Tshooj 98
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Yim Hli Ntuj hnub tim 6, xyoo 1833. Txoj kev tshwm sim no los vim yog txoj kev tsim txom Haiv Neeg Ntseeg hauv Missouri. Qhov uas cov mej zeej ntawm lub Koom Txoos coob zuj zus tuaj nyob hauv Missouri ua rau lwm tus uas tau tuaj nyob hauv qhov chaw ntawd xav tsis zoo txog Tsoom Haiv Neeg Ntseeg lub hwj huam ntawm kev kav teb kav chaw thiab kev kav nyiaj txiag, thiab tej yam sib txawv ntawm kab lis kev cai thiab kev teev ntuj. Thaum lub Xya Hli Ntuj xyoo 1833, ib pawg neeg phem ua rau lub koom Txoos tej teej tug puas tsuaj, pleev cov kua nplaum dub thiab plaub noog rau ob tug mej zeej ntawm lub Koom Txoos, thiab hais kom Tsoom Haiv Neeg Ntseeg khiav tawm ntawm Ciaj Ciam Av Jackson mus. Txawm hais tias ib co xov xwm hais txog cov teeb meem hauv Missouri tau nrov mus txog tus Yaj Saub hauv Kirtland (cuaj pua mais deb), thaum ntawd ntshe tsuas yog los ntawm kev tshwm sim nkaus xwb uas nws thiaj paub hais tias qhov teeb meem no loj npaum li cas.
1–3, Haiv Neeg Ntseeg tej kev txom nyem yuav ua rau lawv tau qhov zoo; 4–8, Haiv Neeg Ntseeg yuav tsum txhawb nqa txoj kev cai txhooj lij choj ntawm lub teb chaws; 9–10, Tsim nyog txhawb cov neeg uas muaj siab ncaj, muaj tswv yim, thiab cov neeg zoo mus ua hauj lwm hauv tsoom fwv; 11–15, Cov uas muab lawv txoj sia pub rau tus Tswv lub hom phiaj yuav tau txoj sia nyob mus ib txhis; 16–18, Cia li xyeej kev ua rog thiab tshaj tawm txoj kev thaj yeeb; 19–22, Haiv Neeg Ntseeg hauv Kirtland raug qhuab ntuas thiab raug txib kom hloov siab lees txim; 23–32, Tus Tswv qhia txog Nws tej kev cai hais txog tej kev tsim txom thiab kev txom nyem uas muab yuam rau Nws cov neeg; 33–38, Tsuas yog thaum tus Tswv txib xwb thiaj tsim nyog ua rog; 39–48, Haiv Neeg Ntseeg yuav tsum zam txim rau lawv cov yeeb ncuab, cov uas kuj yuav dim ntawm tus Tswv txoj kev pauj yog hais tias lawv hloov siab lees txim.
1 Kuv hais tseeb rau nej kuv cov phooj ywg, tsis txhob ntshai, nej cia li txais kev nplij siab; muaj tseeb tiag, xyiv fab tas mus li, thiab ua tsaug rau txhua yam;
2 Ua siab ntev loo tos tus Tswv, vim nej tej lus thov Vajtswv tau nkag mus rau hauv tus Tswv ntawm Xanpa-aus ob lub pob ntseg lawm, thiab twb raug muab kaw cia nrog lub cim thiab zaj lus tim khawv no—tus Tswv tau cog lus thiab tshaj tawm hais tias yeej yuav pub tej ntawd rau nej.
3 Yog li ntawd, nws muab lo lus cog tseg no rau nej, nrog ib txoj kev khi lus tsis txawj hloov hais tias yeej yuav muaj tej ntawd; thiab txhua yam kev tsim txom uas nej tau raug yuav koom ua ke los pab nej, thiab rau lub yeeb koob ntawm kuv lub npe, tus Tswv hais li.
4 Thiab nim no, kuv hais tseeb rau nej ntsig txog tej kev cai ntawm lub teb chaws, yog kuv lub siab nyiam uas kuv cov neeg yuav coj raws li txhua yam uas kuv txib lawv.
5 Thiab txoj kev cai ntawm lub teb chaws uas yog raws li txhooj lij choj, uas txhawb txoj ntsiab cai ntawm kev ywj pheej kom muaj tej cai thiab tej sam xeeb, yog rau tib neeg sawv daws, thiab kuv pom tias yog kev coj ncaj ncees.
6 Yog li ntawd, kuv, tus uas yog tus Tswv, pom zoo rau nej, thiab nej cov kwv tij ntawm lub koom txoos, kom txhawb nqa txoj kev cai txhooj lij choj ntawm lub teb chaws;
7 Thiab hais txog tib neeg txoj kev cai, txhua yam uas tshaj los yog tsawg dua qhov no, ces yog los ntawm kev phem los.
8 Kuv, tus Tswv uas yog Vajtswv, ua rau nej ywj pheej, yog li ntawd nej muaj kev ywj pheej tiag tiag; thiab txoj kev cai kuj ua rau nej ywj pheej thiab.
9 Txawm li ntawd los, thaum cov phem kav ces cov neeg quaj ntsuag.
10 Yog li ntawd, yuav tsum mob siab nrhiav cov neeg siab ncaj thiab cov neeg muaj tswv yim, thiab nej yuav tsum txhawb nqa cov neeg zoo thiab cov neeg muaj tswv yim; yog tsis li ces txhua yam uas tsawg dua tej no yog los ntawm kev phem los.
11 Thiab kuv muab ib lo lus txib rau nej tias, nej yuav tsum tso tag nrho tej kev phem pov tseg thiab muab siab npuab txhua yam zoo, kom nej yuav ua neej raws li txhua lo lus uas tawm hauv Vajtswv lub qhov ncauj los.
12 Vim rau cov uas rau siab ntseeg nws yuav muab ib nqe lus ntxiv rau ib nqe lus, ib ntsiab cai ntxiv rau ib ntsiab cai; thiab kuv yuav sim nej los ntawm tej no.
13 Thiab yog tus uas muab nws txoj sia pub rau kuv lub hom phiaj, rau kuv lub npe, tus ntawd yuav nrhiav tau txoj sia dua, uas twb yog txoj sia nyob mus ib txhis.
14 Yog li ntawd, tsis txhob ntshai nej cov yeeb ncuab, vim kuv tau txiav txim nyob hauv kuv lub siab, tus Tswv hais tias, kuv yuav ua txhua yam sim nej, saib nej puas yuav ua raws li kuv txoj kev khi lus, kom txog thaum tuag, kom tus Tswv yuav pom hais tias nej yog neeg tsim nyog.
15 Vim yog nej tsis ua raws li kuv txoj kev khi lus ces nej tsis tsim nyog rau kuv.
16 Yog li ntawd, cia li xyeej kev ua rog thiab tshaj tawm kev thaj yeeb, thiab rau siab nrhiav kev kom muab cov me nyuam lub siab tig mus rau lawv cov yawg koob, thiab cov yawg koob lub siab tig mus rau cov me nyuam;
17 Thiab ntxiv, cov Neeg Yudais lub siab mus rau cov yaj saub, thiab cov yaj saub mus rau cov Neeg Yudais; tsis li ces kuv yuav los thiab nplawm tag nrho neeg ntiaj teb nrog ib txoj kev foom tsis zoo, thiab txhua tus tib neeg raug kub hnyiab rau kuv pom.
18 Nej tsis txhob nyuaj siab; vim nyob saum kuv Txiv lub tsev muaj ntau qhov chaw nyob, thiab kuv tau npaj ib qho chaw rau nej; thiab qhov uas kuv Txiv thiab kuv nyob, nej yuav nyob qhov ntawd thiab.
19 Saib seb, kuv, tus uas yog tus Tswv, twb tsis txaus siab rau ntau tus uas nyob hauv pawg ntseeg hauv Kirtland;
20 Vim lawv tsis muab lawv tej kev txhaum tso pov tseg, thiab lawv tej kev phem, lawv lub siab muab hlob, thiab lawv txoj kev ntshaw luag tug, thiab tag nrho lawv tej yam uas ntxim ntxub, thiab tsis coj raws li tej lus tswv yim thiab txoj sia nyob mus ib txhis uas kuv tau muab rau lawv.
21 Kuv hais tseeb rau nej tias, kuv, tus uas yog tus Tswv, yuav qhuab ntuas lawv thiab yuav ua txhua yam uas kuv xav ua, yog hais tias lawv tsis hloov siab lees txim thiab coj raws li txhua yam uas kuv tau hais rau lawv.
22 Thiab kuv hais ntxiv rau nej tias, yog hais tias nej ua tib zoo ua txhua yam uas kuv txib nej, kuv, tus uas yog tus Tswv, yuav muab tag nrho kev npau taws thiab kev chim siab tig ntawm nej mus, thiab tej qhov rooj ntawm ntuj txiag teb tsaus yuav kov tsis yeej nej.
23 Nim no, kuv hais lus rau nej ntsig txog nej tsev neeg—yog hais tias neeg ntaus nej, los yog nej tsev neeg, ib zaug, thiab nej ua siab ntev nyiaj thiab tsis cem lawv, thiab tsis nrhiav kev ua pauj, nej yuav tau nqi zog;
24 Tiam sis yog hais tias nej tsis ua siab ntev nyiaj, ces yuav muab suav rau nej ib yam li tau muab luj ntsuas ncaj rau nej lawm.
25 Thiab ntxiv, yog hais tias nej tus yeeb ncuab ntaus nej zaum ob, thiab nej tsis cem nej tus yeeb ncuab, thiab ua siab ntev nyiaj, nej nqi zog yuav yog ib puas npaug.
26 Thiab ntxiv, yog hais tias nws ntaus nej zaum peb, thiab nej ua siab ntev nyiaj, nej nqi zog yuav ntau ntxiv plaub npaug los rau nej;
27 Thiab peb zaug no yuav ua tim khawv rau nej tus yeeb ncuab yog hais tias nws tsis hloov siab lees txim, thiab yuav tsis muab rho tawm mus.
28 Thiab nim no, kuv hais tseeb rau nej tias, yog tus yeeb ncuab ntawd dim kuv txoj kev ua pauj, kom nws tsis raug coj los txiav txim ntawm kuv xub ntiag, yog li ntawd nej yuav ua zoo xyuas kom nej ceeb toom nws los ntawm kuv lub npe, kom nws tsis txhob tuaj tawm tsam nej ntxiv, thiab nej tsev neeg, thiab cov me nyuam ntawm nej cov me nyuam mus txog tiam neeg thib peb thiab thib plaub.
29 Thiab tom qab ntawd, yog nws tuaj tawm tsam nej los yog nej cov me nyuam, los sis cov me nyuam ntawm nej cov me nyuam mus txog tiam neeg thib peb thiab thib plaub, kuv twb tau muab nej tus yeeb ncuab coj los tso rau hauv nej txhais tes;
30 Thiab tom qab ntawd yog hais tias nej tseg nws, nej yuav tau nqi zog rau nej txoj kev ncaj ncees; thiab kuj rau nej cov me nyuam thiab cov me nyuam ntawm nej cov me nyuam mus txog tiam neeg thib peb thiab thib plaub.
31 Txawm li ntawd los, nej tus yeeb ncuab twb nyob hauv nej txhais tes; thiab yog hais tias nej muab nqi zog rau nws raws li nws tej hauj lwm ces nej twb tsis muaj txim; yog hais tias nws tau nrhiav kev tua nej, thiab nws ua rau nej txoj sia plhom sij, nej tus yeeb ncuab twb nyob hauv nej txhais tes lawm thiab nej twb tsis muaj txim.
32 Saib seb, qhov no yog txoj kev cai kuv tau muab rau kuv tus tub qhe Nifais, thiab nej cov yawg koob, Yauxej, thiab Yakhauj, thiab Ixaj, thiab Anplaham, thiab tag nrho kuv cov yaj saub thiab thwj tim txheej puag thaud.
33 Thiab ntxiv, qhov no yog txoj kev cai uas kuv muab rau kuv haiv neeg puag thaud, hais tias kom lawv tsis txhob mus ua rog tawm tsam ib haiv neeg twg, ib xeem neeg twg, ib yam lus twg, los sis ib yam neeg twg li, tsuas yog thaum kuv, tus uas yog tus Tswv, txib lawv xwb.
34 Thiab yog hais tias muaj ib haiv neeg twg, yam lus twg, los yog yam neeg twg tshaj tawm tias yuav ua rog tawm tsam lawv, lawv yuav tsum xub tsa ib tug chij ntawm kev thaj yeeb rau yam neeg ntawd, haiv neeg ntawd, los sis yam lus ntawd tso;
35 Thiab yog hais tias haiv neeg ntawd tsis txais txoj kev tiam ntawm kev thaj yeeb, zaum thib ob thiab zaum thib peb los tsis txais, ces tsim nyog kom lawv nqa tej yam ua tim khawv no rau tus Tswv;
36 Ces, kuv, tus uas yog tus Tswv, yuav muab ib lo lus txib rau lawv, thiab suav tias qhov uas lawv tawm mus ua rog tawm tsam haiv neeg ntawd, yam lus ntawd, los yog yam neeg ntawd yeej tsis muaj txim.
37 Thiab kuv, tus uas yog tus Tswv, yuav ntaus lawv tej pluav rog, thiab lawv cov me nyuam tej pluav rog, thiab cov me nyuam ntawm lawv cov me nyuam tej, kom txog thaum lawv tau ua pauj tag nrho lawv cov yeeb ncuab, mus rau tiam neeg thib peb thiab thib plaub.
38 Saib seb, qhov no yog ib tug yam ntxwv rau sawv daws tag nrho, tus Tswv nej tus Vajtswv hais li, kom kuv thiaj pom tias lawv twb hloov kom tsis muaj txim.
39 Thiab ntxiv, kuv hais tseeb rau nej tias, yog tom qab nej tus yeeb ncuab tuaj tawm tsam nej thawj zaug, es nws hloov siab lees txim thiab tuaj cuag nej thiab thov nej zam txim, nej yuav tsum zam txim rau nws, thiab yuav tsum tsis txhob muab tej no suav tias yog kev ua tim khawv ntxiv los tawm tsam nej tus yeeb ncuab—
40 Thiab ua li no kom txog zaum ob thiab zaum peb; thiab ntau zaus npaum li uas nej tus yeeb ncuab hloov siab lees txim rau tej kev txhaum uas nws tau ua txhaum rau nej, nej yuav tsum zam txim rau nws, kom txog xya zaus xya caum.
41 Thiab yog hais tias nws ua txhaum rau nej tiam sis tsis hloov siab lees txim thawj zaug, txawm li ntawd los nej yuav tsum zam txim rau nws.
42 Thiab yog hais tias nws ua txhaum rau nej zaum ob, thiab tsis hloov siab lees txim, txawm li ntawd los nej yuav tsum zam txim rau nws.
43 Thiab yog hais tias nws ua txhaum rau nej zaum peb, thiab tsis hloov siab lees txim, nej kuj yuav tsum zam txim rau nws thiab.
44 Tiam sis yog hais tias nws ua txhaum rau nej zaum plaub nej tsis txhob zam txim rau nws, tiam sis yuav tsum coj cov pov thawj no mus rau tus Tswv pom; thiab yuav tsis muab tej no rho tawm kom txog thaum nws hloov siab lees txim thiab muab nqi zog rau nej plaub npaug ntawm txhua yam uas nws tau ua txhaum rau nej tso.
45 Thiab yog hais tias nws ua li no, nej yuav tsum zam txim rau nws kom tas nej lub siab; thiab yog hais tias nws tsis ua li no, kuv, tus uas yog tus Tswv, mam ua pauj nej tus yeeb ncuab rau nej ib puas npaug;
46 Thiab rau nws cov me nyuam, thiab rau cov me nyuam ntawm nws cov me nyuam tag nrho cov uas ntxub kuv, mus txog tiam neeg thib peb thiab thib plaub.
47 Thiab yog hais tias cov me nyuam hloov siab lees txim, los yog cov me nyuam ntawm nws cov me nyuam, thiab tig los rau tus Tswv lawv tus Vajtswv, kom kawg lawv lub dag lub zog thiab lub siab, thiab pauj plaub npaug rau tag nrho lawv tej kev ua txhaum uas lawv tau ua txhaum, los sis tej uas lawv txiv tau ua txhaum, los sis lawv yawg, tom qab ntawd ces nej yuav tsum muab nej txoj kev npau taws tig mus;
48 Thiab kev ua pauj yuav tsis muaj los ntxiv rau lawv lawm, tus Tswv nej tus Vajtswv hais li, thiab tsis txhob muab lawv tej kev txhaum coj los ua tim khawv nkaug lawv ib zaug ntxiv rau ntawm tus Tswv. Amees.