Sección 110
Visiõ ojehechaukavaʼekue José Smith, upe Proféta ha Oliver Cowdery-pe, Kirtland, Ohio Témplope, abril 3, 1836-pe. Upe jave haʼékuri peteĩ servicio dominical. José Smith rembiasakuépe heʼi: “Kaʼarukue, aipytyvytõkuri ambue presidente-kuérape ameʼẽvo Ñandejára Santa Cena Tupaoguakuérape, ahupytývo upéva umi Doce-gui, orekovaʼekue priviléhio oʼofisia hag̃ua upe mesa marangatúpe upe ára. Ajapo rire pe servicio che joykeʼykuérape, ahákuri púlpitope, oñemboguejývo umi vélo, ha añesũ, Oliver Cowdery-ndi, ñemboʼe solemne ha kirirĩme. Ropuʼãvo, roñemboʼepa rire, ojehechauka oréve ko visiõ”.
1–10, Jehová Ñandejára ojehechauka iglóriape ha omboaje Kirtland Témplo Hógaramo; 11–12, Mokõive, Moisés ha Elías ojehechauka ha omeʼẽ illáve ha idispensasiõ; 13–16, Elías oujey ha omeʼẽ idispensasiõ llavekuéra, oñepromete haguéicha Malaquías-pe.
1 Ojepeʼákuri upe vélo ore akãgui, ha ore ñeikũmby resa ojepeʼákuri.
2 Rohechákuri Ñandejárape púlpito varánda ári, ore renondépe; ha umi ipy guýpe oĩkuri peteĩ paviménto oroitégui, ámbar kolorcha.
3 Umi hesa tata rendýicha; iñakã áva morotĩ sakã niéveicha; hova ojajaive kuarahy resapégui; ha iñeʼẽpu haʼékuri heta yguasu ryapúicha, héẽ, Jehová ñeʼẽpu heʼíva:
4 Che haʼe peteĩha ha ipaháva; Che haʼe pe oikovéva, Che haʼe pe ojejukavaʼekue; Che haʼe penderehe ojeruréva Túva renondépe.
5 Péina ápe, oñeperdona peẽme pene angaipakuéra; penepotĩme che renondépe; upévare, pehupi pene akã ha pevyʼa.
6 Tovyʼa pende joykeʼykuéra korasõ, ha tovyʼa opa che tavayguakuéra korasõ, umi imbarete reheve, omopuʼãvaʼekue ko óga che rérape.
7 Ha péina ápe, Che amboajégui ko óga, ha che réra oĩta koʼápe; ha Che ajehechaukáta poriahuverekópe che tavayguakuérape ko ógape.
8 Héẽ, Che ajehechaukáta che rembiguaikuérape, ha añeʼẽta chupekuéra che ñeʼẽpu teépe, che tavyaguakuéra oñongatúramo che rembiapoukapykuéra, ha nomongyʼái ko óga marangatu.
9 Héẽ, millares ha deséna de millares korasõ tuicha ovyʼáta, umi jehovasa oñeñohẽtava rupi ha pe ñembyao che rembiguaikuéra oñembyao haguére ko ógape.
10 Ha ko óga rerakuãporã isarambíta umi tetã ambue peve; ha kóva haʼe jehovasa ñepyrũmby oñeñohẽtava che tavayguakuéra akã ári. Taupéicha. Amén.
11 Ko visiõ oñemboty rire, ojepeʼa jey oréve yvága; ha Moisés ojehechauka ore renondépe, ha omeʼẽ oréve llavekuéra Israel ñembyaty irundy yvy rendágui, ha umi diez tribu jegueraha lláve, norte-gua retãgui.
12 Kóva rire, Elías ojehechauka, ha omeʼẽ Abraham evanhélio dispensasiõ, heʼívo ore ha ore ñemoñare rupive ojehovasataha opa ñemoñareaty ore riregua.
13 Opa rire ko visiõ, ojehechauka oréve ambue visiõ tuicha ha igloriósova; oñemboʼýgui ore renondépe Elías, upe Proféta, ojeguerahavaʼekue yvágape ohasaʼỹre ñemano, ha heʼi:
14 Péina ápe, og̃uahẽmbaitéma ára oñeñeʼẽ haguégui Malaquías juru rupi—otestifikávo haʼe, [Elías upe Proféta] oñemboutaha Ñandejára ára tuicha ha oporomondyietéva mboyve—
15 Omoĩ hag̃ua tuvakuéra korasõ taʼyrakuéra gotyo, ha taʼyrakuéra korasõ tuvakuéra gotyo, ani hag̃ua opa upe yvy ojejopy peteĩ ñeʼẽngáipe—
16 Upévare, oñemoĩ pende pópe ko dispensasiõ llavekuéra; ha kóva rupi peikuaáta Ñandejára ára tuicha ha oporomondyietéva hiʼag̃uimaha, héẽ, upe okẽme.