Tshooj 83
Kev tshwm sim uas tus Yaj Saub Joseph Smith tau txais, nyob hauv Independence, Missouri, lub Plaub Hlis Ntuj hnub tim 30, xyoo 1832. Tau txais txoj kev tshwm sim no thaum tus Yaj Saub muaj kev sab laj nrog nws cov kwv tij.
1–4, Cov poj niam thiab me nyuam muaj cai kom lawv cov txiv thiab lawv txiv txhawb yug lawv; 5–6, Cov poj ntsuam thiab cov me nyuam ntsuag muaj cai kom lub Koom Txoos txhawb yug lawv.
1 Tseeb tiag, tus Tswv hais li no, ntxiv rau tej kev cai ntawm lub koom txoos ntsig txog cov poj niam thiab me nyuam, cov uas zwm rau lub koom txoos, cov uas tau xiam lawv tus txiv los yog leej txiv hais tias:
2 Cov poj niam muaj cai kom lawv cov txiv txhawb lawv, kom txog thaum lawv cov txiv raug coj mus lawm tso; thiab yog hais tias cov poj niam tsis ua txhaum ces lawv yuav ua tau mej zeej nyob hauv lub koom txoos.
3 Thiab yog hais tias lawv tsis rau siab ntseeg ces lawv yuav ua tsis tau mej zeej nyob hauv lub koom txoos; tiam sis lawv nyob tau twj ywm rau hauv lawv tej vaj tse raws li tej kev cai ntawm thaj av.
4 Txhua tus me nyuam muaj cai kom lawv niam thiab txiv txhawb yug lawv kom txog thaum lawv muaj hnub nyoog tso.
5 Thiab tom qab ntawd, lawv muaj cai kom lub koom txoos pab lawv, los yog hais tias muaj cai tau kev txhawb los ntawm tus Tswv lub tsev rau khoom, yog lawv niam thiab txiv tsis muaj peev xwm muab tau qub txeeg qub teg rau lawv.
6 Thiab yuav tsum tswj hwm lub tsev rau khoom los ntawm tej khoom uas cov ntseeg tau fij tseg; thiab yuav tsum muab khoom pab cov poj ntsuam thiab cov me nyuam ntsuag, thiab kuj pab cov pluag. Amees.