Tshooj 3
Kev tshwm sim uas tus Yaj Saub Joseph Smith tau txais, nyob hauv Harmony, Pennsylvania, lub Xya Hli Ntuj xyoo 1828, hais txog 116 phab ntawv uas tau ploj lawm uas yog muab txhais los ntawm thawj feem ntawm Phau Ntawv Maumoos, uas hu ua Lihais phau ntawv. Tus Yaj Saub tsis tshua yeem tiam sis tau muab tej phab ntawv no uas nws saib xyuas mus rau Martin Harris, tus uas tau pab ua tus teev ntawv ib nyuag ntus luv luv thaum txhais Phau Ntawv Maumoos. Txoj kev tshwm sim no yog muab thaum siv lub Ulees thiab Thumees. (Saib tshooj 10.)
1–4, Tus Tswv txoj kev yog ib txoj uas ncig mus ib txhis li; 5–15, Joseph Smith yuav tsum hloov siab lees txim, tsis li ces nws yuav poob lub txiaj ntsim txhais lus; 16–20, Phau Ntawv Maumoos tawm los mus cawm Lihais cov tub ki.
1 Yeej rhuav tsis tau tej hauj lwm, thiab tej tswv yim, thiab tej hom phiaj ntawm Vajtswv, thiab tej ntawd yeej yuav tsis ploj mus.
2 Vim Vajtswv tsis taug tej kev nkhaus, thiab nws tsis tig mus rau sab tes xis los sis mus rau sab laug, thiab nws tsis hloov tej uas nws tau hais, yog li ntawd nws tej kev yeej ncaj, thiab nws txoj kev yog ib txoj uas ncig mus ib txhis li.
3 Nco ntsoov, nco ntsoov hais tias twb tsis yog Vajtswv txoj hauj lwm uas raug muab rhuav, tiam sis yog tib neeg txoj hauj lwm;
4 Txawm hais tias ib tug neeg yuav muaj tej kev tshwm sim ntau, thiab muaj hwj chim ua tau ntau yam zoo kawg, yog tias nws khav theeb txog nws tus kheej lub zog, thiab muab Vajtswv tej lus ntuas saib yam tsis muaj nqis dab tsi li, thiab ua raws li nws tus kheej lub siab xav thiab sab cev nqaij daim tawv nyiam, ces nws yeej yuav poob thiab coj tus Vajtswv uas ncaj ncees txoj kev pauj los rau nws.
5 Saib seb, twb tau tso siab muab tej yam no rau koj, tiam sis tej lus txib rau koj mas nruj heev; thiab cia li nco ntsoov tej lus cog tseg uas tau cog rau koj thiab, yog hais tias koj tsis tau ua txhaum rau tej ntawd.
6 Thiab saib seb, koj tau ua txhaum rau Vajtswv tej lus txib thiab tej kev cai ntau zaus, thiab tau mus ua raws li neeg tej kev ntxias.
7 Vim, saib seb, tsim nyog uas koj tsis tau hwm neeg tshaj li hwm Vajtswv. Txawm hais tias neeg muab Vajtswv tej lus ntuas saib yam tsis muaj nqis dab tsi li, thiab tsis quav ntsej txog nws cov lus—
8 Txawm li ntawd los tsim nyog uas koj rau siab ntseeg; ces nws yeej yuav cev nws txhais npab los thiab txhawb koj tiv thaiv tag nrho tus yeeb ncuab tej xib xub hluav taws; thiab nws yeej yuav nrog koj ua ke rau txhua lub sij hawm thaum muaj teeb meem.
9 Saib seb, koj yog Joseph, thiab Vajtswv tau xaiv koj los ua tus Tswv txoj hauj lwm, tiam sis vim yog kev ua txhaum, yog hais tias koj tsis ua zoo xyuas ces koj yuav poob mus.
10 Tiam sis nco ntsoov, Vajtswv muaj siab hlub tshua, yog li ntawd, cia li hloov siab lees txim rau yam koj tau ua uas tsis raws li txoj lus txib uas kuv tau muab rau koj, thiab koj tseem yog tus uas Vajtswv xaiv tseg, thiab tus uas Vajtswv hu dua los ua txoj hauj lwm no;
11 Tsuas yog koj ua li no xwb, tsis li ces koj yuav raug tso tseg huv tib si thiab hloov los ua zoo li lwm tus neeg, thiab yuav tsis tau txiaj ntsim ntxiv.
12 Thiab thaum koj tau nqa yam uas Vajtswv tau pub rau koj pom thiab muab hwj chim rau koj txhais mus rau luag, ces twb yog koj nqa yam uas dawb ceev coj mus rau ib tug neeg phem ob txhais tes,
13 Tus uas tau muab Vajtswv tej lus ntuas saib tsis muaj nqis dab tsi li, thiab tau ua txhaum rau tej lus cog tseg dawb ceev tshaj plaws uas tau cog rau Vajtswv, thiab tau vam khom rau nws tus kheej txoj kev txiav txim thiab tau khav txog nws tus kheej lub tswv yim.
14 Thiab twb yog vim li no koj thiaj tau poob koj tej txiaj ntsim ib ntus—
15 Vim koj tau cia tej kev ntuas ntawm tus uas coj koj txoj kev raug muab tsuj txij thaum chiv thawj los lawm.
16 Txawm li ntawd los, kuv txoj hauj lwm yeej yuav mus lawm yav tom ntej, vim ib yam li txoj kev paub txog ib tug Cawm Seej tau muaj los rau neeg ntiaj teb, los ntawm cov Neeg Yudais tej lus tim khawv los, ces txoj kev paub txog ib tug Cawm Seej twb yuav los zoo ib yam li ntawd rau kuv cov neeg thiab—
17 Thiab mus rau cov Neeg Nifais, thiab cov Neeg Yakhauj, thiab cov Neeg Yauxej, thiab cov Neeg Xaulas, los ntawm lawv cov yawg koob zaj lus tim khawv—
18 Thiab zaj lus tim khawv no yuav los ua rau cov Neeg Lamas paub, thiab cov Neeg Lemu-ees, thiab cov Neeg Ixama-ees, cov uas tau tso txoj kev ntseeg tseg zuj zus vim yog tej kev ua phem ntawm lawv cov yawg koob, cov uas tus Tswv tau cia kom ua puas tsuaj rau lawv cov kwv tij uas yog cov Neeg Nifais, vim yog lawv tej kev ua phem thiab lawv tej kev qias.
19 Thiab twb yog rau kiag lub hom phiaj no es tus Tswv thiaj muab cov phiaj no tshwj tseg, cov uas ntim tej ceev xwm txheej no—xwv kom yuav muaj raws li tus Tswv tej lus cog tseg, tej uas nws tau cog rau nws cov neeg.
20 Thiab xwv kom cov Neeg Lamas yuav los mus paub txog lawv cov yawg koob, thiab xwv kom lawv yuav paub tus Tswv tej lus cog tseg, thiab xwv kom lawv yuav ntseeg txoj moo zoo thiab vam khom rau tej uas Yexus Khetos tau ua, thiab kom muaj yeeb koob los ntawm kev ntseeg nws lub npe, thiab xwv kom los ntawm lawv tej kev hloov siab lees txim lawv yuav txais kev cawm dim. Amees.