Tshooj 12
Kev tshwm sim uas tus Yaj Saub Joseph Smith tau txais kom qhia Joseph Knight tus Laus, nyob hauv Harmony, Pennsylvania, lub Tsib Hlis Ntuj xyoo 1829. Joseph Knight ntseeg tej uas Joseph Smith tshaj tawm txog qhov uas nws tau cov phiaj uas yog Phau Ntawv Maumoos thiab ntseeg txoj hauj lwm txhais lus uas tab tom muaj nyob rau lub sij hawm ntawd thiab muaj ntau zaus tau muab nws tej khoom pab Joseph Smith thiab nws tus teev ntawv, uas pab tau rau nkawd txhais lus mus ntxiv. Los ntawm qhov Joseph Knight tau thov, tus Yaj Saub thiaj tau nug tus Tswv thiab tau txais txoj kev tshwm sim no.
1–6, Cov neeg ua hauj lwm hauv lub vaj txiv hmab yuav tau txais kev cawm seej; 7–9, Tag nrho cov xav pab thiab zoo txaus ces pab tau ua tus Tswv txoj hauj lwm.
1 Ib txoj hauj lwm tseem ceeb thiab zoo kawg nkaus tab tom yuav tawm los mus rau noob neej.
2 Saib seb, kuv yog Vajtswv; cia li mloog kuv txoj lus, uas muaj sia zees nyob thiab muaj hwj chim, ntse dua li rab ntaj uas muaj ob sab hniav, yuav faib hlo tej pob qij txha thiab tej hlwb txha ua ob sab; yog li ntawd cia li mloog kuv txoj lus.
3 Saib seb, thaj teb twb daj rhuv zoo sau qoob loo lawm, yog li ntawd, yog leej twg xav mus sau cia nws cev nws rab liag sib zog mus hlais, thiab sau los thaum tseem tshuav sij hawm, kom nws yuav khaws tau txoj kev cawm seej uas kav ib txhis cia rau nws tus ntsuj plig nyob hauv Vajtswv lub nceeg vaj.
4 Muaj tseeb tiag, tus uas yuav cev nws rab liag mus sau, ces Vajtswv hu tus ntawd.
5 Yog li ntawd, yog koj thov kuv ces koj yuav tau txais; yog koj khob ces yuav qhib rau koj.
6 Nim no, vim koj tau thov, saib seb, kuv hais rau koj tias, cia li ua raws li kuv tej lus txib, thiab nrhiav kev pab coj thiab tsa lub hom phiaj ntawm Xi-oos.
7 Saib seb, kuv hais lus rau koj, thiab kuj hais rau tag nrho cov uas muaj tej kev xav pab tsa thiab coj txoj hauj lwm no los;
8 Thiab tsis muaj ib tug twg yuav muaj peev xwm pab tau rau txoj hauj lwm no tsuas yog nws yuav txo hwj chim thiab muaj kev hlub puv npo xwb, muaj txoj kev ntseeg, kev cia siab, thiab kev siab hlub, tswj tus kheej txog txhua yam, txhua yam uas yuav muab rau nws saib xyuas.
9 Saib seb, kuv yog txoj kev kaj thiab txoj sia ntawm neeg ntiaj teb, tus uas hais cov lus no, yog li ntawd cia li sib zog mloog, ces tom qab ntawd tus Tswv hu koj. Amees.