Tshooj 9
Kev tshwm sim uas tus Yaj Saub Joseph Smith tau txais kom qhia Oliver Cowdery, nyob hauv Harmony, Pennsylvania, lub Plaub Hlis Ntuj xyoo 1829. Tus Tswv qhuab ntuas Oliver kom ua siab ntev thiab yaum nws kom nws txaus siab sau tej uas tus txhais lus hais tawm los, rau lub sij hawm no, es kom tsis txhob sim txhais.
1–6, Tshuav lwm cov ceev xwm txheej puag thaum ub tseem yuav muab txhais; 7–14, Yuav muab Phau Ntawv Maumoos txhais los ntawm kev kawm thiab kev pom zoo ntawm sab ntsuj plig.
1 Saib seb, kuv hais rau koj, kuv tus tub, hais tias vim koj tsis tau txhais raws li qhov uas koj thov kuv, thiab tau pib sau dua rau kuv tus tub qhe Joseph Smith, tus Hluas, twb yog li ntawd kuv thiaj xav kom neb ua ntxiv mus kom txog thaum neb ua tag cov ceev xwm txheej no, uas kuv tau tso siab muab rau nws.
2 Thiab tom qab ntawd, saib seb, kuv muaj lwm cov ceev xwm txheej, uas kuv yuav muab hwj chim rau koj xwv kom koj tau pab txhais.
3 Ua siab ntev, kuv tus tub, vim yog kuv lub tswv yim, thiab tsis tsim nyog kom koj yuav tsum txhais lub sij hawm no.
4 Saib seb, txoj hauj lwm uas tus Tswv hu koj los ua yog los sau rau kuv tus tub qhe Joseph.
5 Thiab, saib seb, twb yog vim hais tias koj tsis ua mus ntxiv kom zoo li thaum koj tau pib, thaum koj pib txhais lus, kuv thiaj tau tshem lub cib fim no tawm ntawm koj mus lawm.
6 Tsis txhob yws yws, kuv tus tub, vim yog kuv lub tswv yim uas kuv thiaj tau ua zoo li no rau koj.
7 Saib seb, koj twb tsis to taub; koj tau xav hais tias kuv yuav cia li muab rau koj, txawm hais tias koj twb tsis tau xav txog tsuas yog koj los thov kuv xwb.
8 Tiam sis, saib seb, kuv hais rau koj tias, koj yuav tsum xav zoo zoo nyob hauv koj lub siab; tom qab ntawd koj yuav tsum thov kuv saib puas yog, thiab yog hais tias yeej yog ces kuv yuav ua kom koj lub siab kub lug tuaj; yog li ntawd, koj yuav paub hais tias qhov koj xav yeej yog.
9 Tiam sis yog hais tias tsis yog ces koj yuav tsis muaj tej kev xav zoo li ntawd, tiam sis koj yuav muaj kev xav tsis tawm uas yuav ua rau koj hnov qab qhov uas tsis yog ntawd; yog li ntawd, koj tsis muaj peev xwm sau tej uas dawb ceev tsuas yog kuv muab tej ntawd rau koj xwb.
10 Nim no, yog hais tias koj tau paub li no ces tej zaum koj twb txhais tau lawm; txawm li ntawd los, twb tsis tsim nyog rau koj txhais lub sij hawm no.
11 Saib seb, twb tsim nyog thaum koj pib; tiam sis koj tau ntshai, thiab lub sij hawm tau dhau lawm, thiab twb tsis tsim nyog thaum lub sij hawm no.
12 Vim, koj tsis pom tias kuv twb muab lub zog txaus rau kuv tus tub qhe Joseph, kom li no qhov ntawd txawm peem tuaj? Thiab kuv twb tsis rau txim rau neb ob leeg.
13 Ua qhov uas kuv tau txib koj no, ces koj yuav vam meej. Rau siab ntseeg, thiab txhob ywj rau tej kev ntxias.
14 Nyob ruaj nrees ua txoj hauj lwm uas kuv tau hu koj los ua, ces koj ib txoj plaub hau los yeej yuav tsis ploj, thiab yuav muab koj tsa sawv thaum txog hnub kawg. Amees.