Benneg 131
Panangiwardas ni Joseph Smith a Propeta, a naited iti Ramus, Illinois, idi 16 ken 17 ti Mayo 1843 (History of the Church, 5:392–393).
1–4, Nasken ti celestial a kallaysa para iti pannakaitan-ok iti kangatuan a langit; 5–6, Mailawlawag no kasano a mapaglantip dagiti tao iti agnanayon a biag; 7–8, Banag ti amin nga espiritu.
1 Iti celestial a gloria adda tallo a langit wenno tukad;
2 Ket tapno magun-od ti kangatuan, nasken a sumrek ti tao iti daytoy nga urnos ti kinasaserdote [kayatna a sawen ti baro ken agnanayon a katulagan ti panagasawa];
3 Ket no dina aramiden, saanna a magun-od daytoy.
4 Mabalinna ti sumrek iti sabali, ngem dayta ti paggibusan ti pagarianna; awanen ti dur-asanna.
5 (Iti maika-17 ti Mayo, 1843.) Ti nataltalged a balikas ti pammadto kaipapananna ti pannakaammo ti tao a mailantip iti agnanayon a biag, babaen ti paltiing ken ti espiritu ti pammadto, babaen ti bileg ti Nasantuan a Kinasaserdote.
6 Saan a mabalin a maisalakan ti tao iti kinakuneng.
7 Awan ti kasta a banag a di maitunos a banag. Banag ti amin nga espiritu, ngem napimpino wenno natartarnaw, ket kabaelan la a makita ti natartarnaw a mata;
8 Saantayo a makita daytoy; ngem no mapatarnaw ti bagbagitayo makitatayo a banag amin daytoy.