1 Cia li mloog, auj nej uas yog cov neeg ntawm kuv lub koom txoos; vim kuv hais tseeb rau nej tias tau hais tej yam no rau nej kom zoo rau nej thiab kom nej tau kawm.

2 Tiam sis txawm yog muaj tej yam ntawd uas tau muab sau cia lawm los, yeej ib txwm cia cov txwj laug ntawm kuv lub koom txoos txij thaum chiv keeb los, thiab yuav zoo li ntawd mus li, kom coj tag nrho tej kev sib ntsib raws li tus Ntsuj Plig Dawb Huv qhia thiab coj.

3 Txawm li ntawd los tus Tswv twb txib nej kom tsis txhob ntiab ib tug twg hlo li tawm hauv nej tej kev sib ntsib rau sawv daws, uas qhib rau neeg txhua tus.

4 Tus Tswv kuj txwv kom nej tsis txhob ntiab ib tug twg uas zwm rau lub koom txoos tawm hauv nej tej kev sib ntsib txais lub cim nco txog mus; txawm li ntawd los, yog muaj tus tau ua txhaum, cia nws txhob noj kom txog thaum nws rov qab sib raug zoo tso.

5 Thiab kuv hais ntxiv rau nej tias, nej tsis txhob ntiab ib tug twg uas mob siab nrhiav lub nceeg vaj tawm hauv nej tej kev sib ntsib txais lub cim nco txog—Kuv hais qhov no ntsig txog cov tsis tau zwm rau lub koom txoos.

6 Thiab kuv hais ntxiv rau nej, ntsig txog nej tej kev sib ntsib ua kev pom zoo, hais tias yog muaj ib tug twg uas tsis tau zwm rau lub koom txoos, uas mob siab nrhiav lub nceeg vaj, nej tsis txhob ntiab lawv tawm.

7 Tiam sis tus Tswv txib nej kom thov Vajtswv txog txhua yam, tus muaj siab dawb pub; thiab tej uas tus Ntsuj Plig ua tim khawv rau nej kuv xav kom nej muab siab dawb huv tag nrho ua tej ntawd, ua rau kuv pom tias nej taug kev ncaj ncees, xav txog qhov kawg ntawm nej txoj kev cawm seej, ua txhua yam nrog kev thov Vajtswv thiab kev ua tsaug, kom nej thiaj tsis raug ntxias los ntawm tej ntsuj plig phem, los yog tej lus qhuab qhia ntawm tej dab phem, los yog neeg tej lus txib; vim ib txhia yog neeg li, thiab ib txhia yog tej dab phem li.

8 Yog li ntawd, ceev faj tsam nej raug dag ntxias; thiab yuav kom nej tsis raug dag ntxias nej cia li mob siab nrhiav tej txiaj ntsim zoo tshaj plaws, nco ntsoov tias yog vim li cas ho muab tej txiaj ntsim ntawd los;

9 Vim kuv hais tseeb rau nej tias, tau muab tej txiaj ntsim ntawd los kom pab rau cov uas hlub kuv thiab ua raws li tag nrho kuv tej lus txib, thiab rau tus uas nrhiav kev ua li ntawd; kom yuav pab tag nrho cov uas nrhiav kuv los yog thov kuv, cov uas thov tiam sis tsis thov kom tau ib lub cim rau lawv siv raws li lawv lub siab ntshaw.

10 Thiab ntxiv, kuv hais tseeb rau nej tias, kuv xav kom nej yuav nco ntsoov, thiab nco ntsoov hauv nej lub cim xeeb tias tej txiaj ntsim ntawd yog dab tsi, uas tau muab pub rau cov ntseeg.

11 Vim tsis tau muab txhua lub txiaj ntsim rau lawv sawv daws; vim muaj ntau lub txiaj ntsim, thiab twb muab ib lub txiaj ntsim los ntawm Vajtswv tus Ntsuj Plig rau txhua tus neeg.

12 Rau ib txhia pub ib lub, thiab rau ib txhia ho pub lwm lub, kom li ntawd sawv daws thiaj tau koob hmoov.

13 Rau ib txhia tus Vaj Ntsuj Plig Dawb Huv pub rau lawv kom paub hais tias Yexus Khetos yog Vajtswv Leej Tub, thiab paub tias nws raug ntsia rau saum ntoo khaub lig rau neeg ntiaj teb tej kev txhaum.

14 Rau lwm cov ho pub rau cov ntawd kom ntseeg lawv tej lus, kom lawv yuav tau txoj sia nyob mus ib txhis yog hais tias lawv rau siab ntseeg mus ntxiv.

15 Thiab ntxiv, rau ib txhia tus Vaj Ntsuj Plig Dawb Huv pub rau lawv kom paub tej kev sib txawv ntawm kev ua hauj lwm, vim yuav ua rau tib tug Tswv zoo siab, raws li tus Tswv siab nyiam, ua kom tus Tswv tej kev hlub tshua haum rau noob neej tej xwm txheej.

16 Thiab ntxiv, tus Vaj Ntsuj Plig Dawb Huv pub rau ib txhia kom paub tau tej kev sib txawv ntawm kev khiav hauj lwm, saib tej ntawd puas yog Vajtswv li, kom yuav muab tej kev tshwm sim los ntawm tus Ntsuj Plig rau txhua tus neeg kom pab lawv.

17 Thiab ntxiv, kuv hais tseeb rau nej tias, rau ib txhia Vajtswv tus Ntsuj Plig pub txoj lus ntawm kev muaj tswv yim.

18 Rau lwm tus ho pub txoj lus ntawm kev txawj ntse, kom yuav qhia sawv daws muaj tswv yim thiab muaj kev txawj ntse.

19 Thiab ntxiv, pub rau ib txhia kom muaj kev ntseeg kom zoo mob;

20 Thiab pub rau lwm tus kom muaj kev ntseeg kho tau lwm tus.

21 Thiab ntxiv, pub rau ib txhia kom ua tau tej txuj ci tseem ceeb.

22 Thiab pub rau lwm tus kom qhia tej yuav muaj los yav tom ntej.

23 Thiab rau lwm cov, txoj kev paub tau tej ntsuj plig.

24 Thiab ntxiv, pub rau ib txhia kom paub hais tej lus txawv;

25 Thiab pub rau lwm tus kom paub txhais tej lus txawv.

26 Thiab tag nrho tej txiaj ntsim no los ntawm Vajtswv los, kom pab tau Vajtswv cov me nyuam.

27 Thiab rau tus npisov ntawm lub koom txoos, thiab rau cov uas Vajtswv hu los thiab tsa los saib xyuas lub koom txoos thiab los ua cov txwj laug rau lub koom txoos, kom lawv paub tau qhov sib txawv ntawm tag nrho tej txiaj ntsim ntawd tsam muaj qee tus nyob hauv nej hais tias nws yog los ntawm Vajtswv tiam sis tseeb tiag twb tsis yog los ntawm Vajtswv.

28 Thiab yuav muaj tias tus uas thov los ntawm tus Ntsuj Plig ces yuav tau txais los ntawm tus Ntsuj Plig;

29 Kom yuav muab tag nrho tej txiaj ntsim ntawd rau ib txhia, kom yuav muaj ib tug thawj coj, kom txhua tus mej zeej thiaj yuav tau koob hmoov.

30 Tus uas thov los ntawm tus Ntsuj Plig thov raws li Vajtswv lub siab nyiam; yog li ntawd yuav muaj raws li nws thov.

31 Thiab ntxiv, kuv hais rau nej tias, txhua yam yuav tsum ua los ntawm Khetos lub npe, txhua yam uas nej ua los ntawm tus Ntsuj Plig;

32 Thiab nej yuav tsum ua Vajtswv tsaug los ntawm tus Ntsuj Plig rau txhua txoj koob hmoov uas nej tau txais.

33 Thiab nej yuav tsum coj kev tsim txiaj thiab kev dawb huv rau kuv pom kom tsis tu ncua. Twb yog li ntawd. Amees.