Benneg 64
Paltiing a naited kadagiti elder ti Simbaan babaen ni Joseph Smith a Propeta, iti Kirtland, Ohio, idi 11 ti Septiembre 1831 (History of the Church, 1:211–214). Agsagsagana idi ti Propeta nga umakar iti Hiram, Ohio, a pangpabaruanna iti aramidna a panangipatarus iti Biblia, a naitungtungkua bayat ti kaaddana iti Missouri. Sipapasnek a nakiraman ti bunggoy dagiti kabsat a nabilin nga agdaliasat iti Zion (Missouri) iti panagsagana a pumanaw iti Oktubre. Iti daytoy nakumikom a panawen, naawat ti paltiing.
1–11, Nabilin dagiti Santo nga agpipinnakawan iti tunggal maysa, no saan agtalinaed kadakuada ti nakarkaro a basol; 12–22, Nasken a maidatag dagiti saan nga agbabawi iti Simbaan; 23–25, Saanto a mapuoran iti yaay ti Apo ti mangted iti apagkapullo; 26–32, Naballaagan dagiti Santo a maibusor iti utang; 33–36, Maisinanto iti Zion dagiti nasukir; 37–40, Kednganto ti Simbaan dagiti pagilian; 41–43, Rumang-ayto ti Zion.
1 Adtoy, kastoy ti kuna ti Apo a Diosyo kadakayo, O dakayo nga elder ti simbaanko, imdengan ken denggenyo, ken awatenyo ti pagayatak maipapan kadakayo.
2 Ta pudno kunak kadakayo, kayatko a parmekenyo ti lubong; gapuna adda panangngaasik kadakayo.
3 Adda sumagmamano kadakayo a nagbasol; ngem pudno kunak, maminsan laeng daytoy, para iti dayagko, ken para iti pannakaisalakan dagiti kararua, pinakawankon dagiti basolyo.
4 Kaasiankayonto, ta naitedkon kadakayo ti pagarian.
5 Ket saanto a maala dagiti tulbek dagiti datdatlag iti pagarian manipud iti katulongak a ni Joseph Smith, Jun., babaen ti wagas nga intudingko, bayat ti panagbiagna, no la ketdi tungpalenna dagiti ordinansak.
6 Adda dagiti agsapsapul iti pagbiddutanna nga awanan iti gapu;
7 Nupay kasta, nagbasol; ngem pudno kunak kadakayo, siak, ti Apo, pakawanek ti basbasol dagiti mangipudno iti basbasolda kaniak ket dumawat iti pammakawan, a saan a nagbasol iti patay.
8 Dagiti disipulok, iti nagkauna a panawen, nagsapulda iti pagbiddutan ti tunggal maysa ken saan a namakawan a sipupuso iti tunggal maysa; ket gapu iti daytoy a kinadakes nagrigatda ket nadusada iti napalalo.
9 Gapuna, kunak kadakayo, a nasken nga agpipinnakawankayo iti tunggal maysa; ta asino man a di mamakawan iti nagbiddutan ti kabsatna agtakderto a makedngan iti imatang ti Apo; ta agtalinaed kenkuana ti nadagdagsen a basol.
10 Siak, ti Apo, pakawanekto ti pakawanek, ngem kadakayo nasken a pakawanenyo amin a tao.
11 Ket nasken a sawenyo iti puspusoyo—bay-am a ti Dios ti mangukom kadata, ket itdenna kenka ti gunggonam a maibatay kadagiti aramidmo.
12 Ket isu a di agbabawi kadagiti basolna, ken saan a mangipudno kadagitoy, idatagyo ida iti simbaan, ket aramidenyo kenkuana ti ibaga kadakayo ti nasantuan a kasuratan, babaen man ti bilin wenno babaen ti paltiing.
13 Ket aramidenyo daytoy tapno maitan-ok ti Dios—saan a gapu ta saankayo a mamakawan, nga awanankayo iti panangngaasi, ngem tapno makedngankayo kadagiti mata ti paglintegan, tapno saankayo a makabasol iti nangted kadakayo iti paglintegan—
14 Pudno kunak, gapu iti daytoy aramidenyonto dagitoy a banag.
15 Adtoy, siak, ti Apo, kagurak ti katulongak a ni Ezra Booth, ken kasta met ti katulongak a ni Isaac Morley, ta saanda a tinungpal ti paglintegan, wenno uray ti bilin;
16 Nagsapulda iti dakes iti puspusoda, ket siak, ti Apo, minedmedak ti Espirituk. Kinednganda ti banag a dakes a saan met a dakes; nupay kasta pinakawankon ti katulongak a ni Isaac Morley.
17 Ken kasta met ti katulongak a ni Edward Partridge, adtoy, nagbasol, ket pinanggep ni Satanas a dadaelen ti kararuana; ngem no maipakaammo kadakuada dagitoy a banag, ket ibabawida ti dakes, mapakawandanto.
18 Ket ita, pudno kunak a nasken unay kaniak a ti katulongak a ni Sidney Gilbert, kalpasan ti sumagmamano a lawas, agsublinto iti negosiona, ken iti kinamangibagina iti daga ti Zion;
19 Ket dayta a nakitana ken nangngeganna maipakaammonto kadagiti disipulok, tapno saanda a mapukaw. Ket daytoy a gapu ti nangibagaak kadagitoy a banag.
20 Ket manen, kunak kadakayo, a saan a masulisog ni katulongak nga Isaac Morley iti kabaelanna nga imeten, ket mamagbaga a sibibiddut iti pakasaktanyo, nangtedak iti bilin a nasken a mailako ti talonna.
21 Diak kayat nga ilako ti katulongak a ni Frederick G. Williams ti talonna, ta siak, ti Apo, pagayatak a mapagtalinaed ti natalged a lugar iti daga ti Kirtland, iti uneg ti lima a tawen, a diak pangpaksiatan kadagiti nadangkes, tapno bareng adda maisalakanko kadakuada.
22 Ket kalpasan dayta nga aldaw, siak, ti Apo, diak ibaga a nagbasol ti asino man a naimpusuan ti papanna iti daga ti Zion; ta siak, ti Apo, kasapulak ti puspuso dagiti annak ti tattao.
23 Adtoy, ita naawagan iti daytoy nga aldaw agingga iti yaay ti Anak ti Tao, ket pudno nga isu ti aldaw ti panagsakripisio, ken aldaw a pannangted iti apagkapullo dagiti taok; ta isu a nangted iti apagkapullo saanto a mapuoran iti yaayna.
24 Ta umayto ti pannakapuor kalpasan daytoy nga aldaw—kastoy a wagas ti panagsao ti Apo—ta pudno kunak, inton bigat kaslanto punget amin dagiti napalangguad ken dagiti agaramid iti dinadangkes; ket puorakto ida, ta siak ti Apo ti Pangen; ket diak isalakan ti asino man nga agbati iti Babilonia.
25 Gapuna, no patiendak, agtrabahokayo ita nga aldaw kas naituding.
26 Ket saan a mainugot nga ilako dagiti katulongak, da Newel K. Whitney ken Sidney Gilbert, dagiti pagtagilakuan ken dagiti sanikuada ditoy; ta saan a nainsiriban daytoy agingga a mapan dagiti nabati ti simbaan, a nagbati iti daytoy a lugar, iti daga ti Zion.
27 Adtoy, nasao kadagiti paglintegak, wenno maiparit, ti umutang kadagiti kabusoryo;
28 Ngem adtoy, saan a nasao iti kaano man a saan a nasken nga alaen ti Apo no pakaragsakanna, ken bayadanna iti pagarupna a nasayaat.
29 Gapuna, iti kinamangibagiyo, babaonennakayo ti Apo; ket ania man ti aramidenyo a maibatay iti pagayatan ti Apo aramid ti Apo.
30 Ket tinudingannakayo a mangtulong kadagiti santona kadagitoy maudi nga aldaw, tapno magun-odda ti tawidda iti daga ti Zion.
31 Ket adtoy, siak, ti Apo, ipakdaarko kadakayo, ket awan duadua dagiti balikasko ket dida agkamtud, tapno magun-odda.
32 Ngem lumabas amin a banag iti panawenda.
33 Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan.
34 Adtoy, kalikaguman ti Apo ti puso ken ti natallugod a panunot; ken ti natallugod ken natulnog manganto iti nasayaat iti daga ti Zion kadagitoy maudi nga aldaw.
35 Ket maisinanto dagiti nasukir iti daga ti Zion, ket mapapanawdanto, ket saandanto nga agtawid iti daga.
36 Ta, pudno kunak a saan a dara ni Ephraim dagiti nasukir, gapuna mapagtalawdanto.
37 Adtoy, siak, ti Apo, inaramidko ti simbaanko kadagitoy maudi nga aldaw a kas iti ukom a nagtugaw iti turod, wenno iti nangato a lugar, a mangukom kadagiti pagilian.
38 Ta mapasamakto nga ukomennanto dagiti agindeg iti Zion dagiti amin a banag maipanggep iti Zion.
39 Duktalandanto dagiti ulbod ken managpammarang, ket maipakaammonto dagiti saan nga apostol ken propeta.
40 Ken uray pay ti obispo, nga isu ti ukom, ken dagiti mamagbagana, no saanda a napudno kadagiti ibagianda makedngandanto, ket maipatugawto dagiti sabali a sukatda.
41 Ta, adtoy, kunak kadakayo a rumang-ayto ti Zion, ket addanto kenkuana ti dayag ti Apo;
42 Ket isunto ti wagayway kadagiti tao, ket addanto umay kenkuana nga aggapu iti tunggal pagilian iti sirok ti langit.
43 Ket umayto ti aldaw nga agarigenggen ti daga gapu kenkuana, ket agbutengto gapu kadagiti nakaam-amakna. Nasaon ti Apo. Amen.