Benneg 103
Paltiing a naited babaen ni Joseph Smith a Propeta, iti Kirtland, Ohio, idi 24 ti Pebrero 1834 (History of the Church, 2:36–39). Naawat daytoy a paltiing kalpasan ti isasangpet iti Kirtland, Ohio da Parley P. Pratt ken Lyman Wight, a naggapu iti Missouri tapno pabalakadan iti Propeta maipapan iti tulong ken pannakaisubli manen dagiti Santo iti dagdagada iti Jackson County.
1–4, No apay nga impalubos ti Apo a maidadanes dagiti Santo iti Jackson County; 5–10, Agballiginto dagiti Santo no tungpalenda dagiti bilin; 11–20, Dumtengto ti pannakasubbot ti Zion babaen ti bileg, ket kuyogento ti Apo dagiti taona; 21–28, Aguummong dagiti Santo iti Zion, ket masarakanto manen dagiti nangpukaw iti biagda dagiti biagda; 29–40, Sumagmamano a kakabsat ti natudingan a mangbangon iti Kampo ti Zion ken mapan iti Zion; naikarianda iti balligi no napudnoda.
1 Pudno kunak kadakayo, gagayyemko, adtoy, itdekto kadakayo ti paltiing ken bilin, tapno ammoyo ti aramidenyo iti panangipatungpalyo kadagiti pagrebbenganyo maipanggep iti pannakaisalakan ken pannakasubbot dagiti kabsatyo, a nasayyasayya iti daga ti Zion;
2 Iti pannakapapanaw ken panangdangran ida dagiti kabusorko, a pangibukbokakto iti pungtotko a di marukod iti panawenko.
3 Ta pinalubosak ida iti kasta ti kapautna, tapno makun-osda ti rukod ti basbasolda, tapno mapunno ti kopada;
4 Ken tapno dagiti nangpanagan iti bagbagida iti naganko madusada iti ababa a panawen iti nasaem ken nakaro a pannakadusa, gapu ta dida impangag a namimpinsan dagiti annuroten ken bilin nga intedko kadakuada.
5 Ngem pudno kunak kadakayo, nga impaulogko ti paulog a maamiristo dagiti taok, no la ketdi dumngegda itan iti pammagbaga a siak, ti Apo a Diosda, itdekto kadakuada.
6 Adtoy rugiandanto, ta impaulogkon, ti agballigi kadagiti kabusorko manipud iti daytoy nga oras.
7 Ket babaen ti panangimdengda a mangtungpal kadagiti amin a balikas a siak, ti Apo a Diosda, ibagakto kadakuada, saandanto a pulos nga agpatingga nga agballigi agingga a maparmek dagiti pagarian ti lubong iti sakaanak, ket maited ti daga kadagiti santo, tapno tagikuaenda iti agnanayon nga awan inggana.
8 Ngem no dida tungpalen dagiti bilinko, ken dida umimdeng a mangtungpal kadagiti amin a balikasko, agballiginto kadakuada dagiti pagarian iti lubong.
9 Ta nairantada a silaw iti lubong, ken mangisalakan kadagiti tao;
10 Ket no saanda a mangisalakan kadagiti tao, awan dumada iti asin a napukawen ti ramenna, ket awanen ti mamaayna no di maibelleng ken iludekludek dagiti tao.
11 Ngem pudno kunak kadakayo, impaulogko nga agsublinto kadagiti daga a tawidda dagiti kabsatyo a nasayyasayya, ket bangonendanto dagiti nadadael a lugar iti Zion.
12 Ta kalpasan ti adu a panagtutuok, kas nasaok kadakayo iti napalabas a bilinko, umay ti bendision.
13 Adtoy, daytoy ti bendision nga inkarik kalpasan dagiti panagtutuokyo, ken dagiti panagtutuok dagiti kabsatyo—ti pannakasubbotyo, ken ti pannakasubbot dagiti kabsatyo, uray pay ti pannakaisubli ti daga ti Zion, a mabangonto, saanton a marippuog.
14 Nupay kasta, no rugitanda dagiti tawidda marippuogdanto; ta saankonto nga isalakan ida no rugitanda dagiti tawidda.
15 Adtoy, kunak kadakayo, nasken a dumteng babaen ti bileg ti pannakasubbot ti Zion;
16 Ngarud, mangpatanorakto iti tao manipud kadagiti taok, a mangidaulo kadakuada a kas ken ni Moises idi indauluanna dagiti annak ti Israel.
17 Ta dakayo ti annak ti Israel, ken bukel ni Abraham, ket nasken a maidauluankayo a rumuk-at iti pannakaadipen babaen ti bilegko, ken babaen ti naitanggaya a takiag.
18 Ket kas iti pannakaidaulo dagiti ammayo idi damo, kastanto met ti pannakasubbot ti Zion.
19 Ngarud, diyo pagluloken dagiti pusoyo, ta imbagak kadakayo a saan a kas iti imbagak kadagiti ammayo: Agpangatonto ti anghelko iti sangoyo, ngem saan nga iti imatangko.
20 Ngem kunak kadakayo: Agpangatonto dagiti anghelko iti sangoyo, ken kasta met iti imatangko, ket matagikuayonto a dagus ti nasayaat a daga.
21 Pudno, pudno kunak kadakayo, a ni katulongak a Joseph Smith, Jun., ti tao nga inyarigko iti katulongan a nangisaritaan ti Apo ti bangkag iti pangngarig nga intedko kadakayo.
22 Ngarud paibagayo iti katulongak a ni Joseph Smith, Jun., kadagiti panuli ti balayko, dagiti agtutubok ken dagiti agkabannuag—Ummongenyo ti bagbagiyo iti daga ti Zion, iti daga a ginatangko iti kuarta a naikkan-pateg kaniak.
23 Ket paitulodyo kadagiti masirib a tao ti amin a simbaan dagiti kuartada, ket gumatangda iti dagdaga a kas iti imbilinko kadakuada.
24 Ket no la ketdi umay dagiti kabusorko a mangpapanaw kadakayo iti nasayaat a daga, nga inikkak-pateg nga agbalin a daga ti Zion, a kas kadagiti bukodyo a daga kalpasan dagitoy a pammaneknek, nga indatagyo kaniak a maibusor kadakuada, ilunodyonto ida;
25 Ket asino man nga ilunodyo, ilunodkonto, ket ibalesdakto kadagiti kabusorko.
26 Ket addaakto kadakayo uray pay iti panangibalesyo kaniak kadagiti kabusorko, iti maikatlo ken maikapat a kaputotanda a manggurgura kaniak.
27 Diyo ipalubos nga adda tao a mabuteng a mangpukaw iti biagna para iti pagimbagak; ta asino man a mangpukaw iti biagna para kaniak masarakannanto manen.
28 Ket asino man a di agtallugod a mangpukaw iti biagna para iti pagimbagak saanko a disipulo.
29 Pagayatak a pigsaanto ni Sidney Rigdon a katulongak ti agsao iti paguummongan kadagiti pagilian iti dumaya, a mangisagana kadagiti simbaan nga umawat kadagiti bilin nga intedko kadakuada maipanggep iti pannakaisubli ken pannakasubbot ti Zion.
30 Pagayatak a saan nga agsubli dagiti katulongak a da Parley P. Pratt ken Lyman Wight iti daga dagiti kabsatda, agingga a makaalada iti kaduada a mapan iti daga ti Zion, a sagsangapulo, wenno sagduduapulo, wenno saglilimapulo, wenno sagsangagasut, agingga a makaalada iti bilang a lima gasut a panuli ti balayko.
31 Adtoy daytoy ti pagayatak; dumawatkayo ket maikkankayo; ngem manmano nga aramiden ti tao ti pagayatak.
32 Ngarud, no dikayo makagun-od iti lima gasut, agdawatkayo a sireregta tapno iti panagdaliasatyo makagun-odkayo iti tallo gasut.
33 Ket no saankayo a makagun-od iti tallo gasut, agdawatkayo a sireregta tapno iti panagdaliasatyo makagun-odkayo iti sangagasut.
34 Ngem pudno kunak kadakayo, itedko kadakayo ti bilin, a saankayo a mapan iti daga ti Zion agingga a dikayo makagun-od iti sangagasut a panuli ti balayko, a sumurot kadakayo iti daga ti Zion.
35 Ngarud, kas nasaok kadakayo, dumawatkayo ket maikkankayo; agkararagkayo a sipapasnek tapno iti pagdaliasatyo, kumuyog kadakayo ni katulongak a Joseph Smith, Jun., ket isu ti mangimaton iti tengnga dagiti taok, ken buklenna ti pagariak iti naikkan-pateg a daga, ket buklenna dagiti annak ti Zion kadagiti paglintegan ken bilin a naiteden ken maitedto kadakayo.
36 Lumabasto kadakayo ti amin a balligi ken gloria babaen ti kinaregta, kinapudno, ken napnuan pammati a panagkararagyo.
37 Pagdaliasatenyo ti katulongak a ni Parley P. Pratt a kaduana ni katulongak a Joseph Smith, Jun.
38 Pagdaliasatenyo ti katulongak a ni Lyman Wight a kaduana ni katulongak a Sidney Rigdon.
39 Pagdaliasatenyo ti katulongak a ni Hyrum Smith a kaduana ni katulongak a Frederick G. Williams.
40 Pagdaliasatenyo ni katulongak nga Orson Hyde a kaduana ni katulongak nga Orson Pratt, no ania man ti pammagbaga kadakuada ni katulongak a Joseph Smith, Jun., iti pananggun-od iti pannakatungpal dagitoy a bilin nga intedko kadakayo, ket ibatiyo kaniak dagiti nabati. Pudno a kasta. Amen.