1 Cia li mloog lub suab ntawm Yexus Khetos, nej tus Txhiv Dim, tus Kuv Yeej Yog uas Muaj Hwj Chim, tus uas tau muab nws txhais npab ntawm kev hlub tshua theej txhoj rau nej tej kev txhaum;

2 Tus uas yuav muab nws haiv neeg sau los ua ke zoo ib yam li ib tug poj qaib sau nws cov me nyuam los rau hauv nws ob sab tis, twb yog tag nrho cov uas yuav mloog kuv lub suab thiab txo hwj chim ntawm lawv tus kheej rau kuv, thiab hu kuv los ntawm kev sib zog thov Vajtswv.

3 Saib seb, kuv hais tseeb tseeb rau nej tias, lub sij hawm no kuv zam txim rau nej tej kev txhaum lawm, yog li ntawd nej txais tej yam no; tiam sis nco ntsoov tsis txhob ua txhaum ntxiv lawm, tsam tej kev plhom sij los raug nej.

4 Kuv hais tseeb rau nej tias kuv twb xaiv nej tawm ntawm cov neeg ntiaj teb mus tshaj kuv txoj moo zoo nrog lub suab xyiv fab, ib yam li nrog lub suab raj hlau nrov.

5 Nej cia li zoo siab thiab xyiv fab, vim kuv nrog nraim nej nyob, thiab kuv yog tus sawv cev uas daws nej zaj lus thov Leej Txiv, thiab nws muaj lub siab zoo xav muab lub nceeg vaj rau nej.

6 Thiab, zoo li twb muaj sau tseg—Txhua yam uas nej yuav thov nrog txoj kev ntseeg, koom siab thov Vajtswv raws li kuv txoj kev txib, ces nej yuav tau txais.

7 Thiab kuv hu nej kom muab kuv cov neeg uas tau xaiv tseg sau los ua ke; vim kuv cov neeg tau xaiv tseg hnov kuv lub suab thiab tsis ua lawv lub siab tawv qhawv;

8 Yog li ntawd lo lus tshaj tawm twb los ntawm Leej Txiv lawm kom lawv yuav sib sau los mus rau ib qho chaw nyob hauv thaj av no, los npaj lawv lub siab thiab npaj txhua yam tos hnub uas tus Tswv xa kev txom nyem thiab kev puas ntsoog los rau cov neeg phem.

9 Vim lub sij hawm twb yuav txog lawm thiab hnub uas lub ntiaj teb siav lawm twb los yuav txog; thiab tag nrho cov muab hlob thiab lawv cov uas ua phem yuav zoo li tej quav nyab npleg; thiab Ib Tsoom Tub Rog tus Tswv hais tias, kuv yuav muab lawv hlawv, kom yuav tsis muaj kev phem nyob hauv ntiaj teb no.

10 Vim lub sij hawm twb yuav txog lawm, thiab yuav tsum muaj raws li qhov uas kuv cov thwj tim tau hais; vim lawv hais li cas ces yeej yuav muaj li ntawd;

11 Vim kuv yuav ua kuv tus kheej tshwm sim saum ntuj ceeb tsheej los nrog lub hwj chim thiab yeeb koob loj, nrog tag nrho ib tsoom tib neeg qaum ntuj, thiab los nyob nrog kev ncaj ncees nrog tib neeg rau hauv ntiaj teb ib txhiab xyoo, thiab cov phem yuav tiv tsis taus.

12 Thiab ntxiv, kuv hais tseeb tseeb rau nej, thiab tej no twb tawm mus ua ib lo lus tshaj tawm ruaj, los ntawm Leej Txiv lub siab nyiam, hais tias kuv cov thwj tim, Kaum Ob tug Thwj Tim uas tau nrog kuv ua hauj lwm qhuab qhia hauv Yeluxalees, yuav sawv ntawm kuv sab xis thaum hnub uas kuv yuav los nrog ib tug ncej nplaim hluav taws nqis los, lawv yuav hnav cev thav ntxwv ntawm kev ncaj ncees, ntoo meej mom rau saum lawv lub taub hau, muaj yeeb koob zoo ib yam li kuv, los txiav txim rau tag nrho tsev neeg Ixayees, twb yog tag nrho cov uas tau hlub kuv thiab ua raws li kuv tej lus txib, thiab tsis muaj leej twg ntxiv.

13 Vim ib lub suab raj hlau yuav nrov ntev thiab muaj ceem, ib yam li nyob rau saum Roob Xinais, thiab tag nrho ntiaj teb yuav qeeg, thiab lawv yuav sawv los—muaj tseeb tiag, cov neeg tuag uas tau tuag rau ntawm kuv, los txais ib lub meej mom ntawm kev ncaj ncees, thiab yuav tau hnav khaub ncaws, ib yam li kuv, los nyob nrog kuv, kom peb ua ib tug.

14 Tiam sis, saib seb, kuv hais rau nej tias ua ntej hnub tseem ceeb no yuav los lub hnub yuav tsaus nti, thiab lub hli yuav hloov mus ua ntshav, thiab cov hnub qub yuav poob saum ntuj los, thiab yuav muaj tej cim loj dua nyob saum ntuj thiab nyob hauv lub ntiaj teb;

15 Thiab yuav muaj kev quaj thiab kev nyiav nyob hauv ib tsoom tib neeg;

16 Thiab yuav muaj ib kob lawg loj uas raug xa los ntaus tej qoob loo hauv lub ntiaj teb puas tsuaj.

17 Thiab yuav muaj tias, vim yog tej kev phem ntawm neeg ntiaj teb, kuv yuav ua pauj rau cov phem, vim lawv tsis kam hloov siab lees txim; vim lub khob ntawm kuv txoj kev npau taws twb puv lawm; vim saib seb, kuv cov ntshav yuav tsis ntxuav lawv yog hais tias lawv tsis mloog kuv.

18 Yog li ntawd, kuv, tus Tswv uas yog Vajtswv yuav xa cov yoov los rau hauv lub ntiaj teb, es yuav los tsawv nkaus cov neeg nyob rau haud, thiab yuav noj lawv tej nqaij, thiab yuav ua kom lawv tej nqaij muaj kas;

19 Thiab lawv tus nplaig yuav raug muab ceev kom lawv tsis txhob hais lus tawm tsam kuv; thiab lawv tej nqaij yuav poob ntawm lawv tej pob txha mus, thiab lawv lub qhov muag poob ntawm lawv lub nplos muag mus;

20 Thiab yuav muaj tias tej tsiaj tom hav zoov thiab tej noog saum nruab ntug yuav muab lawv noj.

21 Thiab lub koom txoos uas muaj zog thiab txaus ntxub, uas yog tag nrho ntiaj teb tus niam ntiav, yuav raug hluav taws hlawv kom puas tsuaj, raws li tus yaj saub Exekees lub qhov ncauj hais, tus uas hais txog tej yam no, uas tseem tsis tau muaj tiam sis yeej yuav los, yog kuv tseem muaj sia nyob, vim tej kev qias yuav tsis tau los kav.

22 Thiab ntxiv, kuv hais tseeb tseeb rau nej tias thaum ib txhiab xyoo kawg lawm, thiab tib neeg rov qab pib xyeej lawv tus Vajtswv, thaum ntawd kuv yuav tseg lub ntiaj teb nyob ib nyuag ntus lawm xwb;

23 Ces qhov kawg yuav los, ces saum nruab ntug thiab lub ntiaj teb yuav ploj thiab dhau mus, thiab yuav muaj ib lub ntuj tshiab thiab ib lub ntiaj teb tshiab.

24 Vim tag nrho tej yam qub yuav dhau mus, thiab txhua yam yuav hloov dua tshiab tuaj, tsis hais lub ntuj thiab lub ntiaj teb los yog, thiab txhua yam nyob rau haud, tag nrho tib neeg thiab tej tsiaj, tej noog saum nruab ntug, thiab tej ntses hauv hiav txwv;

25 Thiab yuav tsis muaj ib txog plaub hau, los yog ib qho me me ploj li, vim tej no yog kuv txhais tes tsim.

26 Tiam sis, saib seb, kuv hais tseeb rau nej tias, ua ntej lub ntiaj teb yuav dhau mus, Mikhayees, kuv tus thawj tim tswv, yuav tshuab nws lub raj hlau, ces tom qab ntawd tag nrho cov neeg tuag yuav tsim los, vim lawv tej qhov ntxa yuav qhib, thiab lawv yuav sawv los—muaj tseeb tiag, tag nrho txhua tus.

27 Ces cov ncaj ncees yuav sib sau los nyob ntawm kuv sab tes xis los txais txoj sia nyob mus ib txhis; thiab cov phem los nyob ntawm kuv sab tes laug uas kuv yuav txaj muag rau Leej Txiv hais tias lawv yog kuv li;

28 Yog li ntawd kuv yuav hais rau lawv tias—Nej cov uas raug foom tsis zoo, cia li khiav ntawm kuv mus, rau hauv hluav taws uas tsis txawj tuag, uas tau npaj rau niag dab phem thiab nws cov tim tswv.

29 Thiab nim no, saib seb, kuv hais rau nej tias, yeej tsis tau muaj ib zaug twg li uas kuv tau tshaj tawm los ntawm kuv lub qhov ncauj kom lawv rov qab los, vim lawv los tsis tau rau qhov chaw kuv nyob, vim lawv tsis muaj hwj chim.

30 Tiam sis nco ntsoov tias yuav tsis muab tag nrho kuv tej kev txiav txim rau tib neeg; thiab ib yam li cov lus tau tawm ntawm kuv lub qhov ncauj mus lawm ces yeej yuav muaj raws li ntawd, kom cov uas los ua ntej yuav los tom qab, thiab kom cov uas los tom qab ho yuav los ua ntej rau txhua tsav txhua yam uas kuv tau tsim los ntawm txoj lus ntawm kuv lub hwj chim, uas yog kuv tus Ntsuj Plig lub hwj chim.

31 Vim los ntawm kuv tus Ntsuj Plig lub hwj chim kuv tau tsim txhua yam; muaj tseeb tiag, txhua yam ntawm sab ntsuj plig thiab sab nqaij daim tawv—

32 Qhov thib ib yog sab ntsuj plig, qhov thib ob yog sab nqaij daim tawv, uas yog qhov chiv keeb ntawm kuv txoj hauj lwm; thiab ntxiv, qhov thib ib yog sab nqaij daim tawv, thiab qhov thib ob yog sab ntsuj plig, uas yog qhov kawg ntawm kuv txoj hauj lwm—

33 Hais lus li no rau nej kom nej yuav txawj to taub; tiam sis rau kuv tus kheej kuv tej hauj lwm yeej tsis muaj qhov kawg, thiab tsis muaj qhov chiv keeb; tiam sis tau pub rau nej kom nej yuav to taub, vim yog nej tau nug kuv txog qhov ntawd thiab sib koom siab.

34 Yog li ntawd, kuv hais tseeb rau nej tias kuv pom tias txhua yam yog ntawm sab ntsuj plig, thiab tsis tau muaj ib zaug twg uas kuv yuav muab ib txoj kev cai rau nej uas yog ntawm sab nqaij daim tawv; thiab twb tsis tau muab rau ib tug neeg twg, los yog rau noob neej twg; thiab twb tsis tau muab rau Adas, nej tus yawg koob, tus uas kuv tau tsim.

35 Saib seb, kuv cia rau Adas kom nws yuav ua ib tug uas xaiv ywj siab rau nws tus kheej; thiab kuv tau muab lus txib rau nws, tiam sis kuv tsis tau muab lus txib ntawm sab nqaij daim tawv rau nws, vim kuv cov lus txib yog ntawm sab ntsuj plig; kuv cov lus txib tsis yog ntawm lub cev nqaij daim tawv los yog lub ntiaj teb no, tsis yog ntawm lub siab nyiam sab cev nqaij daim tawv thiab tsis yog ntawm tej uas sab cev nqaij daim tawv xav.

36 Thiab tau muaj tias Adas, raug niag dab phem ntxias—vim, saib seb, twb xub muaj niag dab phem ua ntej Adas, vim nws ntxeev siab tawm tsam kuv, hais tias, Muab koj lub sam xeeb rau kuv, qhov uas yog kuv lub hwj chim; thiab nws tau coj ib feem peb ntawm ib tsoom neeg saum ntuj khiav ntawm kuv mus lawm vim yog lawv txoj kev ywj siab xaiv;

37 Thiab lawv raug ntiab tawm mus, thiaj li muaj tus dab phem thiab nws cov tim tswv;

38 Thiab, saib seb, muaj ib qho chaw uas tau npaj rau lawv txij thaum chiv keeb los, qhov chaw uas yog ntuj txiag teb tsaus.

39 Thiab yeej yuav tsum muaj tus dab phem los ntxias noob neej, yog tsis li ntawd lawv yuav xaiv tsis tau rau lawv tus kheej; vim yog hais tias lawv tsis muaj qhov iab li ces lawv yuav tsis paub qhov qab zib—

40 Yog li ntawd, tau muaj tias tus dab phem ntxias Adas, thiab Adas noj lub txiv ntoo uas txwv tsis pub noj thiab nws ua txhaum lo lus txib, nws thiaj li raug tus dab phem lub siab nyiam kav, vim nws ywj rau kev ntxias.

41 Yog li ntawd, kuv, tus Tswv uas yog Vajtswv, tau ua kom nws yuav raug ntiab tawm hauv lub Vaj Edees mus, ntawm kuv xub ntiag mus, vim yog nws txoj kev ua txhaum, yog li ntawd nws thiaj li tuag ntawm sab ntsuj plig, uas yog thawj txoj kev tuag, twb yog tib txoj kev tuag uas yog txoj kev tuag kawg, uas yog ntawm sab ntsuj plig, uas yuav muab hais rau cov phem thaum kuv yuav hais tias: Khiav mus, nej cov uas raug foom tsis zoo.

42 Tiam sis, saib seb, kuv hais rau nej tias, kuv, tus Tswv uas yog Vajtswv, tau pub rau Adas thiab rau nws cov tub ki, kom lawv yuav tsis tuag rau txoj kev tuag ntawm sab cev nqaij daim tawv, kom txog thaum kuv, tus Tswv uas yog Vajtswv, yuav xa cov tim tswv los tshaj txoj kev hloov siab lees txim thiab kev txhiv dim rau lawv tso, los ntawm kev ntseeg kuv Tib Leeg Tub lub npe.

43 Thiab li ntawd kuv, tus Tswv uas yog Vajtswv, thiaj tau muab tej hnub nyoog sim siab rau tib neeg—xwv kom los ntawm nws txoj kev tuag ntawm sab nqaij daim tawv ces yuav muab nws tsa los ntawm txoj kev tsis txawj tuag mus rau txoj sia nyob mus ib txhis, twb muab rau tag nrho cov uas yuav ntseeg;

44 Thiab lawv cov uas tsis ntseeg ces mus rau txoj kev raug txim nyob mus ib txhis; vim kuv txhiv tsis tau lawv dim ntawm lawv txoj kev poob ntawm sab ntsuj plig, vim lawv tsis hloov siab lees txim;

45 Vim lawv nyiam kev tsaus ntuj dua kev kaj, thiab lawv tej hauj lwm phem, thiab lawv txais lawv tej nqi zog los ntawm cov uas lawv xaiv mus mloog.

46 Tiam sis saib seb, kuv hais rau nej tias, twb muab tej me nyuam yaus txhiv dim txij thaum ntuj tsim teb raug los ntawm kuv Tib Leeg Tub;

47 Yog li ntawd, lawv ua tsis tau txhaum, vim twb tsis cia Dab Ntxwg Nyoog muaj hwj chim ntxias cov me nyuam yaus, kom txog thaum kuv pom tias lawv pib paub tab rau kuv pom tso;

48 Vim kuv cia rau lawv raws li kuv lub siab nyiam, raws li kuv tus kheej lub siab xav tau, kom lawv txiv yuav tsum ua tej yam zoo kawg nkaus.

49 Thiab, kuv hais rau nej ntxiv tias, tus uas twb paub lawm, kuv tsis tau txib kom nws hloov siab lees txim los?

50 Thiab hais txog tus uas tsis to taub, kuv tseem muaj hwj chim ua raws li tej uas twb sau tseg. Thiab nim no kuv tsis tshaj ntxiv rau nej lub sij hawm no. Amees.