Tshooj 88
Kev tshwm sim uas tus Yaj Saub Joseph Smith tau txais nyob hauv Kirtland, Ohio, lub Kaum Ob Hlis Ntuj hnub tim 27 thiab 28, xyoo 1832, thiab lub Ib Hlis Ntuj hnub tim 3, xyoo 1833. Tus Yaj Saub muab txoj kev tshwm sim no hu ua “‘nplooj ntoo txiv roj’ … de ntawm Tsob Ntoo ntawm Yeeb Tsheej los, uas yog tus Tswv tsab xov kaj siab los rau peb.” Tau muab txoj kev tshwm sim no los tom qab cov pov thawj hlob nyob hauv ib lub rooj sab laj tau thov Vajtswv “nyias thov nyias thiab thov nrov nrov rau tus Tswv kom qhia nws lub siab nyiam rau peb ntsig txog txoj kev txhim tsa Xi-oos.”
1–5, Cov Ntseeg uas rau siab ntseeg txais tau tus Nplij Siab, uas yog txoj kev cog lus txog txoj sia nyob mus ib txhis; 6–13, Khetos txoj Kev Kaj tswj thiab kav txhua yam; 14–16, Txoj Kev Sawv Rov Los yog muaj los ntawm txoj Kev Txhiv Dim; 17–31, Kev ua raws li txoj kev cai xilethi-aus, thawlethi-aus, los yog thilethi-aus npaj tib neeg mus nyob rau lub nceeg vaj thiab yeeb koob ntawd; 32–35, Cov uas xaiv ua kev txhaum ntxiv mus tseem yuav vuab tsuab li qub; 36–41, Kev cai kav txhua lub nceeg vaj; 42–45, Vajtswv tau muab ib txoj kev cai rau txhua yam; 46–50, Tib neeg yuav to taub Vajtswv; 51–61, Zaj lus piv txwv uas tus txiv neej xa nws cov tub qhe mus tom thaj teb thiab mus xyuas lawv ib tug dhau ib tug; 62–73, Txav los ze rau ntawm tus Tswv, ces nej yuav pom Nws lub ntsej muag; 74–80, Hloov nej tus kheej ua dawb huv thiab ib leeg qhia ib leeg txog tej lus qhuab qhia ntawm lub nceeg vaj; 81–85, Txhua tus neeg uas txais kev ceeb toom lawm yuav tsum ceeb toom nws tus neeg zej zog; 86–94, Tej cim, tej kev puas tsuaj ntawm lub ntiaj teb, thiab tej tim tswv npaj txoj kev rau tus Tswv txoj kev los; 95–102, Cov tim tswv lub suab raj hlau hu kom cov neeg tuag sawv los raws li lawv thib sawv; 103–116, Cov tim tswv lub suab raj hlau tshaj tawm txog txoj kev txum tim txoj moo zoo rov qab los, Npanpiloos txoj kev vau, thiab npluav rog ntawm tus Vajtswv muaj hwj chim; 117–126, Nrhiav kev kawm, ua Vajtswv ib lub tsev (ib lub tuam tsev), thiab muab txoj kev sib khi ua ke uas yog kev siab hlub los ua tsoos tsho rau nej hnav; 127–141, Tus Tswv qhia tus txheej txheem ntawm cov Yaj Saub lub Koom Haum Kawm, nrog rau txoj kab ke ntxuav ko taw thiab.
1 Tus Tswv hais tseeb li no rau nej cov uas tau sib txoos nej tus kheej tuaj ua ke kom txais nws lub siab nyiam ntsig txog nej:
2 Saib seb, qhov no ua rau nej tus Tswv zoo siab, thiab cov tim tswv xyiv fab rau nej; tej hauj lwm zoo uas yog nej tej kev thov Vajtswv tau los txog rau tus Tswv ntawm Xanpa-aus ob lub pob ntseg, thiab tus Tswv muab ceev cia rau hauv phau ntawv uas ntim cov neeg dawb huv lub npe, uas twb yog cov ntawm lub ntuj xilethi-aus.
3 Yog li ntawd, nim no kuv xa dua ib tug Nplij Siab los rau nej, uas twb yog los rau nej uas yog kuv cov phooj ywg, kom nws yuav nyob hauv nej lub siab, uas twb yog tus Ntsuj Plig Dawb Huv ntawm kev cog lus; lwm tus Nplij Siab no twb yog tib tug uas kuv tau cog lus rau kuv cov thwj tim, ib yam li tau muab sau cia rau hauv Yauhas phau tim khawv.
4 Tus Nplij Siab no yog txoj kev cog lus uas kuv muab rau nej txog txoj sia nyob mus ib txhis, uas twb yog lub yeeb koob ntawm lub nceeg vaj xilethi-aus;
5 Lub yeeb koob uas yog los ntawm lub koom txoos ntawm tus Tub Hlob, uas yog Vajtswv lub, lub dawb huv tshaj txhua lub, los ntawm nws Leej Tub Yexus Khetos—
6 Tus uas nce mus puag saum ntuj, thiab nws kuj nqis qis tshaj txhua yam, nws thiaj li to taub txhua yam, kom nws yuav muaj peev xwm nyob hauv txhua yam thiab nyob thoob plaws txhua yam; yog txoj kev kaj ntawm kev tseeb;
7 Qhov tseeb no ci tuaj. Nov yog Khetos txoj kev kaj. Kuj ib yam li nws nyob hauv lub hnub, thiab yog txoj kev kaj ntawm lub hnub, thiab yog lub hwj chim uas tau tsim lub hnub ntawd.
8 Kuj ib yam li nws yog lub hli, thiab nws yog txoj kev kaj ntawm lub hli, thiab yog lub hwj chim uas tau tsim lub hli ntawd.
9 Kuj ib yam li nws yog txoj kev kaj ntawm cov hnub qub, thiab yog lub hwj chim uas tau tsim cov hnub qub ntawd;
10 Thiab lub ntiaj teb thiab, thiab lub hwj chim ntawd, uas twb yog lub ntiaj teb uas nej sawv saud.
11 Thiab yog txoj kev kaj uas ci tuaj, uas ua txoj kev kaj rau nej, twb yog los ntawm tus uas ua rau nej lub qhov muag pom kev, uas yog tib txoj kev kaj uas txhawb nej txoj kev to taub;
12 Yog txoj kev kaj uas ci ntawm Vajtswv xub ntiag tuaj mus puv nkaus lub qab ntuj dav dav—
13 Txoj kev kaj uas nyob hauv txhua yam, uas ua rau txhua yam muaj txoj sia, uas yog txoj kev cai uas kav txhua yam, uas twb yog lub hwj chim ntawm Vajtswv tus uas zaum saum nws lub rooj theej kiab, tus uas nyob hauv plawv ntawm txoj kev nyob mus ib txhis, tus uas nrog nraim txhua yam nyob.
14 Nim no, kuv hais tseeb rau nej tias, yog los ntawm txoj kev txhiv dim uas ua rau nej thiaj li muaj txoj kev sawv hauv qhov tuag rov qab los.
15 Thiab tus ntsuj plig thiab lub cev ua ke yog tus neeg.
16 Thiab txoj kev sawv hauv qhov tuag rov qab los yog txoj kev txhiv tus neeg dim.
17 Thiab txoj kev txhiv tus neeg dim yog los ntawm tus uas txhawb txhua tus txoj sia, tus uas nyob hauv nws nruab siab, tshaj tawm hais tias cov neeg pluag thiab cov neeg muaj siab mos siab muag hauv lub ntiaj teb yuav tau lub ntiaj teb ua lawv tug.
18 Yog li ntawd, yeej yuav tsum ua rau lub ntiaj teb hloov ua dawb huv ntawm txhua yam tsis ncaj ncees, kom yuav muab lub ntiaj teb npaj rau lub yeeb koob xilethi-aus;
19 Vim tom qab uas lub ntiaj teb ua txhua yam raws li lub hom phiaj uas tau tsim lub ntiaj teb no los, lub ntiaj teb yuav tau yeeb koob ntoo, uas twb yog nrog Vajtswv tus uas yog Leej Txiv lub yeeb haum;
20 Xwv kom cov uas muaj lub cev ntawm lub nceeg vaj xilethi-aus yuav nyob hauv lub ntiaj teb mus ib txhiab thiab ib txhis li; vim, rau lub hom phiaj no thiaj tau ua thiab tsim lub ntiaj teb no los, thiab vim yog lub hom phiaj no tus Tswv thiaj muab lawv hloov ua neeg dawb huv.
21 Thiab cov uas tsis tau hloov ua dawb huv los ntawm txoj kev cai uas kuv tau muab rau nej, uas twb yog Khetos txoj kev cai, yuav tsum txais lwm lub nceeg vaj ua lawv tug, uas twb yog lub nceeg vaj thawlethi-aus, los yog lub nceeg vaj thilethi-aus.
22 Vim tus uas tsis muaj peev xwm coj raws li txoj kev cai ntawm lub nceeg vaj xilethi-aus yuav tsis muaj peev xwm thev taus lub yeeb koob xilethi-aus.
23 Thiab tus uas tsis muaj peev xwm coj raws li txoj kev cai ntawm lub nceeg vaj thawlethi-aus yuav tsis muaj peev xwm thev taus lub yeeb koob thawlethi-aus.
24 Thiab tus uas tsis muaj peev xwm coj raws li txoj kev cai ntawm lub nceeg vaj thilethi-aus tsis muaj peev xwm thev taus lub yeeb koob thilethi-aus; yog li ntawd nws tsis tsim nyog tau ib lub nceeg vaj muaj yeeb koob. Yog li ntawd nws yuav tsum mus nyob rau ib lub nceeg vaj uas tsis yog ib lub nceeg vaj muaj yeeb koob.
25 Thiab ntxiv, kuv hais tseeb rau nej tias, lub ntiaj teb coj raws li txoj kev cai ntawm lub nceeg vaj xilethi-aus, vim lub ntiaj teb ua txhua yam raws li lub hom phiaj uas tau tsim lub ntiaj teb no, thiab tsis ua txhaum txoj kev cai—
26 Yog li ntawd, tus Tswv yuav muab lub ntiaj teb no hloov ua dawb huv; muaj tseeb tiag, txawm tias lub ntiaj teb yuav tuag los, lub ntiaj teb yuav rov qab ciaj sia dua, thiab yuav thev taus lub hwj chim uas ua rau lub ntiaj teb ciaj sia, thiab cov ncaj ncees yuav txais lub ntiaj teb ua lawv tug.
27 Vim txawm hais tias lawv tuag los, lawv kuj yuav rov qab sawv dua los, ib lub cev ntawm sab ntsuj plig.
28 Lawv cov uas muaj tus ntsuj plig xilethi-aus yuav tau txais tib lub cev uas yog lub cev ntawm sab nqaij daim tawv; nej yeej yuav tau txais nej lub cev, thiab nej lub yeeb koob yog lub yeeb koob uas txhawb nej lub cev kom muaj sia los.
29 Nej cov uas ib feem ntawm lub yeeb koob xilethi-aus txhawb nej kom muaj sia los thaum ntawd yuav tau txais lub yeeb koob ntawd, twb yuav txais tag nrho.
30 Thiab lawv cov uas ib feem ntawm lub yeeb koob thawlethi-aus txhawb lawv kom muaj sia los thaum ntawd yuav tau txais lub yeeb koob ntawd, twb yuav txais tag nrho.
31 Thiab lawv cov uas ib feem ntawm lub yeeb koob thilethi-aus txhawb lawv kom muaj sia los thaum ntawd kuj yuav tau txais lub yeeb koob ntawd, twb yuav txais tag nrho.
32 Thiab lawv cov uas tseem tshuav kuj yuav txhawb lawv kom muaj sia thiab; txawm li ntawd los, lawv yuav rov qab mus rau lawv qhov qub chaw, mus zoo siab rau qhov uas lawv txaus siab txais, vim yog lawv tsis txaus siab rau tej uas lawv muaj peev xwm txais.
33 Vim yuav pab tau dab tsi rau ib tug neeg yog hais tias muab ib lub txiaj ntsim rau nws, tiam sis nws tsis txais lub txiaj ntsim ntawd? Saib seb, nws tsis zoo siab rau qhov uas tau muab rau nws, thiab tsis zoo siab rau tus uas muab lub txiaj ntsim ntawd rau nws thiab.
34 Thiab ntxiv, kuv hais tseeb rau nej tias, tus uas kev cai kav ces kev cai kuj yuav tshwj nws cia thiab tib txoj kev cai ntawd yuav ua rau nws hloov ua zoo tag nrho thiab hloov ua dawb huv.
35 Tus uas rhuav kev cai, thiab tsis coj raws li kev cai, tiam sis nrhiav kev kom tsim ib txoj kev cai rau nws tus kheej, thiab xaiv ua kev txhaum, thiab ua tag nrho kev txhaum mus, tsis muaj peev xwm muab tus ntawd hloov ua dawb huv los ntawm kev cai, los yog ntawm kev hlub tshua, kev txim lij, los yog kev txiav txim. Yog li ntawd, lawv yeej tseem vuab tsuab li qub.
36 Vajtswv muab ib txoj kev cai rau txhua lub nceeg vaj;
37 Thiab muaj ntau lub nceeg vaj; vim tsis muaj ib qho chaw twg uas tsis muaj ib lub nceeg vaj; thiab tsis muaj ib lub nceeg vaj twg uas tsis muaj ib qho chaw, txawm yog ib lub nceeg vaj uas siab dua los yog qis dua.
38 Thiab Vajtswv muab ib txoj kev cai rau txhua lub nceeg vaj; thiab rau txhua txoj kev cai kuj muaj tej yam uas txwv tsis pub ua thiab tej yam uas yuav tsum ua.
39 Txhua tus neeg uas tsis coj raws li tej yam yuav tsum ua ntawd yeej ua tsis taus neeg uas tsis muaj txim.
40 Vim kev txawj kev ntse npuab rau kev txawj kev ntse; tswv yim txais tswv yim; kev tseeb yeej nrog kev tseeb; kev tsim txiaj nyiam kev tsim txiaj; qhov kaj npuab rau qhov kaj; kev hlub tshua muaj kev khuv leej rau kev hlub tshua thiab txais cov uas muaj kev hlub tshua; kev txim lij taug txoj kev mus ntxiv thiab txais cov uas muaj kev txim lij; kev txiav txim mus rau tus uas zaum saum lub rooj theej kiab thiab kav thiab txiav txim rau txhua yam.
41 Nws to taub txhua yam, thiab muaj txhua yam rau ntawm nws xub ntiag, thiab txhua yam nyob ib puag ncig nws; thiab nws kav txhua yam, thiab nyob hauv txhua yam, thiab nyob thoob plaws txhua yam, thiab nyob ib puag ncig txhua yam; thiab txhua yam yog los ntawm nws los, thiab nyob ntawm nws, uas twb yog Vajtswv, mus ib txhiab thiab ib txhis li.
42 Thiab ntxiv, kuv hais tseeb rau nej tias, nws tau muab ib txoj kev cai rau txhua yam, es los ntawm txoj kev cai no txhua yam nyias ncig mus ncig los raws li nyias lub sij hawm thiab lub caij;
43 Thiab twb tsim tej kev khiav rau txhua yam no, uas yog tej kev khiav rau lub ntuj thiab lub ntiaj teb, tsis hais lub ntiaj teb no thiab tag nrho tej ntiaj teb los yog.
44 Thiab txhua yam no ib lub ci rau ib lub raws li nyias lub sij hawm thiab nyias lub caij, raws li nyias feeb, raws li nyias teev, raws li nyias hnub, raws li nyias lim tiam, raws li nyias hli, raws li nyias xyoo—tag nrho tej no yog ib xyoo rau Vajtswv, tiam sis tsis yog rau neeg.
45 Lub ntiaj teb siv ob sab tis ncig mus, thiab lub hnub ci kaj lug thaum nruab hnub, thiab lub hli ci kaj lug thaum hmo ntuj, thiab cov hnub qub kuj ci kaj lug thiab, thaum siv tej tis ncig mus nrog lub yeeb koob, vij voog los ntawm Vajtswv lub hwj chim.
46 Kuv yuav muab tej nceeg vaj no piv rau dab tsi, kom nej thiaj yuav to taub?
47 Saib seb, tag nrho tej no yog tej nceeg vaj, thiab tus neeg twg uas tau pom ib lub los yog lub me tshaj plaws ntawm tej no ces twb tau pom Vajtswv txav nyob hauv nws lub yeeb haum thiab lub hwj chim.
48 Kuv hais rau nej tias, tus ntawd twb pom nws lawm; txawm li ntawd los, tus uas los rau nws cov neeg lawv twb tsis txais yuav nws.
49 Txoj kev kaj ci nyob rau hauv qhov tsaus ntuj, tiam sis qhov tsaus ntuj tsis to taub txoj kev kaj; txawm li ntawd los, yuav muaj ib hnub nej yuav to taub Vajtswv, vim los ntawm nws thiab los ntawm nws txoj cai, nws txhawb nej txoj sia.
50 Thaum ntawd nej yuav paub hais tias nej tau pom kuv lawm, paub tias muaj kuv, thiab paub tias kuv yog txoj kev kaj tseeb uas nyob hauv nej, thiab paub tias nej twb nyob hauv kuv; yog tsis li ces nej yuav vam meej tsis taus.
51 Saib seb, kuv yuav muab tej nceeg vaj no piv rau ib tug txiv neej muaj ib thaj teb, thiab nws xa nws cov tub qhe mus lawm tom thaj teb mus khawb thaj teb.
52 Thiab nws hais rau tus thib ib tias: Koj cia li mus thiab ua hauj lwm tom thaj teb, thiab thaum teev thib ib kuv mam tuaj xyuas koj, thiab koj yuav pom txoj kev xyiv fab ntawm kuv lub ntsej muag.
53 Thiab nws hais rau tus thib ob tias: Koj cia li mus lawm tom thaj teb thiab, thiab thaum teev thib ob kuv mam tuaj xyuas koj nrog txoj kev xyiv fab ntawm kuv lub ntsej muag.
54 Thiaj kuj hais rau tus thib peb thiab, hais tias: Kuv mam tuaj xyuas koj;
55 Thiab rau tus thib plaub, thiab mus ntxiv kom txog tus thib kaum ob.
56 Thiab tus tswv ntawm thaj teb tau mus xyuas tus thib ib thaum teev thib ib, thiab nrog nws nyob tag nrho teev ntawd, thiab ua rau nws zoo siab los ntawm qhov kaj ntawm nws tus tswv lub ntsej muag.
57 Thiab tom qab ntawd nws tau ncaim ntawm tus thib ib lawm kom nws thiaj tau mus xyuas tus thib ob thiab, thiab tus thib peb, thiab tus thib plaub, thiab mus ntxiv kom txog tus thib kaum ob.
58 Thiab lawv tag nrho tau txais qhov kaj ntawm lawv tus tswv lub ntsej muag zoo li no, txhua tus neeg nyias raws li nyias teev, thiab raws li nyias lub sij hawm, thiab raws li nyias lub caij—
59 Pib ntawm thawj tug, thiab mus ntxiv kom txog tus kawg, thiab ntawm tus kawg mus rau thawj tug, thiab ntawm thawj tug mus rau tus kawg;
60 Txhua tus neeg nyias raws li nyias thib, kom txog thaum nws teev sij hawm tag tso, raws nraim li nws tus tswv tau txib nws, kom nws tus tswv yuav tau yeeb koob los ntawm nws, thiab nws los ntawm nws tus tswv, kom lawv sawv daws yuav tau yeeb koob.
61 Yog li ntawd, kuv yuav muab tag nrho tej nceeg vaj no piv rau zaj lus piv txwv no, thiab tej neeg nyob rau hauv—txhua lub nceeg vaj raws li nws teev, thiab raws li nws lub sij hawm, thiab raws li nws lub caij, raws nraim li qhov uas Vajtswv tau tshaj tawm.
62 Thiab ntxiv, kuv hais tseeb rau nej, kuv cov phooj ywg, kuv tseg tej lus no cia rau nej xav txog nyob hauv nej lub siab, nrog lo lus txib no uas kuv muab rau nej, hais tias nej yuav tsum thov kuv thaum kuv tseem nyob ze—
63 Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav ntsib kuv; thov, ces nej yuav tau txais; khob, ces yuav qhib rau nej.
64 Txhua yam uas nej tuav kuv lub npe thov ntawm Leej Txiv ces yuav muab yam ntawd rau nej, txhua yam uas tsim nyog rau nej;
65 Thiab yog hais tias nej thov yam twg uas tsis tsim nyog rau nej, ces yam ntawd yuav tig los mus ua nej txoj kev raug txim.
66 Saib seb, qhov uas nej hnov yog zoo li lub suab ntawm ib tug neeg hais nrov nrov tom hav zoov tuaj—nyob tom hav zoov, vim nej tsis pom nws—kuv lub suab, vim kuv lub suab yog Ntsuj Plig, kuv tus Ntsuj Plig yog kev tseeb; kev tseeb nyob mus li thiab tsis muaj qhov kawg; thiab yog hais tias muaj kev tseeb nyob hauv nej ces yuav muaj kev tseeb nplua mias.
67 Thiab yog hais tias nej lub qhov muag tsuas ntsia ntsoov rau kuv lub yeeb koob xwb, tag nrho nej lub cev yuav kaj nrig, thiab yuav tsis muaj qhov tsaus ntuj nyob hauv nej; thiab lub cev uas kaj nrig ntawd to taub txhua yam.
68 Yog li ntawd, hloov nej tus kheej ua dawb huv kom nej lub siab tsuas ntsia ntsoov Vajtswv xwb, thiab lub sij hawm yuav los thaum nej yuav pom nws; vim nws yuav tshwm nws lub ntsej muag los rau nej, thiab qhov no yuav muaj raws li lub sij hawm nws pom zoo, thiab raws li txoj kev nws pom zoo, thiab raws li nws lub siab nyiam.
69 Nco ntsoov kev cog lus tseem ceeb thiab kawg uas kuv tau cog rau nej; muab nej tej kev xav tsis muaj nuj nqis thiab nej tej kev luag ntau ntau tso tseg kom deb ntawm nej.
70 Nej cia li nyob, nej cia li nyob ntawm qhov chaw no, thiab hu ib lub rooj txoos ua kev cai, hu cov uas yog thawj cov neeg ua hauj lwm rau hauv lub nceeg vaj kawg no.
71 Thiab kom cov uas lawv tau ceeb toom thaum lawv taug kev mus cia li thov tus Tswv, thiab muab lawv lub siab xav rau txoj kev ceeb toom uas lawv tau txais, rau ib nyuag ntus tso.
72 Saib seb, thiab xyuas seb, kuv yuav saib xyuas nej tej pab yaj, thiab yuav tsa cov txwj laug thiab xa mus rau lawv.
73 Saib seb, kuv yuav khiav kuv txoj hauj lwm nrawm nroos raws li lub sij hawm tsim nyog.
74 Thiab kuv muab ib lo lus txib rau nej, cov uas yog thawj cov neeg ua hauj lwm rau hauv lub nceeg vaj kawg no, kom nej mus txoos nej tus kheej ua ke, thiab kho nej tus kheej, thiab npaj nej tus kheej, thiab hloov nej tus kheej ua dawb huv; muaj tseeb tiag, hloov nej lub siab kom huv, thiab ntxuav nej txhais tes thiab nej txhais ko taw rau kuv pom, kom kuv yuav ua rau nej huv;
75 Kom kuv yuav ua tim khawv rau nej Txiv, thiab nej tus Vajtswv, thiab kuv tus Vajtswv, hais tias nej twb huv ntawm tiam neeg phem no cov ntshav; kom kuv yuav ua tau raws li txoj kev cog lus no, txoj kev cog lus tseem ceeb thiab kawg no, uas kuv tau cog rau nej, thaum kuv pom zoo ua.
76 Thiab, kuv muab ib lo lus txib rau nej tias nej yuav tsum thov Vajtswv thiab ua kev cai yoo mov mus ntxiv txij lub sij hawm no mus.
77 Thiab kuv muab ib lo lus txib rau nej tias nej ib leeg yuav tsum qhia ib leeg txog txoj lus qhuab qhia ntawm lub nceeg vaj.
78 Nej cia li rau siab ntso qhia thiab kuv lub hwj chim yuav nrog nej nyob, kom yuav qhia nej zoo dua txog tej ntsiab lus, txog tej ntsiab cai, txog tej lus qhuab qhia, txog tej kev cai ntawm txoj moo zoo, txog txhua yam ntsig txog Vajtswv lub nceeg vaj, uas nej yuav tsum to taub;
79 Txog tag nrho tej yam nyob saum ntuj thiab nyob hauv lub ntiaj teb, thiab hauv qab lub ntiaj teb; tej yam uas tau muaj lawm, tej yam uas muaj ziag no, tej yam uas tsis ntev no yuav tsum muaj los; tej yam uas muaj nyob ntawm nej lub teb chaws, tej yam uas muaj nyob lwm lub teb chaws; tej kev ua rog thiab tej kev cov nyom ntawm tej teb chaws, thiab tej kev txiav txim uas nyob rau hauv thaj av; thiab ib txoj kev paub txog tej teb chaws thiab tej nceeg vaj—
80 Kom nej yuav npaj rau txhua yam thaum kuv yuav xa nej rov qab mus rau siab ua txoj hauj lwm uas kuv tau hu nej, thiab ntiag tug hauj lwm uas kuv tau tso cai rau nej ua.
81 Saib seb, kuv xa nej tawm mus ua tim khawv thiab ceeb toom cov neeg, thiab txhua tus neeg uas txais kev ceeb toom lawm yuav tsum mus ceeb toom nws tus neeg zej zog.
82 Yog li ntawd, lawv liam tsis tau leej twg, thiab lawv tej kev txhaum yuav nyob saum lawv tus kheej lub taub hau.
83 Tus uas nrhiav kuv ntxov yuav pom kuv, thiab yuav tsis raug muab tso tseg.
84 Yog li ntawd, nej cia li nyob, thiab rau siab ntso ua hauj lwm, kom nej yuav ua tau zoo tag nrho thaum ua nej txoj kev qhuab qhia mus rau Lwm Haiv Neeg rau zaum kawg, tag nrho cov uas tus Tswv lub qhov ncauj yuav hais npe, mus muab txoj kev cai khi thiab muab zaj lus tim khawv zwm cia, thiab mus npaj haiv neeg ntseeg rau lub sij hawm txiav txim uas yuav los;
85 Kom lawv tus ntsuj plig yuav dim tau Vajtswv txoj kev npau taws, txoj kev puas ntsoog ntawm txoj kev qias uas tos cov neeg phem, nyob hauv lub neej no thiab hauv lub neej yuav los tib si. Kuv hais tseeb rau nej tias, cia cov uas tsis yog thawj cov txwj laug ua hauj lwm mus ntxiv nyob hauv lub vaj txiv hmab kom txog thaum tus Tswv lub qhov ncauj hu lawv tso, vim tsis tau txog lawv lub sij hawm; lawv tej tsoos tsho tsis huv ntawm tiam neeg no cov ntshav.
86 Nej cia li nyob raws li txoj kev ywj pheej uas ua rau nej dim; tsis txhob rig nej tus kheej rau tej kev txhaum, tiam sis cia nej txhais tes huv si, kom txog thaum tus Tswv los.
87 Vim tsis ntau hnub txij no mus thiab lub ntiaj teb yuav tshee hnyo thiab yuav dov mus dov los zoo li tus neeg qaug cawv; thiab lub hnub yuav nraim nws lub ntsej muag, thiab yuav tsis kam ci; thiab lub hli yuav liab li ntshav; thiab tej hnub qub yuav chim siab heev, thiab yuav muab lawv tus kheej zeeg poob los zoo li lub txiv cev uas zeeg saum tus ntoo cev los.
88 Thiab tom qab nej tej lus tim khawv ces txoj kev npau taws thiab kev chim siab yuav los rau cov neeg.
89 Vim tom qab nej tej lus tim khawv ces tej lus tim khawv ntawm tej av qeeg yuav los, uas yuav ua kom lub ntiaj teb muaj tej suab nroo, thiab neeg yuav vau rau hauv av thiab yuav sawv tsis taus.
90 Thiab kuj yuav muaj tej lus tim khawv los ntawm lub suab ntawm xob quaj, thiab lub suab ntawm xob laim, thiab lub suab ntawm tej cua daj cua dub, thiab lub suab ntawm tej nphwv dej hiav txwv uas ntas mus deb tshaj li txhua zaus.
91 Thiab txhua yam yuav ntxhov hnyo; thiab muaj tseeb, neeg lub siab yuav poob tag; vim txoj kev ntshai yuav los rau txhua tus neeg.
92 Thiab cov tim tswv yuav ya saum nruab ntug, hu ib lub suab nrov nrov, tshuab Vajtswv lub raj, hais tias: Nej cia li npaj, nej cia li npaj, auj neeg ntiaj teb; vim peb tus Vajtswv txoj kev txiav txim twb los lawm. Saib seb, thiab xyuas seb, tus Nraug Vauv yuav los; nej cia li tawm mus tos nws.
93 Thiab tam sim ntawd yuav muaj ib lub cim tseem ceeb tshwm nyob saum ntuj, thiab tag nrho cov neeg yuav ua ke pom lub cim ntawd.
94 Thiab muaj dua ib tug tim tswv yuav tshuab nws lub raj hlau, hais tias: Lub koom txoos muaj zog ntawd, uas yog leej niam ntawm tej kev qias, tus uas tau ua kom txhua haiv neeg haus cov cawv txiv hmab npau taws ntawm nws txoj kev deev nkauj nraug, tus uas tsim txom Vajtswv haiv neeg ntseeg, tus uas ua rau lawv ntshav nrog—tus uas zaum saum cov dej hiav txwv ntau, thiab rau saum tej koog pov txwv hauv dej hiav txwv—saib seb, nws yog cov txhauv ntawm lub ntiaj teb; nws raug muab khi ua tej twb teg; tej hlua khi nws ruaj khov, tsis muaj ib tug neeg twg yuav muab tej hlua daws tau; yog li ntawd, nws twb zoo muab hlawv lawm. Thiab tus tim tswv yuav tshuab nws lub raj hlau kom ntev thiab nrov, thiab txhua haiv neeg yuav hnov.
95 Thiab yuav muaj kev ntsiag to nyob saum ntuj ntev li ib nrab ntawm ib teev; thiab tom qab kiag ntawd ces daim ntaub thaiv rooj ntug yuav qhib, ib yam li ib kauv ntawv raug muab nthuav tawm tom qab muab kauv, ces yuav pom tus Tswv lub ntsej muag;
96 Thiab haiv neeg ntseeg uas nyob hauv lub ntiaj teb, cov tseem ciaj, tus Tswv yuav txhawb lawv txoj sia thiab yuav coj lawv mus cuag nws.
97 Thiab cov uas tau pw hauv lawv qhov ntxa yuav sawv los, vim lawv qhov ntxa yuav qhib; thiab tus Tswv kuj yuav coj lawv mus cuag nws nyob saum nruab ntug—
98 Lawv yog Khetos li, cov txiv txi thawj tom, cov uas yuav nrog nws xub nqis los, thiab cov uas nyob hauv lub ntiaj teb thiab nyob hauv lawv qhov ntxa, cov uas tus Tswv xub coj mus cuag nws; thiab tag nrho tej no yog los ntawm lub suab tshuab raj hlau ntawm Vajtswv tus tim tswv.
99 Thiab tom qab muaj li no yuav muaj dua ib tug tim tswv tshuab raj, uas yog lub raj hlau thib ob; thiab tom qab ntawd ces yuav muaj txoj kev txhiv dim rau cov uas yog Khetos li thaum nws los; cov uas tau txais lawv feem nyob hauv lub tsev kaw uas tau npaj rau lawv, kom lawv yuav tau txais txoj moo zoo, thiab raug txiav txim raws li cov neeg thaum muaj cev nqaij daim tawv nyob.
100 Thiab ntxiv, ib lub raj hlau ntxiv yuav nrov, uas yog lub raj hlau thib peb; ces tom qab ntawd neeg cov ntsuj plig uas yuav los mus raug txiav txim, thiab uas pom tias yuav raug txim mam los;
101 Thiab cov no yog tag nrho lwm cov ntawm cov tuag; thiab lawv yuav tsis muaj sia nyob dua kom txog thaum ib txhiab xyoo xaus tso, thiab tsis muaj sia nyob dua, kom txog thaum lub ntiaj teb kawg tso.
102 Thiab ib lub raj hlau ntxiv yuav nrov, uas yog lub raj hlau thib plaub, hais tias: Nrog cov uas yuav nyob twj ywm kom txog hnub tseem ceeb thiab hnub kawg ntawd, uas yog qhov kawg, muaj cov uas tseem yuav vuab tsuab li qub.
103 Thiab ib lub raj hlau ntxiv yuav nrov, uas yog lub raj hlau thib tsib, uas yog tus tim tswv thib tsib uas coj txoj moo zoo uas kav ib txhis—ya saum nruab ntug, coj los rau txhua haiv neeg, txhua xeem neeg, txhua yam lus, thiab txhua yam neeg;
104 Thiab nov yog lub suab ntawm nws lub raj hlau, hais rau txhua tus neeg, tag nrho saum ntuj thiab hauv ntiaj teb, thiab cov uas hauv qab lub ntiaj teb—vim txhua lub pob ntseg yuav hnov lub suab ntawd, thiab txhua lub hauv caug yuav qhau pe, thiab txhua tus nplaig yuav lees, thaum lawv hnov lub suab raj hlau, hais tias: Cia li hwm Vajtswv, thiab cia li qhuas tus uas zaum saum lub rooj theej kiab, mus ib txhiab thiab ib txhis li; vim lub sij hawm ntawm nws txoj kev txiav txim twb los lawm.
105 Thiab ntxiv, muaj dua ib tug tim tswv yuav tshuab nws lub raj hlau, uas yog tus tim tswv thib rau, hais tias: Nws twb vau lawm tus poj niam uas tau ua kom txhua haiv neeg haus cov cawv txiv hmab npau taws ntawm nws txoj kev deev nkauj nraug; nws twb vau lawm, twb vau lawm!
106 Thiab ntxiv, muaj dua ib tug tim tswv yuav tshuab nws lub raj hlau, uas yog tus tim tswv thib xya, hais tias: Twb tiav lawm, twb tiav lawm! Vajtswv tus Me Nyuam Yaj tau kov yeej thiab tau tsuj lub rhawv tsuam txiv hmab nws ib leeg, uas twb yog lub rhawv tsuam txiv hmab ntawm txoj kev tshawj chim ntawm tus Vajtswv uas Muaj Hwj Chim Tag Nrho txoj kev npau taws.
107 Ces tom qab ntawd cov tim tswv yuav tau lub yeeb koob ntawm nws lub hwj chim ntoo, thiab haiv neeg ntseeg yuav muaj nws lub yeeb koob puv npo, thiab txais lawv qub txeeg qub teg thiab tus Me Nyuam Yaj yuav muab lawv ua kom sib txig nrog nws.
108 Ces tom qab ntawd thawj tug tim tswv yuav rov qab tshuab nws lub raj hlau rau tag nrho cov neeg ua ciaj sia lub pob ntseg, thiab muab tej yam uas neeg ua ntsiag to tshwm sim los, thiab Vajtswv tej hauj lwm tseem ceeb nyob hauv thawj ib txhiab xyoo ua kom tshwm sim.
109 Ces tom qab ntawd tus tim tswv thib ob yuav tshuab nws lub raj hlau, thiab muab tej yam uas neeg ua ntsiag to ua kom tshwm sim, thiab tej kev xav thiab tej lub hom phiaj ntawm lawv lub siab, thiab Vajtswv tej hauj lwm loj nyob hauv ib txhiab xyoo thib ob—
110 Thiab mus zoo li ntawd, kom txog thaum tus tim tswv thib xya tshuab nws lub raj hlau; thiab nws yuav sawv rau hauv thaj av thiab saum tus dej hiav txwv, thiab cog lus los ntawm tus uas zaum saum lub rooj theej kiab lub npe, hais tias yuav tsis muaj sij hawm ntxiv lawm, thiab Dab Ntxwg Nyoog yuav raug khi, tus niag nab txwj nab laug, uas hu ua niag dab phem, thiab nyob ib txhiab xyoo yuav tsis muab nws tso.
111 Ces tom qab ntawd yuav muab nws tso los ib nyuag ntus, kom nws yuav muab nws pab tub rog sau los ua ke.
112 Thiab Mikhayees, tus tim tswv thib xya, uas twb yog tus thawj tim tswv, yuav sib sau nws pab tub rog los ua ke, uas twb yog ib tsoom neeg saum ntuj.
113 Thiab tus dab phem yuav muab nws pab tub rog sau los ua ke; uas twb yog ib tsoom tub rog ntawm ntuj txiag teb tsaus, thiab yuav tawm los mus ua rog tawm tsam Mikhayees thiab nws pab tub rog.
114 Ces tom qab ntawd tus Vajtswv uas muaj hwj chim npluav rog yuav los; thiab tus dab phem thiab nws pab tub rog yuav raug ntiab mus rau hauv lawv tus kheej qhov chaw, kom lawv yuav tsis muaj hwj chim ntxias haiv neeg ntseeg ib qho ntxiv hlo li lawm.
115 Vim Mikhayees yuav ntaus lawv npluav rog, thiab yuav kov yeej tus uas pheej xav tau lub rooj theej kiab ntawm tus uas zaum saum lub rooj theej kiab, uas twb yog tus Me Nyuam Yaj.
116 Qhov no yog Vajtswv lub yeeb koob, thiab cov uas dawb huv; thiab lawv yuav tsis pom txoj kev tuag ntxiv.
117 Yog li ntawd, kuv hais tseeb rau nej, kuv cov phooj ywg, cia li hu nej lub rooj txoos ua kev cai, raws li kuv tau txib nej.
118 Thiab vim tsis yog txhua tus muaj kev ntseeg, nej cia li rau siab nrhiav thiab ib leeg cia li qhia tej lus tswv yim rau ib leeg; muaj tseeb tiag, nej cia li nrhiav tej lus tswv yim hauv tej phau ntawv zoo tshaj plaws; nrhiav kev kawm, twb yog los ntawm kev kawm ntawv thiab los ntawm kev ntseeg.
119 Kho nej tus kheej; npaj txhua yam uas yuav tsum muaj; thiab tsa ib lub tsev, uas twb yog ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj kev kawm, ib lub tsev muaj yeeb koob, ib lub tsev muaj chaw txawb chaw rau, ib lub tsev rau Vajtswv;
120 Kom nej txoj kev mus hauv yuav yog los ntawm tus Tswv lub npe; kom nej txoj kev tawm mus yuav yog los ntawm tus Tswv lub npe; kom tag nrho nej tej kev sib hu tos txais yuav yog los ntawm tus Tswv lub npe, nrog kev tsa tes mus rau tus Siab Tshaj Plaws.
121 Yog li ntawd, cia li tsum ntawm tag nrho nej tej kev sib tham tsis muaj nuj nqis, ntawm tag nrho tej kev luag nrov nrov, ntawm tag nrho tej kev ntshaw nej lub siab xav tau, ntawm tag nrho nej tej kev muab hlob thiab kev dag ntsuav, thiab ntawm tag nrho nej tej kev ua phem.
122 Tsa ib tug xib hwb qhia nyob hauv nej, thiab tsis txhob pub sawv daws hais lus tib lub sij hawm; tiam sis cia ib tug hais lus tag tso ib tug mam hais thiab cia sawv daws mloog tej lus nws hais, kom thaum txhua tus tau hais lus tas lawm sawv daws ib leeg yuav txhawb zog ib leeg, thiab xwv kom txhua tus neeg yuav muaj lub cib fim sib npaug.
123 Cia li xyuas kom nej ib leeg hlub ib leeg; tseg txoj kev ntshaw luag tug; cia li kawm kom ib leeg pub rau ib leeg raws li txoj moo zoo qhia tias yus yuav tsum ua.
124 Cia li tso kev tub nkeeg tseg; tso kev tsis huv tseg; tso kev ib leeg liam ib leeg tseg; tso kev pw ntev tshaj li tsim nyog tseg; cia li mus pw ntxov, kom nej thiaj tsis nkees; cia li sawv ntxov, kom nej lub cev thiab lub siab yuav muaj dag zog.
125 Thiab tshaj txhua yam, nej cia li muab txoj kev sib khi ua ke uas yog kev siab hlub los hnav, ib yam li hnav lub tsho ntev, uas yog txoj kev sib khi ua ke ntawm kev ua zoo tag nrho thiab kev kaj siab.
126 Cia li thov Vajtswv tas mus li, kom nej thiaj tsis qaug zog, kom txog thaum kuv los. Saib seb, thiab xyuas seb, kuv yuav los sai sai no, thiab coj nej mus nrog kuv nyob. Amees.
127 Thiab ntxiv, tus txheej txheem ntawm lub tsev uas npaj rau pawg thawj tswj hwm ntawm cov yaj saub lub koom haum kawm, tau tsa los rau lawv txoj kev qhia txhua yam uas tsim nyog rau lawv, uas twb yog rau tag nrho cov thawj coj ntawm lub koom txoos, los yog hais tias, cov uas tus Tswv hu los mus ua hauj lwm qhuab qhia nyob hauv lub koom txoos, pib ntawm cov pov thawj hlob, los mus txog rau cov diskas—
128 Thiab qhov no yuav yog tus txheej txheem ntawm lub tsev ntawm kev kawm ntawv pawg thawj tswj hwm: Tus uas yuav muab tsa los ua tus thawj tswj hwm, los yog xib hwb, yuav tsum kom sawv hauv nws qhov chaw, nyob hauv lub tsev uas yuav npaj rau nws.
129 Yog li ntawd, nws yuav yog thawj tug nyob hauv Vajtswv lub tsev, nyob hauv qhov chaw uas pawg neeg nyob hauv lub tsev yuav hnov nws tej lus zoo thiab meej, tsis yog hais lus nrov nrov.
130 Thiab thaum nws tuaj hauv Vajtswv lub tsev, vim nws yuav tsum yog thawj tug tuaj hauv lub tsev—saib seb, qhov no zoo nkauj, kom nws yuav ua ib tug yam ntxwv—
131 Cia nws txhos caug thov Vajtswv muab nws tus kheej pub rau Vajtswv, ua lub cim los yog kev nco txog txoj kev khi lus uas kav ib txhis.
132 Thiab thaum muaj tus lawv nws qab nkag tuaj rau hauv, kom tus xib hwb sawv ntsug, thiab, nrog kev tsa tes rau saum ntuj, muaj tseeb tiag, uas ncaj nraim rau saud, hu nws tus kwv tij los yog cov kwv tij nrog cov lus no:
133 Koj puas yog ib tug kwv tij los yog cov kwv tij? Kuv hu tos txais koj los ntawm tus Tswv Yexus Khetos lub npe, ua lub cim los yog kev nco txog ntawm txoj kev khi lus uas kav ib txhis, nyob hauv txoj kev khi lus kuv txais koj los ua ib tug mej zeej, nrog txoj kev txiav txim siab ruaj khov, tsis txav, thiab tsis hloov, los ua koj tus phooj ywg thiab kwv tij los ntawm Vajtswv txoj kev tshav ntuj nyob hauv txoj kev sib hlub, kom taug kev raws li tag nrho Vajtswv tej lus txib tsis muaj txim, nrog kev ua tsaug, mus ib txhiab thiab ib txhis li. Amees.
134 Thiab tus uas lawv pom tias nws tsis tsim nyog tau txoj kev hu tos txais no yuav tsis muaj chaw nyob hauv nej; vim nej yuav tsis cia nws ua kom kuv lub tsev paug.
135 Thiab tus uas nkag los thiab rau siab ntseeg rau kuv pom, thiab yog ib tug kwv tij, los sis lawv yog cov kwv tij, lawv yuav tsum hu tos txais tus thawj tswj hwm los yog xib hwb nrog tsa tes mus saum ntuj, nrog rau tib txoj kev thov Vajtswv thiab kev khi lus no, los sis los ntawm qhov hais, Amees, ua lub cim rau tib qho ntawd.
136 Saib seb, kuv hais tseeb rau nej tias, qhov no yog ib qho piv txwv rau nej txog ntawm kev ib leeg hu ib leeg nyob hauv Vajtswv lub tsev, nyob hauv cov yaj saub lub koom haum kawm.
137 Thiab tus Tswv hu nej kom ua li no los ntawm kev thov Vajtswv thiab kev ua tsaug, raws li tus Ntsuj Plig yuav qhia txog txhua yam nej ua nyob hauv tus Tswv lub tsev, nyob hauv cov yaj saub lub koom haum kawm, kom tus Tswv lub tsev yuav hloov los ua ib qho chaw dawb huv, ua ib lub tuam tsev rau tus Ntsuj Plig Dawb Huv kom yuav txhawb nqa nej.
138 Thiab nej yuav tsum txhob txais ib tug twg nyob hauv nej tuaj mus rau hauv lub koom haum kawm no tsuas yog nws twb huv ntawm tiam neeg no cov ntshav lawm xwb;
139 Thiab yuav txais nws los ntawm txoj kab ke ntxuav ko taw, vim twb yog rau lub hom phiaj no thiaj tau muaj txoj kab ke ntxuav ko taw.
140 Thiab ntxiv, txoj kab ke ntxuav ko taw yuav tsum yog tus thawj tswj hwm ua, los sis tus txwj laug uas tswj hwm ntawm lub koom txoos.
141 Yuav tsum pib ua li no nrog txoj kev thov Vajtswv; thiab tom qab txais mov mog noj thiab cawv txiv hmab haus, nws yuav tsum sia ntaub raws li tus yam ntxwv muab nyob hauv tshooj kaum peb ntawm Yauhas zaj lus tim khawv ntsig txog kuv. Amees.