ປຈສ, 2 ເປໂຕ 3:3–13. ປຽບທຽບໃສ່ກັບ 2 ເປໂຕ 3:3–13
ໃນຍຸກສຸດທ້າຍ, ຜູ້ຄົນຢ່າງຫລວງຫລາຍຈະປະຕິເສດອົງພຣະເຢຊູຄຣິດເຈົ້າ. ເມື່ອພຣະອົງສະເດັດມາ, ໄພພິບັດທາງທຳມະຊາດຈະເກີດຂຶ້ນ. ຖ້າຫາກເຮົາອົດທົນໃນຄວາມຊອບທຳ, ເຮົາຈະໄດ້ຮັບແຜ່ນດິນໂລກໃໝ່.
3 ກ່ອນອື່ນຈົ່ງຮູ້ຂໍ້ນີ້, ໃນຍຸກສຸດທ້າຍ ຈະມີຄົນເຍາະເຍີ້ຍ, ມາເວົ້າສຽດສີຕາມໃຈປາດຖະໜາຂອງຕົນ.
4 ປະຕິເສດອົງພຣະເຢຊູຄຣິດເຈົ້າ, ແລະ ຖາມວ່າ, ຄຳທີ່ສັນຍາໄວ້ວ່າ ພຣະອົງຈະສະເດັດມານັ້ນຢູ່ໃສ? ເພາະນັບແຕ່ບັນພະບຸລຸດລ່ວງລັບໄປແລ້ວ, ທຸກສິ່ງທັງປວງ ຕ້ອງເປັນຢູ່ເໝືອນເດີມ, ແລະ ດຳເນີນຕໍ່ໄປ ດັ່ງທີ່ເປັນມາ ນັບຕັ້ງແຕ່ການເລີ່ມຕົ້ນຂອງການສ້າງໂລກ.
5 ເພາະວ່າພວກເຂົາເຮັດຄືລືມຂໍ້ນີ້ເສຍ, ວ່າຟ້າສະຫວັນໄດ້ມີຢູ່ຕັ້ງແຕ່ບູຮານ, ແລະ ແຜ່ນດິນໂລກໄດ້ເກີດຂຶ້ນມາຈາກນ້ຳ ແລະ ດ້ວຍທາງນ້ຳ, ໄດ້ຖືກສ້າງຂຶ້ນດ້ວຍພຣະຄຳຂອງພຣະເຈົ້າ;
6 ແລະ ດ້ວຍພຣະຄຳຂອງພຣະເຈົ້າ, ໂລກໃນສະໄໝບູຮານ ຈຶ່ງຖືກທຳລາຍດ້ວຍນ້ຳຖ້ວມ;
7 ແຕ່ຟ້າສະຫວັນ ແລະ ແຜ່ນດິນໂລກ ທີ່ມີຢູ່ໃນປະຈຸບັນນີ້, ຖືກຮັກສາໄວ້ ດ້ວຍພຣະຄຳດຽວກັນນັ້ນ, ສຳລັບໃຫ້ໄຟເຜົາຜານເສຍ, ຖືກຮັກສາໄວ້ຈົນເຖິງວັນພິພາກສາ ແລະ ວັນພິນາດຂອງບັນດາຄົນອະທຳ.
8 ແຕ່ພວກທີ່ຮັກເອີຍ ກ່ຽວກັບການສະເດັດມາຂອງພຣະຜູ້ເປັນເຈົ້າ, ເຮົາບໍ່ຢາກໃຫ້ພວກເຈົ້າລືມຂໍ້ນີ້ວ່າ ຕໍ່ພຣະຜູ້ເປັນເຈົ້າແລ້ວ ວັນດຽວກໍເໝືອນກັບພັນປີ, ແລະ ພັນປີກໍເໝືອນກັບວັນດຽວ.
9 ພຣະຜູ້ເປັນເຈົ້າບໍ່ໄດ້ເສີຍຊ້າ ທີ່ຈະເຮັດໃຫ້ຄຳສັນຍາ ແລະ ການສະເດັດມາຂອງພຣະອົງສຳເລັດ, ເໝືອນດັ່ງທີ່ບາງຄົນນັ້ນຄິດວ່າຊ້າ; ແຕ່ພຣະອົງອົດທົນດົນນານກັບເຮົາ, ບໍ່ປະສົງໃຫ້ຜູ້ໃດຜູ້ໜຶ່ງຕ້ອງຈິບຫາຍໄປ, ແຕ່ປາດຖະໜາໃຫ້ຄົນທັງປວງມາສູ່ການກັບໃຈ.
10 ແຕ່ວັນຂອງພຣະຜູ້ເປັນເຈົ້າຈະມາເຖິງເໝືອນດັ່ງຂະໂມຍມາ, ໃນວັນນັ້ນ ຟ້າສະຫວັນຈະຫວັ່ນໄຫວ, ແລະ ແຜ່ນດິນໂລກຈະສັ່ນສະເທືອນ, ແລະ ພູເຂົາຈະລະລາຍ, ແລະ ສະຫລາຍໄປດ້ວຍສຽງດັງກ້ອງສະໜັ່ນ, ແລະ ໂລກທາດຈະເຕັມໄປດ້ວຍໄຟ; ແລະ ແຜ່ນດິນໂລກກໍຈະເຕັມໄປດ້ວຍໄຟຄືກັນ, ແລະ ວຽກງານທີ່ເສື່ອມເສຍ ຊຶ່ງຢູ່ໃນນັ້ນ ຈະຖືກເຜົາໄໝ້.
11 ຖ້າຫາກ ໃນເມື່ອທຸກສິ່ງຈະຖືກທຳລາຍໄປຢ່າງນີ້, ພວກເຈົ້າຄວນຈະເປັນຄົນຢ່າງໃດ ໃນການປະຕິບັດ ແລະ ໃນການນັບຖືພຣະເຈົ້າ,
12 ຈົ່ງຄອຍຖ້າ, ແລະ ຕຽມສຳລັບວັນແຫ່ງການສະເດັດມາຂອງພຣະຜູ້ເປັນເຈົ້າ ຊຶ່ງໃນນັ້ນ ສິ່ງທີ່ເສື່ອມເສຍຂອງຟ້າສະຫວັນຈະຖືກເຜົາໄໝ້, ຈະສະຫລາຍໄປ, ແລະ ພູເຂົາຈະລະລາຍດ້ວຍໄຟ?
13 ເຖິງຢ່າງໃດກໍຕາມ, ຖ້າເຮົາຈະອົດທົນ, ເຮົາຈະຖືກຮັກສາໄວ້ ຕາມຄຳສັນຍາຂອງພຣະອົງ. ແລະ ເຮົາຈະຄອຍຖ້າຟ້າສະຫວັນໃໝ່, ແລະ ແຜ່ນດິນໃໝ່ ຊຶ່ງຄວາມຊອບທຳຈະຕັ້ງຢູ່ທີ່ນັ້ນ.