63 Thiab kuv ua li no xwv kom kuv tsa tau kuv txoj moo zoo, kom tsis txhob muaj kev sib cav sib ceg ntau ntau; muaj tseeb tiag, Dab Ntxwg Nyoog yeej txhaub cov neeg lub siab kom muaj kev sib cav sib ceg ntsig txog tej ntsiab lus ntawm kuv txoj lus qhuab qhia; thiab lawv ua yuam kev ntawm tej yam no, vim lawv muab tej vaj lug kub ntxeev thiab tsis to taub tej vaj lug kub.
64 Yog li ntawd, kuv yuav muab qhov txuj ci tseem ceeb uas neeg paub tsis txog no nthuav tawm los mus rau lawv.
65 Vim saib seb, kuv yuav muab lawv sau los ib yam li ib tug poj qaib sau nws cov me nyuam los rau hauv nws qab tis, yog hais tias lawv tsis ua kom lawv lub siab tawv qhawv;
66 Muaj tseeb tiag, yog lawv xav los, ces lawv los tau, thiab los haus cov dej ntawm txoj sia tsis yuav nqi li.
67 Saib seb, nov yog kuv txoj lus qhuab qhia—tus uas hloov siab lees txim thiab los cuag kuv, ces tus ntawd yog kuv lub koom txoos.
68 Tus uas hais ntau tshaj los yog tsawg dua qhov no, ces tus ntawd twb tsis yog los ntawm kuv los, tiam sis yog tawm tsam kuv; yog li ntawd nws twb tsis yog los ntawm kuv lub koom txoos los.
69 Thiab nim no, saib seb, tus uas yog los ntawm kuv lub koom txoos los, thiab nyob hauv kuv lub koom txoos nyiaj mus kom txog thaum kawg, ces kuv yuav muab tus ntawd tsa rau saum kuv lub pob zeb, thiab tej qhov rooj ntawm ntuj txiag teb tsaus yuav kov tsis yeej lawv.
70 Thiab nim no, nco ntsoov tej lus ntawm tus neeg uas yog txoj sia thiab yog txoj kev kaj ntawm neeg ntiaj teb, koj tus Txhiv Dim, koj tus Tswv thiab koj tus Vajtswv. Amees.