1 Peb ntseeg hais tias Vajtswv tau tsim tej tsoom fwv los pab tib neeg; thiab hais tias nws ua kom tib neeg lav ris lawv tej hauj lwm nyob hauv tej tsoom fwv ntawd, tag nrho ntawm kev tsim tej kev cai thiab kev tswj hwm, rau txoj kev zoo thiab kev nyab xeeb ntawm tib neeg sawv daws.

2 Peb ntseeg hais tias yeej tsis muaj ib yam tsoom fwv uas yuav muaj kev thaj yeeb, tsuas yog muab tej kev cai ntawd tsim thiab ceev tsis pub rhuav, kom thiaj muab tau txoj kev ywj siab xaiv li siab xav, txoj cai thiab kev tswj tej teej tug, thiab txoj kev pov hwm txoj sia rau txhua leej txhua tus.

3 Peb ntseeg hais tias txhua yam tsoom fwv yuav tsum muaj cov thawj coj thiab cov nom tswv ntawm cov pej xeem los teem tej kev cai ntawm tag nrho tej tsoom fwv ntawd; thiab yuav tsum xaiv thiab txhawb nqa los ntawm cov neeg lub suab tej uas yuav tswj txoj cai ntawm kev ua ncaj thiab kev txim lij yog hais tias muaj cai cia cov neeg tawm suab xaiv, los yog raws li tus vaj ntxwv lub siab nyiam.

4 Peb ntseeg hais tias kev teev ntuj yog Vajtswv tsim; thiab hais tias neeg lav ris rau nws, thiab tsuas yog rau nws xwb, rau kev coj raws li txoj kev teev ntuj, tsuas ntshe lawv tej tswv yim teev ntuj ua rau lawv muaj siab xav rhuav lwm tus tej cai thiab tej kev ywj pheej xwb; tiam sis peb ntseeg hais tias tib neeg txoj kev cai tsis muaj cai los cuam tshuam nrog kev tsim tej kev cai teev tiam kom khoo tau tib neeg tej kev xav, los yog yuam kev teev ntuj rau sawv daws los sis ib tug twg; kom tej nom tswv tswj tej kev txhaum cai, tiam sis tsis txhob tswj neeg tej kev xav hlo li; yuav tsum rau txim rau cov muaj txim, tiam sis tsis txhob muab tus ntsuj plig txoj kev ywj pheej quab yuam tsuj nthi.

5 Peb ntseeg hais tias neeg sawv daws yuav tsum los txhawb nqa thiab pab tej tsoom fwv ntawm tej zos uas lawv nyob, kom tej tsoom fwv ntawd tej kev cai pov hwm lawv tej cai ntuj tsawb thiab tej cai teb tsim; thiab hais tias txhua tus pej xeem uas tej kev cai ntawd pov hwm yuav tsis fab ntxeev thiab ntxeev siab rau tsoom fwv ntawd, thiab yog leej twg ntxeev siab yuav tsim nyog muab rau txim kom raws cai; thiab hais tias txhua yam tsoom fwv muaj cai los tsa tej kev cai ntawd raws li lawv pom hais tias yuav zoo tshaj plaws los tswj kom cov pej xeem sawv daws nyab xeeb; txawm li no los, tej kev cai ntawd yuav tsum tuav kev ywj pheej ntawm tib neeg txoj kev xav kom dawb ceev.

6 Peb ntseeg hais tias yuav tsum hwm txhua tus neeg kav teb chaws thiab txhua tus nom tswv rau lawv lub luag hauj lwm, vim tau tsa lawv los pov hwm cov neeg tsis muaj txhaum thiab los rau txim rau cov muaj txim; thiab hais tias txhua tus neeg yuav tsum hwm thiab ua raws tej kev cai, yog tsis muaj tej kev cai ntawd ces kev thaj yeeb thiab kev sib haum xeeb yuav raug hloov mus kom tsis muaj tsoom fwv thiab tsis tiaj tus txaus ntshai; tib neeg tej kev cai yog tsim rau tej lub hom phiaj los kav tej kev ua neej ntawm peb tus kheej thiab tej teb chaws, ntawm ib tug neeg mus rau lwm tus; thiab Vajtswv tej kev cai yog muab saum ntuj ceeb tsheej los, uas tsim tej kev cai rau tej yam ntawm sab ntsuj plig, rau kev ntseeg thiab kev teev tiam, tib neeg yuav tsum lav ris ob yam kev cai no rau tus uas Tsim lawv.

7 Peb ntseeg hais tias cov neeg kav teb chaws, tej xeev, thiab tej tsoom fwv muaj cai, thiab yuav tsum tsa tej kev cai los pov hwm txhua tus pej xeem txoj kev ywj siab ntseeg lawv txoj kev teev ntuj; tiam sis peb tsis ntseeg hais tias tsoom fwv muaj cai ntawm kev txim lij los tshem txoj cai no tawm ntawm cov pej xeem mus, los yog txwv lawv nyob hauv lawv tej kev ntseeg, tsuas yog cov pej xeem ntawd hawm thiab saib taus tej kev cai thiab tsuas yog tej kev ntseeg ntawd tsis muaj kev ntxeev siab thiab kev tuav hauv tawm tsam tsoom fwv.

8 Peb ntseeg hais tias kev ua txhaum cai yuav tsum raug txim raws li txoj kev txhaum ntawd lub txim; kom tus tua neeg, tus ntxeev siab rau teb chaws, tus tub sab, tus tub nyiag, thiab tus rhuav sawv daws txoj kev nyob kaj siab, ntawm txhua yam, yuav tsum raug txim raws li lawv txoj kev ua txhaum thiab lawv tej kev xav ua phem rau tib neeg, los ntawm lub tsoom fwv nyob ntawm qhov chaw uas tau ua txoj kev txhaum ntawd; thiab rau sawv daws txoj kev thaj yeeb thiab kev nyob kaj siab tag nrho sawv daws yuav tsum siv lawv rab peev xwm los pab coj cov neeg ua txhaum kev cai los rau txim.

9 Peb tsis ntseeg hais tias yog kev ncaj ncees yog yus muab hwj chim kev teev ntuj coj los sib xyaws nrog lub tsoom fwv ntawm cov pej xeem, es txhawb ib lub koom haum teev ntuj thiab ho txwv lwm lub koom haum teev ntuj tej cib fim ntawm sab ntsuj plig, thiab txwv tsis pub cov mej zeej hauv lub koom haum ntawd muaj cai raws li lawv yog pej xeem.

10 Peb ntseeg hais tias tag nrho txhua lub koom haum teev ntuj muaj cai los qhuab ntuas lawv cov mej zeej thaum coj tsis ncaj ncees, raws li cov koom haum ntawd tej kev cai thiab tej kev coj; yog hais tias tej kev qhuab ntuas ntawd ua kom muaj kev sib raug zoo thiab kev ua mej zeej zoo; tiam sis peb tsis ntseeg hais tias ib lub koom haum teev ntuj twg muaj hwj chim los txiav txim rau neeg txoj cai muaj teej tug los yog muaj txoj sia, los txeeb lawv tej khoom teej tug hauv lub ntiaj teb no, los yog muab lawv txoj sia los yog cev nqaij daim tawv tso rau qhov plhom sij, los yog ua ib txoj kev rau txim rau lawv kom mob ntawm sab nqaij daim tawv. Lawv tsuas muab cov mej zeej rho tawm tau ntawm lawv lub koom haum mus, thiab tshem lawv txoj kev ua mej zeej tawm ntawm lawv mus xwb.

11 Peb ntseeg hais tias neeg yuav tsum coj tag nrho tej uas tau ua tsis yog thiab mob rau lawv mus hais rau ntawm txoj kev cai lij choj kom muaj kev them pauj, zaum uas tau ua rau yus raug mob raug nkees los sis nyiag yus tej teej tug los yog ua yus lub npe puas, yog hais tias muaj tej kev cai los pov hwm tej yam ntawd; tiam sis peb ntseeg hais tias txhua tus neeg tsis muaj txim thaum ua tiv thaiv lawv tus kheej, lawv tej phooj ywg, thiab tej teej tug, thiab lub tsoom fwv, ntawm tag nrho txhua tus neeg tej kev tawm tsam tsis raws cai thiab ua txhaum cai rau yus thaum muaj xwm ceev, yog hais tias coj tsis tau mus hais rau ntawm tej kev cai tam sim ntawd, thiab tsis muaj kev daws pab.

12 Peb ntseeg tias yog kev ncaj ncees yog yus mus tshaj tawm txoj moo zoo rau tej haiv neeg hauv lub ntiaj teb, thiab ceeb toom cov ncaj ncees kom cawm lawv tus kheej dim ntawm lub ntiaj teb txoj kev liam sij; tiam sis peb tsis ntseeg tias yog kev ncaj ncees yog yus mus cuam tshuam rau cov neeg ua qhev, los yog tshaj tawm txoj moo zoo rau, los yog muab lawv ua kev cai raus dej tsis raws li lawv cov tswv lub siab nyiam thiab siab xav tau, los yog mus tshuam los sis ua kom lawv tsis txaus siab rau lawv lub neej hauv lub neej no, li no ces plhom sij rau neeg txoj sia; txoj kev mus cuam tshuam li ntawd peb ntseeg hais tias tsis raws kev cai thiab tsis ncaj ncees, thiab plhom sij heev rau txoj kev thaj yeeb ntawm txhua tus tsoom fwv uas cia neeg raug muab ua qhev.