1 Tus Tswv nej tus Vajtswv hais li no, uas twb yog Yexus Khetos, tus Kuv Yeej Yog uas Muaj Hwj Chim, Alafas thiab Aumenkas, qhov chiv keeb thiab qhov kawg, tus uas ntsia mus rau saum nruab ntug dav dav nyob mus ib txhis, thiab tag nrho ib tsoom xelafees saum ntuj, ua ntej ntuj tsim teb raug;

2 Tus uas paub txhua yam, vim kuv qhov muag pom txhua yam;

3 Kuv yog tus uas hais lus, ces txawm tsim tau lub ntiaj teb, thiab txhua yam yog muaj los ntawm kuv.

4 Kuv yog tus uas tau coj Enauj lub Xi-oos mus rau ntawm kuv xub ntiag lawm; thiab kuv hais tseeb tias, kuv coj tag nrho cov uas tau ntseeg kuv lub npe, vim kuv yog Khetos, thiab los ntawm kuv tus kheej lub npe, los ntawm lub hwj chim ntawm cov ntshav uas kuv tau nrog, kuv tau thov Leej Txiv rau lawv.

5 Tiam sis saib seb, cov seem tshuav ntawm cov phem los kuv tau khi ceev nrog tej saw hlau ntawm kev tsaus ntuj kom txog hnub txiav txim uas tseem ceeb, uas yuav los thaum lub ntiaj teb kawg;

6 Thiab kuv yuav ua kom cov phem raug ceev zoo li ntawd, cov uas yuav tsis mloog kuv lub suab tiam sis ua lawv lub siab tawv qhawv; thiab kev txom nyem, kev txom nyem, kev txom nyem, yog lawv lub txim.

7 Tiam sis saib seb, kuv hais tseeb tseeb rau nej tias kuv yeej ntsia ntsoov nej. Kuv nyob nrog nraim nej tiam sis nej tsis pom kuv;

8 Tiam sis hnub ntawd yuav los sai uas nej yuav pom kuv, thiab paub hais tias kuv muaj txoj sia nyob; vim tsis ntev daim ntaub thaiv ntawm kev tsaus ntuj yuav raug muab dua, thiab tus uas tsis hloov ua neeg huv yuav tiv tsis taus hnub ntawd.

9 Yog li ntawd, muab nej tej siv sia thiab npaj kom txhij. Saib seb, lub nceeg vaj yog nej li, thiab cov yeeb ncuab yuav kov tsis yeej.

10 Kuv hais tseeb rau nej tias, nej yeej huv lawm, tiam sis tsis yog tag nrho; thiab twb tsis muaj dua leej twg uas kuv yuav txaus siab rau;

11 Vim kuv pom tias txhua tus tib neeg twb liam sij; thiab tej hwj chim ntawm kev tsaus ntuj twb ri niab nyob hauv lub ntiaj teb, nyob sib xyaw nrog noob neej, nyob rau ntawm tag nrho tsoom neeg saum ntuj—

12 Tej no ua kom nyob ntsiag to kav mus li, thiab tag nrho lub ntuj ceeb tsheej mus ib txhis ntxhov siab, thiab cov tim tswv tos ntsoov lo lus txib tseem ceeb yuav los hlais neeg ntiaj teb, los sau tej txhauv kom muab hlawv; thiab, saib seb, cov yeeb ncuab twb sib koom los ua ke.

13 Thiab nim no kuv muab qhov txuj ci uas neeg paub tsis txog qhia rau nej, yog ib qho uas muaj nyob hauv tej chav zais ntsiag to, kom thaum txog sij hawm yuav coj tau nej txoj kev puas tsuaj los, tiam sis nej paub tsis txog;

14 Tiam sis ziag no kuv muab qhov no qhia rau nej, thiab nej tau koob hmoov, tsis yog vim nej tej kev ua phem, kuj tsis yog vim nej lub siab tsis ntseeg, vim kuv pom tseeb tias nej ib txhia muaj txim, tiam sis kuv yuav hlub tshua rau nej txoj kev qaug zog.

15 Yog li ntawd, txij no mus nej yuav tsum muaj zog; txhob ntshai, vim lub nceeg vaj yog nej li.

16 Thiab kuv muab ib lo lus txib rau nej txoj kev cawm seej, vim kuv tau hnov nej tej lus thov Vajtswv, thiab cov pluag tau yws rau kuv, thiab kuv tau tsim cov nplua nuj, thiab txhua tus tib neeg yog kuv li, thiab kuv tsis xaiv leej twg ntsej muag.

17 Thiab kuv tau ua rau lub ntiaj teb nplua nuj, thiab saib seb nws yog kuv qhov chaw tiag taw, yog li ntawd, kuv yuav sawv rau saud dua.

18 Thiab kuv muab los thiab pom zoo muab tej kev nplua nuj tshaj los rau nej, uas twb yog ib thaj av uas cog lus cia, ib thaj av muaj kua mis thiab zib ntab ntws sis lug, thaj av uas yuav tsis muaj kev foom tsis zoo thaum tus Tswv los;

19 Thiab kuv yuav muab thaj av rau nej ua thaj av ntawm nej qub txeeg qub teg, yog nej nrhiav nrog tag nrho nej lub siab.

20 Thiab qhov no yuav yog kuv txoj kev khi lus nrog nej, nej yuav tau qhov no ua thaj av ntawm nej qub txeeg qub teg, thiab ua qub txeeg qub teg rau nej cov me nyuam mus ib txhis, thaum lub ntiaj teb tseem nyob, thiab nej yuav rov qab muaj thaj av no nyob mus ib txhis, yuav tsis ploj ntxiv.

21 Tiam sis, kuv hais tseeb rau nej tias thaum sij hawm los txog nej yuav tsis muaj vaj ntxwv los yog tus kav teb chaws, vim kuv yuav ua nej tus vaj ntxwv thiab saib xyuas nej.

22 Yog li ntawd, cia li mloog kuv lub suab thiab coj raws li kuv, ces nej yuav ua ib co neeg ywj pheej, thiab nej yuav tsis muaj tej kev cai tsuas yog kuv tej kev cai xwb thaum kuv los, vim kuv yog tus uas muab kev cai rau nej, thiab dab tsi yuav thaiv tau kuv txhais tes?

23 Tiam sis, kuv hais tseeb rau nej tias, ib leeg yuav tsum qhia ib leeg kom raws li lub luag hauj lwm uas kuv tau tsa nej ua;

24 Thiab cia txhua tus neeg suav nws tus kwv tij yam li yog nws tus kheej, thiab coj kev tsim txiaj thiab dawb huv rau kuv pom.

25 Thiab kuv hais rau nej ntxiv tias, cia txhua tus neeg suav nws tus kwv tij yam li yog nws tus kheej.

26 Vim nej leej twg muaj kaum ob tug tub, thiab twb tsis xaiv lawv ntsej muag, thiab lawv ua hauj lwm raws nraim li nws hais, thiab nws hais rau ib tug tub tias: Koj cia li hnav cev thav ntxwv thiab koj los zaum ntawm no; ces hais rau lwm tus tub tias: Koj cia li hnav khaub hlab thiab koj mus zaum tod—thiab ntsia nws cov tub thiab hais tias kuv ncaj?

27 Saib seb, kuv tau muab zaj no rau nej ua ib zaj lus piv txwv, thiab zaj lus piv txwv no twb zoo li kuv. Kuv hais rau nej tias, cia li ua ib lub siab; thiab yog nej tsis ua ib lub siab ces nej tsis yog kuv li.

28 Thiab ntxiv, kuv hais rau nej tias cov yeeb ncuab nyob hauv tej chav zais ntsiag to tab tom nrhiav nej tua pov tseg.

29 Nej hnov txog tej kev ua rog nyob tim tej teb chaws deb, thiab nej hais tias tsis ntev ces yuav muaj kev ua rog loj nyob tim tej teb chaws deb, tiam sis nej tsis paub cov neeg nyob hauv nej thaj av lub siab.

30 Kuv qhia tej yam no rau nej vim yog nej tej kev thov Vajtswv; yog li ntawd, khaws laj lim tswv yim cia rau hauv nej nruab siab, tsam tib neeg txoj kev phem muab tej yam no ua tshwm sim rau nej los ntawm lawv tej kev phem, zoo li txoj kev uas yuav hais lus rau nej tej pob ntseg nrog ib lub suab nrov dua li qhov uas yuav deeg lub ntiaj teb; tiam sis yog hais tias nej npaj txhij nej yuav tsis ntshai.

31 Thiab xwv kom nej yuav khiav dim cov yeeb ncuab lub hwj chim, thiab sib sau ua ib haiv neeg ncaj ncees los rau kuv, tsis muaj qhov phem thiab tsis muaj txim—

32 Yog li ntawd, vim qhov no kuv thiaj tau muab lo lus txib tias nej yuav tsum mus lawm tim Ohio; thiab kuv yuav muab kuv txoj kev cai los rau nej nyob tid; thiab nyob tid nej yuav tau txais vaj txiaj ntsim hwj chim los saum ntuj los;

33 Thiab nyob tid, tus uas kuv pom zoo ces tus ntawd yuav mus rau txhua haiv neeg, thiab tus Tswv yuav qhia lawv saib lawv yuav tsum ua dab tsi; vim kuv muaj ib txoj hauj lwm tseem ceeb tshwj tseg tos, vim Ixayees yuav txais kev cawm dim, thiab kuv yuav coj lawv mus rau txhua qhov chaw uas kuv xav coj, thiab tsis muaj ib lub hwj chim uas yuav thaiv tau kuv txhais tes.

34 Thiab nim no, kuv muab ib lo lus txib rau cov ntseeg nyob rau tej cheeb tsam no tias, yuav tsum muab ib co txiv neej nyob hauv lawv tsa, thiab yuav tsum muab lawv tsa los ntawm cov ntseeg lub suab;

35 Thiab lawv yuav tsum saib xyuas cov pluag thiab cov txom nyem, thiab mus pab kom lawv dim nra xwv kom lawv tsis txhob txom nyem; thiab xa lawv mus rau qhov chaw uas kuv tau txib lawv mus;

36 Thiab qhov no yuav yog lawv txoj hauj lwm, kom mus tswj hwm tej kev siv lub koom txoos no tej teej tug.

37 Thiab lawv cov uas muaj liaj teb uas muag tsis poob, cia muab tej liaj teb ntawd tso los sis xaub rau neeg li lawv pom zoo.

38 Xyuas kom muab txhua yam tshwj tseg cia; thiab thaum neeg tau txais vaj txiaj ntsim hwj chim los saum ntuj los thiab tau xa lawv mus, yuav muab tag nrho tej yam no sau los rau hauv plawv ntawm lub koom txoos.

39 Thiab yog nej nrhiav tej kev nplua nuj uas yog Leej Txiv lub siab nyiam xav muab rau nej, nej yuav yog cov nplua nuj tshaj plaws ntawm txhua haiv neeg, vim nej yuav tau tej kev nplua nuj nyob mus ib txhis; thiab yeej yuav tsum muaj tias tej kev nplua nuj hauv ntiaj teb no yog kuv tug coj los pub rau neeg; tiam sis ceev faj rau txoj kev muab hlob, tsam nej los ua neeg zoo li cov Neeg Nifais thaum ub.

40 Thiab ntxiv, kuv hais rau nej tias, kuv muab ib lo lus txib rau nej tias, txhua tus neeg, tag nrho txwj laug, pov thawj, xib hwb, thiab mej zeej thiab, cia li muab nws lub zog mus, siv nws ob txhais tes khwv, mus npaj thiab ua kom tiav tej yam uas kuv tau txib lawm.

41 Thiab cia nej txoj kev tshaj tawm ua lub suab ceeb toom, txhua tus mus rau nws tus neeg zej zog, muaj lub siab dav thiab lub siab mos siab muag.

42 Thiab nej cia li tawm hauv cov phem mus. Cawm nej tus kheej. Nej cov uas nqa tus Tswv tej cuab yeej yuav tsum huv. Twb yog li ntawd. Amees.