1 Che haʼe haguéicha peẽme che kuatiápe, asẽ mboyve ógagui, ahaitaha peẽme sapyʼapyʼa amombeʼu hag̃ua heta mbaʼe rehegua, kóvape añeʼẽjey omanovaʼekue ñemongaraíre, upe mbaʼe haʼetégui oĩva che akãme ha omonguʼe mbaretéva che remiandu, umi che rayhuʼỹha che muña ypy guive.

2 Che ahaíkuri peẽme rrevelasiõ ñeʼẽnguéra peteĩ haihára rehe. Aguerekovékuri mbovymi temiandu ko mbaʼe rehegua, che amoañetéva koʼág̃a. Péva heʼise, ojeʼékuri che kuatia upe mboyveguápe oĩvaʼerãha peteĩ haihára, haʼevaʼerã testígo ohecháva, ha avei ohendúva ijapysa rupi, ojapo hag̃ua peteĩ añeteguágui jehaipyre Ñandejára renondépe.

3 Koʼág̃a, ko mbaʼe rehegua, hasyetereíta peteĩ haihára año oĩ hag̃ua opa ára ha ojapo hag̃ua opa mbaʼe. Ani hag̃ua oĩ ko ñembohasy, opa táva barrio-pe ikatu oñehenói peteĩ haihára ikatupyrýva ojapo hag̃ua nóta oĩporãva; ha tomoĩporã ha tomoĩmbaite ohaívo opa mbaʼe oikovaʼekuégui, omoañetévo ijehaipyrépe, ohechahague hesa rupi ha ohenduhague ijapysa rupi, omoĩvo umi fécha, umi téra, ha ambue, ha opa upe mbaʼe ñemombeʼupaite, ohenóivo avei mbohapy tapicha oĩvaʼekue upe jave, oĩramo, ikatu hag̃uáicha umíva omoañete pe oikovaʼekuégui oimeraẽ árape, mokõi térã mbohapy testígo juru rupi oñemoĩ hag̃ua opa ñeʼẽ.

4 Upérõ, toĩ peteĩ haihára heneral, oñemeʼẽvape koʼã jehaipyre, ohóva umi kuatia reheve, haʼekueraite omboteraguapyvaʼekue, omoañetéva upe jehaipyre ojapovaʼekue hikuái haʼeha añetegua. Upérõ, pe tupao haihára heneral omoĩta upe jehaipyre tupao kuatiañeʼẽ heneralpe, umi kuatia ha opa testígo oĩvaʼekue ndive, imomarandu tee reheve, haʼe ogueroviaha umi ojeʼe ha ojehaivaʼekue añeteguaha, oñemopyendáva kuaapy porã haʼe orekóvare umi kuimbaʼe rekopy ha iñehenóire tupaópe. Ha kóva ojejapóvo tupao kuatiañeʼẽ heneralpe, isantoitéta upe jehaipyre, ha okumplíta pe ordenánsa, haʼe ohecharõguáicha hesa rupive ha ohendurõguáicha ijapysa rupi, ha ohairamoguáicha pe tupao kuatianeʼẽ heneralpe.

5 Oiméne peimoʼã koʼã mbaʼe ñemohenda oĩporãmbaiteha; ha katu pehejami taʼe peẽme upéicha ojejapoha, oñembohovái hag̃ua Tupã rembipota, jasegívo pe ordenánsa ha ñembosakoʼi Ñandejára oʼordena ha omoĩvaʼekue pe múndo ojejapo mboyve, omanóva ojesalva hag̃ua, umi omanovaʼekue evanhélio jeikuaaʼỹre.

6 Ha avei, che aipota penemanduʼa Juan, upe Rrevelador, ohechahague kóva ko téma umi omanovaʼekue rehegua, heʼírõguare, ojehaiháicha Apocalipsis 20:12-pe—Ha ahecha umi omanovaʼekue, tuicha ha michĩva, oñemboʼývo Tupã renondépe; ha ojepeʼa umi kuatiañeʼẽ, ha ambue kuatiañeʼẽ ojepeʼa, haʼéva tekove rehegua kuatiañeʼẽ; ha umi omanovaʼekue ojehusga umi mbaʼe ojehaívare umi kuatiañeʼẽme, hembiapokuére.

7 Pehecháta ko pehẽ rupive ojepeʼahague umi kuatiañeʼẽ, ha ojepeʼahague ambue kuatiañeʼẽ, haʼéva tekove rehegua kuatiañeʼẽ; ha katu umi omanovaʼekue ojehusgákuri umi mbaʼe ojehaívare umi kuatiañeʼẽme, hembiapokuére; upévare, umi kuatiañeʼẽ oñeñeʼẽha haʼéne umi oguerekóva hembiapokuéra ñemombeʼu, ha oñeʼẽ umi jehaipyre ko yvy ári ojeguerahávare. Ha upe haʼéva tekove rehegua kuatiañeʼẽ, haʼe jehaipyre ojegueraháva yvágape; ha upéicha, ko prinsípio ojegueraha porã pe doctrina oñemandávare peẽme rehe, rrevelasiõ oĩva kuatia che ahaivaʼekuépe peẽme asẽ mboyve che rógagui—opa mbaʼe pehaíva ojehai hag̃ua yvágape.

8 Koʼág̃a, ko ordenánsa reko haʼe upe sacerdocio puʼaka, Jesucristo rrevelasiõ rupive, oñemeʼẽha rupi, umi peñapytĩva yvy ári toñeñapytĩ yvágape, ha umi pejoráva yvy ári tojejora yvágape. Ambue ñeʼẽme, ñamaʼẽ ambuéicharõ upe ñembohasáre, umi pehaíva yvy ári ojehaíta yvágape, ha umi ndapehaíriva yvy ári, ndojehaimoʼãi yvágape; umi kuatiañeʼẽre ojehusgátagui umi omanovaʼekue pene mbaʼéva, hembiapokuére, tahaʼe haʼekueraite ojapóvaramo ijehegui umi ordenánsa, térã iñahentekuéra rupive, upe ordenánsa Tupã ombosakoʼivaʼekuépe isalvasiõrãme oĩháicha, múndo ojejapo mboyve, umi jehaipyre ogueraha háicha hikuái omanovaʼekue imbaʼévagui.

9 Oĩne haʼetévape ipyʼaguasuha ko doctrina añeʼẽvarehína: peteĩ puʼaka ohaíva térã oñapytĩva ko yvy ári ha avei yvágape. Upevére, opa múndo árape, opa ára Ñandejára omeʼẽ vove peteĩ sacerdocio dispensasiõ peteĩ tekovépe térã tekovekuéra atýpe, rrevelasiõ añete rupive, akóinte oñemeʼẽva ko puʼaka. Upéicha, opa mbaʼe umi kuimbaʼe ojapovaʼekue autorida reheve, Ñandejára rérape, ha ojapo hikuái añetépe ha jeroviarekópe, ha ogueraha hikuái peteĩ jehaipyre umívagui, oĩporãva ha ijeroviapýva, kóva haʼékuri peteĩ léi yvýpe ha yvágape, ha, upe Jehová guasu apoukapykuérape heʼiháicha, ndaikatúikuri oñembopaharei. Ko ñeʼẽ añetegua. Mávapa ikatu ohendu?

10 Ha avei, kóina ápe kurivegua, Mateo 16:18, 19: Ha Che haʼe avei ndéve, Nde haʼeha Pedro, ha ko itaguasu ári amopuʼãta che tupao, ha umi añaretã rokẽ ndaipuʼakamoʼãi hese. Ha Che ameʼẽta ndéve yvága rréino llavekuéra, ha umi reñapytĩva guive ko yvy ári, oñeñapytĩta avei yvágape; ha umi rejoráva yvy ári, ojejoráta yvágape.

11 Koʼág̃a, upe tuicha ha imbaʼeguasúva mbaʼeñemimby opa ko mbaʼépe, ha pe summum bonum opa upe téma jarekóvare tenonderã haʼe tajahupyty umi Santo Sacerdocio puʼaka. Pe oñemeʼẽvape koʼã lláve ndahasýi ohupyty hag̃ua kuaapy, umi mbaʼe oikovaʼekue haʼévare yvypóra raʼykuéra salvasiõ rehegua, umi oikovéva ha umi omanovaʼekuégui.

12 Péina ápe glória ha terakuãporã, ñemanokuaaʼỹ ha tekove ijapyraʼỹva—Pe ýpe ñemongarai ordenánsa, pe ñañemoñapymi ipype haʼe hag̃uáicha omanovaʼekue ñemohaʼanga, peteĩ prinsípio haʼe hag̃ua ambuéicha; ñemoñapymi ýpe ha ñesẽ ipypégui, haʼe umi omanovaʼekue jeikovejey osẽvo iñeñotỹhágui ñemohaʼanga; upéicha oñemoĩvaʼekue ko ordenánsa oñembojoaju hag̃ua omanovaʼekue ñemongarai ordenánsa reheve, haʼévo umi omanovaʼekue ñemohaʼanga.

13 Upéicha, oñemoĩkuri upe ñemongarai píla peteĩ ñeñotỹha mohaʼangáicha, ha oñemanda oñemoĩ hag̃ua tenda umi oikovéva oñembyatyha guýpe, omohaʼanga hag̃ua oikovéva ha omanovaʼekuépe, ha opa mbaʼe oguereko hag̃ua ijoguaha, ha ojojogua hag̃ua hikuái—pe yvy ariguáva yvagapeguáicha, Pablo heʼi haguéicha, 1 Corintios 15:46, 47, and 48-pe:

14 Ha espiritualva ndahaʼéi peteĩháva, ha katu upe naturalva; ha upéi pe ijespiritualva. Pe kuimbaʼe ypy haʼe yvy arigua, terrenal; pe kuimbaʼe mokõiha, haʼéva Ñandejára, haʼe yvagagua. Upe terrenal-va, umíva avei terrenal; ha upe celestial-va, umíva avei celestial. Ha umi jehaipyre yvy arigua umi omanovaʼekue penembaʼéva rehegua, ojegueraha porãva, umíva avei yvagagua jehaipyre. Kóva, upéicha, haʼe puʼaka ojesella ha oñembojoaju hag̃ua, ha peteĩ ko ñeʼẽ heʼisévape, umi rreinogua lláve, haʼéva upe kuaapy lláve.

15 Ha koʼág̃a, che hermana ha hermano-kuéra pejehayhuetéva, aikuaaporãgui taʼemi peẽme koʼãva haʼeha umi prinsípio omanóva ha oikovéva rehegua ndojehechagírivaʼerã, ñane salvasiõ reheguávape. Isalvasiõkuéra tekotevẽgui ha imbaʼeguasúgui ñane salvasiõrã, Pablo heʼiháicha tuvakuéragui—haʼekuéra ndaikatuiha oñemoporãmba ñande reheʼỹ, ni ñande ndaikatúi ñañemoporãmba umi omanovaʼekue ñanembaʼéva ỹre.

16 Ha koʼág̃a, omanovaʼekue ñemongaraíre, che ameʼẽta peẽme ambue Pablo jehai pehẽ 1 Corintios 15:29-pe: Ambue hendáicha, mbaʼe ojapóta umi omanovaʼekuérare oñemongaraíva, umi omanovaʼekue mbaʼevéicharõ ndoikovejeymoʼãirõ? Mbaʼére, upérõ, oñemongarai hikuái umi omanovaʼekuére?

17 Ha avei, ko pehẽ reheguáre, che ameʼẽta peẽme peteĩ pehẽ umi proféta orekovaʼekue hesa upe sacerdocio rrestaurasiõre, umi glória ojeikuaaukátavagui umi ára pahápe, ha katuete ko témape, upe igloriosovéva opa umi evanhélio opaveʼỹvagua apytépe, haʼéva, omanovaʼekue ñemongarai; Malaquías heʼígui, upe capítulo paha, versículo 5 ha 6-pe: Péina ápe, Che ambou peẽme Elías upe Proféta, Ñandejára ára tuicha ha oporomondyietéva ou mboyve. Ha haʼe omoĩta tuvakuéra korasõ taʼyrakuérape, ha taʼyrakuéra korasõ tuvakuérape, ani Che aju ha ajopy pe yvy peteĩ ñeʼñengái reheve.

18 Ikatúkuri ameʼẽ peteĩ ñembohasa hesakãvéva kóvagui, ha katu che aipotávape g̃uarã hesakã porãma oĩhaichaite. Iporãnte ojeikuaa, ko kásope, pe yvy ojejopytaha peteĩ ñeʼẽngái reheve, ndahaʼéirõ umi túva ha taʼyrakuéra apytépe oĩramo peteĩ joaju oimeháichagua, tahaʼe peteĩ térã ambue mbaʼe rehegua—ha péina ápe, mbaʼépa upe mbaʼe? Haʼe pe omanovaʼekue ñemongarai. Hesekuéraʼỹ ñande ndaikatúi ñañemoporãmba, ni ndaikatúi oñemoporãmba hikuái ñande reheʼỹ. Ni ndaikatúi ñande ni haʼekuéra ñaneporãmba umi omanovaʼekueʼỹre evanhéliope; oñepyrũvo upe dispensasiõ ára oñekumplipaitetaha, dispensasiõ oñepyrũmava, tekotevẽ ojejapo ha ojeikuaauka peteĩ ñembojoajupa oĩmbaitéva ha iporãmbáva, ha péicha avei umi dispensasiõ, lláve, pokatu ha glória ñembojoaju, Adán ára guive, ára koʼag̃agua peve. Ha ndahaʼéi kóvante, ha katu umi mbaʼe arakaʼeve ojeikuaaukaʼỹvaʼekue, pe yvy ojejapo ypy guive, ha katu oñeñomivaʼekue umi iñarandu ha iñakãguapývagui, ojeikuaaukáta mitã raʼy ha mitã kambúpe, kóvape, dispensasiõ ára oñekumplipaitetahápe.

19 Koʼág̃a, mbaʼe ñahendu evanhélio jahupytyvaʼekuégui? Peteĩ vyʼa ñeʼẽpu! Peteĩ poriahuvereko ñeʼẽpu yvágagui; ha peteĩ añetegua ñeʼẽpu, yvýgui osẽva; mbaʼeporã pyahu omanovaʼekuépe g̃uarã; peteĩ vyʼapavẽ ñeʼẽpu oikovéva ha omanóvape g̃uarã; mbaʼeporã pyahu vyʼapavẽ rehegua. Iporãitépa yvytykuéra ári umi py oguerúva mbaʼeporã pyahu iporãva, ha heʼíva Sion-pe: Péina ápe, nde Tupã orreina! Carmelo-gua ysapýicha, Tupã kuaapy oguejýta hiʼarikuéra!

20 Ha jeyve, mbaʼe ñahendu? Cumorah-pegua mbaʼeporã pyahu! Moroni, peteĩ yvága ánhel, omombeʼúvo profetakuéra ñekumpli: upe kuatiañeʼẽ ojeikuaaukavaʼerã. Peteĩ Ñandejára ñeʼẽpu Fayette taveʼỹme, Séneca kondádope, omomarandúvo umi mbohapy testígo omeʼẽtava testimónio upe kuatiañeʼẽgui! Miguel ñeʼẽpu, Susquehanna rembeʼýpe, ohechakuaávo upe añáme, ojehechaukarõguare tesapegua ánhelcha! Pedro, Santiago ha Juan ñeʼẽpu, Harmony taveʼỹ nandíme, Susquehanna kondádo, ha Colesville, Broome kondádope, upe Susquehanna y osyrývape, omombeʼúvo oguerekoha rreinogua ha dispensasiõ ára oñekumplipaitetaha llavekuéra!

21 Ha avei, Tupã ñeʼẽpu túva tuja Whitmer kotýpe, Fayette, Séneca kondádope, ha heta árape ha heta hendápe, opa Jesucristo Tupao Santokuéra jeʼói ha jeikoʼasýpe! Ha Miguel ñeʼẽpu, upe arkánhel; Gabriel ñeʼẽpu, ha Rafael ha heta anhelkuéra, Miguel térã Adán guive, ko ára peve, opavave omombeʼúvo idispensasiõ, iderécho, illáve, herakuãporã, tuichakue ha igloriakuéra, ha isacerdocio puʼaka; omeʼẽvo saʼisaʼi, mboʼepy mboʼepy ári, saʼimi ápe, ha saʼimi amo; ñanemoangapyhývo umi mbaʼe outáva ñemomarandúpe, omombaretévo ñane ñehaʼarõkuaa!

22 Hermano-kuéra, ndajahaivaʼerãpa tenonde ko káusa guasuetépe? Peñemotenonde, pejevyrãngue. Pyʼaguasu! hermano-kuéra; ha tapeho tenonde, tapeho viktóriape! Tahory pene korasõ ha penerenyehẽ vyʼágui! Tahyapu pe yvy purahéipe! Tohupi umi omanóva ñemomorã purahéi ijapyraʼỹva Rréi Emanuel-pe, múndo ojejapo mboyve, oʼordenavaʼekue upe mbaʼe ohejátava ñandéve ñarredimi chupekuéra iprisiõgui; umi oñeñapytĩva oñemosãsótagui.

23 Tosapukái vyʼágui yvytykuéra, ha opa peẽ, yvy ipéva, pejerure ñeʼẽpu hatãvape; ha opa peẽ, yguasu ha yvy ikãva, pemombeʼu pende Rréi Ijapyraʼỹva techapyrãnguéra! Umi ysyry, ysyryʼi ha ysyryʼivéva, pesyry vyʼápe! Tomomorã Ñandejárape opa ñumegua yvyramáta; ha peẽ, ita mbarete, penerasẽ vyʼágui! Topurahéi joa kuarahy, jasy ha mbyjakuéra koʼẽtĩmegua, ha tosapukái vyʼágui opa Tupã raʼykuéra! Tomombeʼu akói ha tapiaite g̃uarã héra umi apopyre ijapyraʼỹva! Ha Che haʼe jey: Igloriosoitépa ñeʼẽpu yvágagui ñahendúva, omomarandúva ñande apysápe glória, salvasiõ, terakuãporã, ñemanokuaaʼỹ ha tekove ijapyraʼỹva; rréino, prinsipádo ha potestakuéra!

24 Péina ápe, hiʼag̃uíma Ñandejára ára guasu; ha mávapa ogueropuʼakáta ijeju ára, ha mávapa opytáta ñemboʼyhápe haʼe ojehechauka vove? Haʼe ningo tata oporomopotĩvaicha ha havõ jejoheirãicha; ha oguapýta pláta ñemoporã ha ñemopotĩháicha; omopotĩtagui Leví raʼykuérape, omoporãta chupekuéra óro ha plátaicha, oikuaveʼẽ hag̃ua Ñandejárape peteĩ ñemeʼẽmby tekojojápe. Ñaikuaveʼẽ upévare Ñandejárape, tupao ha tavayguakuéraramo, ha Santokuéra Ára Pahapeguáramo, peteĩ ñemeʼẽmby tekojojápe; ha jagueraha isánto témplope, oĩmba vove, peteĩ kuatiañeʼẽ oguerekóva umi omanovaʼekue ñanembaʼéva jehaipyre, upe ijojáva opa jeguerohoryrã.

25 Hermano-kuéra, aguereko heta mbaʼe haʼevaʼerã peẽme ko mbaʼére; ha katu koʼág̃a ambopaháta, ha ambojoapýta upe mbaʼére ambue ára. Che apyta, akóicha, pene rembiguái mirĩvaicha ha pene angirũ tapiaguáramo,