Benneg 46
Paltiing a naited iti Simbaan babaen ni Joseph Smith a Propeta, iti Kirtland, Ohio, idi 8 ti Marso 1831 (History of the Church, 1:163–165). Iti daytoy nasapa a panawen ti Simbaan, awan pay ti nabukel a naurnos nga annuroten ti panangiturong kadagiti annongen iti Simbaan. Nupay kasta, nagbalin a kasla sapasap ti kannawidan a panangawat laeng kadagiti kameng ken naregget nga agusig kadagiti miting iti sakramento ken dadduma pay a pagtitiponan ti Simbaan. Ipeksa daytoy a paltiing ti pagayatan ti Apo a mainaig iti pannakaituray ken pannakaiturong dagiti miting.
1–2, Mangiturong dagiti elder kadagiti miting kas panangiwanwan ti Nasantuan nga Espiritu; 3–6, Saan a rumbeng a mailaksid dagiti agsapsapul iti kinapudno kadagiti annongen ti sakramento; 7–12, Agdawat iti Dios ken sapulen dagiti sagut ti Espiritu; 13–26, Naited ti pannakainagan ti sumagmamano kadagitoy a sagut; 27–33, Naikkan dagiti dadaulo ti Simbaan iti bileg a mangrikna kadagiti sagut ti Espiritu.
1 Imdenganyo, O dakayo a tao ti simbaanko; ta pudno kunak kadakayo a naibaga kadakayo dagitoy a banag a para iti pagimbagan ken pagadalanyo.
2 Ngem iti laksid dagidiay banag a naisurat, kanayon a naited kadagiti elder ti simbaanko manipud pay idi damo, ken kanayonto, a mangiturong kadagiti miting a kas iti pannakaiturong ken pannakaiwanwanda babaen ti Nasantuan nga Espiritu.
3 Nupay kasta mabilinkayo a saankayonto a pulos mamapanaw iti asino man manipud kadagiti mitingyo iti kaaduan, a maangay iti sango ti lubong.
4 Kasta met a mabilinkayo a dikayo mamapanaw iti asino man a kameng ti simbaan kadagiti mitingyo iti sakramento; nupay kasta, asino man ti agbasol, diyo pakiranuden agingga a di makikinnatunosan.
5 Ket kunak manen kadakayo, diyo papanawen kadagiti mitingyo iti sakramento ti asino man a sipapasnek nga agsapsapul iti pagarian—ibagak daytoy a maipanggep kadagiti saan a kameng ti simbaan.
6 Ket kunak manen kadakayo, maipanggep kadagiti miting a pamatalgedanyo, a no adda man saan a kameng ti simbaan, a sipapasnek a mangsapsapul iti pagarian, diyo ida papanawen.
7 Ngem mabilinkayo a dumawat iti Dios iti amin a banag, a mangted a siwawaya; ken paneknekan kadakayo ti Espiritu kasta met a kayatko nga aramidenyo a nasantuan ti pusoyo, a magna iti imatangko a sitatalged, a mangpampanunot iti pagtungpalan ti pannakaisalakanyo, a mangaramid iti amin a banag babaen ti kararag ken panagyaman, tapno saannakayo a masulisog dagiti dakes nga espiritu, wenno ti doktrina dagiti sairo, wenno dagiti bilin ti tattao; ta aramid ti tattao ti dadduma, ken sairo ti sabsabali.
8 Gapuna, agannadkayo amangan ta maallilawkayo; ket tapno saankayo a maallilaw sapulenyo a sipapasnek dagiti kasayaatan a sagut, a kanayon a laglagipenyo ti gapu ti nakaitedanda;
9 Ta pudno kunak kadakayo, naitedda a para iti pagimbagan dagiti mangayat kaniak ken mangtungpal kadagiti amin a bilinko, ken isu a mangsapul a mangaramid; tapno mairanud ti amin a mangsapul wenno agdawat kaniak, nga agdawat a saan ket a para iti tanda nga aramatenda iti bukodda a paggarteman.
10 Ket manen, pudno kunak kadakayo, kayatko a laglagipenyo a kanayon, ket ipasagepsepyo a kanayon iti panunotyo no ania dagidiay a sagut, a naited iti simbaan.
11 Ta saan a maikkan ti amin iti sagut; ta adu ti sagut, ket ikkan ti Espiritu ti Dios ti tunggal tao iti sagut.
12 Maikkan ti sumagmamano iti saggaysa, ket ti dadduma maikkan iti sabali, tapno mairanud ti amin iti kastoy a wagas.
13 Ikkan ti Espiritu Santo dagiti dadduma iti pannakaammo a ni Jesucristo ti Anak ti Dios, ken nailansa iti krus para kadagiti basol ti lubong.
14 Naited kadagiti dadduma iti panamati kadagiti balikasda, tapno maikkanda met iti agnanayon a biag no ituloyda ti kinapudnoda.
15 Ket manen, inted ti Espiritu Santo kadagiti dadduma iti pannakaammo ti paggigidiatan ti panangimaton, kas iti makaay-ayo iti isu met la nga Apo, a maibatay iti pagayatan ti Apo, a mainugot iti kinamanangngaasina maibatay iti kasasaad dagiti annak ti tattao.
16 Ket manen, inted ti Espiritu Santo kadagiti dadduma iti pannakaammo iti nagdudumaan ti panangipagna, no nagtaud iti Dios, tapno ti pagilasinan iti Espiritu maited iti tunggal tao a pakairanudanda.
17 Ket manen, pudno kunak kadakayo, maited kadagiti dadduma, babaen ti Espiritu ti Dios, ti nainsiriban a balikas.
18 Maited kadagiti dadduma ti balikas ti pannakaammo, tapno maisuro ti amin nga agbalin a masirib ken maaddaan iti pannakaammo.
19 Ket manen, maikkan dagiti dadduma iti pammati a maagasan;
20 Ket dagiti dadduma maikkan iti pammati a makaagas.
21 Ket manen, maited kadagiti dadduma ti panagaramid kadagiti milagro;
22 Ket maited kadagiti dadduma ti panamadto;
23 Ket kadagiti dadduma panangrikna kadagiti espiritu.
24 Ket manen, maited kadagiti dadduma ti panagsao kadagiti pagsasao.
25 Ket kadagiti dadduma maited ti panagipatarus kadagiti pagsasao.
26 Ket naggapu amin dagitoy a sagut iti Dios, a para iti pagimbagan dagiti annak ti Dios.
27 Ket iti obispo ti simbaan, ken iti tudingan ti Dios ken ordenanna a mangaywan iti simbaan ken agbalin nga elder iti simbaan, maited kadakuada ti panangrikna kadagiti amin a sagut no saan adda kadakayo ti agipadto iti saan met a nagtaud iti Dios.
28 Ket mapasamakto nga isu nga agdawat iti Espiritu awatennanto ti Espiritu;
29 Tapno kadagiti dadduma maitedto amin dagitoy a sagut, tapno addanto mangipangulo, tapno mairanudto ti tunggal kameng iti daytoy.
30 Isu nga agdawat iti Espiritu agdawat a maibatay iti pagayatan ti Dios; gapuna maaramid a kas iti dawatenna.
31 Ket manen, kunak kadakayo, nasken a maaramid ti amin a banag iti nagan ni Cristo, ania man nga aramidenyo iti Espiritu;
32 Ket nasken nga agyamankayo iti Dios iti Espiritu iti ania man a bendision a nakabendisionanyo.
33 Ket nasken nga itultuloyyo a sanayen ti saguday ken kinasantuan iti sangok. Pudno a kasta. Amen.