1 Che rembiguái Orson Hyde oñehenoiʼakue iñordenasiõ rupive, omomarandu hag̃ua pe evanhélio opaveʼỹva, Tupã oikovéva Espíritu rupive, tavayguágui tavayguápe, peteĩ tetãgui ambue tetãme, umi iñañáva atykuérape, isinagogakuérape, ohesaʼỹijóvo hendivekuéra ha omohesakãvo chupekuéra opa escritura-kuéra.

2 Ha, péina ápe, kóva haʼe tembiecharã opa umi oñeordevaʼekue ko sacerdocio-pe, umi oñemeʼẽvaʼekuépe imisiõ osẽ hag̃ua—

3 Ha kóva haʼe peteĩ tembiecharã chupekuéra, oñeʼẽvaʼerãha hikuái pe Espíritu Santo omomyiháicha chupekuéra.

4 Ha oimeraẽ mbaʼe haʼekuéra oñeʼẽva, Espíritu Santo omomýi jave chupekuéra, haʼéta escritura, haʼéta Ñandejára rembipota, haʼéta Ñandejára heʼiséva, haʼéta Ñandejára ñeʼẽ, haʼéta Ñandejára ñeʼẽpu, ha Tupã pokatu salvasiõrã.

5 Péina ápe, kóva haʼe Ñandejára promésa peẽme, O che rembiguaikuéra.

6 Upévare, pevyʼáke ha ani pekyhyje, Che Ñandejára aimégui penendive, ha aiméta pende ykére; ha petestifikáta chehegui, héẽ, Jesucristo, Che haʼeha pe Tupã oikovéva Raʼy, Che haʼehague, Che haʼeha, ha Che ajútava.

7 Kóva haʼe Ñandejára ñeʼẽ ndéve g̃uarã, che rembiguái Orson Hyde, ha avei che rembiguái Luke Johnson-pe g̃uarã, ha che rembiguái Lyman Johnson, ha che rembiguái William E. McLellin-pe g̃uarã, ha opa che tupaogua elder-kuéra ijeroviarekóva-pe g̃uarã—

8 Tapeho opa múndore, pemboʼe evanhélio mayma tekovépe, pejapóvo autorida Che ameʼẽvaʼekue peẽme rupive, peporomongaraívo Túva, ha Taʼýra, ha Espíritu Santo rérape.

9 Ha pe oguerovia ha oñemongaraíva, ojesalváta, ha pe ndogueroviáiva, oñekondenáta.

10 Ha pe ogueroviáva ojehovasáta techaukakuéra reheve oĩtava hendive, jepeve ojehaiháicha.

11 Ha peẽme oñemeʼẽta peikuaa umi ára rechaukakuéra, ha pe Kuimbaʼe Raʼy jeju rechaukakuéra;

12 Ha opa umi Túva omeʼẽvagui testimónio, oñemeʼẽta peẽme puʼaka pesella hag̃ua chupekuéra tekove ijapyraʼỹvape g̃uarã.

13 Ha koʼág̃a, umi mbaʼe rehegua, apárte umi konvénio ha tembiapoukapykuéragui, haʼe koʼãva—

14 Opyta uperire g̃uarã, Ñandejára araitépe, ambue obispo-kuéra, umi ojeʼapartáva tupaópe, oministra hag̃ua upe peteĩháicha;

15 Upévare, haʼevaʼerã hikuái sumo sacerdote hekojojáva, ha oñehenóita chupekuéra Sacerdocio de Melquisedec Primera Presidencia rupive, ndahaʼéiramo Aarón ñemoñare teéva.

16 Ha haʼéramo hikuái Aarón ñemoñare tee, oguereko derécho legal oĩvo obispado-pe, haʼéramo hikuái ijypykue, Aarón raʼykuéra apytépe;

17 Pe ijypykue oguerekógui derécho ko sacerdocio presidencia-pe, ha umi lláve térã autorida kóva reheguápe.

18 Avave kuimbaʼe ndoguerekói derécho legal ko oficio-pe, oguereko hag̃ua ko sacerdocio llavekuéra, ndahaʼéirõ Aarón ñemoñare tee ha ijypykue.

19 Ha katu, peteĩ Melquisedec Sacerdocio sumo sacerdote, orekógui autorida ombaʼapo hag̃ua opa oficio menor-pe, haʼe ikatu ojapo obispo oficio, ndojejuhúirõ peteĩ Aarón ñemoñare teéva, oñehenói ha ojeaparta ha oñeordenáramo kóva ko puʼakápe, Sacerdocio de Melquisedec Primera Presidencia po rupive.

20 Ha peteĩ Aarón ñemoñare teéva, oñehenoivaʼerã avei kóva ko Presidencia-re, ha ojejuhúramo hekojoja, ha oñeunhi ha oñeordena ko Presidencia po rupive; upéicha ỹramo, ndopytái legalmente autorisádo oofisia hag̃ua iʼsacerdocio-pe.

21 Ha katu, pe apoukapy virtu rupive, derécho orekóvare hikuái sacerdocio-pe, ohasáva túvagui taʼýrape, haʼekuéra ikatu ojerure iñunsiõ, ikatúrõ oimeraẽ ára ohechauka ilináhe, térã oñedetermina Ñandejára rrevelasiõ rupive, upe presidencia ojeʼehague po guýpe.

22 Ha avei, avave obispo térã sumo sacerdote ojeʼapartáva ko ministerio-rã, ndojehusgái térã noñekondenaivaʼerã, mbaʼevéichagua tembiapovaíre, ndahaʼéiramo tupao Primera Presidencia renondépe;

23 Ha ojejuhúramo chupe kúlpare ko Presidencia renondépe, testimónio ndaikatúiva rupi oñembohovái, oñekondenáta chupe.

24 Ha oñearrepentíramo oñeperdonáta chupe, tupaogua konvénio ha tembiapoukapykuérape heʼiháicha.

25 Ha avei, oĩramo sy ha túva orekóva taʼyrakuéra Sion-pe térã oimeraẽ ijestáka oñemohendapyrévape, ha nomboʼéi chupekuéra oikũmby hag̃ua arrepentimiento rehegua doctrina, jerovia Cristo rehe, pe Tupã oikovéva Raʼy, ha ñemongarai ha Espíritu Santo don, poñemoĩ rupive rehe, ohupytývo ócho áño, pe angaipa opytáta ituvakuéra akã ári.

26 Kóva haʼétagui léi umi Sion-guakuérape g̃uarã, térã oimeraẽ ijestáka oñemohendapyrévape.

27 Ha imitãnguéra oñemongaraíta iñangaipakuéra rremisiõrã, oreko vove ócho áño, ha ohupytýta hikuái poñemoĩ.

28 Ha haʼekuéra omboʼéta avei imitãnguérape oñemboʼe hag̃ua, ha oiko hag̃ua tekojojápe Ñandejára renondépe.

29 Ha umi Sion-pe oikóva oñongatúta avei pe Pytuʼu ára osantifika hag̃ua.

30 Ha umi Sion-pe oikóva imanduʼavaʼerã avei umi hembiaporãre, oñemanda rupi chupekuéra ombaʼapo hag̃ua opa jeroviarekópe; umi hekoreívagui oikótare ñemomanduʼa Ñandejára renondépe.

31 Koʼág̃a, Che, Ñandejára, ndacherorypái umi Sion-pe oikóva ndive, oĩgui hekoreíva ijapytepekuéra; ha avei imitãnguéra okakuaa hína tekoñañáme; ha avei ndoheka mbaretéi hikuái umi ára ijapyraʼỹva mbaʼerepy, ha katu umi hesa henyhẽ mbaʼepotágui.

32 Koʼã mbaʼe ndaiporivaʼerã ha ojeipeʼavaʼerã ijapyteguikuéra; upévare, togueraha che rembiguái Oliver Cowdery koʼã ñeʼẽ Sion retãme.

33 Ha peteĩ tembiapoukapy Che ameʼẽ chupekuéra—upe nokumplíriva iñemboʼekuéra Ñandejára renondépe, ára ojejapovaʼerãhápe, toiko hese momanduʼa che tavayguakuéra hue renondépe.

34 Koʼã ñeʼẽ añetegua ha ijeroviapy; upévare, ani pejapyhara koʼãva, ha ani peipeʼa chugui mbaʼeve.

35 Péina ápe, Che haʼe Alfa ha Omega, ha Che ajupotáma. Amén.