Sección 130
Tekomboʼe rehegua mbaʼekuéra oñemeʼẽvaʼekue José Smith upe Proféta rupive, Ramus, Illinois-pe, abril 2, 1843-pe.
1–3, Túva ha Taʼýra ojehechaukakuaa ijeheguiete yvyporakuérape; 4–7, Anhelkuéra oikove peteĩ esfera celestial-pe; 8–9, Pe tierra celestial haʼéta peteĩ Urim ha Tumim tuicháva; 10–11, Opa oikéva mundo celestial-pe oñemeʼẽ peteĩ itaʼi morotĩ; 12–17, Ndojeikuaaukái Profétape upe Jeju Mokõiha aravo; 18–19, Pe akãporã jahupytýva ko tekovépe, opuʼãta ñanendive upe Jeikovejeýpe; 20–21, Opa jehovasakuéra ojehupyty léire ñeʼẽrendu rupive; 22–23, Túva ha Taʼýra oguereko hikuái hete toʼo ha kangueguigua.
1 Salvador ojehechauka vove, jahecháta chupe haʼeháicha. Jahecháta haʼe haʼeha peteĩ kuimbaʼe ñandeichagua.
2 Ha tekorory oĩháicha ñande apytépe koʼápe, oĩta ñande apytépe upépe; ha katu oúta hendive peteĩ glória ijapyraʼỹva koʼág̃a jaikuaaʼỹva.
3 Juan 14:23—Pe Túva ha Taʼýra jehechauka, ko versíkulope, haʼe peteĩ jehechauka ijeheguíva; ha upe ojeʼéva, pe Túva ha pe Taʼýra oikoha yvypóra korasõme, haʼe peteĩ secta-gua mboʼepy yma, ha japu.
4 Ambohováivo upe porandu—Ndojeipapáipa Tupã ára, anhelkuéra ára, profetakuéra ára, ha yvyporakuéra ára, pe planéta oikoháicha hikuái?
5 Che ambohovái, Héẽ. Ha katu ndaipóri anhelkuéra oministráva ko yvy ári, ndahaʼéirõ umi upepeguáva térã haʼevaʼekue upepegua.
6 Anhelkuéra ndoikói peteĩ planéta ko yvy arichaguápe;
7 Ha katu oiko hikuái Tupã renondépe, peteĩ glóvo ojoguáva yguasu vidrio ha tataguiguápe, opa mbaʼe ojehechaukahápe igloria ohasámava, koʼag̃agua ha oútavape g̃uarã, ha oĩ meméva Ñandejára renondépe.
8 Upe tenda Tupã oikoha haʼe peteĩ Urim ha Tumim tuicháva.
9 Ko yvy, ijestádo santifikádo ha manokuaaʼỹme, haʼéta upe kristalcha, ha haʼéta peteĩ Urim ha Tumim umi ipype oikóvape, ojeikuaaukataha rupive, opa mbaʼe haʼéva peteĩ rréino michĩva, térã opa rréino orden menor-guáva umi ipype oikóvape; ha ko yvy haʼéta Cristo mbaʼe.
10 Upérõ upe itaʼi morotĩ, oñeñeʼẽvare Apocalipsis 2:17-pe, oikóta peteĩ Urim ha Tumim opa umi tekove oñemeʼẽvape g̃uarã peteĩ, ha upéva rupive ojeikuaaukáta mbaʼekuéra haʼéva peteĩ orden superior-gua.
11 Ha opavave rréino celestial-pe oikévape oñemeʼẽ peteĩ itaʼi morotĩ, ojehaihápe peteĩ téra pyahu avave oikuaaʼỹva, ndahaʼéirõ pe ohupytýva. Upe téra pyahu haʼe upe ñeʼẽ kláve.
12 Che aprofetisa, Tupã Ñandejára rérape, umi mbaʼevai oguerútava heta tuguy ñeñohẽ pe Kuimbaʼe Raʼy jeju mboyve, oñepyrũtaha Carolina del Sur-pe.
13 Ikatúne ou esklavokuéra rehegua mbaʼevai rupi. Kóva peteĩ ñeʼẽpu omombeʼu chéve, añemboʼe añetérõguare upe mbaʼére, diciembre 25, 1832-pe.
14 Peteĩ ára añemboʼérõguare chepyʼaite guive aikuaa hag̃ua pe Kuimbaʼe Raʼy jeju aravo, ahendu peteĩ ñeʼẽpu heʼijeyjeýva chéve kóva:
15 José, che raʼy, reikovérõ rehupyty peve 85 áño, rehecháta pe Kuimbaʼe Raʼy rova; upévare, taiporãma kóva ndéve g̃uarã, ha anivéma chemyangekói ko mbaʼére.
16 Ha péicha apyta, ikatuʼỹme aikuaa ko jeju oñeʼẽpa upe milénio ñepyrũmbýre, térã ambue jehechuka upe mboyveguarére, térã chépa amanovaʼerã ha péicha ahecha hova.
17 Che arovia pe Kuimbaʼe Raʼy jeju ndoikomoʼãiha upe ára mboyve.
18 Oimeraẽ akãporã jahupytýva ko tekovépe, opuʼãta ñanendive jeikovejeýpe.
19 Ha peteĩ tekove ohupytyvéramo kuaapy ha akãporã ambuévagui, ijesareko ha iñeʼẽrendu rupi, upe grádo peve oguerekóta ventáha múndo oútavape.
20 Oĩ peteĩ léi, oñemoambuekuaaʼỹva yvágape, oñemoĩvaʼekue ko múndo ojejapo mboyve, opa jehovasa oñemopyendaha—
21 Ha jahupytýramo peteĩ jehovasa Tupãgui, haʼe ñaneñeʼẽrendúgui upe léi oñemopyendávare.
22 Pe Túva oguereko peteĩ tete toʼo ha kangueguigua, ikatúvare ojepoko yvypóraicha; ha katu pe Espíritu Santo ndoguerekói peteĩ tete toʼo ha kangueguigua, ha katu haʼe peteĩ tekove Espíritu-guigua. Upéichaʼỹramo, pe Espíritu Santo ndaikatumoʼãi oiko ñandepype.
23 Peteĩ yvypóra ikatu ohupyty pe Espíritu Santo, ha kóva ikatu oguejy hiʼári ha ndopytái hendive.