Tshooj 53
Kev tshwm sim uas tus Yaj Saub Joseph Smith tau txais kom qhia Algernon Sidney Gilbert, hauv Kirtland, Ohio, lub Rau Hli Ntuj hnub tim 8, xyoo 1831. Los ntawm Sidney Gilbert tej lus thov, tus Yaj Saub tau nug tus Tswv txog Kwv Tij Gilbert txoj hauj lwm thiab kev tsa txib nyob hauv lub Koom Txoos.
1–3, Tej uas Vajtswv hu thiab xaiv Sidney Gilbert ua nyob hauv lub Koom Txoos yog kom muab nws tsa ua ib tug txwj laug; 4–7, Nws kuj yuav ua tus npisov ib tug sawv cev.
1 Saib seb, kuv hais rau koj, kuv tus tub qhe Sidney Gilbert, hais tias kuv twb hnov koj tej lus thov; thiab koj tau hu kuv kom ua rau koj paub, los ntawm tus Tswv koj tus Vajtswv, ntsig txog qhov uas Vajtswv hu thiab xaiv koj cia nyob hauv lub koom txoos, uas kuv, tus uas yog tus Tswv, tau tsa nyob hauv hnub nyoog kawg no.
2 Saib seb, kuv, tus uas yog tus Tswv, tus uas raug muab ntsia rau saum ntoo khaub lig rau neeg ntiaj teb tej kev txhaum, muab lus txib rau koj hais tias koj yuav tsum tso tej yam ntawm lub ntiaj teb tseg.
3 Cia li txais kuv txoj kev tsa, uas yog txoj kev tsa ua ib tug txwj laug, mus tshaj tawm txoj kev ntseeg thiab kev hloov siab lees txim thiab kev zam txim rau tej kev txhaum, raws li kuv txoj lus, thiab ntawm kev txais tus Ntsuj Plig Dawb Huv los ntawm kev tso tes rau saum taub hau;
4 Thiab kuj ua ib tug sawv cev rau lub koom txoos no rau hauv qhov chaw uas tus npisov yuav txib koj mus, raws li tej lus txib uas yuav muab tom qab no mus.
5 Thiab ntxiv, kuv hais tseeb rau koj tias, koj yuav tsum mus nrog kuv ob tug tub qhe Joseph Smith, tus Hluas, thiab Sidney Rigdon.
6 Saib seb, nov yog thawj txoj kab ke uas koj yuav tau txais; thiab yuav ua kom paub txog cov kab ke uas seem tshuav rau ib lub sij hawm uas yuav los, raws li koj txoj hauj lwm nyob hauv kuv lub vaj txiv hmab.
7 Thiab ntxiv, kuv xav kom koj kawm tias tus uas nyiaj mus kom txog thaum kawg xwb thiaj yuav txais kev cawm dim. Twb yog li ntawd. Amees.