1 Ha avei, rojerure pehecha hag̃ua iporãha opa santokuéra ombyaty upe oikuaáva opa mbaʼe oikovaʼekuégui, ha umi jehasaʼasy ha mbaʼe ivaíva ojapoʼakue hesekuéra ko Estadogua tavayguakuéra;

2 Ha avei opa mbaʼerepykuéragui ha mboýpa umi ñembyai ohasavaʼekue hikuái, mokõivéva, terakuãme ha tete ñehunga, péicha avei umi mbaʼerepykuéra rehegua;

3 Ha avei, opa tekove réra ijejopykuérape oĩvaʼekue, ikatuha peve ojehupyty ha ojeikua.

4 Ha ikatu oñehenói peteĩ komité oheka hag̃ua koʼã mbaʼe ha ombyaty hag̃ua umi ñemombeʼu ha ojeʼepyréva, ha avei ombyaty hag̃ua umi jehaipy japu oñeguenohẽvaʼekue isarãmbivahína;

5 Ha opa mbaʼe oĩva umi rrevísta ha kuatiañeʼẽrusúpe, ha opa tembiasakue japu oñeguenohẽmavaʼekue ha umi ojehaivahína, ha mávapa ohai, ojeikuaauka hag̃ua umi tekotieʼỹ aña ha tembiapoñaña joaju imbaretéva ha oporojukáva, ojejapovaʼekue ko tavayguakuéra rehe—

6 Ndahaʼéi ojeikuaaukánte hag̃ua opa mundopýre, ha katu oñemeʼẽ hag̃ua opa goviérno mburuvichakuérape, opa iñypytũ ha iñañangue tuichakuépe, ñehaʼã paha, Ñande Ru Yvagagua ojerurevaʼekue jajapo hag̃ua, jajerure porã ha jajerurepaite mboyve upe promésa ñekumpli, oguenohẽtava chupe hekoha ñemígui; ha avei opa upe tetã opyta hag̃ua heʼikuaaʼỹre mbaʼeve, haʼe oity mboyve ijyva mbarete ipuʼakapáva.

7 Haʼe peteĩ tembiaporã tekotevẽtereíva jaguerekóva Tupã ha anhelkuéra ndive, ñañemboʼytaha renondépe, ha avei tekotevẽ ñandejupe g̃uarã, ñane rembireko ha ñande raʼykuéra oñembohaʼasyvaʼekue jepyʼapýre, vyʼaʼỹ ha ñeimevaiete rupi; jejuka, jeikoʼasy ha jejopy ivaivéva po guýpe, oñepytyvõ, oñemokyreʼỹ ha oñemantenéva upe espíritu rembiapóre, omoĩ mbaretevaʼekue tuvakuéra gueroviapy, ohejavaʼekue umi japu taʼyrakuéra korasõme, ha omyenyhẽvaʼekue ko múndo apañuãigui, ha oñemombaretevévakuri ohóvo, ha koʼág̃a haʼe opa ñembyai momyiha, ha yvy tuichakue ipyahẽ hembiapovai pohýi guýpe.

8 Haʼe peteĩ iérroguigua júgo, peteĩ jejokua mbarete; haʼe umi jukuaha ha itasã, umi añaretã jokuapy ha pyrehegua itasãpohýi.

9 Upévare, haʼe peteĩ tembiaporã tekotevẽtereíva jaguerekóva, ndahaʼéi umi ñane rembireko ha raʼy tee añóndinte, ha katu umi imenaʼỹva ha ityreʼỹvandi, iména ha tuvakuéra ojejukavaʼekue ipo iérroguigua guýpe.

10 Tembiapo ypytũ ha oporomoypytũva, ohupytýva upe añaretã jepeve oryrýi hag̃ua kyhyjégui ha opyta ñemondýi paʼũme ha hesaʼyjupa, ha pe añaite po jepeve oryrýi ha okachapa.

11 Ha avei, haʼe peteĩ tembiaporã tekotevẽtereíva jaguerekóva upe ñemoñareaty okakuaáva ndive, ha opa umi ikorasõ potĩva ndive—

12 Oĩgui gueteri heta ko yvy ári, opa sécta apytépe, partído ha denominasiõ, oñembohechaʼỹva tekovekuéra ñemoñuhã raʼeve rupive, ohaʼarõva oporombotavy hag̃ua, ha nog̃uahẽiva añeteguápe, ndoikuaáiguinte moõpa ojuhúta—

13 Upévare, ñamoĩmbaite ñande rekove ha umi jaguerekóva, jaikuaaukávo opa mbaʼe ñemi ypytũmegua, jaikuaaha peve umíva; ha koʼãva añetehápe yvágagui ojehechauka—

14 Upéicha oñeñatendevaʼerã koʼã mbaʼére, tuicha jesareko reheve.

15 Avave ani ohecha umíva mbaʼe michĩramo; oĩgui heta tenonderãme, santokuéra reheguáva, odependéva koʼã mbaʼére.

16 Hermano-kuéra, peẽ peikuaa peteĩ yga guasúpe ouporãha amavai árape, peteĩ timón michĩ ogueraha porãva rehe chupe umi yvytu ha ypuʼã ou ha ohóvare.

17 Upévare, hermano-kuéra pejehayhúva, tory porãme jajapo opa mbaʼe ikatúva; ha upérõ ikatu japyta, jeikuaa porã reheve, jahecha hag̃ua Tupã salvasiõ ha tojehechauka ijyva.