Tshooj 67
Kev tshwm sim uas tus Yaj Saub Joseph Smith tau txais, nyob hauv Hiram, Ohio, thaum ntxov ntawm lub Kaum Ib Hlis Ntuj xyoo 1831. Lub caij nyoog yog thaum muaj ib lub rooj sab laj tshwj xeeb, thiab muab tej kev tshwm sim uas tus Tswv tau qhia rau tus Yaj Saub coj los tham thiab ntaus tswv yim muab luam tawm (saib cov lus piav lub ntsiab ntawm tshooj 1). Tsis ntev ua ntej William W. Phelps tau txhim tsa ib lub tsev luam ntawv rau lub Koom Txoos nyob hauv Independence, Missouri. Cov uas koom lub rooj sab laj txiav txim siab muab tej kev tshwm sim no luam tawm nyob hauv phau Book of Commandments (Phau Ntawv Lus Txib) thiab luam tawm 10,000 phau (tom qab ntawd vim muaj tej yam nyuaj lawv thiaj luam 3,000 phau tawm xwb). Ntau tus kwv tij tau ua tim khawv tiag tiag hais tias tej kev tshwm sim uas thaum ntawd tau muab los sau ua ke coj mus luam tawm yeej muaj tseeb, raws li tau pom tus Vaj Ntsuj Plig Dawb Huv los ua tim khawv rau lawv. Joseph Smith zaj keeb kwm hais tias tom qab tau txais txoj kev tshwm sim uas hu ua tshooj 1, lawv sib tham ntsig txog cov lus uas tau muab siv rau hauv tej kev tshwm sim. Txoj kev tshwm sim muaj li nram no.
1–3, Tus Tswv hnov Nws cov txwj laug tej lus thov thiab saib xyuas lawv; 4–9, Nws twv kom tus neeg txawj ntse tshaj plaws sau ib zaj kev tshwm sim seb puas zoo cuag li Nws txoj kev tshwm sim uas tsis tseem ceeb tshaj plaws; 10–14, Tus Ntsuj Plig yuav txhawb cov txwj laug uas rau siab ntseeg txoj sia thiab lawv yuav pom Vajtswv lub ntsej muag.
1 Saib seb thiab mloog, auj nej cov uas yog txwj laug ntawm kuv lub koom txoos, cov uas tau txoos nej tus kheej tuaj ua ke, cov uas kuv tau hnov nej tej kev thov Vajtswv, thiab cov uas kuv paub nej lub siab, thiab cov uas nej tej kev xav tau nce tuaj txog kuv.
2 Saib seb thiab xyuas seb, kuv ob lub qhov muag twb ntsia nej, thiab lub ntuj thiab lub ntiaj teb twb nyob hauv kuv ob txhais tes, thiab tej kev nplua nuj nyob mus ib txhis yog kuv tug coj los pub rau neeg.
3 Nej sim ntseeg hais tias nej tsim nyog tau txais txoj koob hmoov uas tau muab cev rau nej; tiam sis saib seb, kuv hais tseeb rau nej tias tau muaj tej kev ntshai nyob hauv nej lub siab, thiab tseeb tiag yog vim qhov no es nej thiaj tsis tau txais.
4 Thiab nim no kuv, tus uas yog tus Tswv, muab ib zaj lus tim khawv rau nej txog qhov tseeb ntawm tej lus txib uas muaj nyob ntawm nej xub ntiag.
5 Nej qhov muag tau ntsia kuv tus tub qhe Joseph Smith, tus Hluas, thiab nej twb paub nws txoj kev hais lus, thiab nej twb paub txog nws tej kev tsis zoo; thiab nej tau nrhiav kev txawj ntse nyob hauv nej lub siab kom yuav hais lus tau zoo tshaj li nws hais; qhov no los nej kuj paub.
6 Nim no, nej cia li nrhiav tej uas nyob rau hauv Phau Ntawv Lus Txib, zaj uas tsis tseem ceeb tshaj plaws nyob rau haud, thiab xaiv tus uas txawj ntse tshaj plaws nyob hauv nej;
7 Los sis, yog hais tias muaj ib tug nyob hauv nej uas sau tau ib zaj zoo li zaj ntawd, ces nej tsis muaj txim thaum hais tias nej twb tsis paub tias xyov tej ntawd puas muaj tseeb;
8 Tiam sis yog nej tsis muaj peev xwm sau tau ib zaj zoo li zaj ntawd, ces nej yuav raug txim yog nej tsis ua pov thawj hais tias tej kev tshwm sim ntawd muaj tseeb.
9 Vim nej twb paub hais tias tsis muaj tej kev tsis ncaj ncees nyob hauv tej kev tshwm sim ntawd, thiab qhov uas ncaj ncees yog los puag sab saud los, los ntawm Leej Txiv ntawm txoj kev kaj.
10 Thiab ntxiv, kuv hais tseeb rau nej tias yog nej lub cib fim, thiab kuv muab ib txoj kev cog lus rau nej cov uas tau tsa los rau txoj hauj lwm qhuab qhia no tias, npaum li uas nej tso nej tus kheej tej kev khib siab thiab tej kev ntshai tseg, thiab txo nej lub hwj chim rau kuv, vim nej tsis tau txo hwj chim txaus, daim ntaub thaiv yuav raug dua thiab nej yuav pom kuv thiab paub hais tias muaj kuv tiag—tsis yog los ntawm sab cev nqaij daim tawv los yog lub ntiaj teb, tiam sis yog los ntawm sab ntsuj plig.
11 Vim tsis muaj neeg ntawm sab cev nqaij daim tawv nyob rau ib lub sij hawm twg uas tau pom Vajtswv li, tsuas yog Vajtswv tus Ntsuj Plig txhawb nws txoj sia xwb.
12 Thiab tsis muaj ib tug neeg ntawm sab cev nqaij daim tawv yuav nyiaj taus Vajtswv lub yeeb haum, thiab tus uas muaj lub siab nyiam sab cev nqaij daim tawv nyiaj tsis taus.
13 Nej nyiaj tsis taus Vajtswv lub yeeb haum nim no, thiab tej tim tswv txoj kev los txhawb pab; yog li ntawd, ua siab ntev mus ntxiv kom txog thaum nej ua tau zoo tag nrho.
14 Tsis txhob cia nej lub siab tig rov qab; thiab thaum nej tsim nyog lawm, thaum txog lub sij hawm kuv pom zoo, nej yuav pom thiab paub qhov uas tau muab rau nej los ntawm kuv tus tub qhe Joseph Smith, tus Hluas, ob txhais tes. Amees.