Tshooj 42
Kev tshwm sim uas tus Yaj Saub Joseph Smith tau txais ua ob feem, nyob hauv Kirtland, Ohio, lub Ob Hlis Ntuj hnub tim 9 thiab 23, xyoo 1831. Feem ib, yog nqe 1 txog 72, es Joseph Smith tau txais thaum tab tom nrog kaum ob tug txwj laug ua ke thiab tau txais kom muaj raws li qhov uas tus Tswv tau cog lus ua ntej tias yuav muab txoj “kev cai” los thaum nyob hauv Ohio (saib tshooj 38:32). Feem ob yog nqe 73 txog 93. Tus Yaj Saub qhia tias txoj kev tshwm sim no yog “kev txais txoj kev cai ntawm lub Koom Txoos.”
1–10, Tus Tswv hu cov txwj laug mus tshaj tawm txoj moo zoo, muab cov neeg hloov siab los ntseeg ua kev cai raus dej, thiab txhim tsa lub Koom Txoos; 11–12, Yuav tsum hu thiab tsa lawv thiab lawv yuav tsum mus qhia tej ntsiab cai ntawm txoj moo zoo uas muaj nyob hauv cov vaj lug kub; 13–17, Lawv yuav tsum mus qhia thiab hais tej yuav muaj los yav tom ntej los ntawm tus Ntsuj Plig lub hwj chim; 18–29, Tus Tswv txib Haiv Neeg Ntseeg kom tsis txhob tua neeg, ua tub sab, dag, ntshaw luag tug, deev luag poj luag txiv, los yog hais lus phem rau lwm tus; 30–39, Tau qhia txog tej kev cai tswj txoj kev fij siab muab tej teej tug; 40–42, Tsis pom zoo rau kev muab hlob thiab kev tub nkeeg; 43–52, Yuav tsum kho cov neeg mob kom zoo los ntawm txoj kev pleev roj thov Vajtswv thiab los ntawm kev ntseeg; 53–60, Cov vaj lug kub coj lub Koom Txoos thiab cov txwj laug yuav tsum tshaj tawm cov vaj lug kub rau neeg ntiaj teb; 61–69, Tus Tswv yuav qhia txog qhov chaw ntawm lub nroog Yeluxalees Tshiab thiab tej txuj ci ntawm lub nceeg vaj uas neeg paub tsis txog; 70–73, Yuav tsum siv tej teej tug fij siab los txhawb cov thawj coj ntawm lub Koom Txoos; 74–93, Hais qhia txog cov kev cai kav kev deev nkauj nraug, deev luag poj luag txiv, tua neeg, ua tub sab, thiab kev lees tej kev txhaum.
1 Cia li mloog, auj nej uas yog txwj laug ntawm kuv lub koom txoos, cov tau txoos nej tus kheej ua ke ntawm kuv lub npe, uas twb yog Yexus Khetos, Vajtswv tus uas muaj txoj sia nyob Leej Tub, tus Cawm Seej ntawm lub ntiaj teb; rau qhov nej ntseeg kuv lub npe thiab coj kuv tej lus txib.
2 Kuv hais rau nej dua, cia li mloog thiab hnov thiab ua raws li txoj kev cai uas kuv yuav muab los rau nej.
3 Vim kuv hais tseeb, vim nej tau sib txoos nej tus kheej ua ke raws li lo lus txib uas kuv tau txib nej, thiab sib pom zoo txog qhov no, thiab tau thov Leej Txiv los ntawm kuv lub npe, yog li ntawd nej yuav tau txais.
4 Saib seb, kuv hais tseeb rau nej tias, kuv muab thawj lo lus txib no rau nej, kom nej yuav tawm mus los ntawm kuv lub npe, nej txhua tus, tsuas yog kuv ob tug tub qhe Joseph Smith, tus Hluas, thiab Sidney Rigdon xwb.
5 Thiab kuv muab ib lo lus txib rau nkawd kom nkawd yuav tawm mus ib nyuag ntus, thiab tus Ntsuj Plig lub hwj chim yuav qhia tias thaum twg nkawd mam rov qab los.
6 Thiab nej yuav tawm mus los ntawm kuv tus Ntsuj Plig lub hwj chim, tshaj tawm kuv txoj moo zoo, ob tug ua ib khub, los ntawm kuv lub npe, tsa nej lub suab kom zoo li lub suab raj hlau nrov, tshaj tawm kuv txoj lus zoo yam li Vajtswv cov tim tswv.
7 Thiab nej yuav tawm mus muab neeg ua kev cai raus dej, hais tias: Nej cia li hloov siab lees txim, nej cia li hloov siab lees txim, vim twb yuav txog lub sij hawm rau lub nceeg vaj ceeb tsheej lawm.
8 Thiab nej yuav tawm ntawm qhov chaw no mus rau tej thaj tsam sab hnub poob; thiab npaum li uas nej nrhiav tau cov uas txais yuav nej ces nej yuav txhim tsa kuv lub koom txoos rau txhua cheeb tsam—
9 Txog thaum lub sij hawm uas tus Tswv yuav muab ua tshwm sim los rau nej saum ntuj los, saib thaum twg mam li npaj lub nroog Yeluxalees Tshiab, kom nej yuav sib sau los ua ib ke, kom nej yuav ua kuv cov neeg thiab kuv yuav ua nej tus Vajtswv.
10 Thiab ntxiv, kuv hais rau nej tias, kuv tus tub qhe Edward Partridge yuav tsum ua lub luag hauj lwm uas kuv tau tsa nws ua. Thiab yuav muaj tias, yog nws ua txhaum ces yuav tsa lwm tus los nyob nws chaw. Twb yog li ntawd. Amees.
11 Kuv rov qab hais dua rau nej tias, tsis txhob cia ib tug twg tawm mus tshaj tawm kuv txoj moo zoo, los yog mus txhim tsa kuv lub koom txoos, tsuas yog ib tug uas muaj txoj cai muab nws tsa, thiab cov ntseeg yeej paub hais tias nws muaj txoj cai thiab lub koom txoos cov thawj coj tau tsa nws raws kev cai.
12 Thiab ntxiv, cov txwj laug, cov pov thawj thiab cov xib hwb ntawm lub koom txoos no yuav tsum qhia tej ntsiab cai ntawm kuv txoj moo zoo, uas muaj nyob hauv phau Npaivnpaum thiab Phau Ntawv Maumoos, uas yog qhov txhij txhua ntawm txoj moo zoo.
13 Thiab lawv yuav tsum ua raws li tej kev khi lus thiab lub koom txoos tej nqe lus, thiab lawv yuav tsum qhia tej ntsiab cai ntawd, raws li tus Ntsuj Plig yuav coj lawv.
14 Thiab tus Tswv yuav muab tus Ntsuj Plig rau nej los ntawm txoj kev thov Vajtswv nrog kev ntseeg; thiab yog nej tsis muaj tus Ntsuj Plig nej yuav tsum tsis txhob qhia.
15 Thiab tag nrho tej no nej yuav tsum ua raws li kuv tau txib txog nej tej kev qhia, kom txog thaum muab tej vaj lug kub txhij txhua los tso.
16 Thiab thaum nej tsa nej lub suab los ntawm tus Nplij Siab, nej yuav tsum hais lus thiab qhia tej yuav muaj los yav tom ntej raws li kuv pom zoo;
17 Vim, saib seb, tus Nplij Siab paub txhua yam, thiab ua tim khawv txog Leej Txiv thiab Leej Tub.
18 Thiab nim no, saib seb, kuv hais lus rau cov ntseeg. Nej yuav tsum tsis txhob tua neeg; thiab tus uas tua neeg yuav tsis tau kev zam txim hauv lub neej no, los yog lub neej yuav los.
19 Thiab kuv hais ntxiv tias, nej yuav tsum tsis txhob tua neeg; tiam sis tus uas tua neeg yuav tsum tuag.
20 Nej yuav tsum tsis txhob ua tub sab tub nyiag; thiab tus uas ua tub sab tub nyiag thiab tsis kam hloov siab lees txim ces yuav tsum raug muab ntiab tawm.
21 Nej yuav tsum tsis txhob dag; tus uas dag thiab tsis kam hloov siab lees txim ces yuav tsum raug muab ntiab tawm.
22 Nej yuav tsum hlub nej tus poj niam nrog tag nrho nej lub siab, thiab yuav tsum muab siab npuab nws thiab txhob npuab lwm tus hlo li.
23 Thiab tus uas ntsia ib tug poj niam thiab xav nrog nws pw ces yuav xyeej txoj kev ntseeg, thiab yuav tsis muaj tus Ntsuj Plig; thiab yog nws tsis hloov siab lees txim ces nws yuav tsum raug muab ntiab tawm.
24 Nej yuav tsum tsis txhob deev luag poj luag txiv; thiab tus uas deev luag poj luag txiv, thiab tsis hloov siab lees txim, ces yuav tsum raug muab ntiab tawm.
25 Tiam sis tus uas tau deev luag poj luag txiv thiab hloov siab lees txim kom tag nrho nws lub siab, thiab muab qhov ntawd tso tseg, thiab tsis ua qhov ntawd ntxiv, nej yuav tsum zam txim rau nws;
26 Tiam sis yog nws rov qab ua qhov ntawd dua, yuav tsis zam txim rau nws, tiam sis nws yuav tsum raug muab ntiab tawm.
27 Nej yuav tsum tsis txhob hais lus phem txog nej tus neeg zej zog, los yog ua kom nws raug mob.
28 Nej paub kuv tej kev cai ntsig txog tej yam no twb muaj nyob hauv kuv cov vaj lug kub; tus uas ua txhaum thiab tsis hloov siab lees txim yuav tsum raug muab ntiab tawm.
29 Yog nej hlub kuv nej yuav tsum ua hauj lwm rau kuv thiab ua raws li tag nrho kuv cov lus txib.
30 Thiab saib seb, nej yuav nco ntsoov cov pluag, thiab muab nej tej teej tug uas nej muaj coj mus faib rau lawv fij tseg rau kev txhawb lawv, nrog ib txoj kev khi lus thiab ib daim ntawv puav pheej uas yuav rhuav tsis tau.
31 Thiab npaum li uas nej muab nej tej khoom pub rau cov pluag, ces yog nej ua rau kuv; thiab lub Koom Txoos cov mej zeej yuav tsum coj tej ntawd mus rau tus npisov ntawm kuv lub koom txoos thiab nws ob tug pab cuam, ob tug ntawm cov txwj laug, los yog cov pov thawj hlob, raws li nws yuav tsa los yog tau tsa lawm thiab tau muab tshwj cia rau lub hom phiaj ntawd.
32 Thiab yuav muaj tias, tom qab lawv coj tej khoom ntawd mus rau tus npisov ntawm kuv lub koom txoos, thiab tom qab tus npisov tau txais tej lus pov thawj no ntsig txog txoj kev fij siab muab tej teej tug ntawm kuv lub koom txoos, hais tias yuav muab tsis tau tej khoom ntawd tawm ntawm lub koom txoos mus, raws li kuv tej lus txib, txhua tus neeg yuav tsum lav ris rau kuv, ua ib tug saib xyuas nws tej teej tug, los yog qhov uas nws tau txais los ntawm lwm tus txoj kev fij siab, npaum li uas yuav txaus rau nws tus kheej thiab tsev neeg.
33 Thiab ntxiv, yog hais tias muaj teej tug nyob hauv lub koom txoos tes, los yog ib tug los ntawm lub koom txoos tes, es muaj ntau tshaj li qhov tsim nyog muaj rau lawv noj haus tom qab txoj kev fij siab muab thawj zaug no, uas yog tej teej tug seem tshuav uas yuav muab fij tseg rau tus npisov, yuav muab tej khoom ntawd khaws cia coj mus pub rau cov uas tsis muaj, tej lub sij hawm, kom txhua tus neeg uas txom nyem thiaj tau txaus thiab txais raws li nws xav tau.
34 Yog li ntawd, yuav muab tej seem tshuav ceev cia hauv kuv lub tsev rau khoom, es yuav nqa mus rau cov pluag thiab cov xav tau kev pab, raws li pawg sab laj hlob ntawm kuv lub koom txoos, thiab tus npisov thiab nws pawg sab laj yuav qhia;
35 Thiab cia rau lub hom phiaj yuav muas tej thaj av uas yuav zoo rau cov ntseeg sawv daws, thiab txhim tsa tej tsev teev tiam Vajtswv, thiab txhim tsa lub nroog Yeluxalees Tshiab uas tom qab no mus yuav tshwm sim los—
36 Kom kuv cov neeg khi lus yuav sib sau los ua ib ke nyob rau hnub ntawd thaum kuv yuav los rau hauv kuv lub tuam tsev. Thiab kuv ua li no rau kuv cov neeg txoj kev cawm seej.
37 Thiab yuav muaj tias, tus uas ua txhaum thiab tsis hloov siab lees txim ces yuav raug muab ntiab tawm ntawm lub koom txoos mus, thiab yuav tsis rov qab txais tau tej uas nws muab fij tseg rau cov pluag thiab cov xav tau kev pab ntawm kuv lub koom txoos, los yog hais tias, rau kuv—
38 Vim npaum li uas nej ua rau tus me tshaj plaws, ces yog nej ua rau kuv.
39 Vim yuav muaj tias, tej uas kuv tau hais los ntawm kuv cov yaj saub lub qhov ncauj los yeej yuav muaj raws li ntawd; vim kuv yuav muab tej kev nplua nuj ntawm cov uas mob siab rau kuv txoj moo zoo ntawm Lwm Haiv Neeg fij tseg rau cov pluag ntawm kuv cov neeg cov uas yog los ntawm tsev neeg Ixayees.
40 Thiab ntxiv, nej yuav tsum tsis txhob muab hlob nyob hauv nej lub siab; cia tag nrho nej tej tsoos tsho hnav kom du lug, thiab cia kom qhov zoo nkauj ntawm nej tej tsoo tsho yog qhov zoo nkauj uas nej tus kheej txhais tes tau ua;
41 Thiab cia li ua txhua yam raws li kev huv si rau kuv pom.
42 Koj yuav tsum tsis txhob tub nkeeg; vim tus uas tub nkeeg yuav tsum tsis txhob noj cov mov los yog hnav tej tsoos tsho li tus neeg ua hauj lwm.
43 Thiab tus uas muaj mob ntawm nej, thiab tsis muaj kev ntseeg kom kho zoo, tiam sis ntseeg, cov mej zeej yuav tsum tu tus ntawd los ntawm tag nrho kev siab mos siab muag, los ntawm tej tshuaj ntsuab thiab zaub mov muag, thiab txhob cia tus yeeb ncuab txhais tes ua tej ntawd.
44 Thiab yuav tsum hu cov txwj laug ntawm lub koom txoos, ob leeg los sis tshaj, thiab lawv yuav tsum thov Vajtswv rau thiab tso lawv tej tes rau saum cov neeg mob los ntawm kuv lub npe; thiab yog hais tias lawv tuag ces yog lawv tuag rau kuv, thiab yog hais tias lawv ciaj ces yog lawv ciaj rau kuv.
45 Nej yuav tsum nyob ua ke nrog txoj kev sib hlub, nej thiaj yuav tsum quaj rau lawv cov uas tau ploj tuag, thiab tshwj xeeb tshaj yog rau cov tsis muaj kev cia siab rau ib txoj kev sawv rov los uas yeeb koob ntsa iab.
46 Thiab yuav muaj tias cov uas tuag rau kuv yuav tsis saj txoj kev tuag, vim txoj kev tuag yuav qab zib rau lawv;
47 Thiab cov uas tsis yog tuag rau kuv, kev txom nyem raug lawv, vim lawv txoj kev tuag yuav iab.
48 Thiab ntxiv, yuav muaj tias tus uas ntseeg kuv tias yeej kho tau kom zoo, thiab tsis tau teem tseg rau tus ntawd tuag, ces yuav kho tus ntawd kom zoo.
49 Tus uas muaj kev ntseeg pom yeej yuav pom.
50 Tus uas muaj kev ntseeg hnov yeej yuav hnov.
51 Tus ceg tawv uas muaj kev ntseeg sawv taus yeej yuav sawv taus.
52 Thiab cov uas tsis muaj kev ntseeg ua tej yam no, tiam sis ntseeg kuv, muaj hwj chim hloov los ua kuv cov tub; thiab npaum li uas lawv tsis rhuav kuv tej kev cai ces nej yuav tsum ris lawv tej kev qaug zog.
53 Nej yuav tsum sawv hlo npuab nej txoj hauj lwm saib xyuas.
54 Nej yuav tsum tsis txhob nqa nej tus kwv tij cev tsoos tsho mus; nej yuav tau them rau yam uas nej tus kwv tij muab rau nej.
55 Thiab yog nej tau ntau tshaj qhov uas tsim nyog rau nej noj haus, nej yuav tsum muab tej ntawd coj mus rau hauv kuv lub tsev rau khoom, kom yuav ua tau txhua yam raws li qhov uas kuv tau hais.
56 Nej yuav tsum thov, thiab tus Tswv yuav muab kuv cov vaj lug kub los raws li kuv pom zoo, thiab yuav tsum muab kuv cov vaj lug kub tshwj cia kom nyab xeeb;
57 Thiab tsim nyog uas nej yuav ua twj ywm ntsig txog tej ntawd, thiab tsis txhob qhia txog tej ntawd kom txog thaum nej tau txais tej ntawd tag nrho lawm tso.
58 Thiab kuv muab ib lo lus txib rau nej tias thaum ntawd nej yuav tsum qhia tej ntawd rau txhua tus neeg; vim cov mej zeej ntawm lub Koom Txoos yuav tsum qhia tej ntawd rau txhua haiv neeg, txhua xeem neeg, txhua yam lus thiab txhua yam neeg.
59 Nej yuav tsum muab tej yam uas nej tau txais, uas tau muab rau nej nyob hauv kuv cov vaj lug kub los ua ib txoj kev cai, los ua kuv txoj kev cai kav kuv lub koom txoos;
60 Thiab tus uas ua raws li tej yam no yuav txais kev cawm dim, thiab tus uas tsis ua tej ntawd yuav raug txim yog nws ua li mus ntxiv.
61 Yog hais tias nej thov, nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse, kom nej yuav paub tej txuj ci uas neeg paub tsis txog thiab tej yam kaj siab lug—tej uas coj tau kev xyiv fab los, tej uas coj tau txoj sia nyob mus ib txhis los.
62 Nej yuav tsum thov, thiab yuav muab qhov ntawd ua tshwm sim los rau nej thaum txog lub sij hawm kuv pom zoo saib yuav txhim tsa lub nroog Yeluxalees Tshiab rau qhov twg.
63 Thiab saib seb, yuav tau muaj tias yuav xa kuv cov tub qhe tawm mus rau sab hnub tuaj thiab rau sab hnub poob, rau sab qaum teb thiab rau sab qab teb.
64 Thiab ziag no los, cia tus uas mus rau sab hnub tuaj qhia cov uas yuav hloov siab los ntseeg kom lawv khiav mus rau sab hnub poob, thiab li no twb yog vim tej xwm txheej uas tseem yuav los rau lub ntiaj teb, thiab vim tej kev tuav hauv ntsiag to.
65 Saib seb, nej yuav tsum ua raws li tag nrho tej yam no, thiab nej nqi zog yuav loj; vim twb cia rau nej paub tej txuj ci uas neeg tsis paub txog lub nceeg vaj, tiam sis twb tsis cia rau neeg ntiaj teb paub tej ntawd.
66 Nej yuav tsum ua raws li tej kev cai uas nej tau txais thiab rau siab ntseeg.
67 Thiab tom qab no mus nej yuav tsum txais lub koom txoos tej kev khi lus, tej uas yuav txaus los tsa nej, nyob ntawm no thiab hauv lub nroog Yeluxalees Tshiab.
68 Yog li ntawd, tus uas tsis muaj tswv yim, cia nws thov kuv, thiab kuv yuav muaj siab dawb siab zoo pub rau nws thiab tsis cem nws.
69 Cia li zoo siab thiab xyiv fab, vim tus Tswv twb muab lub nceeg vaj, los yog hais tias, tej yawm sij ntawm lub koom txoos rau nej lawm. Twb yog li ntawd. Amees.
70 Cov pov thawj thiab cov xib hwb yuav tsum muaj lawv tej hauj lwm saib xyuas, ib yam li cov mej zeej.
71 Thiab cov txwj laug los yog cov pov thawj hlob uas tsa los pab tus npisov ua cov pab cuam rau txhua yam, yuav tsum txhawb lawv tsev neeg los ntawm tej teej tug uas tau muab fij tseg rau tus npisov, coj los pab cov pluag, thiab pab rau lwm yam, li tau hais txog ua ntej lawm;
72 Los sis lawv yuav tsum tau txais kev them nqi uas txaus rau tag nrho lawv tej hauj lwm pab, txawm yog ib txoj hauj lwm saib xyuas los yog lwm yam, uas cov pab cuam thiab tus npisov tau xav tias yog qhov zoo tshaj los sis qhov lawv tau txiav txim siab rau.
73 Thiab tus npisov thiab, yuav tsum tau txais nws txoj kev txhawb, los yog kev them nqi uas txaus rau txhua yam hauj lwm nws ua pab nyob hauv lub koom txoos.
74 Saib seb, kuv hais tseeb rau nej tias, tej neeg dab tsi uas nyob hauv nej, uas tau muab lawv tus khub tso tseg vim yog txoj kev deev nkauj nraug, los yog hais tias, yog lawv yuav ua tim khawv rau nej los ntawm kev txo siab txo ntsws hais tias muaj li no tiag, nej yuav tsum tsis txhob muab lawv ntiab tawm ntawm nej mus;
75 Tiam sis yog nej ho kawm hais tias cov neeg twg tau tso lawv tej khub vim yog kev deev luag poj luag txiv, thiab lawv tus kheej yog cov ua txhaum, thiab lawv tej khub tseem muaj sia nyob, lawv yuav tsum raug muab ntiab tawm ntawm nej mus.
76 Thiab ntxiv, kuv hais rau nej tias, nej yuav tsum xyuas zoo thiab ceev faj, nug txhua yam, kom nej tsis txhob txais ib tug zoo li ntawd los rau hauv nej yog hais tias lawv tseem muaj poj muaj txiv;
77 Thiab yog hais tias lawv tsis muaj poj muaj txiv, lawv yuav tsum hloov siab lees txim rau tag nrho lawv tej kev txhaum yog tsis li ntawd nej tsis txhob txais lawv.
78 Thiab ntxiv, txhua tus neeg uas zwm rau Khetos lub koom txoos no, yuav tsum mob siab ua raws li tag nrho tej lus txib thiab tej kev khi lus ntawm lub koom txoos.
79 Thiab yuav muaj tias, yog ib tug neeg twg hauv nej tua neeg tus ntawd yuav tsum raug coj mus thiab ua kom raws li tej kev cai ntawm thaj av; vim nco ntsoov tias tsis muaj kev zam txim rau nws; thiab yuav ua pov thawj raws li tej kev cai ntawm thaj av tias tus ntawd twb yog tus uas ua li ntawd.
80 Thiab yog ib tug txiv neej los yog poj niam twg tau deev luag poj luag txiv, nws yuav raug coj mus hais plaub rau ntawm ob tug txwj laug ntawm lub koom txoos, los sis coob tshaj, thiab txhua lo lus muab coj los hais tawm tsam nws yuav tsum yog los ntawm ob tug tim khawv ntawm lub koom txoos, thiab tsis yog los ntawm cov yeeb ncuab; tiam sis zoo dua yog tias muaj coob tshaj ob tug tim khawv.
81 Tiam sis nws yuav tsum raug txim los ntawm ob tug tim khawv tej lus; thiab cov txwj laug yuav tsum muab rooj plaub tso rau lub koom txoos cov thawj coj, thiab cov ntseeg yuav tsa lawv tej tes tawm tsam nws, kom lub koom txoos yuav ua tej no rau lawv raws li Vajtswv txoj kev cai.
82 Thiab yog hais tias ua tau, yuav tsum muaj tus npisov nyob ntawd thiab.
83 Thiab li no nej yuav tsum ua rau txhua txub uas yuav los rau nej.
84 Thiab yog ib tug txiv neej los yog poj niam nyiag khoom, nws yuav tsum raug coj mus rau cov txiav plaub ntawm thaj av.
85 Thiab yog hais tias nws ua tub sab, nws yuav tsum raug coj mus rau cov txiav plaub ntawm thaj av.
86 Thiab yog hais tias nws dag, nws yuav tsum raug coj mus rau cov txiav plaub ntawm thaj av.
87 Thiab yog hais tias nws ua lwm yam kev ua phem dab tsi, nws yuav tsum raug coj mus rau cov txiav plaub, uas twb yog Vajtswv cov.
88 Thiab yog hais tias nej tus kwv tij los yog nus muag ua txhaum rau nej, nej yuav tsum coj nws thiab nej tus kheej neb ob leeg mus xwb; thiab yog hais tias nws lees txhaum nej yuav tsum rov qab sib raug zoo.
89 Thiab yog hais tias nws tsis lees txhaum nej yuav tsum coj nws mus rau lub koom txoos, tsis yog rau cov mej zeej, tiam sis yog rau cov txwj laug. Thiab yuav sib hais nyob hauv ib lub rooj sib ntsib, thiab tsis yog rau neeg ntiaj teb saib.
90 Thiab yog hais tias nej tus kwv tij los yog nus muag ua txhaum ntau leej, nws yuav tsum raug qhuab ntuas tab meeg ntau leej.
91 Thiab yog hais tias ib tug twg tab meeg ua txhaum, nws yuav tsum raug cem tab meeg, kom nws yuav poob ntsej muag. Thiab yog hais tias nws tsis lees txhaum, nws yuav tsum raug coj mus rau Vajtswv cov txiav plaub.
92 Yog hais tias muaj leej twg ua txhaum ntsiag to, nws yuav raug cem ntsiag to, kom nws yuav muaj lub cib fim lees txhaum ntsiag to rau tus uas nws tau ua txhaum rau lawm, thiab rau Vajtswv, kom cov ntseeg tsis txhob hais lus saib tsis taus nws.
93 Thiab li no nej yuav tsum ua txhua yam.