Tshooj 90
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Peb Hlis Ntuj hnub tim 8, xyoo 1833. Txoj kev tshwm sim no yog ib theem mus ntxiv ntsig txog txoj kev tsa Thawj Pawg Thawj Tswj Hwm (saib cov lus piav lub ntsiab txog tshooj 81); vim yog li ntawd, thiaj tau tsa ob tug pab cuam uas tau hais lawm thaum lub Peb Hlis Ntuj hnub tim 18, xyoo 1833.
1–5, Tus Tswv muab cov yawm sij ntawm lub nceeg vaj cob rau Joseph Smith thiab los ntawm nws mus rau cov mej zeej; 6–7, Sidney Rigdon thiab Frederick G. Williams yuav tsum ua hauj lwm nyob hauv Thawj Pawg Thawj Tswj Hwm; 8–11, Yuav tsum tshaj tawm txoj moo zoo mus rau haiv neeg Ixayees, rau Lwm Haiv Neeg, thiab rau cov Neeg Yudais, kom txhua tus neeg hnov los ntawm nws yam lus; 12–18, Joseph Smith thiab nws ob tug pab cuam yuav tsum tsa lub Koom Txoos kom muaj chaw txawb chaw rau; 19–37, Tus Tswv ntuas lawv ib txhia kom taug kev ncaj thiab ua hauj lwm nyob hauv Nws lub nceeg vaj.
1 Tus Tswv hais li no, kuv hais tseeb tseeb rau koj kuv tus tub, kuv zam txim rau koj tej kev txhaum lawm, raws li koj tej lus thov, vim koj tej kev thov Vajtswv thiab koj cov kwv tij tej kev thov Vajtswv twb tau nce tuaj txog kuv lub pob ntseg.
2 Yog li ntawd, koj tau koob hmoov txij no mus tus uas tuav cov yawm sij ntawm lub nceeg vaj uas tau muab los rau koj; lub nceeg vaj uas tawm los mus rau zaum kawg.
3 Kuv hais tseeb rau koj tias, yeej yuav tsis muab cov yawm sij ntawm lub nceeg vaj no rho tawm ntawm koj mus hlo li, thaum koj tseem nyob hauv lub neej no, thiab nyob hauv lub neej yuav los;
4 Txawm li ntawd los, yuav muab tej kev tshwm sim dhau los ntawm koj rau lwm tus, muaj tseeb tiag, twb yuav muab rau lub koom txoos.
5 Thiab tag nrho cov uas txais Vajtswv tej kev tshwm sim, kom lawv ceev faj txoj kev lawv saib tej ntawd tsam lawv muab tej ntawd suav li ib yam tsis muaj nqis, thiab lawv thiaj raug txim, thiab dawm taw thiab ntog thaum tej cua daj cua dub los, thiab cua ntsawj, thiab tej nag los, thiab nplawm lawv lub tsev.
6 Thiab ntxiv, kuv hais tseeb rau koj ob tug kwv tij, Sidney Rigdon thiab Frederick G. Williams tias, kuv zam txim rau nkawd tej kev txhaum lawm thiab, thiab kuv suav nkawd sib txig nrog koj nyob ntawm kev tuav cov yawm sij ntawm lub nceeg vaj kawg no;
7 Thiab kuj yog los ntawm koj txoj kev tswj hwm tej yawm sij ntawm cov yaj saub lub koom haum kawm, uas kuv tau txib kom tsim;
8 Kom nkawd thiaj yuav ua zoo tag nrho thaum ua nkawd txoj hauj lwm qhuab qhia rau txoj kev cawm seej ntawm Xi-oos, thiab rau haiv neeg Ixayees, thiab rau Lwm Haiv Neeg, tag nrho cov uas yuav ntseeg;
9 Kom los ntawm koj txoj hauj lwm qhuab qhia nkawd yuav tau txais txoj lus, thiab los ntawm nkawd txoj hauj lwm qhuab qhia txoj lus yuav tawm mus thoob plaws lub ntiaj teb, mus rau Lwm Haiv Neeg ua ntej, ces tom qab ntawd, saib seb, thiab xyuas seb, nkawd yuav tig mus rau cov Neeg Yudais.
10 Ces tom qab ntawd yuav txog hnub uas tus Tswv txhais ncaj npab yuav tshwm sim los nrog kev muaj hwj chim yaum tej haiv neeg, tej haiv neeg tsis hwm Vajtswv, tsev neeg Yauxej, ntsig txog txoj moo zoo uas yuav cawm lawv.
11 Vim nyob rau hnub ntawd yuav muaj tias, txhua tus neeg yuav hnov qhov txhij txhua ntawm txoj moo zoo los ntawm nws yam lus hais, thiab los ntawm nws yam lus, los ntawm cov uas tau tsa los rau lub hwj chim no, los ntawm tus Nplij Siab tej lus qhia, kom thiaj xa txoj kev tshwm sim txog Yexus Khetos rau lawv.
12 Thiab nim no, kuv hais tseeb rau nej tias, kuv muab ib lo lus txib rau nej tias nej yuav tsum ua txoj hauj lwm qhuab qhia thiab nyob hauv pawg thawj tswj hwm mus ntxiv.
13 Thiab thaum nej txhais cov yaj saub tej lus tas lawm, txij ntawd mus nej yuav tsum tswj hwm tej xwm ntawm lub koom txoos thiab ntawm lub koom haum kawm;
14 Thiab tej lub sij hawm, raws li tus Nplij Siab yuav qhia, txais tej kev tshwm sim los nthuav tawm tej txuj ci uas neeg tsis paub txog lub nceeg vaj;
15 Thiab tsa tej pawg ntseeg kom muaj chaw txawb chaw rau, thiab xyaum thiab kawm, thiab kom paub tag nrho tej phau ntawv zoo, thiab tej yam lus, tej lus hais, thiab tej neeg.
16 Thiab qhov no yeej yog nej tej dej num thiab ntiag tug hauj lwm nyob hauv tag nrho nej lub neej, los mus tswj hwm kev sab laj, thiab tsa kom muaj chaw txawb chaw rau rau tag nrho tej xwm ntawm lub koom txoos thiab lub nceeg vaj no.
17 Tsis txhob txaj muag, thiab tsis txhob poob ntsej muag; tiam sis cia li raug qhuab ntuas txog tag nrho nej tej kev khav txiv thiab kev muab hlob, vim qhov no coj ib rab ntxiab los cuab nej tus ntsuj plig.
18 Cia li tsa kom nej tej tsev muaj chaw txawb chaw rau; ceev txoj kev tub nkeeg thiab kev tsis huv kom deb ntawm nej.
19 Nim no, kuv hais tseeb rau koj tias, npaj ib qho chaw, sai li sai tau, rau koj tus pab cuam thiab tus teev ntawv tsev neeg, uas twb yog Frederick G. Williams.
20 Thiab cia kuv tus tub qhe muaj hnub nyoog, uas yog Joseph Smith, tus Laus, nrog nws tsev neeg nyob twj ywm ntawm qhov chaw uas nim no nws nyob mus ntxiv; thiab tsis txhob muab qhov chaw ntawd muag kom txog thaum kuv lub qhov ncauj hais tso.
21 Thiab cia kuv tus pab cuam, uas twb yog Sidney Rigdon, nyob twj ywm ntawm qhov chaw uas nim no nws nyob kom txog thaum kuv lub qhov ncauj hais tso.
22 Thiab cia tus npisov mob siab nrhiav kom tau ib tug sawv cev, thiab kom nws yog ib tug txiv neej muaj nyiaj txiag cia—ib tug txiv neej ntawm Vajtswv thiab muaj txoj kev ntseeg muaj zog—
23 Kom nws thiaj yuav muaj peev xwm them tag txhua tus nqi; kom tus Tswv lub tsev rau khoom yuav tsis tau lub npe phem rau ntawm cov neeg txoj kev xav.
24 Cia li mob siab nrhiav, thov Vajtswv tas mus li, thiab cia li ntseeg, ces txhua yam yuav ua hauj lwm ua ke kom zoo rau nej, yog hais tias nej taug kev ncaj thiab nco ntsoov txoj kev khi lus uas nej ib leeg tau khi nrog ib leeg.
25 Cia nej tsev neeg kom tsawg, qhov tshwj xeeb yog kuv tus tub qhe muaj hnub nyoog Joseph Smith, tus Laus, hais txog cov uas tsis yog los ntawm nej tsev neeg;
26 Kom tej yam uas tau npaj rau nej lawm, kom muaj raws li kuv txoj hauj lwm, yuav tsis raug muab tshem ntawm nej mus thiab muab rau cov uas tsis tsim nyog—
27 Thiab ntshe yuav tab kaum nej txoj kev ua tej yam uas kuv tau txib nej.
28 Thiab ntxiv, kuv hais tseeb rau nej tias, yog kuv lub siab nyiam uas kuv tus ntxhais qhev Vienna Jaques yuav txais nyiaj them nws tej nuj nqis, thiab mus lawm pem thaj av Xi-oos;
29 Thiab tej nyiaj seem ces muab fij tseg rau kuv, thiab nws yuav tau nqi zog thaum txog lub sij hawm kuv pom zoo.
30 Kuv hais tseeb rau nej tias, kuv pom zoo hais tias nws yuav tsum mus lawm pem thaj av Xi-oos, thiab txais qub txeeg qub teg los ntawm tus npisov txhais tes;
31 Kom nws yuav mus nyob nrog kev kaj siab npaum li uas nws rau siab ntseeg, thiab tsis txhob tub nkeeg txij ntawd mus nyob hauv nws lub neej.
32 Thiab saib seb, kuv hais tseeb rau nej tias, nej yuav tsum sau lo lus txib no cia, thiab hais rau nej cov kwv tij nyob hauv Xi-oos, sib ntsib ntawm txoj kev hlub, hais tias kuv kuj tau hu nej los mus tswj hwm Xi-oos thaum txog lub sij hawm kuv pom zoo.
33 Yog li ntawd, cia lawv tsis txhob ua rau kuv nkees ntsig txog qhov no ntxiv.
34 Saib seb, kuv hais rau nej tias nej cov kwv tij hauv Xi-oos pib hloov siab lees txim, thiab cov tim tswv xyiv fab rau lawv.
35 Txawm li ntawd los, kuv twb tsis txaus siab rau ntau yam; thiab kuv twb tsis txaus siab rau kuv tus tub qhe William E. McLellin, thiab rau kuv tus tub qhe Sidney Gilbert; thiab tus npisov thiab, thiab lwm tus yuav tsum hloov siab lees txim rau ntau yam.
36 Tiam sis kuv hais tseeb rau nej tias, kuv, tus uas yog tus Tswv, yuav tawm tsam Xi-oos, thiab nrhiav kev yaum nws cov neeg muaj hwj chim, thiab qhuab ntuas Xi-oos kom txog thaum nws kov yeej thiab kuv pom tias nws huv lawm.
37 Vim Xi-oos yuav tsis raug muab tshem tawm ntawm nws qhov chaw mus. Kuv, tus uas yog tus Tswv, tau hais li. Amees.