5. Li jun raqal re li E.U.A. wan wi’ Missouri, Illinois, ut Iowa

Independence Eetalinb’il jo’ xch’oolil Sion (chi’ilmanq Tz. ut S. 57:3). Ki’osob’tesiman jun xna’aj li santil ochoch sa’ 3 Agosto 1831. Eb’ laj santil paab’anel ke’alinasiik chaq sa’ li Condado Jackson sa’ 1833.

Nima’ Fishing Laj Jose Smith ut lix Teepal Sion ke’b’eek chalen chaq Kirtland, Ohio, toj Missouri sa’ 1834, re xk’ojob’ankil wi’chik eb’ laj santil paab’anel aj Condado Jackson sa’ lix ch’och’eb’. Kik’utb’esiman Tz. ut S. 105 chire li nima’ a’in.

Far West Arin kiwan lix k’ojameb’ laj Mormon li q’axal nim sa’ Missouri. Ki’osob’tesiman jun na’ajej choq’ re jun santil ochoch arin (chi’ilmanq Tz. ut S. 115). Arin sa’ 8 Julio 1838, lix Molameb’ li Kab’laju chi Apostol ke’xk’ul jun xb’oqb’aleb’ chalen chaq rik’in li Qaawa’ re te’xb’aanu jun taqlanb’il k’anjel sa’ li ch’och’ Gran Britania (chi’ilmanq Tz. ut S. 118).

Adan-ondi-Ahman Li Qaawa’ kixye naq li na’ajej a’in sa’ xnim li saq’e sa’ Missouri a’an li na’ajej taa’uxq wi’ li nimla ch’utlaak naq taachalq li Jesukristo chixk’ulb’al laj Adan ut eb’ li ralal xk’ajol li tiikeb’ xch’ool (chi’ilmanq Tz. ut S. 78:15; 107:53–57; 116).

Li tz’alam sa’ Liberty Laj Jose Smith ut jalaneb’ chik ke’tz’ape’ sa’ tz’alam chalen Diciembre 1838 toj Abril 1839 chi maak’a’eb’ xmaak. Sa’ xyi li ch’a’ajkilal li yoo chixnumsinkil li Iglees, laj Jose kitijok chiru li Qaawa’ re xk’ulb’al xb’eresinkil, ut kixk’ul Tz. ut S. 121–123.

Nauvoo Li na’ajej a’in, yiib’anb’il chire li Nima’ Mississippi, kiwan choq’ ch’utub’aj-ib’ na’ajej choq’ reheb’ laj santil paab’anel chalen 1839 toj 1846. Arin kikab’laman jun santil ochoch, ut kitikla xb’aanunkileb’ li k’ojob’anb’il k’anjel jo’ li kub’iha’ choq’ reheb’ li kamenaq, li tiqib’aak, ut xtz’apb’aleb’ li sumal sa’ junajil. Arin kik’uub’aman li Komonil re Tenq’ank sa’ 1842. Wankeb’ li k’utb’esinb’il na’leb’ li ke’k’ule’ aran, jo’ Tz. ut S. 124–129.

Carthage Arin laj Jose Smith ut laj Hyrum Smith li ras ke’kamsiik sa’ xk’ab’a’ xpaab’aaleb’ sa’ 27 Junio 1844 (chi’ilmanq Tz. ut S. 135).

Winter Quarters Li xnimal reheb’ li na’ajej ke’kana wi’ laj santil paab’anel naq yookeb’ chi xik sa’ li ru taq’a Lago Salado (1846–1848). Li teep re Israel kik’uub’aman choq’ re lix b’eenikeb’ sa’ rokeb’aal li saq’e (chi’ilmanq Tz. ut S. 136).

Council Bluffs (Kanesville) Li Xb’eenil Awa’b’ejil ke’k’ulub’aak arin sa’ 27 Diciembre 1847, rik’in laj Brigham Young jo’ Awa’b’ej.