Tshooj 131
Tej lus qhia los ntawm tus Yaj Saub Joseph Smith los, muab nyob hauv Ramus, Illinois, lub Tsib Hlis Ntuj hnub tim 16Â thiab 17, xyoo 1843.
1–4, Yuav tsum muaj kev sib yuav xilethi-aus thiaj li tau kev tsa nto nyob saum lub ntuj ceeb tsheej siab tshaj plaws; 5–6, Piav txog txoj kev muab neeg khi tseg cia rau txoj sia nyob mus ib txhis; 7–8, Txhua yam ntawm sab ntsuj plig yeej yog yam ntawm sab cev nqaij.
1 Nyob hauv lub yeeb koob xilethi-aus muaj peb lub ntuj ceeb tsheej los yog peb theem;
2 Thiab yuav kom txais tau lub uas siab tshaj plaws, ib tug neeg yuav tsum ua raws nraim li tus txheej txheem ntawm lub pov thawj hwj no [txhais hais tias yog txoj kev khi lus tshiab thiab kav ib txhis ntawm kev sib yuav];
3 Thiab yog nws tsis ua li ntawd, ces nws txais tsis tau.
4 Tej zaum nws nkag tau rau hauv lwm lub ntuj ceeb tsheej, tiam sis qhov ntawd yog qhov kawg ntawm nws lub nceeg vaj; nws muaj tsis tau ntxiv lawm.
5 (Tsib Hlis Ntuj hnub tim 17, xyoo 1843.) Txoj lus qhia tej yuav muaj los yav tom ntej uas tseeb dua yog txhais hais tias ib tug neeg paub hais tias twb tau muab nws khi tseg cia rau txoj sia nyob mus ib txhis, los ntawm kev tshwm sim thiab lub txiaj ntsim qhia tau tej yuav muaj los yav tom ntej, los ntawm lub Pov Thawj Hwj Dawb Huv lub hwj chim.
6 Ib tug neeg uas tsis paub txais tsis taus kev cawm dim.
7 Twb tsis muaj ib yam uas tsis yog yam ntawm sab cev nqaij. Txhua yam ntawm sab ntsuj plig yeej yog yam ntawm sab cev nqaij, tiam sis tej yam ntawm sab ntsuj plig mos tshaj thiab dawb huv tshaj, thiab tsuas pom tau los ntawm qhov muag dawb huv tshaj xwb.
8 Peb pom tsis tau, tiam sis thaum peb lub cev hloov ua dawb huv lawm peb yuav pom hais tias tag nrho yeej yog yam ntawm sab cev nqaij.